МАХри "Хыпар -Вести Чувашии" каналта вырнаҫтарнӑ сӑнӳкерчӗк

Чӑваш Енри икӗ блогер: Ксения Георгиева тата Татьяна Ляпустина - «Контент министерстви» программӑн ҫурма финалне лекнӗ.

Ксения Георгиева – врач тата клиника фармакологӗ, медицина университечӗн преподавателӗ, Татьяна Ляпустина вара — Чӑваш Республикин ача-пӑча вулавӑшӗн методисчӗ.

Маларах асӑннӑ программӑна йӗркелекенни — «Россия – страна возможностей» Президент платформин пӗтӗм Раҫҫейри «ТопБЛОГ» проекчӗ. Унта ҫӗршыври 51 регионтан 12,5 пин ҫын заявка панӑ, вӗсенчен экспертсем 155-шне ҫурма финала суйласа илнӗ. Тӗрӗссипе, ӳркенмесен кирек епле пултаруллӑ автор та хутшӑнма пултарать.

Вӗсен федераци ведомствисене кирлӗ медиапроектсемпе тӗнче тетелӗнче ӗҫлӗҫ. Чи лайӑх блогерсем «ТопБЛОГ» конкурсӑн улттӑмӗш сезонӗн ҫӗнтерӳҫисем пулса тӑрӗҫ.

Таиландра ҫухалнӑ 19 ҫулти хӗр ашшӗ-амӑшӗпе ҫыхӑннӑ. Кун пирки ШӖМ пӗлтерет.

Анна Горшкова ҫывӑх ҫыннисемпе видео урлӑ ҫыхӑннӑ, унӑн йӑлтах лайӑххине, вӑл Бангкокра пулнине пӗлтернӗ, укҫа ыйтман.

Аса илтерер: Шупашкарта пурӑнакан 19 ҫулти Анна Горшкова Чулхулара вӗреннӗ, ҫу уйӑхӗнче вӑл кӗтмен ҫӗртен Раҫҫейрен тухса кайнӑ. Кун пирки никама та каламан-мӗн.

Ҫу уйӑхӗн 19-мӗшӗнче вӑл «Мускав-Пекин» рейспа вӗҫсе кайнӑ. Китайри Раҫҫей посольствинче пӗлтернӗ тӑрӑх, ҫу уйӑхӗн 21-мӗшӗнче Таиланда вӗҫме билет туяннӑ. Унтан вӑл ӑҫта ҫул тытни паллӑ мар.

Каяс умӗн хӗр амӑшӗ патне каярах вуламашкӑн ҫыру хӑварнӑ, унта вӑл хӑй хӑрушсӑрлӑхра иккенне, ӑна никам та тытса чарманнине, пурнӑҫри хӑйӗн вырӑнне шырама тухса кайнине пӗлтернӗ. Ҫывӑх ҫыннисене хӗр шӑв-шав ҫӗклеме, полицие хыпарлама хушман.

«Контактри» сӑн

Суд Канашра пурӑнакан хӗрарӑм, почтӑра операторта ӗҫленӗскер, айӑплӑ тесе йышӑннӑ. Вӑл клиентсене каламасӑр банк карточкисене вӗсен ячӗсемпе хатӗрленӗ.

Ҫакӑ паллӑ: 2025 ҫулхи кӑрлач-ҫу уйӑхӗсенче ҫак хӗрарӑм почта уйрӑмӗнче, ҫав вӑхӑтрах «Почта Банк» агентӗнче ӗҫленӗ. Вӑл 24 клиентран ыйтмасӑрах электрон майпа ал пуснине хатӗрленӗ те вӗсен ячӗпе перекет счечӗ уҫса банк картти илнӗ. Хӗрарӑм паспорт даннӑйӗсене ҫырнӑ, ҫирӗплетмелли кодсене клиентсенченех ыйтнӑ – почта пулӑшӑвне тума кирлӗ тесе суйнӑ. Унсӑр пуҫне документсенче вӗсемшӗн алӑ пуснӑ. Ҫапла вӑл банкран электрон ал пусни тунӑшӑн 30-50 тенкӗ ӗҫлесе илнӗ, кашни карттӑшӑн – 255 тенкӗ.

Хӗрарӑм судра айӑпне йышӑннӑ, следствие пулӑшнӑ. Суд унӑн виҫӗ пӗчӗк ача пуррине шута илсе 250 пин тенкӗлӗх штрафланӑ тата 2 ҫул пулӑшу сферинче ӗҫлеме чарнӑ.

ШӖМ тунӑ сӑн

Ҫурла уйӑхӗн 21-мӗшӗнче кӑнтӑрла Ҫӗмӗрле районӗнчи ҫул-йӗр инспекторӗсем «зебра» ҫинче ҫынна ирттерсе яман «Лада Гранта» машинӑна чарнӑ.

Документсене тӗрӗсленӗ чухне 61 ҫулти водитель вӗчӗрхеннӗ, медосвидетельствовани витӗр тухма килӗшмен. Куншӑн тата ҫул урлӑ каҫакан ҫынна ирттерсе яманшӑн, страховка ҫуккишӗн йӗрке хуралҫисем ун тӗлӗшпе административлӑ материалсем ҫырнӑ.

Кунсӑр пуҫне полицейскисен Ҫӗмӗрле арҫынни юраман хутӑшсене упрама пултарни пирки информаци пулнӑ. Вӗсем водителе ӑна хӑйӗн ирӗкӗпе пама ыйтнӑ. Лешӗ ларкӑч айӗнчен хутаҫ туртса кӑларнӑ, унта 70 грамм ытла мӑкӑнь улӑмӗ пулнӑ.

cap.ru сайтри сӑн

Улатӑр районӗнче пурӑнакан ҫемье пӗрлешнӗренпе 60 ҫул ҫитнине паллӑ тунӑ. Сӑмах кунта – Креппосем пирки.

Юрий Александровичпа Валентина Ивановна 60 ҫул каялла пӗрлешнӗ. Вӗсем 1966 ҫулта ҫемье ҫавӑрнӑ. Ҫамрӑксем Иваньково-Ленино ялӗнчи «Красный луч» колхозра паллашнӑ. Юрий трактористра ӗҫленӗ, Валентина вара бухгалтер пулнӑ.

Мӑшӑр ывӑлсем ӳстернӗ, халӗ мӑнукӗсемпе савӑнаҫҫӗ. Крепповсем ӗмӗр тӑршшӗпех тӑван ялӗнче пурӑннӑ. Вӗсен ҫемье вӑрттӑнлӑхӗ пур: пӗр-пӗрне пулӑшмалла, хисеплемелле тата, паллах, пӗр-пӗрне юратмалла.

Нумай ҫул пӗрле пурӑнакан мӑшӑра ЗАГС пайӗнче ӗҫлекенсем саламлама килнӗ. Эпир те Креппосене кевер туйпа саламлатпӑр!

bataysk-gorod.ru сайтри сӑн

Чӑваш Енре хӑш-пӗр уявра эрех-сӑра сутма чарасси йӑлара. Пӗлӳ кунӗ ҫывхарать. Ҫапла, авӑн уйӑхӗн 1-мӗшӗнче те республикӑри лавккасенче эрех-сӑра сутмӗҫ. Ку ваккӑн сутакансене пырса тивет.

Палӑртса хӑварар; ЧР Министрсен Кабинечӗн 2012 ҫулхи чӳк уйӑхӗн 14-мӗшӗнчи йышӑнӑвӗпе килӗшӳллӗн, Чӑваш Республикинче эрех-сӑрана ҫулталӑкне тӑватӑ кун сутма юрамасть: шкулсенче юлашки шӑнкӑрав ирттернӗ кунсенче (ҫу уйӑхӗн вӗҫӗ), Ачасене хӳтӗлемелли пӗтӗм тӗнчери кун (ҫӗртме уйӑхӗн 1-мӗшӗ), Ҫамрӑксен кунӗнче (ҫӗртме уйӑхӗнчи юлашки шӑматкун) тата Пӗлӳ кунӗнче (авӑн уйӑхӗн 1-мӗшӗ).

«Лиза Алерт» шыравпа ҫӑлав отрячӗн архивӗнчи сӑн

Атӑл леш енче кӑмпана кайсан ҫухалнӑ 65-ри арҫынна шыраҫҫӗ. Геннадий Михайлович Константинов ҫурла уйӑхӗн 20-мӗшӗнче «Заволжье» сад юлташлӑхӗ ҫывӑхӗнчен вӑрмана кайнӑ та каялла таврӑнман. Ӑна халӗ «Лиза Алерт» шыравпа ҫӑлав отрячӗн хастарӗсем те шыраҫҫӗ.

Вӑл 171 сантиметр ҫӳллӗш, ырхан кӗлеткеллӗ, ҫӳҫӗ шуралнӑ, куҫӗ кӑвак. Вӑрмана кайнӑ чухне комуфляж костюм, сӑрӑ тӗслӗ кофта, шурӑ кроссовка тӑхӑннӑ, хӑйӗнпе пӗрле шурӑ тӗслӗ витре илнӗ.

«Лиза Алерт» пуринчен те пулӑшу ыйтать. Ҫакӑн пек ҫынна курнӑ тӑк шӑнкӑравлӑр: 8 800 700-54-52 (Раҫҫейре шӑнкӑрав тӳлевсӗр). Е шырав инфоргӗпе ҫыхӑнӑр: Искрич (Виктория) 89876687081.

Сӑмах май, кӑҫал утӑ уйӑхӗнче Чӑваш Енре «Лиза Алерт» ҫӑлавпа шырав отрядне ҫын ҫухални пирки 28 заявка килнӗ.

Шупашкарти ЖКХпа энергетика управленийӗн пабликӗнчи сӑнӳкерчӗк

Чӑваш Енре ҫурт-йӗрпе коммуналлӑ хуҫалӑхӑн пӗчӗк чиперккине палӑртӗҫ. Тӗрӗссипе ку конкурс — Раҫҫей шайӗнче иртекенскер.

«Юная краса ЖКХ» (чӑв. Ҫурт-йӗрпе коммуналлӑ хуҫалӑхӑн пӗчӗк чиперкки) ят панӑ конкурса ӗҫсене авӑн уйӑхӗн 30-мӗшӗччен йышӑнаҫҫӗ. Унта 7 ҫултан пуҫласа 17 ҫулчченхи ачасем хутшӑнайӗҫ. Вӗсене ҫулне кура виҫӗ ушкӑна пайласа хаклӗҫ: 7-9 ҫултисем, 10-14 ҫултисем тата 15-17 ҫултисем.

Конкурс 12 номинаципе иртет. Вӗсем пурте хула хуҫалӑхен тӗп енӗпе ҫыхӑннӑ. Ҫав шутра, сӑмахран, «Раздельный сбор ТКО» (чӑв. Йӑлри каяша уйрӑммӑн пуҫтарасси), «Создание комфортной городской среды» (чӑв. Хӑтлӑ хула тӑвасси), «Урбанистика» тата ытти те.

Конкурса хутшӑнакансен материалӗсене конкурс комиссийӗ хак парӗ.

«Контактри» сӑн

«Раҫҫейри ӗҫ» кадрсен центрӗнче «Профессире чи лайӑххи» конкурсӑн регионти тапхӑрне пӗтӗмлетнӗ. Шупашкар хулинче ӗҫлекен Екатерина Иванова «Чи лайӑх карьера консультанчӗ» номинацире мала тухнӑ. Халӗ унӑн Чӑваш Ен чысне федераци шайӗнче хӳтӗлемешкӗн хатӗрленмелле.

Чи лайӑх кадрсен центрӗ Етӗрнери центр тесе палӑртнӑ. Ӑна Михаил Чернов ертсе пырать. Ҫурла уйӑхӗнче 10-мӗшӗ валли хатӗрленӗ статистика кӑтартнӑ тӑрӑх, Етӗрне районӗнче регистрациленӗ 53 ӗҫсӗр ҫын пуҫне вӑтамран пилӗк ваканси лекет.

Палӑртса хӑварар: конкурс «Кадрсем» наци проекчӗпе килӗшӳллӗн виҫҫӗмӗш ҫул иртет. Ӑна специалистсен професси ӑсталӑхне ӳстерес тӗллевпе йӗркелеҫҫӗ.

istockphoto.com сайтри сӑн

Муркаш районӗнчи хӗрарӑм, падагогика тытӑмӗнче ӗҫлекенскер, прическа улӑштарма шухӑшланӑ та укҫасӑр тӑрса юлнӑ.

Ултавҫӑсенчен шар курнӑскер полицие заявлени ҫырма пынӑ. Акӑ мӗн каласа кӑтартнӑ вӑл. Хӗрарӑм прическа улӑштарас тесе малтан хӑйне мӗнлереххи кайнине тӗрӗслеме шухӑшланӑ та телефонӗ ҫине сарӑм лартнӑ. Анчах кун хыҫҫӑнах унӑн телефонӗ сӳнсе ларнӑ. Хӗрарӑм банк сарӑмне урӑх мелпе кӗнӗ те счечӗ ҫинчен 50 пин тенкӗ ҫухалнине курнӑ. Ҫакӑ паллӑ: вӑл телефонӗ ҫине лартнӑ сарӑмра вирус пулнӑ. Ултавҫӑсем укҫа вӑрлас тесе юри ҫапла хӑтланаҫҫӗ.

ШӖМ асӑрхаттарать: сарӑмсене официаллӑ ҫӑлкуҫсем урлӑ кӑна лартмалла. Сиенлӗ программӑсем анлӑ сарӑлнӑ тӳлевсӗр сарӑмсенче «пытанма» пултараҫҫӗ.