Патшалӑх автоинспекцийӗ тунӑ сӑн

Хӗрлӗ Чутай округӗнче питбайкпа ҫыхӑннӑ авари пулнӑ. Шел те, унта ҫын вилмелле аманнӑ.

Чӑваш Енри Патшалӑх автоинспекцийӗ пӗлтернӗ тӑрӑх, авӑн уйӑхӗн 5-мӗшӗнче каҫхи 9 сехет те 5 минутра Штанаш ялӗнче 1971 ҫулта ҫуралнӑ арҫын кӳршин питбайкӗпе ҫула тухнӑ. Анчах ҫул пӑрӑнӑшӗнче руле итлеттереймен – электролини юпи ҫине пырса кӗнӗ. Вӑл йывӑр сурансене пула ҫавӑнтах вилнӗ.

Ҫакӑ паллӑ: арҫыннӑн права та ҫук. Чӑваш Енри Патшалӑх автоинспекцийӗ пӗлтернӗ тӑрӑх, водитель урӑ е ӳсӗр пулнине палӑртма химипе токсикологи тӗпчевӗ тӑвӗҫ.

Аса илтерер: ҫак кунсенче Хӗрлӗ Чутай округӗнче ӳсӗр хӗрарӑм машинӑпа кювета чӑмнӑ, слонра икӗ ачи пулнӑ. Иккӗшне те пульницӑна илсе кайнӑ, кӗҫӗннин сывлӑхӗ йывӑр пулнӑ.

ШӖМ тунӑ сӑн

Хӗрлӗ Чутай округӗнче авари пулнӑ: икӗ пӗчӗк ача шар курнӑ. Руль умӗнче вара ӳсӗр хӗрарӑм ларнӑ.

ЧР ШӖМӗ пӗлтернӗ тӑрӑх, авари паян, авӑн уйӑхӗн 4-мӗшӗнче, 14 сехет тӗлнелле Хӗрлӗ Чутай ҫывӑхӗнче «Сӑр» ҫул ҫинче пулнӑ. «Форд Фьюжн» машина ҫул ҫинчен тухса кайса кювета чӑмнӑ та ҫаврӑнса ӳкнӗ. Руль умӗнче 28 ҫулти ӳсӗр хӗрарӑм ларнӑ. Ҫитменнине, унӑн водитель прави те ҫук.

Салонра унӑн икӗ ывӑлӗ – 4-ри тата 5 ҫулти ачасем – пулнӑ. Иккӗшне те пульницӑна илсе кайнӑ. Тухтӑрсем кӗҫӗннин сывлӑхӗ йывӑр пулнине палӑртнӑ.

Хӗрарӑмӑн – виҫӗ ача. Вӑл тунман: руль умне лариччен эрех ӗҫнӗ. Медосвидетельствовани юнри алкоголь 0,325 мг/л-пе танлашнине палӑртнӑ.

Халӗ полици ӗҫченӗсем ӗҫ-пуҫа уҫӑмлатаҫҫӗ. Тӗрӗслев малалла пырать.

max.ru/channel_chuvashia_21 каналтан илнӗ сӑнӳкерчӗк

Шупашкарти Хӗрлӗ тӳремре тӗлӗнмелле пӑтӑрмах пулса иртнине эпир унччен пӗлтернӗччӗ-ха. Аса илтерер: унта проката илсе ачасем ярӑнмалли машина тӗреклӗ арҫын ҫине пырса кӗнӗ. Инкекре арҫын хытах аманнӑ, унӑн ури хуҫӑлнӑ. Инкек вырӑнне васкавлӑ пулӑшу тухтӑрӗсене тата патшалӑхӑн ҫул-йӗр хӑрушсӑрлӑхӗн инспекторӗсене чӗнсе илнӗ.

Хӗрлӗ тӳремре электросамокатпа ярӑнма юрамасть иккен, анчах ача машинисене вара проката илсе ярӑнса ҫӳреҫҫӗ. Ҫав машинӑсем тепӗр чухне ҫынсем ҫине те пырса кӗреҫҫӗ-мӗн.

МАХри «Первый чувашский» каналта паян пӗлтернӗ тӑрӑх, унти машинӑсем саккуна пӑсса ӗҫленӗ-мӗн. Ку хыпара илтсен ирӗксӗрех ҫапла ыйту ҫуралӗ: йӗркене пӑсса проката паракан ача-пӑча ярӑнмалли машинӑсем пирки тӳре-шара ҫу каҫипе те илтмен, пӗлмен, курман-ши вара?

МАХри channel_chuvashia_21 каналтан илнӗ сӑнӳкерчӗк

Шупашкар хулинчи шкулсенчен пӗрне Пӗлӳ кунӗнче пӗр яш линейкӑна питбайкпа пынӑ. Ун чухне вӑл тепӗр ачана чутах ҫапса кайман. Хӑшӗсем патшалӑхӑн ҫул-йӗр хӑрушсӑрлӑхӗн инспекцине пӗлтерес тенӗ, теприсем вара яша хута кӗнӗ.

Пӑтӑрмах хулан Ҫурҫӗр-Хӗвеланӑҫ районӗнче вырнаҫнӑ 45-мӗш шкулта пулса иртнӗ.

Апла пулин те ҫемьене йӗрке хуралҫисем чӗнсе илнӗ-илнех. Унта яшӑн амӑшӗ ывӑлне хӳтӗленӗ: «У всех во дворе есть, чем мое дите хуже!» (чӑв. Пурин те картишӗнче ларать, манӑн ачам ыттисенчен мӗнпе кая?).

Линейкӑна пынӑ питбайка амӑшӗ 220 пин тенкӗ кредит илсе туянса панӑ. Йӗрке хуралҫисем ҫемьене 30 пин тенкӗлӗх штрафланӑ, унсӑр пуҫне яшӑн ашшӗ-амӑшне хӑйсен тивӗҫне йӗркеллӗ пурнӑҫламаншӑн административлӑ май майпа явап тыттарӗҫ.

Следстви комитечӗ тунӑ сӑн

Чӑваш Енри следовательсем Шупашкар хулинче пулса иртнӗ тискер преступление уҫӑмлатаҫҫӗ. Ӗнер каҫхине, авӑн уйӑхӗн 1-мӗшӗнче, Трактор тӑвакансен проспектӗнчи пӗр ҫуртра 15 ҫулти хӗр виллине тупнӑ.

Следстви версийӗ тӑрӑх, ӑна хӑйӗнпе тантӑш ҫамрӑк пӑвса вӗлернӗ. Вӗсем вӑрҫӑнса кайнӑ. Каччӑ хӗре зарядник пралукӗпе пӑвнӑ. Тискер преступление тусан вӑл тарнӑ.

РФ Следстви комитечӗн Чӑваш Республикинчи следстви органӗсем ку тӗслӗх тӗлӗшпе пуҫиле ӗҫ пуҫарнӑ. Ҫак ӗҫе тума пултарнӑ ҫамрӑка тытса чарнӑ. Ӑна Сӗнтӗрвӑрри хулинче шыраса тупнӑ. Вӑл айӑпне йышӑннӑ.

Следстви малалла пырать.

чеб.ру сӑнӳкерчӗкӗ

Ҫӗнӗ Шупашкар хӗрарӑмӗ урамра ӳсӗр ҫывӑракан пӗлӗшӗн укҫине вӑрланӑ. Халӗ ҫавӑншӑн ӑна тӗрмене хупса хумасӑр ҫулталӑклӑха ирӗкрен хӑтарма йышӑннӑ.

Ҫӗнӗ Шупашкарта пурӑнакан пӗр пенсионерка пенсин пӗр пайне кашни уйӑхрах пухса пынӑ. Ӑна вӑл банкра тытман, ялан ҫумра илсе ҫӳренӗ. Пухнӑ укҫапа вӑл хваттер юсас тенӗ.

Пӗр кунхине хӗрарӑм 250 тенкӗ укҫа, карас телефонӗ тата хутаҫри 235 пин тенкине илсе уҫӑлма тухнӑ. «Бистро» кафене кӗрсе икӗ черкке эрех ӗҫнӗ. Тахҫан та пӗрре ҫеҫ ӗҫет-мӗн те часах ӳсӗрӗлсе кайнӑ. Кафере паллакан хӗрарӑма курсан унпа ӗҫме тытӑннӑ, кайран мӗн пулса иртнине астумасть.

Вӑл Ҫӗнӗ Шупашкарти хула больницинче ҫеҫ тӑна кӗнӗ. Ҫипуҫӗ вараланса пӗтнӗ пулнӑ, пичӗ суранланнӑ, телефонпа укҫа ҫумра пулман.

Тӗпчев вӑхӑтӗнче ҫакна палӑртнӑ. Пенсионерка каҫхи 2 сехетре «Турист» суту-илӳ ҫурчӗ патӗнчен иртсе пынӑ чухне аптека тӗлӗнчи икӗ машина хушшинче персе аннӑ. Тепӗр сехетрен ӑна малтанхи пӗлӗш-хӗрарӑм тата икӗ арҫын асӑрханӑ. Хӗрарӑм укҫа хутаҫҫине кӗсьене илсе чикнӗ.

Ҫын укҫине илекенни судра ӗнентернӗ тӑрӑх, хутаҫра 30 пин ҫеҫ пулнӑ.

Малалла...

Инкеклӗ лару-тӑру министерстви тунӑ сӑн

Паян, ҫурла уйӑхӗн 31-мӗшӗнче, Сӗнтӗрвӑрри районӗнчи Шуршӑл ялӗнче Парк урамӗнчи икӗ хутлӑ ҫурт ҫуннӑ. Пушар тухни пирки ятарлӑ службӑна ирхи 3 сехетсенче пӗлтернӗ.

59 ҫулти кил хуҫи хӗрарӑм тӗтӗм шӑршипе вӑранса кайнӑ. Вӑл ҫулӑма малтан хӑй тӗллӗн сӳнтерме хӑтланнӑ, анчах май килмен, пушарнӑйсене чӗнме тивнӗ.

Ҫӑлавҫӑсем ҫулӑма кӳршӗри икӗ ҫурт ҫине куҫма паман. Вӗсем пушара икӗ сехетрен тӗппипех сӳнтернӗ.

Кил хуҫи хӗрарӑмӗ пиҫсе кайнӑ, ӑна пульницӑна илсе ҫитернӗ. Пӳртре пулнӑ 5 ҫулти мӑнукне тухтӑрсене пулӑшӑвӗ кирлӗ пулман.

Халӗ пушар мӗнрен тухнине уҫӑмлатаҫҫӗ.

forum.zarulem.ws порталтан илнӗ сӑнӳкерчӗк

Шупашкар хулинче пӗр хӗрарӑм-водитель хирӗҫ килмелли ҫулпа ним пулман пек пынӑ. Пӑтӑрмах хулари «Питомник» чарӑну ҫывӑхӗнче пулса иртнӗ.

«Ауди» машинӑпа ҫула тухнӑ хӗрарӑм Иван Яковлев проспекчӗпе ҫавӑн пек пынӑ. Унтан ӑна нумай хваттерлӗ ҫуртсен картишне кӗме меллӗрех пулнӑ иккен.

Хӗрарӑм йӗркене пӑснине куракансем пулнӑ, вӗсем видеона халӑх тетелӗнче вырнаҫтарнӑ хыҫҫӑн ҫул-йӗр хӑрушсӑрлӑхӗн инспекторӗсем машинӑна Канаш шосси ҫинче тытса чарнӑ. Кун пек тума «Хӑрушсӑр хула» камерисем пулӑшнӑ.

Руль умӗнче Улатӑрти 43 ҫулти хӗрарӑм пулнӑ. Вӑл хӑйӗн айӑпне йышӑннӑ, Шупашкарта сайра пулнипе ӑҫталла пӑрӑнмаллине арпаштарса ятӑм тесе ӗнентерме пӑхнӑ.

Хирӗҫ килекен ҫулпа пынӑшӑн хӗрарӑма 7,5 пин тенкӗлӗх штраф хурса парӗҫ тата ҫур ҫул таран водитель прависӗр хӑварӗҫ.

Чӑваш Енӗн Инкеклӗ ӗҫсен министерствин сӑнӳкерчӗкӗ

Иртсе кайнӑ талӑкра пирӗн республикӑра виҫӗ пушар пулнӑ. Ун вӑхӑтӗнче гараж тата мунча ҫуннӑ. Ку вӑл йӑлтах пӗр килте пулса иртмен-ха.

Маларах эпир виҫӗ пушар терӗмӗр те, тепӗр пушар Шупашкарта пулнӑ. Унта, телее, пурлӑх шар курман. Щорс урамӗнчи уҫӑ территорире каяш ҫуннӑ.

Халӗ вара маларах асӑнса хӑварнӑ инкек пирки тӗплӗнрех пӗлтерер.

Муркаш районӗнчи Тереҫ ялӗнче мансардӑллӑ гараж ҫунӑ. Вут-ҫулӑм 30 тӑваткал метр лаптӑк ҫинче алхаснӑ.

Шупашкар районӗнчи Ярӑска ялӗнче мунча хыпса илнӗ. Пушарпа кӗрешекенсем 20 тӑваткал метр ҫинчи пушара сӳнтернӗ. Инкекре, телее, ҫын пиҫсе кайман, нкама та сӗрӗм тивмен, вилмен. Шел те, кил хуҫисем самай шар курнӑ. Вӑрӑран юлать, вутран юлмасть тесе ваттисем ахальтен каламан вӗт.

Инкелӗ лару-тӑру министерстви тунӑ сӑн

Шупашкар хулинчи «Ярмӑрккӑ» пасарта павильонсенчен пӗри ҫунма тытӑннӑ. Ку ҫурла уйӑхӗн 28-мӗшӗнче пулнӑ.

Инкеклӗ лару-тӑру министерствин ӗҫченӗсем вырӑна хӑвӑртах ҫитнӗ. Унта 8-мӗш ретри 40-мӗш вырӑн ҫунма тытӑннӑ. Пушар 2 тӑваткал метр лаптӑк ҫинче сарӑлнӑ.

Ҫак кун Чӑваш Енри ҫӑлавҫӑсем тӑватӑ пушар сӳнтернӗ. Уруков урамӗнчи 1-мӗш ҫуртри пӗр хваттерти кухня ҫунма тытӑннӑ. Вӑрмар районӗнчи Ҫӗнӗ Мӑнтӑр ялӗнче стадионта пушар тухнӑ. Ҫавӑн пекех Шупашкар районӗнчи Шӗнерпуҫ ялӗнче мунча ҫуннӑ.

Сӑмах май, ку уйӑхра Шупашкарти «Мега Молл» суту-илӳ центрӗнче пушар пулнӑччӗ. Унта маччаран ҫакӑнса тӑракан светильник ҫунма пуҫланӑ. Лавккари ӗҫченсем пушара ҫӑлавҫӑсем киличчен сӳнтерме ӗлкӗрнӗ.