"Чувашский край" пабликран илнӗ сӑнӳкерчӗк

Кӳкеҫри темиҫе ҫутӑ будкине сӑрласа илемлетнӗ. Пӗр-пӗр тӗспе сӑрласа мар-ха, граффитипе.

Посёлокри сӑрӑ ҫутӑ будкисене илемлӗ арт-объекта вырӑнти художниксем ҫавӑрнӑ.

Вӑл е ку будкӑна епле илемлетесси пирки Артём Павлетич графика дизайнерӗ пуҫ ватнӑ, Сергей Петров художник вара ӳкернӗ.

Кашни стенана юнашарти ҫуртсене кура сӑрланӑ. ЗАГС ҫумӗнчине пӗрне-пӗри юратакан мӑшӑр евӗр сӑнланӑ, спортлапамӗ патӗнчи ҫине спорстменсене ӳкерсе хунӑ, Бичурин музейӗ патӗнчи ҫине китай драконне вырнаҫтарнӑ.

Ҫӗрпӳ округӗнче пурӑнакан 49 ҫулти арҫын мини-экскаватор туянма тӑрсан 408 пин тенкӗ ҫухатнӑ. Вӑл ултавҫӑсен тӗлне лекнӗ.

Ку ҫу уйӑхӗн варринче пулса иртнӗ. Арҫын техникӑна тӗнче тетелӗнче шыранӑ, хӑйне кирлине курсан менеджерпа ҫыхӑннӑ. Вӗсем нумаях та калаҫман – кун хыҫҫӑн арҫын ӑна пӗр иккӗленмесӗрех 408 пин тенкӗ куҫарса панӑ.

Анчах вӑхӑт иртнӗ, техника вара килмен. Ҫавӑн чухне тин арҫын ултавҫӑ серепине ҫакланнине, сайт суя пулнине ӑнланнӑ. Ирӗксӗрех полицие кайса заявлени ҫырма тивнӗ.

ШӖМ аса илтерет: тӗнче тетелӗнче япала туяннӑ чухне питӗ асӑрханмалла. Иккӗленӳллӗ сайтсене тишкермелле, домен туни пирки даннӑйсем ыйтмалла, ҫынсем ку сайт пирки мӗн ҫырнине вуламалла.

tvc.ru сайтри сӑн

Хӗрлӗ Чутай округӗнчи хӗрарӑм хӑйӗн ачисене хӗнесе пурӑннӑ тесе шутлаҫҫӗ. Ун тӗлӗшпе пуҫиле ӗҫ пуҫарнӑ.

Тӗрӗслев ҫакна палӑртнӑ: вӑл 2024 ҫулхи пуш-ака уйӑхӗсенче тата чӳк уйӑхӗнче 2009 ҫулта тата 2025 ҫулта ҫуралнӑ хӗрӗсене хӗненӗ.

Тӗслӗхрен, пуш уйӑхӗн пуҫламӑшӗнче хӗрарӑм хӗрне ӗнсерен ҫапнӑ, унтан пуҫӗпе компьютер сӗтелӗ ҫине кӗрслеттернӗ. Кун хыҫҫӑн ачан сӑмсинчен юн кайнӑ. Кунсӑр пуҫне вӑл ун пуҫӗнчен фарфор турилккене ҫапса ҫӗмӗрнӗ. Тӗрӗслев вӑхӑтӗнче ытти факта та тупса палӑртнӑ.

Халӗ следстви пырать. Ӗҫе район прокуратури сӑнаса тӑрать.

«Контактри» сӑн

Ҫӗртме уйӑхӗн 21-мӗшӗнче Шупашкарти юханшыв порчӗ Атӑл тӑрӑх ярӑнма чӗнет. Хальхинче хӑйне евӗр рейс пулӗ.

«Чӑваш Ен» теплоход ҫак кун виҫӗ сехете тӑсӑлакан ҫулҫӳреве тухӗ. Ҫав вӑхӑтра вӑл Шупашкарти гидроэлектростанцин шлюзӗсем витӗр икӗ хутчен тухӗ. Ку пысӑк гидротехника сооруженийӗсем мӗнле ӗҫленине курма май парӗ.

Теплоход 15:00 сехетре ҫула тухӗ те 18:00 сехетре каялла таврӑнӗ. Билетсене укҫалла туянмалла. Аслисем тата 10 ҫултан аслӑрах ачасем валли вӑл 1450 тенкӗ тӑрать, 5-10 ҫулсенчи ачасем валли – 700 тенкӗ. Пилӗк ҫултан кӗҫӗнрех ачасене вара тӳлевсӗрех илсе каяҫҫӗ.

Билетсене маларах юханшыв портӗн сайтӗнче туянма пулать. Хальлӗхе кун пек рейс ҫӗртме уйӑхӗн 21-мӗшӗнче кӑна пуласси паллӑ.

cap.ru сайтри сӑн

Шупашкар округӗнче пурнакан арҫын сакӑр юман тата пӗр хурӑн каснӑ. Патшалӑха кӳнӗ тӑкак пӗчӗк мар – 1,7 миллион тенкӗ.

Ҫу уйӑхӗн пуҫламӑшӗнче Шупашкар округӗн администрацийӗ Мамка ҫывӑхӗнчи сад юлташлӑхӗнче такам йывӑҫсем касни пирки полицие пӗлтернӗ. Йӗрке хуралҫисем вырӑна ҫитсен сакӑр юман тата пӗр хурӑн тункатисене асӑрханӑ.

Йывӑҫ касакана часах тупнӑ. Вӑл Шупашкар округӗнчи ҫынах пулнӑ – ниҫта та ӗҫлемен 45 ҫулти арҫын. Вӑл айӑпне йышӑннӑ.

Хайхи арҫын йывӑҫсене пӗлтӗр кӗркунне хӗлле кӑмака хутма тесе каснӑ. Хӗл каҫипе вӑл касса ҫурнӑ пуленккесене кӑмакара ҫунтарса пӗтернӗ.

Арҫын тӗлӗшпе пуҫиле ӗҫ пуҫарнӑ. Унччен ҫак арҫын полици куҫӗ умне лекменни паллӑ. Хальлӗхе унӑн ялтан тухса ҫӳреме юрамасть.

assets3.klops сайтри сӑн

Ҫуркунне ҫӗршывра «Вак укҫа эрни» акци иртнӗ, ҫав шутра – Чӑваш Енре те. Регионти Наци банкӗ акцие пӗтӗмлетнӗ.

Акци вӑхӑтӗнче республикӑра пурӑнакансем 226 пин ытла тимӗр укҫана хутлипе улӑштарнӑ тата банк счечӗ ҫине куҫарнӑ. Пӗтӗмпе – 1,1 миллион тенкӗлӗх. Ҫынсем ытларах банксене 10 тенкӗллӗххисене килсе панӑ.

Раҫҫейӗпе илес тӗк, ака уйӑхӗнче ҫынсем банксене 55 миллион тимӗр укҫа илсе пынӑ. Ку – 252 миллион тенкӗлӗх. Хӑш-пӗр банкра вак укҫасене халӗ те йышӑнаҫҫӗ. Условисемпе монетнаянеделя.рф сайтра паллашма пулать.

Аса илтерер: «Вак укҫа эрни» акци ҫулталӑкра икӗ хут иртет – ҫуркунне тата кӗркунне. 2025 ҫулта республикӑра пурӑнакансем 680 пин ытла тимӗр укҫа панӑ. Ку – 2,3 миллион ытла тенкӗлӗх. Йывӑрӑшӗ – 3 тонна яхӑн.

m.bk55.ru сайтри сӑн

Канашра пурӑнакан 39 ҫулти хӗрарӑм «Кӑнтӑр Корейӑри савнине» ӗненсе ӑна ҫур миллион ытла тенкӗ куҫарса панӑ.

Хӗрарӑм унпа тӗнче тетелӗнче паллашнӑ. Хайхи арҫын ӑна парне ярса панине каланӑ, анчах посылка таможня витер тухайман-мӗн, ҫавӑнпа куншӑн пошлина тӳлемелле. Кун валли вара долларсене тенкӗ ҫине куҫарма хушнӑ, вӑл каланӑ счет ҫине хумаллине ӗнентернӗ.

Ҫапла хӗрарӑм ҫав палламан арҫынна 531 пин тенкӗ куҫарса панӑ. 471 пин тенки – хӑй пухнӑ укҫа, ытти – кивҫен илнӗ. Анчах куҫарса панӑ хыҫҫӑн хайхи арҫыннӑн пӑсӗ те юлман – ҫухалнӑ.

Ултав серепине лекнӗ хӗрарӑмӑн полицие кайма тивнӗ.

cap.ru сайтри сӑн

Хӗрлӗ Чутай округӗнче малашне ҫӗнӗ прокурор ӗҫлӗ. Ку вырӑна Раҫҫей Тӗп прокурорӗн хушӑвӗпе килӗшӳллӗн юстицин кӗҫӗн канашҫи Артур Белов йышӑннӑ.

Артур Белов 1989 ҫулта Шупашкарта ҫуралнӑ. Раҫҫей патшалӑх социаллӑ университечӗн филиалӗнчен вӗренсе тухсан вӑл 2013 ҫултанпа Чӑваш Ен прокуратуринче аслӑ специалистра ӗҫленӗ. 2017-2021 ҫулсенче Чӑваш транспорт прокурорӗн пулӑшуҫи тата аслӑ пулӑшуҫи пулнӑ. 2021 ҫултанпа Шупашкарти Калинин районӗн прокуратуринче, республика прокуратуринче тата Тӑвай районӗн прокуратуринче тӗрлӗ должноҫре ӗҫленӗ. 2024 ҫултанпа вара Улатӑрти районсен хушшинчи прокурорӑн ҫумӗ пулнӑ.

Чӑваш Ен прокурорӗ Эдуард Гиматов Хӗрлӗ Чутай районӗн прокуратурин коллективне ҫӗнӗ прокурорпа паллаштарнӑ.

Чӑваш Ен «Раҫҫейӗн симӗс ылтӑнӗ — 2026» фестивале йыхравлать. Вӑл утӑ уйӑхӗн 25-мӗшӗнчен пуҫласа ҫурла уйӑхӗн 1-мӗшӗ таран пырӗ. Унта крафт, пыл сӑри тата сидр юратакансем хӑйсене килӗшекен сӑрана астивсе пӑхайӗҫ.

Фестивале сӑра вӗретекен 25 завод, пыл сӑри туса кӑларакан 2 организаци тата сидр кӑларакан 1 предприяти хутшӑнӗ.

Ҫӗршывӑн тӗрлӗ кӗтесӗнчи общество апатланӑвӗн 35 заведенийӗ гастрономи енчен тӗлӗнтерӗ.

Шупашкара Мускавран, Питӗртен, Хусантан, Самарӑран, Чӗмпӗртен, Пензӑран, Ярославльтен, Чулхуларан, Барнаултан, Чуллӑ Ҫыртан, Йошкар‑Оларан тата Беларуҫ Республикинчен килсе ҫитӗҫ.

Гостехнадзор видеовӗнчен илнӗ сӑнӳкерчӗк

Чӑваш Енре тракторист-машиниста вӗренсе тухакансем йышланса кайнӑ. Кун пирки Чӑваш Енри Гостехнадзорта пӗлтереҫҫӗ.

Гостехнадзор ҫулталӑк пуҫланнӑранпа 2200 ҫынна кун пек удостоверени панӑ. Тракторист-машинист удостоверенине илекенсен шучӗ юлашки пилӗк ҫулта 43 пинрен 57 пине ҫитнӗ.

Тракторист-машинистсене пирӗн республикӑра 20 автошкулпа вӗренӳ центрӗнче вӗрентсе кӑлараҫҫӗ. Экзамена Гостехнадзорта тытаҫҫӗ, удостоверение Патшалӑх пулӑшӑвӗсен порталӗ урлӑ самантрах илеҫҫӗ.