cap.ru сайтри сӑн

Ҫӗмӗрле районӗнче республика шайӗнчи «Чи лайӑх вӑрман касакан – 2026» конкурс иртнӗ. Пӗтӗмлетӳсем паллӑ.

Малтан палӑртса хӑварар: кӑҫал унта тӗрлӗ регионти специалистсем хутшӑннӑ – Чӑваш Республикинчен, Мари Элтен, Карели Республикинчен, Мускав облаҫӗнчен тата Тутарстан Республикинчен.

Тӳресем вӑрман касакансем мӗнле техникӑпа тата хӑвӑртлӑхпа ӗҫленине, хӑрушсӑрлӑх техникине пӑхӑннине хакланӑ. Хальхинче ҫӗнтерӳҫӗ ятне Улатӑр лесничествинче ӗҫлекен Сергей Фадеев тивӗҫнӗ. Иккӗмӗш вырӑна вара Вӑрнар районӗнчи специлист Алексей Иванов йышӑннӑ. Виҫҫӗмӗш вырӑна Шӑмӑршӑ районӗнчи специалиста Сергей Семенова панӑ.

Палӑртса хӑварар: республика шайӗнчи «Чи лайӑх вӑрман касакан» конкурса 2005 ҫултанпа ирттереҫҫӗ, унта кашни ҫулах вӑрман хуҫалӑхӗнче тӑрӑшакан специалистсем тупӑшаҫҫӗ.

«Контактра» халӑх тетелӗнчи сӑн

Улатӑр районӗнче пурӑнакан арҫыннӑн суд сакки ҫине ларма тивӗ. Йӑлтах – йывӑҫ каснӑшӑн.

Улатӑр округӗнче 26 хурӑн тункатине асӑрхасан йӗрке хуралҫисем ҫакна кам тунине шырама тытӑннӑ. Йӗрсем вӗсене Суйкӑн ялӗнчи пӗр ҫурта илсе ҫитернӗ. Кайран иккӗленӳ юлман – картишӗнче тин каснӑ йывӑҫсене асӑрханӑ. Арҫын тӗлӗшпе пуҫиле ӗҫ пуҫарнӑ. Вӑл йывӑҫсене касса патшалӑха 152 пин тенкӗлӗх тӑкак кӳнӗ. Йӗпреҫ районӗнче те хурӑнсем каснӑ тӗслӗхе асӑрханӑ. Унта 3 тунката пулнӑ. Йывӑҫсене Шупашкар хулинче пурӑнакан арҫын каснине палӑртнӑ. Вӑл «Урал» машинӑпа йывӑҫсем турттарнӑ ҫӗрте ӗҫлет.

Йывӑҫ каснӑшӑн иккӗшӗн те суд сакки ҫинче явап тытма тивӗ.

cap.ru сайтри сӑн

Ҫӗмӗрле районӗнче республика шайӗнчи професси ӑсталӑхӗн конкурсӗ иртет. Хальхинче вӑрман касакансем тупӑшаҫҫӗ. Конкурса вӑрман хуҫалӑхӗн тата вӑрман промышленноҫ комплексӗн ӗҫченӗсем хутшӑнаҫҫӗ.

Конкурса рабочи профессийӗсен ят-сумне ӳстерес тесе йӗркелеҫҫӗ. Вӑл «Экологи ырлӑхӗ» наци проекчӗпе килӗшӳллӗн иртет.

Конкурса хутшӑнакансем пурте – 18 ҫултан аслӑрах, кашнин 2 ҫултан сахалрах мар опыт пур. Кунсӑр пуҫне кашнин хӑйӗн ятарлӑ тумӗ тата бензопӑчкӑ пур. Вӗсен пилӗк задание пурнӑҫлама тивӗ: йывӑҫ касса антарасси, сӑнчӑра улӑштарасси, раскряжевка, тӗплӗ раскряжевка тата турат касасси.

Ҫӗнтерӳҫӗсене мӗн чухлӗ балл пухнине кура палӑртӗҫ. Призерсем, 1-3-мӗш вырӑнсене йышӑннисем ЧР Ҫут ҫанталӑк министерствин дипломне тивӗҫӗҫ.

Канашри социаллӑ центр сӑнӳкерчӗкӗ

Канашра «Помощь тем, кто нуждается» (чӑв. Пулӑшу кирлисене ал парар) ятпа ыркӑмӑллӑх акцийӗ иртнӗ.

Ыркӑмӑллӑх акцийӗ вӑхӑтӗнче нумай ачаллӑ ҫемьесем ачасем валли шкул ҫипуҫӗ тӳлевсӗр илме пултарнӑ.

«Пире кун пек пулӑшнӑшӑн чунтан тав тӑватпӑр. Ҫӗнӗ вӗренӳ ҫулӗ валли япала туянма укҫа нумай кирлӗ. Кунта вара шкул ҫипуҫне тӳлевсӗр илме май килчӗ. Уншӑн эпӗ питӗ савӑнтӑм», — хавхаланса калаҫнӑ виҫӗ ача амӑшӗ, Анна ятлӑ хӗрарӑм.

Вырӑнти социаллӑ центрта кун пек ыркӑмӑллӑх акцине ҫулсерен ирттерни пирки пӗлтереҫҫӗ. Сӑмах май каласан, ытти тӑрӑхри социаллӑ центрсем те ун пеккине йӗркелеҫҫӗ. Уҫӑ кӑмӑллӑ усламҫӑсем пулӑшнипе нумай ачаллӑ ҫемьесен хыснине перекетлеме май килет. Акцие йывӑр лару-тӑрури ытти ҫемье те хутшӑнма пултарать.

«Контактра» халӑх тетелӗнчи сӑн

Чӑваш Енре хӑйне евӗр хурт-кӑпшанка асӑрханӑ. Вӑл – горбатка-буйвол. Унччен кун пек хурт-кӑпшанкӑ пирӗн тӑрӑхра вуҫех пулман.

Горбатка-буйвол – Ҫурҫӗр Америкӑран. Анчах вӑл 100 ҫула яхӑн каялла Европӑна та лекнӗ. Акӑ халӗ ав Чӑваш Республикине ҫитнӗ. Заповедникре ӑна чукун ҫул патӗнче асарханӑ. Специалистсем вӑл пуйӑспа килнӗ тесе шухӑшлаҫҫӗ.

Горбатка-буйвол симӗс тӗслӗ, 1 сантиметр таран калӑпӑшлӑ. Вӑл сикме те, вӗҫме те пултарать. Ҫӗршыври кӑнтӑр регионсенче вӑл сӑтӑр тума пуҫланӑ ӗнтӗ – панулмипе груша турачӗсем ҫине ҫӑмарта хурать, ҫавна пула йывӑҫсем чирлеҫҫӗ.

Халӗ пирӗн ӑсчахсем ӑна сӑнаҫҫӗ: вӑл заповедник вӑрманӗсенче пурӑнса кайӗ-и е курӑклӑ ҫӗрте кӑна юлӗ-и? Хальлӗхе ӑна умлӑн-хыҫлӑн икӗ хут тупнӑ. Эппин, горбатка-буйвола кунта питех япӑх мар.

МАХри progorod21 каналтан илнӗ сӑнӳкерчӗк

Чӑваш Енри арҫын 5 миллион тенкӗ выляса илнӗ.

Телейлӗ ҫын инҫе ҫула ҫӳрекен водитель иккен. Ку енӗпе вӑл 16 ҫул ӗҫлесе илсе пурӑнать.

Лотерея билечӗпе укҫа выляса илнине арҫын тӳрех пӗлмен те иккен. Хӑш чухне билета килте манса хӑварнӑ, тепӗр чухне киоск хупӑннӑ вӑхӑт тӗлне пулнӑ...

«Пӗлтӗр эпӗ хамӑн юбилея паллӑ турӑм. Тен, ку укҫа — шӑпа кая юлса панӑ телей пулӗ. Кая юлса пулин те тем мар», — хавхаланса каласа кӑтартнӑ арҫын телейлӗ лотерея билечӗ пирки.

Арҫын хӑй туса лартнӑ пӳртре пурӑнать. Нумаях пулмасть вӑл унта мунча туса лартнӑ. Выляса илнӗ укҫа пулӑшнипе водитель киле газ кӗртесшӗн тата арӑмӗпе канма кайса килесшӗн.

Сӑмах май каласан, кил патне газ илсе ҫитерме патшалӑх та пулӑшать.

ШӖМ тунӑ сӑн

Нимӗҫ овчарки, Виджи ятлӑ йытӑ, вӑхӑтлӑх усрамалли изоляторта службӑра пулнӑ. Вӑл 9 ҫул тултарсан ӑна тивӗҫлӗ канӑва янӑ. Чӑваш Республикин ШӖМӗн кинологи службин центрӗ ун валли ҫӗнӗ хуҫа шыранӑ.

Виджие илес текен нумай пулнӑ. Анчах кинологсем ун валли хуҫана тӗплӗн суйланӑ, ӑна лайӑх пӑхчӑр тенӗ.

Халӗ Виджи Муркаш округӗнчи Мӑн Сӗнтӗр ялӗнче арҫынсен Александр Невский мӑнастирӗнчи лаша ферминче пурӑнать. Ҫӗнӗ хуҫа каланӑ тӑрӑх, йытӑ ҫӗнӗ ҫӗре хӑвӑртах хӑнӑхнӑ, чӗрчунсемпе туслашнӑ. Халӗ вӗсемпе хаваспах вылять.

Виджи шӑпишӗн пӑшӑрханакансене ҫӗнӗ хуҫа хӑйӗн патне хӑнана чӗнет.

Чӑваш Ен ют ҫӗршыв турисчӗсем йышлӑ килекен 10 регион шутне кӗнӗ-мӗн. Кӑҫалхи ҫур ҫулта пирӗн республикӑна ют ҫӗршывсенчен пурӗ 860 пин (!) ҫын килнӗ.

Чӑваш Ен ертӳҫисем ку хыпара хавхаланса пӗлтернӗ май туристсем валли инфраструктура туса панипе сӑлтавланӑ.

«Про Город Чебоксары» хаҫатҫисем вара тӳре-шарана ӗненме васкаманни сисӗнет. «Ҫапах та уҫӑмлах мар-ха: вӗсене Чӑваш Енри илем илӗртнӗ-ши е кунта укҫа ӗҫлесе илме май пурри-ши?», — тесе пуҫ ватнӑ кӑларӑмӑн МАХри каналӗнче.

Чӑваш Ене ҫеҫ мар, ытти региона та мигрантсем килме юратнине пӗлетпӗр-ха. Хӑйсем ӗҫлесе пурӑнма ҫеҫ мар, ачи-пӑчипе, ашшӗ-амӑшӗпе, арӑмӗсемпех килеҫҫӗ. Ача ҫуратсан пособи илсе пурӑнма май пурри, пульницӑсенче тӳлевсӗр сиплени те илӗртет пулӗ...

cap.ru сайтри сӑн

Канаш хулинче пурӑнакан 49 ҫулти хӗрарӑм ҫурт-йӗре найм мелӗпе илнӗшӗн тата коммуналкӑшӑн укҫа тӳлесе пыман. Парӑмӗ вара ӳссех пынӑ, 564 пин тенкӗрен иртнӗ.

Хӗрарӑм парӑма хайӗн ирӗкӗпе татма шухӑшламан та. Ҫавна май пристав унран 55 пин тенкӗ исполнительнӑй сбор шыраса илме йышӑну тунӑ. Ҫапла пӗтӗмӗшле парӑм 619 пин тенке ҫитнӗ.

Пристав ҫак хӗрарӑмӑн харпӑрлӑхӗнче мӗн пуррине те тӗрӗсленӗ. Унӑн Канаш варринче пӗр пӳлӗмлӗ хваттер пур иккен. Пристав ун ҫине арест хунӑ. Хӗрарӑм хваттере сутса ярса парӑма татасран хӑраса ӳкнӗ пулмалла – пӗтӗм парӑма ҫийӗнчех тӳленӗ.

Кун хыҫҫӑн хваттере арестран кӑларнӑ.

cap.ru сайтри сӑн

Шупашкар хулинче пурӑнакан Кирилловсем ҫак кунсенче «тимӗр туя» паллӑ тунӑ.

Виталий Кириловичпа Людмила Яковлевна 65 ҫул каялла ҫемье ҫавӑрнӑ. Вӗсем 2 хӗр ӳстернӗ. Халӗ икӗ мӑнукпа тата пӗр кӗҫӗн мӑнукпа савӑнса пурӑнаҫҫӗ.

Иккӗшӗ те ӗмӗр тӑршшӗпех Шупашкар, республика аталанӑвӗшӗн ӗҫленӗ. Людмила Яковлевна Шупашкарти пир-авӑр комбинатӗнче вӑй хунӑ, Виталий Кириллович вара Ятарлӑ ҫыхӑнура фельдъегерь пулнӑ. Вӗсем иккӗшӗ те – ӗҫ ветеранӗсем, вӑрҫӑ ачисем. Иккӗшӗ те Хисеп грамотисене, Тав ҫырӑвӗсене пӗрре мар тивӗҫнӗ.

Мӑшӑра «тимӗр туй» ячӗпе ЧР Элтеперӗн Олег Николаевӑн ятӗнчен саламлӑ открытка панӑ. Саламлатпӑр мӑшӑра!