"Контактри" сӑн

Канашри ЗАГСра 50 ҫул пӗрле пурӑнакан Кузнецовсене чысланӑ. Вӗсем 1975 ҫулта Сиккассинче пӗрлешнӗ.

Валентин Николаевичпа Людмила Ильинична икӗ ача ҫуратса ӳстернӗ, халӗ пилӗк мӑнукӗпе савӑнса пурӑнаҫҫӗ.

Валентин Николаевич культура тытӑмӗнче ӗҫленӗ: Сиккассинчи ача-пӑча ӳнер шкулӗнче вӗрентекен тата директор пулнӑ. 1986 ҫулта «Чӑваш АССРӗн тава тивӗҫлӗ культура ӗҫченӗ» ята тивӗҫнӗ. 1991 ҫултанпа вара вӑл – Раҫҫей композиторӗсен ассоциацийӗн пайташӗ.

Кузнецовсен ҫемйи – ҫамрӑксемшӗн тӗслӗх.

pravdapfo.ru сайтран илнӗ сӑнӳкерчӗк

Чӑваш Енри тӳре-шара Китайра туса кӑларнӑ 9 машина туянасшӑн. Аукцион ирттересси пирки калакан документра Haval F7 е ҫавӑн пек урӑх автомобиль туянасси пирки сӑмах пырать. Контрактӑн пуҫламӑш хакӗ — 28,7 млн тенкӗ.

Машинӑна патшалӑх влаҫӗн органӗсенче тӑрӑшакансене транспорта тивӗҫтерме уйӑракан ятарлӑ субсиди укҫипе илӗҫ.

Пӗр машинӑншӑн 3,2 миллион тенкӗ уйӑрма хатӗр. Анчах унтан ытла мар. Автомобиль хура тӗслӗ пулмалла, Вӑл 2025 ҫулта кӑларни пулмалла.

Аукциона авӑн уйӑхӗн 29-мӗшӗнче пӗтӗмлетӗҫ.

Сӑмах май каласан, хамар ҫӗршыври АвтоВАЗ предприяти 4 кунлӑ ӗҫ эрни ҫине куҫассине маларах хыпарланӑччӗ. Предприяти ҫӑмӑл мар лару-тӑрура-мӗн.

cap.ru сайтри сӑн

Чӑваш Енре «Земство культура ӗҫченӗ» программа хута кайнӑ. Кӑҫал унта хутшӑнакансем ӗҫе пуҫӑннӑ.

Ҫак кунсенче Чӑваш Республикин культура министрӗ Светлана Каликова яла ӗҫлеме каякан специалистсемпе тӗл пулнӑ. Ку программӑна 7 ҫын хутшӑннӑ. Вӗсенчен иккӗшӗ ют регионтан килнӗ: Чӗмпӗр тата Курган хулисенчен. Ыттисем вара Чӑваш патшалӑх культурӑпа искусствӑсен институтӗнче аслӑ пӗлӳ илнӗ.

Специалистсен программӑпа килӗшӳллӗн ялта 5 ҫул ӗҫлемелле. Хальлӗхе вӗсен ҫумне наставниксем ҫирӗплетнӗ. Вӗсем малтанхи вӑхӑтра пулӑшса пырӗҫ.

«Лиза Алерт» шыравпа ҫӑлав отрячӗн архивӗнчи сӑн

Канашра саккӑрмӗш кун ӗнтӗ 15 ҫулти хӗре шыраҫҫӗ. «Лиза Алерт» шыравпа отряд хастарӗсем пулӑшу ыйтаҫҫӗ.

Анастасия Владимировна Алексеева авӑнӑн 9-мӗшӗнче киле таврӑнман. Вӑл ӑҫтине халӗ те пӗлмеҫҫӗ.

Вӑл ырхан кӗлеткеллӗ, 160 сантиметр ҫӳллӗш, ҫӳҫӗ ҫырӑ, куҫӗ тӗттӗм сӑрӑ тӗслӗ. Ҫав кун хура жилетка, шурӑ блузка, хура шӑлавар тата шурӑ кроссовка тӑхӑннӑ пулнӑ.

Ҫак номерсемпе шӑнкаравлама ыйтаҫҫӗ: 8 800 700-54-52 (Раҫҫейре тӳлевсӗр), 8 917 660 26 33 (Тучка (Дарья),

cap.ru сӑнӳкерчӗкӗ

Канаш округӗнче пурӑнакан Кудряшовсем ҫемье ҫавӑрнӑранпа 60 ҫул ҫитнине паллӑ тунӑ.

Георгий Павловичпа Мария Тимофеевна 1965 ҫулта пӗрлешнӗ. Вӗсем тӑватӑ ача ҫуратса ӳстернӗ. Халӗ тӑхӑр мӑнукпа тата икӗ кӗҫӗн мӑнукпа савӑнса пурӑнаҫҫӗ. «Пирӗн чи пысӑк пуянлӑх – ачасемпе мӑнуксем», – теҫҫӗ вӗсем.

Георгий Павлович пушар хуралӗн водителӗнче 35 ҫул ытла ӗҫленӗ. Мария Тимофеевна вара медицина тытӑмӗнче вӑй хунӑ, вӑл – Чӑваш АССРӗн тава тивӗҫлӗ фельдшерӗ. Халӗ те вӗсем ӗҫсӗр лармаҫҫӗ, кил хуҫалӑхӗнче тӑрмашаҫҫӗ.

«На связи» форумри сӑн

Ашшӗ-амашӗ ачине санаторирен илсе кайма пырсан пӑтӑрмах сиксе тухнӑ. Вӗсем ачан телефонне туртса илнӗ. Куншӑн вара лешӗ питӗ кӳреннӗ те вӑрмана тарнӑ.

Ку ӗнер Улатӑр округӗнче пулнӑ. Ашшӗ-амӑшӗ кун пирки тӳрех полицие пӗлтернӗ. Полицейскисем санатори таврашӗнчи вӑрманта ачана шырама пуҫланӑ.

Юрать-ха, арҫын ачана санатори водителӗ, ӗҫе кайма тухнӑскер, асӑрханӑ. Ача 1,5 ҫухрӑм аякка кайма ӗлкӗрнӗ иккен. Кун хыҫҫӑн Канашри ҫемьепе полицейскисем калаҫу ирттернӗ, вара вӗсем чиперех киле кайнӑ.

vladcons.ru сайтри сӑн

Тренерсем те патшалӑхран 1 миллион тенкӗ илме пултарӗҫ. 2026 ҫулта Чӑваш Енре «Земство тренерӗ» программа ӗҫлеме пуҫлать.

Ку укҫана яла ӗҫлеме каякан специалистсем тивӗҫме пултарӗҫ. Вӗсен физкультура тата спорт енӗпе ятарлӑ пӗлӳ пулмалла.

Килӗшӗве алӑ пуснӑ хыҫҫӑн ялти учрежденире 5 ҫул ӗҫлемелле.

Хальхи вӑхӑтра ЧР Спорт министерстви вакансисен списокне хатӗрлет. Асӑннӑ программа ҫамрӑксене яла илӗртмешкӗн хута ярӗҫ.

Pinterest сайтри сӑн

Ҫӑлавҫӑсен кушак аҫине пулӑшма тивнӗ. Вӑл хушма ҫурт тӑррине хӑпарса кайнӑ та каялла хӑй тӗллӗн анайман.

Ку пӑтӑрмах пирки ҫӑлав службине авӑн уйӑхӗн 12-мӗшӗнче каҫхине кушак аҫин хуҫи шӑнкӑравласа пӗлтернӗ. Вӑл каланӑ тӑрӑх, чӗрчун чӳречерен хушма ҫурт тӑррине сикнӗ те аялалла анайман.

Ҫӑлавҫӑсем вырӑна ҫитсен хушма ҫурт тӑррине хӑпарса кайса кушак аҫине антарнӑ. Халӗ вӑл хуҫи ҫумӗнчех ачашланса ҫӳрет.

Чӑваш Енӗн Ӗҫ министерствин сӑнӳкерчӗкӗ

Чӑваш Енри Екатерина Петрова «Лучший по профессии» (чӑв. Профессире чи лайӑххи) ҫӗршыв шайӗнчи конкурсра «Ҫӗвӗҫ» номинацире ҫӗнтернӗ.

Конкурсра 130 ҫын хутшӑнса финала 19 ҫын тухнӑ. Чӑваш Ен хӗрарӑмӗ виҫҫӗмӗш вырӑна тухнӑ. Пӗрремӗш вырӑна тухнӑ ҫын 1 миллион тенке тивӗҫнӗ, иккӗмӗш вырӑна тухни — 500 пин тенке, Екатерина — 300 пин тенке.

miloserdie.ru сайтри сӑн

Ҫӗмӗрле округӗнчи Вырӑс Улхаш ялӗнче тилӗ виллине тупнӑ та экспертизӑна янӑ. Вӑл урнӑ чирпе аптӑрани паллӑ пулнӑ.

Паянтан Вырӑс Улхашӗнче – карантин. Хушӑва ЧР Элтеперӗ Олег Николаев алӑ пуснӑ. Ялтан 1,6 ҫухрӑм радиусри территори ку чир енчен хӑрушӑ пулнине палӑртнӑ.

Хальхи вӑхӑтра ветеринарсем чире сарӑлма парас мар тесе ӗҫлеҫҫӗ. Карантин пулнӑ чухне чӗрчунсен куравне йӗркелеме, вӗсене сутма юрамасть.

Сӑмах май, авӑнӑн 9-мӗшӗнченпе Ҫӗнӗ Шупашкарта та карантин. Унта «Агния» сад юлташлӑхӗ патӗнче тилӗ виллине тупнӑ, вӑл урнӑ чирпе аптӑранине палӑртнӑ.