Чӑваш Енӗн ШӖМӗн сӑнӳкерчӗкӗ

Паян Шупашкарта «БМВ» машинӑпа «Хендай» пырса ҫапӑннӑ. Инкек кӑнтӑрла иртсен Сӗнтӗрвӑрри шосси ҫинче пулса иртнӗ.

Малтанласа палӑртнӑ тӑрӑх, «БМВ» машина умра пыракан машинӑпа ытла та ҫывӑх пынӑ. Руль умӗнче хӗрарӑм пулнӑ. Хура куҫлӑх тӑхӑннӑскер сӑнпа пӑхсан ӳсӗрри сисӗннӗ. Чӑн та, унӑн юнӗнче 1 литр пуҫне 1 миллиграмм ытла эрех пулни палӑрнӑ.

Автомашинӑна хӗрарӑм инкекчен пӗр кун маларах ҫеҫ туяннӑ, ӑна вӑл регистрацилесе те ӗлкӗреймен.

Патшалӑх автоинспекцийӗн сайтӗнчи сӑн

Ӗнер каҫхине Етӗрне тата Муркаш округӗсен чиккинче М-7 ҫул ҫинче «Лада Веста» водителӗ пӑшие ҫапса кайнӑ. Чӗрчун ҫул урлӑ каҫнӑ. Шел те, пӑши вилмеллех аманнӑ.

Аварире 40 ҫулти пассажирка суранланнӑ. Тӑнне ҫухатнӑскере пульницӑна илсе кайнӑ.

Ҫакӑ паллӑ: 1983 ҫулта ҫуралнӑ водитель ӳсӗр пулман.

Сӑмах май, пӗлтӗр республикӑри ҫулсем ҫинче 32 пӑшие ҫапса хӑварнӑ.

Патшалӑх автоинспекцийӗ тунӑ сӑн

Пенза облаҫӗнче Чӑваш Енри рабочисем аварие лекнӗ: иккӗн вилнӗ, улттӑшӗ пульницӑна лекнӗ.

Авари паян ирхи 6 сехетре «Чулхула – Саратов» ҫул ҫинчи Пенза облаҫӗнчи Симанки ялӗ патӗнче пулнӑ. Патшалӑх автоинспекцийӗ пӗлтернӗ тӑрӑх, Чӑваш Ен арҫыннисен машини КамАЗпа ҫапӑннӑ. 1965 тата 1967 ҫулта ҫуралнӑ арҫынсем ҫавӑнтах вилнӗ. Улттӑшӗ йывӑр тата вӑтам аманнӑ.

Хӑш-пӗр ҫӑлкуҫ пӗлтернӗ тӑрӑх, рабочисем Курск облаҫӗнчен Чӑваш Ене килме тухнӑ.

Шупашкар районӗнче патшалӑхӑн ҫул-йӗр хӑрушсӑрлӑх инспекторӗнче ӗҫленӗ икӗ ҫынна суд тунӑ. Вӗсене ӗҫ вырӑнӗпе усӑ курнӑшӑн тата сӗтев илнӗшӗн явап тыттарнӑ.

2024 ҫулхи ҫулла ҫав этемсенчен пӗри 20 тата 40 пин сӗтев илсе инкек пулман ҫӗртех инкек пулнӑҫи туса хутсем шӑрҫаланӑ. Ҫав ӗҫе хӑйӗн ӗҫтешне те явӑҫтарнӑ. Суя документсемпе усӑ курса машина хуҫисем 1 миллиона яхӑн тенкӗ страховка укҫи илнӗ.

Айӑпла инспекторсенчен пӗрне халӗ 1 ҫуллӑха, теприне 3 ҫул та 6 уйӑхлӑха тӗрмене хупса хумасӑр айӑплама йышӑннӑ. 150 пин тенкӗ штраф хурса панӑ.

Елчӗк районӗнче пурӑнакан 26 ҫулти хӗр пӗрле эрех ӗҫнӗ хӗр тусӗпе ҫапӑҫма тапранса кайнӑ.

Кӑҫалхи кӑрлач уйӑхӗн 19-мӗшӗнче вӑл Елчӗкри тусӗ патне хӑнана кайнӑ. Унпа тата тусӗн тӑванӗсемпе Кӑшарни ячӗпе шыва кӗме кайса килнӗ. Ҫылӑхран ҫапла майпа тасалнӑ хыҫҫӑн эрех ӗҫнӗ. Унтан туссем вӑрҫӑнса кайнӑ. Хӑна кил хуҫи хӗрне ҫӳҫрен ярса илнӗ.

Халӗ хӑнана РФ Пуҫиле кодексӗн 116.1 статйин 2-мӗш пайӗпе явап тыттарнӑ. 26-ри хӗре ҫавӑн пек ҫапӑҫса ҫӳренӗшӗн унччен те виҫӗ хутчен суд тунӑ иккен.

21.мвд.рф сӑнӳкерчӗкӗ

Ӗнер Шупашкарта банк ӗҫченӗсем ултавҫӑсен капкӑнне ҫакланнӑ хӗрарӑма пулӑшнӑ.

Пӑтӑрмах пирки банк ӗҫченӗсем йӗрке хуралҫисене шӑнкӑравласа пӗлтернӗ. Кредит учрежденине хӗрарӑм машина туянма кредит илесшӗн тесе пырса кӗнӗ.

Банка пыриччен хӗрарам ултавҫӑсене 400 пин тенкӗ ытла куҫарса пама ӗлкӗрнӗ те иккен.

Хӗрарӑм укҫана такамсене куҫарса ан патӑр тесе банк ӗҫченӗсемпе йӗрке хуралҫисем унӑн ывӑлне те чӗнсе илнӗ. Вӑл пырса ҫитсен хӗрарӑм тӗрӗссине каласа кӑтартнӑ.

Маларах ун патне Федерацин хӑрушсӑрлӑх службин ӗҫченӗ текен ҫын шӑнкӑравланӑ иккен. Вӑл ӑна ун счечӗ ҫинчен такамсем укҫана Украинӑна куҫарса панӑ, тӗрмене хупса ан хуччӑр тесен укҫана ятарлӑ счет ҫине куҫармалла тесе ӗнентернӗ. Хӗрарӑм ют ҫынсем каланине пурнӑҫласан та вӗсем унран хӑпман.

Шупашкарта пурӑнакан пӗр арҫын хӑйӗн ватӑ амӑшне эрех ӗҫме укҫа тапӑнса хӗнесе пӗтернӗ.

Шар курнӑ ватта пуш уйӑхӗн 5-мӗшӗнче пульницӑна илсе кайнӑ. Унта вӑл ывӑлӗ хӗнесе пӗтернине йышӑннӑ. Кӑшт маларах арҫын наркологи диспансерӗнче сипленнӗ иккен, анчах унта выртса тухни нумая пыман, каллех ӗҫес килнӗ. Амӑшӗ эрех ӗҫме укҫа паманран 46-ри арҫын 77-ри амӑшне хӗнеме пуҫланӑ.

Арҫын тӗлӗшпе халӗ пуҫиле ӗҫ пуҫарнӑ.

Прокуратура архивӗнчи сӑн

Ӗнер, ака уйӑхӗн 1-мӗшӗнче, Муркаш округӗнчи Эхветкасси ялӗ ҫывӑхӗнче типӗ курӑк ҫунма тытӑннӑ. Пӗтӗмпе – 2 гектар ҫӗр ҫинче.

Малтанлӑха палӑртнӑ тӑрӑх, унта электролини пралукӗ татӑлса ӳкнӗ те ҫулӑм тухнӑ. Ҫулӑм ял, дача патнелле ҫывхарас хӑрушлӑх пулман, пушӑрнӑйсем ӑна сӳнтернӗ.

Халӗ прокуратура электролиние пӑхса тӑракан организаци ӗҫӗ-хӗлне тишкерет.

ШӖМ тунӑ сӑн

Ӗнер Канаш округӗнче машина кювета чӑмса ҫаврӑнса ӳкнӗ. Салонра 6 ҫамрӑк ҫын пулнӑ. Шел те, иккӗшӗ вилмеллех аманнӑ.

Ҫакӑ паллӑ: ҫамрӑксем ача ҫуралнине паллӑ тунӑ. «Чеб.ру» портал пӗлтернӗ тӑрӑх, ҫамрӑк ашшӗ – вилнисен йышӗнче. Машина кювета чӑмсан 22 ҫулти каччӑ салонран тухса вӗҫнӗ. Вӑл ҫак округри Вӑтапуҫ ялӗнчен. Ҫавӑн пекех Сӗнтӗрвӑрринчи 26 ҫулти каччӑ вилмеллех аманнӑ. «Хондӑн» 28-ти водительне тата тепӗр 3 пассажира пульницӑна илсе кайнӑ, вӗсем йывӑр аманнӑ.

Инкелӗ лару-тӑру министерстви тунӑ сӑн

Паян Шупашкарта 61 ҫулти арҫыннӑн пурнӑҫӗ пушарта татӑлнӑ.

Инекек Октябрь: 50 ҫул урамӗнче пулнӑ. Ҫак урамри 6-мӗш ҫуртра 5-мӗш хутри икӗ пӳлӗмлӗ хваттер ҫуннӑ. Ҫӑлавҫӑсем ҫулӑма 20 минутран сӳнтернӗ. Кил хуҫи пульницӑна илсе кайнӑ чухне ҫул ҫинче вилнӗ. Вӑл сӗрӗмпе наркӑмӑшланнӑ.

Ҫулӑм 15 тӑваткал метр лаптӑкри отделкӑна сиенлетнӗ.