Инкеклӗ лару-тӑру министерстви тунӑ сӑн

Вӑрнар округӗнчи Ишлей ялӗнче 64 ҫулти арҫыннӑн килӗ-ҫурчӗ, хуралтӑ таврашӗ ҫунса кайнӑ. Ҫулӑм 140 яхӑн тӑваткал метр ҫинче алхаснӑ.

Юрать-ха, ҫӑлавҫӑсем пушара часах сӳнтерме пултарнӑ, кӳршӗ ҫурт ҫине куҫма паман. Халӗ ҫулӑм мӗнрен тухнине тӗпчеҫҫӗ.

Сӑмах май, юлашки талӑкра Чӑваш Енре тӑватӑ пушар пулнӑ. Шупашкар округӗнчи Ҫӑкалӑхьялӗ патӗнче типӗ курӑк ҫуннӑ. Ҫулӑм пӗтӗмпе 300 тӑваткал метр ҫинче алхаснӑ.

ШӖМ тунӑ сӑн

2025 ҫулхи чӳк уйӑхӗн 12-мӗшӗнче Ҫӗнӗ Шупашкарта 10 ҫулти арҫын ачана таптаса кайнӑ троллейбус водительне 2 ҫуллӑха колони-поселение ӑсатма йышӑннӑ.

Аса илтерер: ку пӑтӑрмах каҫ кӳлӗм Винокуров урамӗнче пулнӑ. Ача телефонпа калаҫса светофор хӗрлӗ ҫутнӑ чухне ҫул ҫине тухнӑ. Ҫав вӑхӑтра 55-мӗш троллейбус пынӑ. Вӑл чарӑнса ӗлкӗреймен, арҫын ачана вилмеллех таптаса кайнӑ. Руль умӗнче 39 ҫулти хӗрарӑм пулнӑ.

Колони-поселенире 2 ҫул ларнисӗр пуҫне водителӗн транспортпа 2 ҫул ҫӳреме юрамасть.

max.ru/progorod21 каналтан илнӗ сӑнӳкерчӗк

Пӗрремӗш каналпа кӑтартакан «Мужское/Женское» телекӑларӑмра ӗнер, ҫу уйӑхӗн 13-мӗшӗнче, Чӑваш Енри ҫемьене кӑтартнӑ. Унта пӗр хӗрарӑм хӑйӗн кӳршӗ хӗрарӑмне эрех ӗҫсе пурӑнать тесе ӳпкелесе калаҫнӑ, амӑшӗ эрех ӗҫсе пурӑннӑран унӑн виҫӗ ачи нушаланать тесе пӑшӑрханнӑ.

Нумай ачаллӑ хӗрарӑм, Надежда Колосьева, ӗнентернӗ тӑрӑх, вӑл хӑй нуша курса пурӑнать. Унпа пӗрле пурӑнакан арҫын усал иккен, ӑна хӗнет имӗш, ачисене килтен те хӑваласа кӑларса ярать-мӗн. Хӗрарӑм ӗнентернӗ тӑрӑх, арҫын икӗ ҫулхи ывӑлне хӑйӗн ашшӗ-амӑшӗ патне илсе кайнӑ. Вӗсем вара 200 километрта пурӑнаҫҫӗ. Нумай ача амӑшӗ каланӑ тӑрӑх, ниҫта кайма ҫукран вӑл усал арҫынна чӑтса пурӑнать.

Пӗрле пурӑнакан арҫын тата вӗсен кӳршисем пачах урӑхла ӗнентереҫҫӗ. Вӗсем Надеждӑна эрех ӗҫет тесе калаҫҫӗ иккен.

21.мвд.рф сӑнӳкерчӗкӗ

Ҫӗнӗ Шупашкарта ӳсӗр арҫын йӗрке хуралҫине хулӗнчен ҫапнӑ, унтан вӗсене ҫынсен умӗнче кӳрентермелле сӑмахсем каласа пӗтернӗ.

Пӑтӑрмах пӗлтӗрхи раштав уйӑхӗн каҫхине хулари кафесенчен пӗринче пулса иртнӗ. Унта кӗнӗ патрульпе пост службин ӗҫченӗсем пӗр ӳсӗре асӑрханӑ. Пакунлисене курсан вӑл тухса тарма тӑнӑ. Лешсем унӑн докуменчӗсене тӗрӗслес тенӗ. 40 ҫулти арҫын унччен судпа айӑпланнӑскер пулнӑ, вӑрах вӑхӑт тӗрмере ларнӑ.

Йӗрке хуралҫисем тӗрӗслени килӗшменрен вӑл вӗсенчен пӗрине хулӗ тӗлӗнчен ҫапнӑ, унтан сӑмахпа кӳрентерме тапранса кайнӑ.

Урӑлсан тата пуҫиле ӗҫ пуҫарсан арҫын чунтан ӳкӗнме пуҫланӑ, вӑл каҫару та ыйтнӑ. Ҫавӑнпа суд ӑна хальхинче тӗрмене хупса хумалла туман — икӗ ҫуллӑха тӗрмене хупса хумасӑр ирӗкрен хӑтарма йышӑннӑ.

Шупашкарта пурӑнакан, республикӑри пысӑк производство комплексӗсенчен пӗринче инженерта ӗҫлекен 62 ҫулти хӗрарӑм Федерацин хӑрушсӑрлӑх службин ӗҫченӗсене пулӑшас тесе улталаннӑ. Тӗрӗссипе, унтисене хайхи пулӑшӑвӗ кирлӗ пулман. Хӗрарӑма ултавҫӑсем ҫавӑн пек ӗнентернӗ.

Пӗр уйӑха яхӑн маларах ун патне Пенси фондне ӗҫ кӗнекипе пымалла тесе шӑнкӑравланӑ, унччен вара электрон черете ҫырӑнмалла, ун валли СМС-ҫырури кода каламалла тенӗ.

Шӑнкӑравлакан хӗрарӑм инженерӑн СНИЛС номерне те каланӑ.

Кайран ФХС ӗҫченӗ текен арҫын шӑнкӑравланӑ, ултавҫӑсене тытса чарма пулӑшма ыйтнӑ. Вара вӑл хайхисем мӗн каланине итленӗ: банкран 1 миллион тенкӗ илнӗ, вӑл укҫана хваттер туянакан тусне вӑхӑтлӑха паратӑп тесе хӑйӗн хӗрне те, банк ӗҫченӗсене те ӗнентернӗ. Укҫана банкомат урлӑ такамсене куҫарса панӑ.

forum.zarulem.ws сайтра вырнаҫтарнӑ сӑнӳкерчӗк

Ҫуллахи вӑхӑтра ялсенче правасӑр ачасем скутерпа чупнине час-часах курма пулать. Хӑш чухне ку транспорта нимрен хӑрама пӗлмен яш-кӗрӗм ҫеҫ мар, ӳсӗрсем те ҫула тухаҫҫӗ.

Вӑрнар районӗнче ун пеккисенчен пӗри нумаях пулмасть Патшалӑхӑн автоинспекциӗн ӗҫченӗсен куҫӗ тӗлне лекнӗ. Мототранспортпа пыракан ҫын урах мар пек туйӑннӑран ӑна пакунлисем чарас тенӗ. Хайхи ҫын алкотестерпа тӗрӗсленме те, тухтӑрсем патне кайма та килӗшмен. Унтан та ытларах — хайхин водитель прави те пулман. Тытса чарнӑ чухне вӑл йӗрке хуралҫисене хирӗҫ тӑма хӑтланнӑ.

Халӗ скутера штрафстоянкӑна ӑсатнӑ, ӳсӗрле тата водитель прависӗр ҫула тухнӑ арҫын тӗлӗшпе вара РФ Пуҫиле кодексӗн 264.1-мӗш статйипе пуҫиле ӗҫ пуҫарнӑ.

cheb.ru сӑнӳкерчӗкӗ

Паян Шупашкарти аэропорта каллех хупса хунӑ. Вӑхӑтлӑха.

Хулара пилотсӑр вӗҫекен аппаратсем тата ракета хӑрушлӑхӗ пуртан сирена янӑранине эпир кӑшт маларах хыпарласа ӗлкӗрнӗччӗ. Ҫавна май самолётсем те вӗҫме чарӑннӑ. Ку вӑл — хӑрушсӑрлӑх правилине пӑхӑнас тӗллевпе тунӑ йышӑну.

Росавиаци пӗлтернӗ тӑрӑх, ҫак самантра Тамбоври, Пензӑри, Сарӑтури, Самарти, Чӗмпӗрти аэропортсене хупса хунӑ.

Сӑмах май каласан, паян ирпе, ҫичӗ сехет хыҫҫӑн, сирена Ҫӗнӗ Шупашкарта та янӑранӑ.

max.ru/Radar_Cheboksary сӑнӳкерчӗкӗ

Паян ирхине Шупашкарта каллех сиренӑсем янӑраса кайнӑ. Шкулсемпе ача пахчисене инҫет ҫыхӑну мелӗпе ӗҫлеттереҫҫӗ. Пӗрремӗш сменӑна пынӑ ачасене каялла киле яраҫҫӗ иккен. Иккӗмӗш сменӑра вӗренекенсен шкула каймаллипе каймалла марри кун каҫипе лару-тӑру епле пулнинчен килӗ.

Ывӑл-хӗрне ача пахчине яракан ашшӗ-амӑшне тӗпренчӗкӗсене килте хӑварма сӗннӗ.

Сӑмах май каласан, иртнинче Шупашкарта пилотсӑр вӗҫекен аппаратсем ватса пӗтернӗ ҫуртсене малалла юсаҫҫӗ.

Инкеклӗ лару-тӑру министерстви тунӑ сӑн

Республикӑра пӗр талӑкра типӗ курӑк ҫуннине пула икӗ пушар тухнӑ.

Вӗсенчен пӗри Шупашкарти «Травянка» сад юлташлӑхӗнче пулнӑ. Юрать-ха, пушарнӑйсем ҫулӑма ҫуртсем ҫине куҫма паман, вӑхӑтра сӳнтернӗ.

Тепӗр тӗслӗхӗ Улатӑр округӗнчи Стемас ялӗ ҫывӑхӗнче пулнӑ. Унта типӗ курӑк пӗр гектар лаптӑк ҫинче ҫуннӑ.

Инкеклӗ лару-тӑру министерствин ӗҫченӗсем пушар хӑрушсӑрлӑхне пӑхӑнмаллине аса илтереҫҫӗ. Республикӑра халӗ пушара хирӗҫ режим вӑйра. Ҫавна май вӑрман ҫывӑхӗнче кӑвайт чӗртме, типӗ курӑк ҫунтарма юрамасть. Уйрӑмах ҫиллӗ ҫанталӑкра асӑрхануллӑ пулмалла.

Патшалӑх автоинспекцийӗ тунӑ сӑн

Ҫӗнӗ Шупашкарта амӑшӗпе ачине машина ҫапса кайнӑ. Ку ӗнер 16 сехетре пулса иртнӗ.

Строительсен урамӗнче хӗрарӑм велосипедпа пыракан ачипе ҫул урлӑ каҫма тӑнӑ. Вӗсем «зебрӑпа» каҫма пуҫланӑ. Ҫав вӑхӑтра иномарка вӗсем ҫине пырса кӗнӗ. Амӑшӗпе ачи велосипечӗ-качки ҫул хӗрринелле вӑркӑнса кайнӑ.

Амӑшӗпе ачи хӑйсене мӗнле туйни пирки официаллӑ информаци ҫук.