mazsz.ru сайтри сӑн

Канашра пурӑнакан 38 ҫулти арҫын пӗлтӗр пуш уйӑхӗнче тӗнче тетелӗнче АПШра «Киа Соренто» машинӑна сутас тӗлӗшпе аукцион иртесси пирки вуласа пӗлнӗ. Унпа палламан ҫын ҫыхӑннӑ. Вӑл Тольяттири организаци ӗҫченӗ имӗш.

Канаш арҫынни машинӑна кӳрсе килме тесе «посреднике» 1 миллион та 200 пин тенкӗ куҫарса панӑ. Анчах палӑртнӑ вӑхӑтра машина килмен. Ҫавӑн хыҫҫӑн арҫын полицие кайнӑ.

Кун тӗлӗшпе пуҫиле ӗҫ пуҫарнӑ.

sparklogic.ru сайтри сӑн

Ҫулталӑк пуҫланнӑранпа республикӑра 7 тонна ытла аш-какая утилизаци тунӑ. Ку йӑлтах – сывлӑхшӑн сиенлисем. Ҫапла пӗлтерет ЧР Патшалӑх ветеринари служби.

Аш-какай сентре ҫине лекиччен тӗрӗслев витӗр тухать. Ведомство ӗсченӗсем аш пахалахӗпе хӑрушсӑрлӑхне кашни кун тӗрӗслесе тӑраҫҫӗ. Кӑҫалхи икӗ уйӑхра специалистсем 14 пин ытла тонна какая тӗрӗсленӗ, утилизацие ямаллисене те тупнӑ. Сӑлтавӗ тӗрлӗрен пулнӑ: срокӗ тухнӑ, упаковки сиенленнӗ, тӗрӗслев пӗтӗмлетӗвӗ лайӑхах пулман… Ҫапла 562 килограмм какай, 517 килограмм аш-какай продукцийӗ, 6240 килограмм выльӑх-чӗрлӗх ӑш-чикне утилизацие янӑ.

cheb-centr.soc.cap.ru сӑнӳкечӗкӗ

Пуш уйӑхӗн 21-мӗшӗнче Муркаш мунициапллӑ округӗнчи Каршлӑхри ваттисен ҫуртӗнче Шупашкарти артистсен тӳлевсӗр концерчӗ пулӗ. Юрӑ-ташӑпа савӑнтараканнисем — Шупашкарти халӑхӑн сцаллӑ ыйтӑвӗсене тивӗҫтерекен комплекслӑ центрне ҫӳрекен ватӑсем.

Центрта тӗрлӗ музыка коллективӗ пур. Вӗсенчен пӗри — Чӑваш Республикин культурӑн тава тивӗҫлӗ ӗҫченӗ Владимир Арланов ертсе пыракан «Надежда» ансамбль. Унта ҫӳрекен ватӑсем уйрӑммӑн та юрлаҫҫӗ, ушкӑнпа та. Вӗсене хулари тӗрлӗ мероприятие йыхравлаҫҫӗ, куракансем концерта кӑмӑлтан йышӑнаҫҫӗ.

Геннадий Исаков архивӗнчи сӑн

Геннадий Исаков орнитолог-ӑсчах пӗлтернӗ тӑрӑх, юлашки 5 ҫулта республикӑра кураксем сахалланнӑ. Шупашкартан 8 ҫухрӑм радиусра вӗсен колонине тупма та ҫук иккен.

«5 ҫулта Чӑваш Енре 102 ял-салара кураксен 132 колонийӗ ҫухалнӑ», - ҫапла пӗлтерет орнитолог. 2019 ҫулта ӑсчахсем 474 ялта кураксен 546 кӗтӗвӗ пулнине палӑртнӑ. Кӑҫал ку хисеп 414 таран ҫитнӗ, кураксен кӗтӗвне 372 ялта асӑрханӑ. Кураксем ытларах Етӗрне, Элӗк, Шупашкар округӗсенче ҫухалнӑ. Ытларахӑшӗ – пӗчӗк кӗтӳсем. Чи пысӑк ҫухалнӑ кӗтӳ Йӗпреҫ оругӗнчи Ҫӗрӗклӗ ялӗнче пулнӑ. Унта 125 йӑва пӗтнӗ.

baikal24.ru сайтри сӑн

Красноармейскинче ҫапкаланчӑк йытӑсем ачана тапӑннӑ икӗ тӗслӗхе шута илнӗ. Пӗри Ленин урамӗнче пулнӑ, тепри — Слукин урамӗнче. Ачасене кун хыҫҫӑн тухтӑрсен пулӑшӑвӗ кирлӗ пулнӑ.

Кам айӑплӑ? Килсӗр чӗрчунсемшӗн вырӑнти администраци яваплӑ. Ҫавӑнпа прокуратура округ администрацийӗнчен кашни ача валли 20-шер пин тенкӗ шыраса илме тавӑҫ тӑратнӑ. Хальхи вӑхӑтра ӑна пӑхса тухаҫҫӗ.

rosstat.gov.ru порталтан илнӗ сӑнӳкерчӗк

Чӑваш Енре пурӑнакансен уйӑхри вӑтам ӗҫ укҫи 68 пин тенкӗпе танлашнӑ. Ку вӑл — пӗлтӗрхи раштав уйӑхӗнче. Ҫак цифрӑна Росстат пӗлтернӗ.

Чӑваш Енре уйӑхри вӑтам ӗҫ укҫи 68 пин те 657 тенке ларнӑ. Ку вӑл унчченхи ҫав вӑхӑтринчен 22,2 процент пысӑкрах.

Уйӑхри вӑтам ӗҫ укҫипе пирӗн республика Федерацин Атӑлҫи округӗнчи ҫичӗ регионтан: Мари Элтан, Мордва тата Удмурт республикисенчен, Киров, Пенза, Саратов тата Чӗмпӗр облаҫӗсенчен.

Чӑваш Енре пӗлтӗр вӑтам ӗҫ укҫи 50 пин те 186 тенкӗпе танлашнӑ. 2022 ҫулта вӑл 41,2 пин тенкӗ пулнӑ, 2021 ҫулта — 35,8 пин тенкӗ, 2020 ҫулта — 31,8 пин тенкӗ.

Следстви комитечӗ тунӑ сӑн

Следстви комитечӗн Ҫӗмӗрлери районсен хушшинчи уйрӑмӗн ӗҫченӗсем пушарта нимсӗр юлнӑ нумай ачаллӑ ҫемьене пулӑшнӑ. Вӗсем укҫа-тенкӗ, тумтир, усӑ курма кирлӗ япаласем пухнӑ та ҫемьене пырса панӑ.

Улатӑр тӑрӑхӗнчи Алтышево ялӗнче пурӑнакан 3 ачаллӑ ҫемье нарӑсӑн 26-мӗшӗнче ҫуртсӑр юлнӑ. Пушар ӑна тӗппипех тӗп тунӑ. Инкекре никам та шар курман. Анчах ҫемьен халӗ тӑванӗсем патӗнче пурӑнма тивет.

Нумай ача амӑшӗ Следстви комитечӗн ӗҫченӗсене тав сӑмахӗ каланӑ.

"Лиза Алерт" сайтри сӑн

Шупашкарта 36 ҫулти арҫынна пӗр уйӑха яхӑн шыраҫҫӗ. Евгений Соколов килтен нарӑс уйӑхӗн 11-мӗшӗнче тухса кайнӑ. Унтанпа унран хыпар ҫук. Вӑл мӗнле майпа ҫухални те паллӑ мар.

Евгений - ҫӳллӗ, хыткан арҫын. Ҫӳҫӗ хура, куҫӗ симӗс. Ун пирки мӗн те пулин пӗлекенсене 8-800-700-54-52 е 112 номерпе шӑнкӑравлама ыйтаҫҫӗ.

Сӑмах май, пушӑн 15-мӗшӗнче «Лиза Алерт» Наци вулавӑшӗнче ҫынсене шырама пулӑшас текенсемпе тӗл пулаҫҫӗ. Мероприяти 18 сехет ҫурӑра пуҫланать.

"Контактри" сӑн

Виҫӗ ача ӳстерекен Эльвирӑпа Михаил Павловсем пӳрт маччи ҫинче чечексем ӳстереҫҫӗ. Хӑйне евӗр пахчана вӗсем хӑйсем хута янӑ. Унта чун ӑшшине кӑна мар, 300 пин тенкӗ те хывма тивнӗ.

Маччана вӗсем ӑшӑнмалла тунӑ, электричество кӗртнӗ. Унта ӳсен-тӑран хӑйне питӗ лайӑх туять.

Павловсем мачча тӑрринче тюльпансем, чечек калчисем ӳстереҫҫӗ, кайран вӗсене сутаҫҫӗ. «Малтан мачча пушӑччӗ, халӗ вара унта пирӗн пӗчӗк хуҫалӑх», - тет кил хуҫи.

cheb.mk.ru сайтри сӑн

Суд приставӗсен федераци службин Чӑваш Енри управленийӗ Полина ятлӑ бота ӗҫлеттерме пуҫланӑ. Унпа ҫак номерпе ҫыхӑнма пулать: 8 (800) 303-00-00.

Машина интеллекчӗ шӑнкӑравлакан ҫыннӑн сассине ӑнланса ун валли хурав хатӗрлет. Суд приставӗсен службин сайтӗнче парӑм пирки пӗлме пулать. Полина ботпа та ҫаплах - анчах вӑл ыйтусене сасӑпа хуравлать. Бот верификаци валли ИНН тата СНИЛС номерӗсене ыйтать. Кайран шӑнкӑравлакан ҫыннӑн служба базинчи тулли статусӗ пирки калать.