t.me/gibdd121 сӑнӳкерчӗкӗ

Паян, чӳк уйӑхӗн 10-мӗшӗнче, Шупашкар хулинче автобус ачана ҫапса кайнӑ.

Инкек ирхи 10 сехет те 30 минутра «Чебоксарец» магазин тӗлӗнче пулса иртнӗ.

Патшалӑхӑн ҫул-йӗр хӑрушсӑрлӑхӗн инспекцийӗнче малтанласа пӗлтернӗ тӑрӑх, ачапа унӑн тӑванӗ ҫул урлӑ каҫнӑ. 41-мш маршрутпа ҫӳрекен автобус ҫавӑн чухне ачана ҫапса кайнӑ.

Пуҫне суранлатнӑ ачана пульницӑна илсе кайнӑ.

siktivkar.bezformata.com сайтри сӑн

Улатӑрта Киров урамӗнчи 38-мӗш ҫуртра пушар пулнӑ. Унти икӗ пӳлӗмлӗ хваттер ӗнер ирхи 7 сехетре ҫунма пуҫланӑ.

Ҫулӑм шалти отделкӑна, пӗтӗмпе 2 тӑваткал метра, сиенлетнӗ. Юрать-ха. никам та вилмен. 64 ҫулти кил хуҫи хӗрарӑмӗ пушарта алли-урине пӗҫертнӗ.

Малтанлӑха пӗлтернӗ тӑрӑх, ҫулӑм ҫунакан лампадӑран тухма пултарнӑ. Ӑна кил хуҫи хӗрарӑмӗ пӑхмасӑр хӑварнӑ.

Инкеклӗ лару-тӑру министерстви архивӗнчи сӑн

Ӗнер, чӳк уйӑхӗн 7-мӗшӗнче, Ҫӗнӗ Шупашкарти Ҫамрӑксен урамӗнчи 6-мӗш ҫуртра пушар пулнӑ. Малтанлӑха пӗлтернӗ тӑрӑх, ҫулӑм пирус асӑрханмасӑр туртнӑран тухнӑ.

Пушар 19 сехет те 50 минутра 1-мӗш хутри пӳлӗмре алхасма тытӑннӑ. Ҫав вӑхӑтра унта пулнӑ арҫын, 1972 ҫулта ҫуралнӑскер, сӗрӗмпе наркӑмӑшланнӑ. Вӑл кресло ҫинче ларнӑ. Пируса пула кресло ҫунма тытӑннӑ. Ӑна ҫӑлавҫӑсем урама илсе тухнӑ, тухтӑрсен аллине панӑ.

Пушара 10 минутра сӳнтернӗ. Ҫак ҫуртра пурӑнакансене эвакуацилеме тивмен.

forum.zarulem.ws сӑнӳкерчӗкӗ

Шупашкарта чӳк уйӑхӗн 5-мӗшӗнче васкавлӑ пулӑшу машини инкеке лекнӗ. Пӑтӑрмах Граждан тата Эльмен урамӗсем хӗресленнӗ ҫӗрте пулса иртнӗ.

«Руль умӗнче» форумра инкек самантне ӳкерсе илнӗ видео тӑрӑх пӗлтернӗ тӑрӑх, сӑрӑ тӗслӗ кроссовер пӑрӑнма тӑнӑ, хура седан «Байконур» микрорайон еннелле пӑрӑннӑ. Васкавлӑ пулӑшу машини сиренӑпа тата ятарлӑ ҫутӑпа тӳрӗ ҫулпа пынӑ.

Ҫавӑн чухне машинӑсем инкеке лекнӗ те.

ВКонтакте сӑнӳкерчӗкӗ

Ултавҫӑсем шӑнман пӑрпа такама та лартса яма пултараҫҫӗ. Вӗсен капкӑнне вӗреннисем те, вӗренменнисем те ҫакланаҫҫӗ.

Шупашкарти аслӑ пӗлӳ паракан учрежденисенчен пӗринче ӗҫлекен доцента: «Санӑн укҫу Украинӑна каять», — тесе хӑратнӑ. 64 ҫулти хӗрарӑм патне шӑнкӑравлаканни хӑйӗнпе Федерации хӑрушсӑрлӑх службин ӗҫченӗ тесе паллаштарнӑ.

Хӗрарӑма ҫав этем укҫана хӑрушсӑр счет ҫине куҫарса яма ӳкӗте кӗртнӗ. Ученӑй степеньлӗ хӗрарӑм ултавҫӑна ӗненнӗ — 2 миллион тенкӗ ытла укҫана такамсене куҫарса панӑ. Асӑннӑ суммӑн самай пайне вӑл банкран кивҫен илнӗ.

sbbusiness.ru сӑнӳкерчӗкӗ

Омск облаҫӗнче пурӑнакан пӗр арҫын Канашри хостелта хӑйӗн япалисене ҫухатнӑ. Унӑн телефонӗ тата музыка колонки ҫӗтнӗ. Унсӑр пуҫне унӑн банк картти ҫинчи 20 пин тенкӗ укҫа та ҫухалнӑ.

Йӗрке хуралҫисем кӗҫех вӑрра тупса палӑртнӑ. Омск облаҫӗнчи рабочин япалисене Краснодар тӑрӑхӗнчи 26 ҫулти рабочи вӑрланӑ иккен. Вӗсем иккӗшӗ те пӗр хостелта пурӑннӑ. Ӗҫе вӗҫленӗ хыҫҫӑн тӑван тӑрӑхӗсене тухса кайма пуҫтарӑннӑ. Краснодар тӑрӑхӗнчи каччӑна Шупашкарта тытса чарнӑ.

21.мвд.рф сӑнӳкерчӗкӗ

Шупашкар хулинче пӗрисем ача пушмакне ҫухатнӑ. Урана тӑхӑнмаллине МТВ-центрти вӑйӑ пӳлӗмӗ умне лартса хӑварнӑ. Анчах ӑна такам йӑтса кайнӑ.

Пӑтӑрмах юпа уӑхӗн 7-мӗшӗнче пулса иртнӗ. Видеокамерӑсене пӑхнӑ та ют ҫын япалине ватӑ ҫын вӑрланине палӑртнӑ. Ачапа уҫӑлма тухнӑ ватӑ хӗрарӑм пӗчӗкскерне малтан пӗр пушмака тӑхӑнтартнӑ. Кайран каялла ҫаврӑнса пынӑ та урӑххине тӑхӑнтартса тухса кайнӑ.

Чӳк уйӑхӗн 3-мӗшӗнче пакунлисем хӗрарӑма шыранине пӗлтернӗ. Ҫавӑн хыҫҫӑн ватӑ ҫын полицие пынӑ. Вӑл каҫару ыйтнӑ, ют ҫын япалине тӑхӑнтартса кайнине ывӑннипе тата хӑйӗн тимсӗрлӗхӗпе сӑлтавланӑ.

Пакунлисем кинемее явап тыттарас темен. Ача пушмакне вара хуҫисене тавӑрса парӗҫ.

t.me/mchs_chuvashia сӑнӳкерчӗкӗ

Паян, чӳк уйӑхӗн 6-мӗшӗнчи ирхине, Шупашкарти нумай хваттерлӗ ҫуртсенчен пӗринче пушар тухнӑ. Вӑл ҫурт хулари 9-мӗш пилӗкҫуллӑх урамӗнче, 5-мӗш ҫуртра вырнаҫнӑ.

Малтанласа палӑртнӑ тӑрӑх, пушарта пӗр ҫын пурнӑҫӗ татӑлнӑ, 1 ҫынна пульницӑна ӑсатнӑ.

Нумай хваттерлӗ ҫуртӑн саккӑрмӗш хутӗнчи икӗ пӳлӗмлӗ хваттерти пушар пирки ҫӑлавҫӑсене ирхи 7 сехетре пӗлтернӗ. Пушара сӳнтерме 30 ҫӑлавҫӑ, 11 единица техника пырса ҫитнӗ. 22 ҫынна (ҫав шутра 9 ачана) эвакуациленӗ.

Следстви комитечӗ тунӑ сӑн

Чӑваш Енре Чӑмпӗр облаҫӗн арҫыннине тытса чарнӑ. Вӑл ҫынна хӗнесе вӗлернӗ тесе шутлаҫҫӗ.

Ҫак 23 ҫулти арҫын Улатӑр муниципаллӑ округӗнчи Иванькоао-Ленино ялне ӗҫтешӗпе стройка ӗҫне килнӗ.

Юпа уйӑхӗн 27-мӗшӗнче вӑл пӗлӗшӗпе эрех ӗҫнӗ. Хайхискерсем хирӗҫсе кайнӑ. 23-ри арҫын пӗлӗшне кӗлеткин тӗрлӗ пайӗнчен тапнӑ, ҫапнӑ. Лешӗ йывӑр сурансене пула ҫавӑн чухнех вилнӗ.

ШӖМ тунӑ сӑн

Паян 10 сехет ҫурӑра Шупашкарта Кӑнтӑр-хӗвеланаҫ бульварӗнчи 8-мӗш ҫурт ҫывӑхӗнче ҫӳп-ҫап турттаракан машина хӗрарӑма таптаса кайнӑ.

Малтанлӑха пӗлтернӗ тӑрӑх, ҫӳп-ҫап турттаракан машина каялла чакнӑ чухне хӗрарӑм ҫине пырса кӗнӗ. Вӑл ҫавӑнтах вилнӗ. Хайхискер кам пулнине тӳрех палӑртайман.

Ҫӳп-ҫап турттаракан машина рулӗ умӗнче 37 ҫулти арҫын пулнӑ.