max.ru/progorod21 каналтан илнӗ сӑнӳкерчӗк

Шупашкарти Граждан урамӗнче пӗр водитель асламӑшӗпе (тен, кукамӑшӗ-тӗр. Вырӑсла хыпарта бабушка тенӗ) мӑнукне таптаса кайнӑ.

Ҫул урлӑ каҫнӑ чухне питех те асӑрхануллӑ пулмалла ҫав. Светофорӑн симӗс ҫутипе каҫнӑ чухне те малтан пӑхса илмелле. Светофор ҫук ҫӗрте пушшех те асӑрханмалла, мӗншӗн тесе тепӗр водитель йӑпӑр-япӑр чарӑнасшӑн мар.

Ҫавӑн пек инкек Шупашкарта пулса иртнӗ. Аслӑ ҫынпа ача Граждан урамӗнчи 20-мӗш ҫурт патӗнче пассажирсене каҫса ҫӳремелли вырӑнтан ҫул урлӑ каҫма тӑнӑ. Ҫав вӑхӑтра вӗсем ҫине пырса кӗнӗ.

«Лада Гранта» автомобиль урапи айне 55 ҫулти хӗрарӑмпа 6 ҫулти арҫын ача пулнӑ. Вӗсене иккӗшне те больницӑна илсе кайнӑ. Малтанласа палӑртнӑ тӑрӑх, вӗсен пуҫ мими чӗтреннӗ.

Инкек сӑлтавне палӑртассипе тӗпчевҫӗсем малалла ӗҫлеҫҫӗ.

Инкеклӗ лару-тӑру министерстви тунӑ сӑн

Канаш хулинче пушарнӑйсем пилӗк ҫулти хӗрачана ҫӑлнӑ. Ку инкек ӗнер, ҫӗртме уйӑхӗн 26-мӗшӗнче, каҫхине пулнӑ.

Хӗвелтухӑҫ микрорайонӗнче 5 хутлӑ ҫурт хваттерӗнче пушар тухнӑ – унта япала типӗтекен машина ҫунма тытӑннӑ. Кил хуҫи хӗрарӑмӗ лавккана кайнӑ, машинӑна вара сӳнтерсе хӑварман.

Ҫулӑм мачча, стенасем тата япаласем ҫине куҫнӑ. Килте вара пилӗк ҫулти хӗрача пӗчченех пулнӑ. Амӑшӗ ӑна пӗрле илсе кайман, хӑварнӑ.

Тӗтӗм тухнине курсан пушарнӑйсене кӳршисем чӗннӗ. Вӗсем вырӑна ҫитсен хваттер алӑкне ҫӗмӗрсе шала кӗнӗ, пӗчӗк хӗрачана тӗтӗм ӑшӗнчен илсе тухнӑ. Ҫав самант тӗлне ача сӗрӗмпе наркӑмӑшланса тӑнне ҫухатнӑ. Вӑйлах аптӑранӑскере Шупашкар хулинчи пульницӑна илсе ҫитернӗ. Халӗ унӑн пурнӑҫӗ хӑрушлӑхра мар.

Шупашкар хулинче пурӑнакан пӗр арҫын пӗлӗшне хӗнесе вӗлернӗ. Вилене тупнӑ хыҫҫӑн тӗпчевҫӗсем ҫын пурнӑҫне кам татнине тӗпчеме пуҫланӑ. Часах вӗсем кун пек усал ӗҫ тума пултарнӑ ҫын йӗрӗ ҫине те тухнӑ.

Тӗпчевҫӗсем палӑртнӑ тӑрӑх, кӑҫалхи ҫӗртме уйӑхӗн 20-мӗшӗнче 56 ҫулти арҫын ӳсӗр пулнӑ. Шупашкарти хваттерте вӑл пӗлӗшӗпе хирӗҫсе кайнӑ та чышкине ирӗке янӑ. Пӗрре сулса янипех ҫырлахман, хӗнесе пӗтернӗ. Суранланса пӗтнӗ арҫын инкек вырӑнӗнчех кӑштахран вилсе кайнӑ.

Ҫынна хӗнесе вӗлернӗ арҫынна пакунлисем кӑштахран тытса чарнӑ, ун тӗлӗшпе пуҫиле ӗс пуҫарнӑ. Суд ӑна вӑхӑтлӑха хупса хума йышӑннӑ.

Ҫав вӑхӑтрах тӗпчевҫӗсем ӗҫе малалла тӗпчеҫҫӗ, тӗрлӗ экспертиза ирттерӗҫ. Унтан ӗҫе суда ярса парӗҫ.

ИИ сӑнӳкерчӗкӗ

Шупашкар районӗнчи пӗр предприятире ҫынсене шалу тӳлемен. Парӑм виҫи 800 пин тенкӗрен иртсе кайнӑ.

Ҫынсене ӗҫлеттерме юратакан, анчах шалу тесен укҫа ҫук теме юратакан пӑтӑрмах унти «Энерги» тулли мар яваплӑ обществӑра пулса иртнӗ.

Предприятире шалу вӑхӑтра тӳленипе тӳлеменнине вырӑнти прокуратура тӗрӗслесе палӑртнӑ. Пакунлисем пӗтӗмлентнӗ тӑрӑх, 28 ҫын умӗнче предприяти 800 пин тенкӗ ытла парӑм пухса тултарнӑ.

Ӗҫ укҫине тӳлесе татассине надзор органӗ пӗрмай сӑнаса тӑнӑ. Сӑнанипех ҫырлахман-ха. Предприяти директорӗ тӗлӗшпе прокуратура административлӑ майпа ӗҫ пуҫарнӑ, яваплӑ ҫынна асӑрхаттару хучӗ ҫырса панӑ. Прокуратура хушша-хуппа кӗнин усси пулнӑ: халӗ шалу парӑмне йӑлтах тӳлесе татнӑ.

chuvashia.sledcom.ru сӑнӳкерчӗкӗ

Шупашкар хулинче 22 ҫулти арҫын ҫынна вӗлернӗ. Халӗ ун тӗлӗшпе РФ Пуҫиле кодексӗн 111-мӗш статйин 4-мӗш пайӗпе пуҫиле ӗҫ пуҫарнӑ. Ку вӑл ҫын сывлӑхне ятарласа йывӑр сиен кӳнине, ҫавна пула асӑрханмасӑр вӗлернине пӗлтерет.

Тӗпчевҫӗсем шухӑшланӑ тӑрӑх, кӑҫалхи ҫӗртме уйӑхӗнче вӑл хулари Хусанкай урамӗнче пӗлӗшӗпе хирӗҫсе кайнӑ. Хӑй мӗншӗн кӑмӑлсӑрланнине сӑмахпа ӑнлантарса парас темен курӑнать, ҫын ҫине алӑ ҫӗкленӗ. Ӑна пуҫӗнчен икӗ хутран кая мар ҫапнӑ. Йывӑр суранланнӑ арҫынна пульницӑна илсе кайнӑ-ха, анчах ӑна ҫӑлса хӑварма май килмен. Шар курни сиплев учрежденийӗнче вилсе кайнӑ.

Ҫынна хытӑ хӗнесе пӗтернӗ ҫамрӑка хальлӗхе хупса хунӑ. Ун тӗлӗшпе пуҫарнӑ пуҫиле ӗҫе специалистсем малалла тӗпчеҫҫӗ.

21.мвд.рф сӑнӳкерчӗкӗ

Чӑваш Енри арҫынна Краснодар тӑрӑхӗнчи ҫамрӑк арҫын улталанӑ.

Чӑваш Енре пурӑнакан 63 ҫулти арҫын йӗрке хуралҫисенчен кӑҫалхи нарӑс уйӑхӗнче пулӑшу ыйтнӑ. Вӑл пакунлисене каласа кӑтартнӑ тӑрӑх, ултӑ пине яхӑн тенкӗлех улталаннӑ. Пенсионер тӗнче тетелӗнче ҫӗр ҫырли сутни пирки пӗлтерӳ курнӑ. Унта 300 тӗм сутассине пӗлтернӗ. Арҫын укҫа тӳленӗ, анчах калчана кӗтсе илеймен.

Чӑваш Енри арҫынна улталанӑ ҫынна йӗрке хуралҫисем командировкӑна Краснодар тӑрӑхне кайсан тыса чарнӑ. Унта пахчаҫимӗҫ ӗҫӗпе аппаланса пурӑнакан 38 ҫулти арҫын унччен судпа айӑпланман иккен. Вӑл ӗнентернӗ тӑрӑх, калчана тӗрлӗ сӑлтава пула ярса пама май килмен.

Халӗ ун тӗлӗшпе пуҫиле ӗҫ пуҫарнӑ. Краснодар тӑрӑхӗнчи арҫын тӑкака саплаштарма шантарнӑ.

alrf.ru сайтри сӑн

Чӑваш Енре Сосновка поселокӗнче пурӑнакан арҫынна пӗлӗшне вӗлерсе Атӑла пенӗшӗн суд тунӑ.

Ку тискер преступлени пуш уйӑхӗн 18-мӗшӗнче ҫӗрле пулнӑ. Икӗ арҫын Сосновкӑра вӑрҫӑнса кайнӑ. Пӗри теприне хӗненӗ, кайран ҫӗҫӗпе чикнӗ. Лешӗ ҫавӑнтах вилнӗ.

Арҫын преступлени йӗрне пытарас тесе вилене тытнӑ та чӑнкӑ ҫыранран Атӑл юханшывне пенӗ. Ҫапах нимӗн те йӗрсӗр ҫухалмасть – вилене те, ҫак тискер ӗҫе кам тунине те тупнӑ.

Суд приговор кӑларнӑ: ҫак арҫынна ҫирӗп режимлӑ колоние 7 ҫуллӑха ӑсатма йышӑннӑ.

cheb.ru сайтран илнӗ сӑнӳкерчӗк

Чӑваш Енре «Благодать» тулли мар яваплӑ общество директорӗпе унӑн мӑшӑрне ҫынсене улталанӑ тесе шухӑшлаҫҫӗ. Вӗсем тӗлӗшпе пуҫиле ӗҫ пуҫарнӑ. Тӗпчевҫӗсем шухӑшланӑ тӑрӑх, вӗсем ҫынсене 867 миллион тенкӗлӗх улталанӑ.

Укҫана юратакан (ӑна пурте юратаҫҫӗ-ха, анчах теприсем ҫавӑншӑнах ҫынна улталамаҫҫӗ) мӑшӑр тӗлӗшпе РФ Пуҫиле кодексӗн темиҫе статйипе пуҫиле ӗҫ пуҫарнӑ.

Тӗпчевҫӗсем шухӑшланӑ тӑрӑх, 2008 ҫултан пуҫласа 2020 ҫулччен Игорь Нарышкин тата унӑн арӑмӗ Светлана Маркова пӗр-пӗринпе ҫыхӑннӑ 8 фирмӑпа хуҫаланнӑ. Ҫав вӑхӑтра 1472 ҫынтан 867 миллион ытла тенкӗ укҫа вӑрланӑ. Вӗсем укҫана процентпа тавӑрса пама шантарнӑ.

Организацисем Чӑваш Енре, Мари Элта тата Чулхула облаҫӗнче пулнӑ.

Шупашкар хула администрацийӗн сӑнӳкерчӗкӗ

Чӑваш Енӗн Правительстви пилостӑр вӗҫекен аппаратсем ҫу уйӑхӗн 5-мӗшӗнче шар кӑтартнӑ ҫынсене пулӑшма 15.1 миллион тенкӗ уйӑрма йышӑннӑ. Хушӑва республикӑн премьер-министрӗ Сергей Артамонов алӑ пуснӑ. Укҫа пӗр хутчен паракан тӳлев валли, пурлӑх шар курнине саплаштарма тата сиенленнӗ транспортшӑн тӳлеме кайӗ.

Пилӗк усламҫӑпа 10 предприятие 300-шер пин тенкӗ парӗҫ. Укҫана заявкӑсем ҫитнине кура куҫарса параҫҫӗ.

Аса илтерер: ҫу уйӑхӗн 5-мӗшӗнче хулан Ҫӗнӗ Кӑнтӑр районӗ, ВНИИР районӗ самай шар курчӗ. Вӗҫекен ҫав аппарат Строительсен урамӗнчи ҫурт ҫине те персе аннӑ. 44 ҫын аманнӑ, вӗсенчен виҫҫӗшӗ вилнӗ. Нумай хваттерлӗ 40 ҫурт сиенленнӗ.

Ҫӑлав служби тунӑ сӑн

Атӑл юханшывӗн сулахай ҫыранӗнче, Сӗнтӗрвӑрри хулине хирӗҫле, тепӗр инкек пулнӑ – пулӑҫ путса вилнӗ.

1965 ҫулта ҫуралнӑ арҫын путса вилни пирки Мари Элти Звенигово районӗнчи авари-ҫӑлав службин МАСС ушкӑнне ҫӗртме уйӑхӗн 19-мӗшӗнче 10 сехет те 13 минутра пӗлтернӗ. Вырӑна Чӑваш Енри ҫӑлавҫӑсем те ҫитнӗ. Пирӗн республика ҫӑлавҫисем эхолот пулӑшнипе арҫын путма пултарнӑ вырӑна тӗрӗсленӗ. Унтан Звенигово районӗнчи водолаз вилене тупса ҫыран хӗррине илсе тухнӑ, ӑна Чӑваш Ен транспорт полицине панӑ.

Аса илтерер: ҫӗртме уйӑхӗн 18-мӗшӗнче Ҫӗнӗ Шупашкар хулинче Атӑлта 10 ҫулти арҫын ача путса вилнӗ. Вӑл ишме пӗлмен, юраман вырӑнта шыва кӗнӗ те каялла тухайман. Ача Атӑл хӗррине юлташӗпе килнӗ.