Васкавлӑ пулӑшу паракан центр сӑнӳкерчӗкӗ

Шупашкар хулинче пурӑнакан вӑйпитти арҫын, ӳсӗрскер, фельдшера тапӑннӑ.

Пӑтӑрмах раштав уйӑхӗн 15-мӗшӗнче каҫхине пулса иртнӗ. 35 ҫулти арҫынпа пӗрле пурӑнакан хӗрарӑм ӳсӗр арҫынна япӑх пулса кайнӑран тухтӑрсене чӗнсе илнӗ. Васкавлӑ пулӑшу тухтӑрӗсем ӑна тӑна кӗме пулӑшнӑ хыҫҫӑн хайхискер ҫӗҫӗ ярса илсе 39 ҫулти фельдшера вӗлерессипе хӑратма пуҫланӑ. Бригадӑн пӗр пайӗ балкон ҫине тухса тарнӑ, хӗрарӑм-тухтӑр подъезда тухса тарса йӗрке хуралҫисене чӗнсе илнӗ.

Усал арҫын тӗлӗшпе халӗ ҫынна вӗлерессипе хӑратнӑшӑн пуҫиле ӗҫ пуҫарнӑ.

ШӖМ тунӑ сӑн

Ӗнер Шупашкар округӗнчи Чӑрӑшкасси ҫывӑхӗнче, «Шупашкар — Сӑр» ҫул ҫинче, авари пулни пирки пӗлтернӗччӗ. Унта Пӑрачкав округӗн администрацийӗн ӗҫченӗсем вилнӗ.

Аса илтеретпӗр: «Тойота» хирӗҫ ҫул ҫине тухса «Лада Грантӑпа» ҫапӑннӑ. «Грантӑра» округ администрацийӗн пуҫлӑхӗн экономика, АПК тата финанс енӗпе ӗҫлекен заместителӗ Татьяна Галахова, Ял хуҫалӑх, экономика тата инвестици ӗҫӗн управленийӗн пуҫлӑхӗн заместителӗ Елена Абрамова, администраци водителӗ Александр Горский пулнӑ.

ШӖМ тунӑ сӑн

Паян 14:30 сехетре «Шупашкар — Сӑр» автоҫул ҫинче, Чӑрӑшкасси ялӗнчен инҫех мар, авари пулнӑ. Унта, шел те, 3 ҫыннӑн пурнӑҫӗ татӑлнӑ.

Малтанлӑха пӗлтернӗ тӑрӑх, «Тойота» рулӗ умӗнче ларнӑ 41-ри арҫын, хирӗҫ ҫул ҫине тухса «Грантӑпа» ҫапӑннӑ. «Гранта» водителӗ тата унти 2 пассажир ҫавӑнтах вилнӗ. Иномаркӑра пулнӑ хӗрарӑма пульницӑна илсе ҫитернӗ.

ШӖМ тунӑ сӑн

Шупашкарти 20-ри хӗр пӗрле пурӑнакан хӗр тусӗн апачӗ ҫине ҫывӑратакан эмел янӑ та унӑн 5 пин ытла тенкине вӑрланӑ.

Шар курнӑ хӗрарӑм укҫа ҫухалсан полицие кайнӑ. Йӑлтах каласа кӑтартнӑ: 5 пин те 400 пин тенке вӑл хваттер илме пухнӑ, ӑна банкра упранӑ. Кӑшт маларах унран пӗрле пурӑнакан 20 ҫулти хӗр укҫа ыйтнӑ иккен. Ҫавӑнпа полици укҫана вӑл вӑрлама пултарать тесе шухӑшланӑ.

Чӑнах та, кайран ҫакӑ палӑрнӑ: 20-ри хӗр патне ултавҫӑсем шӑнкӑравланӑ, вӗсене ӗненсе вӑл хӑйӗн 700 пин тенкине куҫарса панӑ. Лешсем ӑна тусӗн укҫине те «деклараци» тумаллине ӗнентернӗ, укҫана курьера пама, Чулхулана кайса унта «ФСБ ӗҫченӗсенчен» хушу кӗтме хушнӑ. Хӗр тусӗ нимӗн те ан систӗр тесе вӑл унӑн апачӗ тата чейӗ ҫине ҫывӑратакан эмел янӑ. Лешӗ ҫывӑрнӑ чухне ултавҫӑсем хушнине пурнӑҫланӑ та.

20-ри хӗр тӗлӗшпе пуҫиле ӗҫ пуҫарнӑ.

«За рулем» порталти сӑн

Паян Шупашкарта Гузовский урамӗнче «Хендай» кроссовер «Ҫутҫанталӑк» чарӑну ҫине пырса кӗнӗ. Ку кӑна мар, павильона витӗр шӑтарса тухнӑ.

Ку 11 сехет тӗлӗнче Маяковский вулавӑшӗ енче пулнӑ. Иномарка хирӗҫ ҫул ҫине тухса кайса чарӑну павильонӗ ҫине пырса тӑрӑннӑ. Малтанлӑха пӗлтернӗ тӑрӑх, аманнисем пур.

Вырӑнта ҪҪХПИ тата васкавлӑ мудпулӑшу ӗҫлеҫҫӗ.

vk.com/cheb121 пабликран илнӗ сӑнӳкерчӗк

Шупашкар хулинче пурӑнакан икӗ хӗр Ехрем хуҫа купса ячӗллӗ бульвара машинӑпа пырса кӗнӗ. Унта Ҫӗнӗ ҫул умӗн ҫутӑ маччи вырнаҫтарнӑ. Пикесем шӑпах ҫавӑн патӗнче машинӑпа сӑн ӳкерӗнес тенӗ.

Кӗҫех вӗсене йӗрке хуралҫисем чӗнсе илнӗ. 27 ҫулти ҫак пикесене ҫуран ҫӳрекенсем валли туса панӑ урама машинӑпа пырса кӗнӗшӗн административлӑ майпа явап тыттарма йышӑннӑ. Вӗсенчен пӗрне, «БМВ» машинӑн водительне, ют номерпе усӑ курнӑ тесе шухӑшлаҫҫӗ, ҫавна та тӗрӗслӗҫ.

Раштав уйӑхӗн 9-мӗшӗнче Сӗнтӗрвӑрри округӗнчи пӗр ялта ывӑлӗ ашшӗне вилмеллех хӗненӗ. Следстви комитечӗ ку тӗслӗх тӗлӗшпе пуҫиле ӗҫ пуҫарнӑ.

Следстви версийӗ тӑрӑх, вӗсем хирӗҫсе кайнӑ, ывӑлӗ ашшӗне кӗлеткен тӗрлӗ пайӗнчен тапнӑ-ҫапнӑ. Арҫын тухтӑрсем киличчен вилнӗ.

Ывӑлне тытса чарнӑ. Халӗ следстви вӑхӑтӗнче ӑна хупса усрасси пирки ыйтӑва татса параҫҫӗ.

forum.na-svyazi.ru сӑнӳкерчӗкӗ

Шупашкарти маркетплейс ӗҫченӗ тавар вӑрланӑ. Раштав пуҫламӑшӗнче Шупашкарти тавар паракан пунктран маркетплейс складне пушӑ темиҫе курупка таврӑннӑ. Хӑрушсӑрлӑх службин ӗҫченӗсем йӗрке хуралҫисенчен пулӑшу ыйтнӑ. Вӗсем тавар паракан пунктра ӗҫлекен 21 ҫулти хӗр йӗрӗ ҫине часах тухнӑ.

Вӑл хӑйӗн тата тӑванӗсен ячӗпе тавар саккас панӑ, ҫав шутра ылтӑн вӑчӑра, хаклӑ гаджетсем пулнӑ. Хӗр вӗсене илсе юлса тавара каялла ӑсатанҫи тунӑ. Ҫапла майпа 300 пин тенкӗ ытла тенкӗлӗх япала вӑрланӑ.

21.мвд.рф сӑнӳкерчӗкӗ

Ӗнер, раштав уйӑхӗн 11-мӗшӗнче, Ҫӗнӗ Шупашкарта ҫул ҫинче пӗр кунта икӗ инкек пулса иртнӗ.

Каҫхи 18 сехет тӗлӗнче хулари Винокуров урамӗнчи 35-мӗш сурт патӗнче «Лада Гранта» машина ҫул урлӑ симӗс ҫутӑпа каҫакан хӗрарӑм ҫине пырса кӗнӗ. 39 ҫулти хӗрарӑм суранланса пӗтнӗ, ӑна пульницӑна илсе кайнӑ. 42 ҫулти водитель урах пулнӑ.

Ҫав кунах ҫав урамри 105-мӗш ҫурт патӗнче «Чери Тигго» машина пӗрремӗш класс ачи ҫине пырса кӗнӗ. 28 ҫулти хӗрарӑм-водитель урах пулнӑ.

Инкеклӗ лару-тӑру министерстви тунӑ сӑн

Куславкка округӗнче пушарта 78 ҫулти арҫын ҫунса вилнӗ. Инкек ӗнер, раштавӑн 11-мӗшӗнче, Пилешкасси ялӗнче пулнӑ.

Ҫулӑм ҫурт ҫинчен куҫса хуралтӑ таврашӗсем ҫине те лекнӗ. Пушара 10 ҫӑлавҫӑ тата 4 техника сӳнтернӗ. Ҫулӑм 73 тӑваткал метр лаптӑк ҫинче алхаснӑ.

Пушара сӳнтерсен 78 ҫулти арҫын виллине тупнӑ.