/max.ru/channel_chuvashia_21 каналта вырнаҫтарнӑ сӑнӳкерчӗксем

Мускавра Чӑваш Енри 21 ҫулти хӗре пусмӑрланӑ. Пӑтӑрмах хулари пӗр-пӗр тӗттӗм кӗтесре те мар, хӑна ҫуртӗнче пулса иртнӗ.

Хӗр лаунж-отельте ҫӗр каҫнӑ. Пӳлӗм алӑкӗ уҫҫине курса ун патне ашшӗ ҫулӗнчи арҫын кӗрсе выртнӑ. 47 ҫулти арҫын Удмурт Республикинчен иккен. Саранскран ҫӗршывӑн тӗп хулине укҫа ӗҫлесе илме тухса кайнӑскер унта «муж на час» (чӑв. пӗр сехетлӗх упӑшка) пулса тӑрӑшнӑ. Ун пек арҫынсем кил-тӗрӗшри вак-тӗвеке пурнӑҫласа параҫҫӗ. Хайхи пирки каласан, вӑл сӗтел-пукан юсаса пурӑннӑ иккен.

Отельти пӗчӗк пӳлӗмӗн алӑкӗ уҫҫине курсан сӗмсӗр арҫын пике патне кӗрсе выртнӑ. Хӗр ҫав вӑхӑтра ҫывӑрнӑ.

Арҫынна йӗрке хуралҫисем часах тытса чарнӑ. Ун тӗлӗшпе Мускаври тӗпчевҫӗсем пуҫиле ӗҫ пуҫарнӑ.

max.ru/progorod21 каналтан илнӗ сӑнӳкерчӗк

Сӗнтӗрвӑрринче пурӑнакан хӗрарӑм пӗр каҫхине виҫӗ ачине лартса ҫула тухнӑ. Анчах кунта сӑмах ачасен каҫпа ҫывӑрмалли пирки ҫеҫ те мар.

Автомобиле чӗртсе ҫула тухнӑ хӗрарӑм ӳсӗр пулнӑ, ура ҫинче аран тӑнӑ. «Лада Гранта» автомобиле, юрать-ха, йӗрке хуралҫисем асӑрханӑ. Патшалӑхӑн ҫул-йӗр хӑрушсӑрлӑхӗн инспекторӗсем машинӑна чарнӑ.

Руль умӗнче ларакан хӗрарӑм питӗ ӳсӗр пулнӑ, ура ҫинче аран тӑнӑ. Салонта унӑн виҫӗ ачи (вӗсем ҫулталӑкран пуҫласа пилӗк ҫул таран) ларса пынӑ. Вӗсене амӑшӗ хӑрушсӑрлӑх пиҫиххипе те ҫыхман.

Машинӑна штрафстоянкӑна илсе кайнӑ, ачасене — тӑванӗсем патне.

Унччен ҫемье профилактика органӗсенче шутра тӑман. Те лешсем ӗҫлесе ҫитереймен, те хӗрарӑм унччен эрех тавраш ҫӑвара та ярса курман?..

max.ru/pcheb_21 каналтан илнӗ сӑнӳкерчӗк

Шупашкар хулинче пӗр каччӑ тепӗр ҫыннӑн машинине чӗртсе яма тӑнӑ. Пӑтӑрмах пирки йӗрке хуралҫисене машина хуҫи ҫурла уйӑхӗн 7-мӗшӗнче пӗлтернӗ.

«Киа Серато» автомобиль Шупашкарти Дементьев урамӗнчи пӗр ҫурт патӗнче ларнӑ.

Вырӑна пырса ҫитнӗ пакунлисем иномаркӑн бензобакне тимлесе пӑхнӑ, машинӑн урапи анса ларнине асӑрханӑ.

Пакунлисем кун пек усал шухӑш кам тытнине кӗҫех палӑртма пултарнӑ. Машина патне 22 ҫулти каччӑ ҫӗр каҫипе темиҫе хутчен те пынӑ. Автомобиль хуҫине вӑл хӑйӗн хӗрӗпе ӑнланманлӑх сиксе тухнӑшӑн кӳреннӗ иккен, пӑтӑрмах ӑна пула пуҫланса кайнӑ тесе шухӑшланӑ. Хӗре ҫухатас килменрен вӑл тепӗр ҫынна тавӑрма шут тытнӑ.

Ют ҫын пурлӑхне сӑтӑр кӳме хӑтланнӑ каччӑ тӗлӗшпе пуҫиле ӗҫ пуҫарнӑ.

pravdapfo.ru сайтран илнӗ сӑнӳкерчӗк

Комсомольскинчи ҫӗнӗ шкула утӑ уйӑхӗн 31-мӗшӗ тӗлне туса пӗтермелле пулнӑ, анчах подряд организацийӗ ӗҫӗн 90 процентне ҫеҫ пурнӑҫласа ӗлкӗрнӗ.

Асӑннӑ объектра республикӑн прокуратури тӗрӗслевпе пулнӑ.

Ҫӗнӗ шкул 640 ача вӗренмеллӗх пулӗ. Заказчикпа подрядчик алӑ пуснӑ контрактра пӑхса хӑварнӑ тӑрӑх, шкула кӑҫалхи утӑ уйӑхӗн 31-мӗшӗ тӗлне туса пӗтермелле пулнӑ. Анчах строительсем ӗҫӗн 90 процентне ҫеҫ пурнӑҫланӑ.

Палӑртнине вӑхӑтра туса пӗтерейменнине проектра унччен пӑхса хӑварман хушма ӗҫсем пурнӑҫлама тивнипе тата рабочисем ҫитменнипе сӑлтавлаҫҫӗ иккен. Шкула хӑпартаканни — «ПМК-8» организаци.

Ӗҫе вӑхӑтра тумалли пирки подрядчик ертӳҫине прокуратура ҫуркуннех асӑрхаттарнӑ иккен. Халӗ подряд организацийӗ тата унӑн директорӗ тӗлӗшпе административлӑ ӗҫ пуҫарнӑ.

Шупашкар районӗнчи икӗ предприяти ҫынсене шалу тӳлеме васкаман. Унта тӑрӑшакансене хӳтӗлесе прокуратура хушша-хуппа кӗрсен ҫеҫ парӑма тӳлесе татнӑ.

Чӑваш Енӗн прокуратуринче пӗлтернӗ тӑрӑх, ӗҫ укҫи парӑмӗ 1 миллион тенкӗрен иртсе кайнӑ. Ӑна пухса яраканнисем — «Премьер Плюс» тата «Энергия» предприятисем. Вӗсем иккӗшӗ те тулли мар яваплӑ обществӑсем шутланаҫҫӗ.

Предприятисен ячӗпе кӑлтӑка пӗтерме хушса прокуратура хут ҫырнӑ, тулли мар яваплӑ обществӑсен ертӳҫисен тӗлӗшпе вара административлӑ ӗҫ пуҫарнӑ.

Надзор органӗ хушша-хуппа кӗнӗ хыҫҫӑн тин «Премьер Плюс» тата «Энергия» предприятисем хускалнӑ, хӑйсем патӗнче ӗҫлекенсем умӗнче пухса тултарнӑ 1 миллион та 100 пин тенкӗ парӑма часрах тӳлесе татнӑ.

forum.na-svyazi.ru порталта нилнӗ сӑнӳкерчӗк

Ҫӗнӗ Шупашкарта пурӑнакан пӗр хӗрарӑм тӑванӗн укҫине вӑрланӗ.

Унӑн пиччӗшӗ (тен, шӑллӗ-тӗр. Вырӑсла хыпарта «брат» тесе ҫырнӑ) салтакра пулнӑ. Хӗрарӑм унӑн банк картти ҫинчи 3 миллион тенкӗ укҫана хӑйӗн тунӑ.

Икӗ тӑван хушшинчи пӑтӑрмах пуҫиле ӗҫпе вӗҫленнӗ. Хӗрарӑм тӗлӗшпе РФ Пуҫиле кодексӗн 158-мӗш статйин 5-мӗш пайӗн «б» пункчӗпе килӗшӳллӗн пуҫиле ӗҫ пуҫарнӑ.

Арҫын салтака кайнӑ чухне банк карттине хӑйӗн тӑванне шанчӑклӑ алӑра пултӑр тесе парса хӑварнӑ. Банк приложенийӗнчи уйрӑм пӳлӗмри пароле те шанса каланӑ.

Ҫывӑх ҫын вара хӑйма сыхлама лартнӑ кушак евӗр пулса тухнӑ — банк картти ҫинчен 3 миллион тенкӗ укҫана вӑрланӑ. Пӗр кунта мар. 2022 ҫулхи раштав уйӑхӗн 10-мӗшӗнчен пуҫласа 2024 ҫулхи раштав уйӑхӗн 25-мӗшӗччен 3 миллион те 140 пин тенкӗ илсе хӑйӗн валли уҫа курнӑ.

Пуҫиле ӗҫ Чӑваш Енӗн Аслӑ суднех ҫитнӗ.

Халӗ хӗрарӑма тӗрмене хупса хумасӑр ирӗкрен хӑтарма йышӑннӑ, унсӑр пуҫне унӑн хӑйӗн тӑванне 3,14 миллион тенкӗ парӑма тавӑрса памалла.

forum.na-svyazi.ru порталтан илнӗ сӑнӳкерчӗк

Шупашкарти Хӗрлӗ тӳремре тӗлӗнмелле пӑтӑрмах пулса иртнӗ. Унта ачасем тетте-машинӑпа ярӑнма кӑмӑллаҫҫӗ. Кун пек транспорта проката илме пулать.

Хӗрлӗ тӳремре час-час пулакансем каланӑ тӑрӑх, машина рулӗ умне ачасемпе пӗрле аслисем те кӗрсе лараҫҫӗ, вӗсем пӗчченшерӗн те ярӑнаҫҫӗ.

Нумаях пулмасть ҫавӑн пек пӗр машина тӗреклӗ арҫын ҫине пырса кӗнӗ. Инкекре арҫын хытах аманнӑ, унӑн ура хуҫӑлнӑ. Инкек вырӑнне васкавлӑ пулӑшу тухтӑрӗсене тата патшалӑхӑн ҫул-йӗр хӑрушсӑрлӑхӗн инспекторӗсене чӗнсе илнӗ.

Тӗрӗссипе каласан, унта электросамокатпа ярӑнма юрамасть иккен, анчах ача машинисене вара проката илсе ярӑнса ҫӳреме чармаҫҫӗ. Халӑх ҫуран уҫӑлса ҫӳреме юратакан илемлӗ вырӑнта каҫсерен ҫын уйрӑмах йышлӑ.

Ҫул-йӗр автоинспекцийӗн управленийӗн сӑнӳкерчӗкӗ

Шупашкарта патшалӑхӑн автоинспекцийӗнче тӑрӑшакан арҫын ӳсӗр водителе тытса чарма пулӑшнӑ.

Трактор тӑвакансен проспектӗнчи картишӗнчен тухнӑ чухне вӑл «Ниссан» автомобиле асӑрханӑ. Тимлӗ арҫын ку машинӑн водителӗ урӑ маррине сиснӗ. Вӑл унӑн машини умне хӑйӗн автомобильне чарса лартнӑ, ҫав вӑхӑтра ҫул-йӗр хӑрушсӑрлӑхӗн экипажне чӗнсе илнӗ.

Патшалӑх автоинспекцийӗнче районсем хушшинчи экзамен пайӗнче тӑрӑшакан ҫын сисчевлӗ пулни ҫул ҫинчи инкекрен ҫӑлса хӑварнӑ.

Инспекторсем вырӑна пырса ҫитсен ӳсӗр водитель эрех ӗҫнипе ӗҫменнине тӗрӗсленме килӗшмен. Ун тӗлӗшпе административлӑ статьяпа протокол ҫырнӑ, машинине штрафстоянкӑна ӑсатнӑ. Водителе 45 пин тенкӗ таран штрафлама тата водитель правине ҫулталӑк ҫурӑран пуҫласа икӗ ҫул таранлӑх туртса илме пултарӗҫ.

Инкеклӗ лару-тӑру министерстви тунӑ сӑн

Канаш хулинчи Машиностроительсен урамӗнчи ҫуртра, пиллӗкмӗш хутри икӗ пӳлӗмлӗ хваттерте, пушар пулнӑ. Ҫулӑм 7 тӑваткал метр лаптӑк ҫинче сарӑлнӑ.

Пушара 7 ҫӑлавҫӑ тата 3 техника сӳнтернӗ. Кил хуҫи, 40 ҫулти арҫын, сӗрӗмпе наркӑмӑшланнӑ. Ӑна пульницӑна илсе ҫитернӗ.

Малтанлӑха палӑртнӑ тӑрӑх, пушар пирус туртнӑ чухне асӑрханманнипе тухнӑ.

Инкеклӗ лару-тӑру министерстви пӗлтернӗ тӑрӑх, республикӑра юлашки талӑкра 3 пушар пулнӑ. Ҫулталӑк пуҫланнӑранпа вара пирӗн регионта 754 пушар тухнӑ.

МАХри "Первый чувашский" каналтан илнӗ сӑнӳкерчек

Паян тӑр кӑнтӑрла Шупашкарта пӑтӑрмах пулса иртнӗ.

Хулари 48-мӗш шкул ҫывӑхӗнчи нумай хваттерлӗ ҫуртсенчен пӗрин чӳречинчен каччӑ ӳкнӗ (кун пек пӑтӑрмах пирки урӑхла калама юраманран эпир ку хыпара асӑрханарах та суйларах пӗлтерме тӑрӑшнине вулакан сисрех-тӗр).

МАХри «Первый чувашский» каналта пӗлтернӗ тӑрӑх, каччӑн пурнӑҫӗ татӑлнӑ.

Ҫамрӑк ҫын чунӗнче мӗн пулса иртнине унӑн ҫывӑх ҫыннисем ҫеҫ пӗлнӗ пуль. Тен, вӗсем те пӗлмесен те пултарнӑ. Этем тени пур чухне те чуна уҫса калаҫма юратмасть-ҫке. Тен, ӑнланакан, ал паракан, хавхалантаракан тата ҫунатлантаракан ҫын та пулман пулӗ ҫумӗнче...

Апла-и, капла-и, такам ҫемйине паян пысӑк хуйхӑ пырса шакканӑ. Каччӑн ҫывӑх ҫыннисен (вӗсем пур пулсан) ку хуйхӑна чӑтса-тӳссе ирттерме тивӗ.