Сӗнтӗрвӑрри округӗнчи Шуршӑлти Космонавтика музейӗ виҫӗ эрне ӗнтӗ ӗҫлемест. Экспозицие кӳршӗ Чӑвашпотребсоюз ҫуртне куҫараҫҫӗ. Куҫарса пӗтерсен мемориал комплексӗ ӗҫлесе кайӗ, хӑнасене йышӑнӗ.

Ку реконструкципе ҫыхӑннӑ. Хальхи вӑхӑтра территорие демонтаж тата строительство ӗҫӗсем валли хатӗрлеҫҫӗ.

Планпа килӗшӳллӗн, реконструкци 2027 ҫул тӗлне вӗҫленӗ. Кун хыҫҫӑн вӑл музей мар, планетариллӗ тата обсерваториллӗ вӗренӳпе музей комплексӗ пулӗ.

"Контактри" сӑн

Елчӗкре пурӑнакан Валерий Изратов килӗ умӗнче Тӑван ҫӗршывӑн Аслӑ вӑрҫине, унта хутшӑннӑ ашшӗ-амӑшне халалласа музей йӗркеленӗ. Пӗтӗм экспозицие тенӗ пек вӑл районта пуҫтарнӑ, укҫа ытларах стройматериалсем туянса тӑкакланнӑ.

Нумайӑшӗ ӑна тӳлевсӗрех пулӑшнӑ. Ҫапла унӑн 50 пин тенкӗ кӑна тӑкакланнӑ.

Музея Чӑваш Енри кӑна мар, Хусанти, Екатеринбургри, Мускаври ҫынсем те килсе кураҫҫӗ. Шкулсенчен, ача пахчисенчен шӑпӑрлансене илсе килеҫҫӗ. Музей – тӳлевсӗр. Вӑл Елчӗкре Октябрь тата Андреев урамӗсем хӗресленнӗ ҫӗрте вырнаҫнӑ.

Палӑртмалла: Валерий Изратов культура ҫурчӗн директорӗ пулнӑ. Халӗ вӑл – 65 ҫулта, тивӗҫлӗ канура.

Пӗррӗмӗш каналпа пыракан «Непутевые заметки с Дмитрием Крыловым» кӑларӑмра Чӑваш Ен пирки кӑтартӗҫ

Нумаях пулмасть ӳкерӳ ушкӑнӗ Етӗрне округӗнчи Тури Ачакри 19-мӗш ӗмӗрти чӑваш хресченӗн музейӗнче пулнӑ. Федераци каналӗн журналисчӗсене «Вирьял» халӑх ансамбль, музей ӗҫченӗсемпе шкул ачисем пирӗн халӑхӑн йӑли-йӗркипе паллаштарнӑ.

Хӑнасем Сӑр хӗрринче те пулнӑ, вӑрҫӑ ҫулӗсенче унта хӳтӗлев чикки тунӑ вырӑнсене курнӑ. Унтан Етӗрнери ӳнерпе тавра пӗлӳ тата СССР халӑх артисчӗ Н.Д.Мордвинов ячӗллӗ музейсенче кадрсем ӳкернӗ.

Кӑларӑма курмасӑр ан юлӑр! Вӑл ҫӗртмен 8-мӗшӗнче тата 15-мӗшӗнче эфира тухӗ.

Ҫак кунсенче пирӗн ҫӗршыв Аслӑ Ҫӗнтерӗве тунӑранпа 80 ҫул ҫитнине кӗтсе илме хатӗрленет. Шупашкарта та тӗрле шайри тӳре-шара ветерансем патне ҫитсе вӗсене уявпа саламлать, парнепе хавхалантарать.

Хӗрлӗ Чутай районӗнчи Хыркасси ялӗнче 1926 ҫулхи пуш уйӑхӗнче ҫуралнӑ, халӗ Шупашкрата пурӑнакан Иван Петрова та саламланӑ. Ун патне хулари халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем пырса ҫитнӗ.

Сӑмах май каласан, унччен Иван Афанасьевич, ытти ветеран евӗрех, Ҫӗнтерӗве халалласа республикӑра пӗр хутчен паракан 20 пин тенкӗ укҫана тивӗҫнӗ тата федераци шайӗнчи 80 пин тенке.

glava.cap.ru сӑнӳкерчӗкӗ

Чӑваш Енӗн Правительствин тунтикунсерен иртекен ларӑвӗнче хальхинче кадрсене хатӗрлес ыйтӑва сӳтсе явнӑ. Специалистсене 2026 ҫулта тӗллевлӗ вӗрентме заказсене ҫу уйӑхӗн 14-мӗшӗччен тӑратмалла иккен. Кун пирки республика Элтеперӗ Олег Николаев палӑртса хӑварнӑ. Вӑл сывлӑх сыхлавӗпе вӗрентӗве тата экономикӑн тӗрлӗ секторӗнче кадр кадрсем пирки паянах шухӑшламаллине аса илтерсе хӑварнӑ.

Ака уйӑхӗн 28-мӗшӗ тӗлне 98 организацирен 253 тӗллевлӗ вырӑн пирки заявка хатӗрленӗ. Верену сферинчисем уйрӑмах хастар пулнӑ (74 организаци, 148 вырӑн), промышленность — (8 организаци, 53 вырӑн), ял хуҫӑлӑхӗ (10 организаци, 28 вырӑн), сывлӑх сыхлавӗ (2 организаци, 19 вырӑн).

«Контактри» сӑн

Шупашкарта «Чӑваш Ен мисне» суйланӑ. Кӑҫал 30-мӗш хут иртнӗ конкурсра тӗп хулари 4-мӗш гимназине ӑс пухакан Влада Комарова ҫӗнтернӗ.

Ӑна коронӑна пӗлтӗр «Чӑваш Ен мисӗ» ята тивӗҫнӗ Алла Кадеева панӑ. Конкурса курма тата унта хутшӑнакансене хавхалантарма 2023 ҫулти «Чӑваш Ен мисӗ» тата пӗлтӗр «Тӗнче уҫлӑхӗн мисӗ» ята тивӗҫнӗ Валентина Алексеева та килнӗ.

«Контактри» сӑн

Патӑрьелте Вӑрҫӑ ачисене халалланӑ палӑк уҫӑлнӑ. Вӑл «Юбилейный» паркра вырнаҫнӑ.

Тӑван ҫӗршывӑн Аслӑ вӑрҫи пуҫлансан ҫав ҫулсенче ҫуралнӑ ачасен ачалӑхӗ пӗтнӗ. Вӗсем те аслисемпе тан тӑрса колхозра ӗҫленӗ, Ҫӗнтерӗве ҫывхартма пулӑшнӑ.

Патӑрьелти палӑка савӑнӑҫлӑ лару-тӑрура уҫнӑ, унта вӑрҫӑ ачисене чӗннӗ.

ВКонтакте сайтри сӑн

Чӑваш Енри ЗАГС упрвленийӗ Тӑван ҫӗршывӑн Аслӑ вӑрҫи вӑхӑтӗнче ачасене ытларах мӗнле ят хунине тишкернӗ.

1941-1945 ҫулсенче пӗтӗмпе 159,023 ача ҫуралнӑ. Вӗсен йышӗнчен 80,581-шӗ – арҫын ачасем. 78,442-шӗ – хӗрачасем.

Арҫын ачасене ытларах Николай ят хунӑ. Топ-10 йыша ҫавӑн пекех Иван, Владимир, Юрий, Александр, Анатолий, Пётр, Василий, Михаил, Валерий тата Геннадий кӗнӗ. Хӗрачасене ытларах Нина ят панӑ. Валентина, Мария, Зоя, Галина, Лидия, Анна, Раиса, Зинаида, Тамара тата Ольга ят хуракансем те нумай пулнӑ.

www.cap.ru сӑнӳкерчӗкӗ

Элӗк, Красноармейски тата Пӑрачкав округӗсенче пӗлтӗр пушар чаҫӗсен виҫӗ ҫӗнӗ постне йӗркеленӗ. Кӑҫал Ҫӗрпӳ округӗнчи Чурачӑк салинче пушар чаҫӗн тата тепӗр уйрӑм посчӗ ӗҫлеме пуҫланӑ. Кун пирки Чӑваш Ен Элтеперӗ Олег Николаев пушар хуралӗн ӗҫченӗсене професси уявӗпе саламлана май палӑртса хӑварнӑ.

«Эпир ҫакӑнпа кӑна чарӑнса тӑма шутламастпӑр, ҫитес виҫӗ ҫулта пушарпа кӗрешекен службӑн тата 8 подразделенине, 42 ирӗклӗ пушар командине йӗркелеме, ҫавӑн пекех республикӑри муниципалитетсенче 7 ҫӗнӗ пушар деповӗ тума палӑртатпӑр», — хыпарланӑ Элтепер.

dp.ru сайтри сӑн

Етӗрне округӗнчи Чаканар пурӑнакан 44 ҫулти арҫын 2019 ҫулта Мари Элте пурнӑҫра йывӑр лару-тӑрӑва лекнӗ арҫынпа паллашнӑ. 2020 ҫулта вӑл ӑна хӑйӗн хуҫалӑхӗнче ӗҫлеме сӗннӗ. Лешӗ килӗшнӗ.

Вӑл ӑна хӑйӗн патне илсе килнӗ, пурӑнма юрӑхсӑр ҫӗрте вырнаҫтарнӑ та кашни кун стройка, ҫӗр, ытти ӗҫпе ӗҫлеттернӗ. Анчах укҫине тӳлемен, йӗркеллӗ апат ҫитермен. Ӗҫлеме килӗшмесен вара хӗненӗ.

2023 ҫулхи ҫу уйӑхӗнче вӑл тепӗр арҫынна илсе килнӗ, Шупашкарта стройкӑна вырнаҫтарма шантарнӑ. Анчах ӑна та леш арҫын пек тӳлевсӗр ӗҫлеттернӗ, выльӑх пӑхтарнӑ.

Пӗлтӗр ҫу уйӑхӗнче ҫав икӗ арҫын тарма пултарнӑ, пӗлӗшӗсенчен пулӑшу ыйтнӑ. Лешсем вара кун пирки йӗрке хуралне пӗлтернӗ.

Етӗрне арҫынни тӗлӗшпе пуҫарнӑ пуҫиле ӗҫе суд пӑхса тухӗ.