t.me/mchs_chuvashia сӑнӳкерчӗкӗ

Улатӑр районӗнче пурӑннӑ 63 ҫулти арҫын пушарта вилнӗ. Вут мӗнрен тухнине специалистсем палӑртӗҫ.

«Хӗрлӗ автан» ҫурла уйӑхӗн 22-мӗшӗнче Алтышево посёлокӗнче 23 сехетре алхасма тытӑннӑ. Вут-ҫулӑм йывӑҫ пӳрте тата унпа юнашар вырнаҫнӑ хуралтӑсене тӗп тунӑ.

Пушара сӳнтерме тӑватӑ техника хутшӑннӑ. Кил хуҫин пурнӑҫӗ вара пушарта татӑлнӑ.

Ҫулталӑк пуҫланнӑранпа пирӗн республикӑра 995 пушар тухнӑ, вӗсенче 39 ҫын пурнӑҫӗ татӑлнӑ.

pulse.mail.ru сӑнӳкерчӗкӗ

Ҫӗнӗ Шупашкарта пурӑнакан пӗр хӗрарӑм «Барби» кинофильмра тӗп рольсенчен пӗрне вылянӑ Канада актёрӗн пултарулӑхӗпе питех те кӑсӑкланнӑ, вӑл фан-клуб членӗ те пулнӑ. Нумаях пулмасть хӗрарӑмпа «киноҫӑлтӑрӑн» ассистенчӗ ҫыхӑннӑ.

Хӑйӗнпе ҫавӑн пек паллаштарнӑ ют ҫын Ҫӗнӗ Шупашкар хӗрӗпе актёр тӗл пулма кӑмӑл тунине пӗлтернӗ. Артист пирӗн ҫӗршыва хӗр шучӗпе килесшӗн иккен. Савӑннӑ хӗрарӑм 300 пин тенкӗ куҫарса та панӑ, ҫав шутран пӗр пайне вӑл кредит илнӗ.

Хӑйне такамсем улталанине ӑнланса илнӗ хыҫҫӑн хӗр пакунлисенчен пулӑшу ыйтнӑ.

prof-trading.ru сӑнӳкерчӗкӗ

Шупашкарти ача пахчисенчен пӗринче тӑрӑшакан хӗрарӑм ултавҫӑсене 2 миллион ытла тенкӗ куҫарса панӑ. Пӗр харӑс мар. Икӗ эрне хушшинче.

42 ҫулти хӗрарӑм патне утӑ уйӑхӗн вӗҫӗнче мессенджерсенчен пӗринче укҫана хывса пайта курма май пурри ҫинчен пӗлтерӳ ҫитсе выртнӑ. Хӗрарӑмпа «консультант» та ҫыхӑннӑ. Вӑл ӑна укҫа куҫарма ӳкӗте кӗртнӗ, ыттине биржа ӗҫченӗсем хӑйсемех тӑвӗҫ тесе ӗнентернӗ.

Утӑ уйӑхӗн 28-мӗшӗнчен пуҫласа ҫурла уйӑхӗн 12-мӗшӗччен хӗрарӑм Краснодар, Волгоград тӑрӑхӗсенче тата Мускавра регистрациленнӗ номерсем ҫине 2 миллион ытла куҫарса панӑ.

«Биржӑна хывнӑ» укҫана каялла илме май килменрен хӗрарӑм йӗрке хуралҫисенчен пулӑшу ыйтнӑ.

21.мвд.рф сӑнӳкерчӗкӗ

Ҫу уйӑхӗн 24-мӗшӗнче 16 сехетре «Елчӗк-Курнавӑш» ҫул ҫинче «Лада Гранта» автомобиль «Лада Калина» машинӑпа пырса ҫапӑннӑ. «Гранта» рулӗ умӗнче 52 ҫулти сусӑр ҫын пулнӑ. Вӑл машинӑна сехетре 130 километр хӑвӑртлӑхпа хӑваланӑ.

«Калина» машинӑра инкек вӑхӑтӗнче 6 ҫын пулнӑ. Салонта ларса пынӑ 61 ҫулти хӗрарӑм машинӑран тухса ӳксе вилнӗ. Водитель тата тепӗр тӑватӑ пассажир аманнӑ.

Лада Гранта» автомобиль водителӗ те шар курнӑ. Вӑл ӳсӗр пулнӑ.

Асӑннӑ пӑтӑрмахпа ҫыхӑннӑ ӗҫе халӗ Елчӗк районӗнчи суда ярса панӑ.

Шупашкар хулинче пӗр каччӑ 10-мӗш хутлӑ ҫуртран сикме шухӑшланӑ. Юрать, пӑтӑрмаха асӑрхакансем тата ҫамрӑка усал ӗс тӑвассинчен тытса чаракансем тупӑннӑ.

Каччӑ хулари Трактор тӑвакансен проспектӗнчи нумай хваттерлӗ ҫуртсенчен пӗринчен сикме шухӑшланӑ.

Усал шухӑш тытнӑ каччӑ пирки ятарлӑ службӑсене систерекен тупӑннӑ. Каччӑпа психолог калаҫнӑ, ӑна лӑплантарнӑ хыҫҫӑн яш усал шухӑшне пӑрахӑҫланӑ.

"Город Грехов" тунӑ сӑн

Ӗнер каҫхине 20 сехет те 50 минутра Шупашкартан тухнӑ ҫӗрте, Вӑрнар ҫулӗ ҫинче, авари пулнӑ. Унта икӗ ҫыннӑн пурнӑҫӗ татӑлнӑ, виҫҫӗшӗ аманнӑ.

Малтанлӑха пӗлтернӗ тӑрӑх, «Лада Гранта» хирӗҫ ҫул ҫине тухса кайса «буханкӑпа» ҫапӑннӑ. «Грантӑри» 53 ҫулти водитель тата 34 ҫулти пассажирка вырӑнтах вилнӗ, 32 ҫулти пассажир вӑйлах аманса пульницӑна лекнӗ.

«Буханкӑри» водитель тата пассажирка аманнӑ.

ШӖМ тунӑ сӑн

Паян 18 сехет те 40 минутра Канаш районӗнче «Канаш - Славаш» ҫул ҫинче пулнӑ аварире ҫын пурнӑҫӗ татӑлнӑ.

ШӖМ пӗлтернӗ тӑрӑх, ГАЗель автофургон ҫулпа пынӑ чухне кювета чӑмнӑ. Малтанлӑха пӗлтернӗ тӑрӑх, водитель руле итлеттереймен. Вӑл аманнӑ, ӑна пульницӑна илсе ҫитернӗ. Шел те, пассажир вара авари вырӑнӗнчех вилнӗ.

ШӖМ пӗлтернӗ тӑрӑх, халӗ ӗҫ-пуҫа уҫӑмлатаҫҫӗ.

Вӑрнар районӗнче пурӑнакан 18 ҫулти ҫамрӑк бронежилет сутатӑп тесе тӗнче тетелӗнче пӗтерӳ вырнаҫтарнӑ. Хӑйӗн ун пек япала пулман та.

Кӑштахран тавар туянас кӑмӑллӑ ҫын та тупӑннӑ. Сутуҫӑна вӑл 26 пин тенкӗ куҫарса панӑ. Яш ҫав укҫапа хӑй пӗлнӗ пек усӑ курнӑ.

Пӑтӑрмах тӗлӗшпе йӗрке хуралҫисем пуҫиле ӗҫ пуҫарнӑ. 18 ҫулти каччӑна ҫынна улталанӑшӑн РФ Пуҫиле кодексӗн 159-мӗш статйин 1-мӗш пайӗпе явап тыттарасшӑн.

Етӗрне районӗнче 31 ҫулти арҫын ҫухалнӑ. Ӑна «ЛизаАлерт» шырав отрячӗн хастарӗсем ышрама тытӑннӑ.

Алексей Данилов Йӑмалӑх ялӗнче пурӑнать. Вӑл кӑҫалхи ҫӗртме уйӑхӗн 9-мӗшӗнче ҫухалнӑ. Арҫын ӑҫтине ҫавӑнтанпа никам та пӗлмест. Шыравҫӑсем шухӑшланӑ тӑрӑх, вӑл Йошкар-Олара пулма пултарать.

Арҫын 180 сантиметр ҫӳллӗш, вӑтам пӳ-силлӗ, ҫӳҫӗ тӗксӗм хӑмӑр, куҫӗ хӑмӑртарах кӑвакарах тӗслӗ. Арҫынна тухтӑрсен пулӑшӑвӗ кирлӗ.

Ҫухалнӑ ҫын ӑҫтине пӗлекенсене 8 (800) 700-54-52 е 112 телефон номерӗсемпе шӑнкӑравлама ыйтаҫҫӗ.

mk.ru сӑнӳкерчӗкӗ

Шупашка хулинчи пӗр усламҫӑ шалу тӳлемен. Прокуратура хушша-хуппа кӗнӗ хыҫҫӑн ҫеҫ ҫав пуян ӗҫ укҫине тӳлесе татнӑ.

Пӗр арҫын ҫӑра тавраш сутакан организацире ӗҫленӗ. Кӑҫалхи ҫӗртме уйӑхӗнче вӑл ҫар службине тухса кайнӑ. Ҫавӑн чухне ӗҫ контрактне усламҫӑпа вӑхӑтлӑха чарса лартнӑ.

Саккуна пӑхансан ӗҫ укҫине ҫын ӗҫрен пӑрахнӑ кунах тӳлесе татмалла. Анчах усламҫӑ апла утма васкаман.

Кӑлтӑк пирки прокуратурӑн хушша-хуппа кӗме тивнӗ. Надзор органӗ административлӑ ӗҫ пуҫарнӑ. Ҫавӑн хыҫҫӑн кӑна шалӑва тӳленӗ.