Патшалӑх автоинспекцийӗ тунӑ сӑн

Шупашкар хулинче икӗ шкул ачи «Лада Гранта» машина айне пулнӑ. Телее, вӗсем вӑйлах аманман. Вӗсене пульницӑна тӗрӗслеме илсе кайнӑ.

Ку эрнекун, юпа, уйӑхӗн 9-мӗшӗнче, 18 сехет ҫурӑра Кадыков урамӗнчи 30-мӗш ҫурт ҫывӑхӗнче пулнӑ. Икӗ шкул ачи «зебрӑпа», светофор ҫук ҫӗрте, ҫул урлӑ каҫма тӑнӑ

Ҫавӑн чухне вӗсем ҫине «Лада Гранта» пырса кӗнӗ. Руль умӗнче 1970 ҫулта ҫуралнӑ арҫын ларнӑ.

Водитель медосвидетельствовани витӗр тухнӑ. Вӑл ӳсӗр пулманни паллӑ. Халӗ ку ӗҫ-пуҫ тӗлӗшпе тӗрӗслев пырать.

forum.zarulem.ws сӑнӳкерчӗкӗ

Шупашкарта урапа ылмаштарнӑ хыҫҫӑн машинӑна штрафстоянкӑна ӑсатнӑ. Урапа улӑштарнишӗн ята кӗмен-ха. Руль умне ӳсӗрле ларнишӗн.

Ӗнер, юпа уйӑхӗн 10-мӗшӗнче, ирхине «Мегаполис» хӑна ҫурчӗ умӗнче иртен-ҫӳрен шавлӑ ушкӑна асӑрханӑ. Ӳсӗр ушкӑн «Ауди» автомобилӗн шӑтса кайнӑ урапине ылмашарнӑ.

Ҫынсем 102 номерпе шӑнкӑравласа пӗлтернӗ. Машина вырӑнтан хускалнӑ-хускалман ҫул-йӗр патрулӗн экипажӗ пырса ҫитнӗ. Руль умӗнче Шупашкарта пурӑнакан 34 ҫулти арҫын ларнӑ. Йӗрке хуралҫисене вӑл хӑй тӑм урӑ тесе ӗнентерме пӑхнӑ. Тӗрӗсленме хайхи ним тусан те килӗшмен. Ҫавна май ун тӗлӗшпе РФ Адмкодексӗн 12.26 статйин 1-мӗш пайӗпе протокол ҫырнӑ. Водителе ку статьяпа 45 пин тенкӗлӗх штрафлама тата икӗ ҫуллӑха водитель прависӗр хӑварма пултараҫҫӗ. Унсӑр пуҫне машинӑна штрафстоянкӑна ӑсатнӑ.

max.ru/channel_chuvashia_21 каналтан илнӗ сӑнӳкерчӗк

Кун пекки хальлӗхе пулманччӗ-ха, анчах хальхинче тӑшман Яндексӑн дата-центрне тапӑннӑ. Кун пирки «Яндекс» компани хыпарланӑ.

Тӑшман Рязань ҫывӑхӗнчи объекта кӗҫӗр ҫӗрле тапӑннӑ. Ҫавӑн хыҫҫӑн «Yandex Cloud» инфраструктурин пӗр пайӗ, ҫав шутра даннӑйсен бази, пӗлӗт управҫисем, искусство интеллекчӗн тата мониторинг системин сервисӗсем ӗҫлеме пӑрахнӑ.

Карттӑ тӑрӑх пӑхсан, Чӑваш Ене ку пӑтӑрмах пырса тивмен.

Яндекс хыпарланӑ тӑрӑх, Рязань патӗнчи объект пуҫӗпех ӗҫлеме пӑрахнӑ.

Пилотсӑр вӗҫекен аппаратсем маркетплейссене маларах темиҫе хутчен те тапӑннӑччӗ-ха. «Озон» та, «Валдберриз» та пӗрре ҫеҫ мар шар курнӑччӗ. Складсене сирпӗтнӗрен тавар хуҫисем те шар кураҫҫӗ. Халӗ, ав, Яндексӑн дата-центрне тапӑннӑ.

max.ru/pcheb_21 сӑнӳкерчӗкӗ

Паян Ҫӗрпӳ районӗнче «Ниссан» автомобиль ҫул ҫинчи инкеке лекнӗ. «М-7» федераци ҫулӗпе Ҫӗрпӳ еннелле кайнӑ чухне вӑл пӑрӑннӑ чухне руле йӗркеллӗ пӑрса ӗлкӗреймен, йывӑҫ ҫине кайса ҫапӑннӑ. Ун хыҫҫӑн машина хыпса илнӗ.

Ҫӑмӑл автомашина рулӗ умӗнче пулнӑ 22 ҫулти каччӑпа 18 ҫулти хӗр-пассажира больницӑна илсе кайнӑ.

Шупашкарта вара паян тепӗр инкек пулнӑ. «Лада» машина Трактор тӑвакансен проспектӗнче пӑрӑннӑ чухне юпа ҫине пырса ҫапӑннӑ. «ВАЗ-2107» рулӗ умӗнче 22 ҫулти каччӑ пулнӑ. Унӑн водитель прави те, асӑннӑ транспорт руле умне ларма ирӗк паракан документ та пулман. Пӑтӑрмаха ҫакаланнӑ каччӑ ҫӑмӑл машинӑпа каҫхи клубран таврӑннӑ. Вӑл руль умне ӳсӗрле ларнипе ларманнине тӗрӗсленӗ те ӗҫни ҫиеле тухнӑ.

Етӗрне хулинче пурӑнакан икӗ карчӑк вӑрҫса кайнӑ.

Чӑваш Енӗн прокуратуринче пӗлтернӗ тӑрӑх, вӗсем пӗрне-пӗри унчченех килӗштермен иккен-ах. Кӑҫалхи ҫулла, утӑ уйӑхӗн 9-мӗшӗнче, каллех харкашмалли тупӑннӑ. 73-ри кинмейрен пӗри теприн ҫынсен умӗнчех усал сӑмахпа вӑрҫса пӗтернӗ иккен.

Унӑн тантӑшӗ те аптӑраса ӳкекен йышши пулман, вӑл лешне телефонти видеопа ӳкерсе илнӗ. «Вӑл мана кӳрентерчӗ», — тесе ватӑ ҫын пакунлисенчен пулӑшу ыйтас тенӗ.

Йытӑпа кушак пек пурӑнаканскерсен тавлашӑвӗпе ҫыхӑннӑ ӗҫ малтан прокуратурӑна, кайран суда ҫитнӗ. Тантӑшне усал сӑмахпа кӳрентерсе пӗтернӗ карчӑка суд административлӑ майпа явап тыттарнӑ. Ӑна 3 пин тенкӗ штраф хурса пама йышӑннӑ. Халӗ ватӑ ҫыннӑн кӗсьене ҫӳхетме тивӗ.

Инкеклӗ ӗҫсен министерствин Чӑваш Енри управленийӗн сӑнӳкерчӗкӗ

Чӑваш Енре паян, юпа уйӑхӗн 6-мӗшӗнче, ирхи пушарта 68 ҫулти арҫын вилнӗ. Инкек Сӗнтӗрвӑрри хулинче пулса иртнӗ.

Пушар уйрӑм ҫын килӗнче ирхи икӗ сехетре алхасма тытӑннӑ. Ҫунакан пӳртрен хӗрарӑм хӑй тӗллӗнех тухса ӗлкӗрнӗ-ха, ӑна ҫапах та тухтӑрсен пулӑшӑвӗ кирлӗ пулса тухнӑ. Арҫын вара пӳртрен тухайман, унӑн пурнӑҫӗ татӑлнӑ.

Пушара сӳнтерме Инкеклӗ ӗҫсен министерствин тӑватӑ техникипе 8 специалисчӗ вырӑна пырса ҫитнӗ.

Сӑнӳкерчӗк тӑрӑх хакласан, пӳртрен ним те юлман темелле, кӑшӑлӗ ҫеҫ ларать.

Специалистсем малтанласа палӑртнӑ тӑрӑх, килте ҫутӑ пӑралукӗ юсавсӑр пулма пултарнӑ. Чӑн сӑлтава пушарпа техника экспертизи туса ирттернӗ хыҫҫӑн ҫеҫ татса калайӗҫ. Унсӑр пуҫне судпа медицина экспертизи ирттерме те палӑртнӑ.

Шупашкарта пӗр машина икӗ ачана чутах таптаса кайман. Пӑтӑрмах Коммуналлӑ слобода урамӗнче пулса иртнӗ. Ҫав самант тепӗр водителӗн авторегистраторӗ ҫине лекнӗ.

«Аутлендер» автомобиль 12-мӗш шкул патӗнче светофорӑн симӗс ҫутипе каҫакан икӗ ача ҫине чутах пырса кӗмен. Кроссовер светофорӑн хӗрлӗ ҫутине пӑхӑнмасӑр малалла вӗҫтернӗ. Темле майпа вӑл тормоза пусса ӗлкӗрнӗ — машина ачасем ҫине пырса кӗрсе каяйман.

Видеорегистратор «Mitsubishi Outlander» автомобиль ҫул хӗресленнӗ вырӑнта светофорӑн хӗрле ҫутине пӑхмасӑрах каҫса кайма тӑни курӑнать. Ҫав вӑхӑтра ачасем светофорӑн симӗҫ ҫутипе ним пулман пек ҫул урлӑ каҫнӑ.

Ку ачасем кипкепе ҫуралнӑ тесси ҫеҫ юлать. Ахальлӗн чипер ҫӗртех шар курма пулать.

Следстви комитечӗ тунӑ сӑн

Ҫӗрпӳ округӗнче паян пулӑҫ путса вилнӗ. Инкек Паваркасси ялӗ ҫывӑхӗнче пулнӑ.

1959 ҫулта ҫуралнӑ арҫын Кӗҫӗн Ҫавал юханшывӗнче пулӑ тытнӑ чухне путса вилнӗ. Ҫакна ял ҫыннисем курнӑ, унӑн виллине ҫыран хӗррине илсе тухнӑ.

Ку ӗҫ-пуҫ тӗлӗшпе тӗрӗслев пырать. Следовательсем инкек вырӑнне пӑхса тухнӑ. Ҫапла пӗлтерет Раҫҫей Следстви комитечӗн Чӑваш Енри управленийӗ.

pravdapfo.ru сайтран илнӗ сӑнӳкерчӗк

Муркаш районӗнче пурӑнакан арҫынна ҫӗре ҫумкурӑк айне тунӑшӑн штрафланӑ. Кун пирки Россельхознадзорӑн республикӑри управленийӗ пӗлтернӗ.

Муркаш районӗнчи пӗр ялта пурӑнакан ҫав арҫыннӑн 47,76 гектар лартӑк ҫӗр пур иккен. Ӑна ял хуҫалӑх тӗллевӗпе усӑ курмалла. Апла пулсан, ун ҫинче ял хуҫалӑх культурине туса илмелле. Анчах хуҫа ҫӗрпе усӑ курмасть иккен. Сухаламан, вӑхӑтра ҫулса тирпейлемен ҫӗр часах хытхура тата йывӑҫ-тӗм хунавӗ айне пулать.

Кӑҫалхи нарӑс уйӑхӗнче ҫӗр хуҫине Россельхознадзор управленийӗ ҫӗре тивӗҫлипе уса курмалли пирки асӑрхаттару хучӗ ҫырса панӑ. Ҫӗре кӑҫалхи ҫӗртме уйӑхӗн 22-мӗшӗччен пусӑ ҫаврӑнӑшне кӗртмелле пулнӑ. Анчах унӑн хуҫи каланине итлемен.

Халӗ ку ӗҫе суд пӑхса тухнӑ та ҫӗр хуҫине штрафлама йышӑннӑ.

ҪҪХПИ тунӑ сӑн

Ӗнер, юпа уйӑхӗн 2-мӗшӗнче, Шупашкар округӗнчи Ишек ялӗ патӗнче хӗрарӑм вилнӗ: ӑна икӗ машина ҫапса кайнӑ.

Малтанлӑха палӑртнӑ тӑрӑх, каҫхи 6 сехетре хӗрарӑм «зебра» тӑрӑх каҫма тӑнӑ. Ҫавӑн чухне ӑна «Киа Спортейдж» машина, Ҫӗмӗрле хули енчен Шупашкар еннелле каяканскер, сулахай тӗкӗрпе лекнӗ. Руль умӗнче 1970 ҫулта ҫуралнӑ арҫын ларнӑ. Кун хыҫҫӑн хӗрарӑм ҫул ҫине ӳкнӗ те «Лада Приора» айне лекнӗ. Унта руль умӗнче 2001 ҫулта ҫуралнӑ арҫын пулнӑ.

Хӗрарӑм йывӑр сурансене пула васкавлӑ медпулӑшу киличчен вилнӗ. Вӑл кам иккенне тӳрех палӑртайман, вӑл 65-70 ҫулсенчи пек курӑннӑ.