Zoon.ru сайтри сӑн

Ҫитес вӑхӑтра республикӑра кафесемпе ресторансенче кальян туртма чарӗҫ. Кун пирки ЧР Правительствинче иртнӗ канашлура ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев калаҫнӑ.

Ҫавӑн пекех общество вырӑнӗсенче электронлӑ пируссем, вейпсем, наркотиклӑ ытти продукцисем туртма чарӗҫ. Раҫҫей президенчӗ хушӑва утӑ уйӑхӗн 31-мӗшӗнче алӑ пуснӑ. Вӑл 90 кунран, юпа уйӑхӗнче, саккунлӑ вӑя кӗрет. Ҫак йӗркене пӑсакансене штрафлӗҫ.

Ку саккуна кальяннӑйсене ӗҫлеме чармасть. Анчах саккун вӑя кӗрсен вӗсен халӑха апат-ҫимӗҫпе тивӗҫтермелле мар.

РФ Патшалӑх Думин финанс рынокӗ енӗпе ӗҫлекен комитечӗн ертӳҫи Анатолий Аксаков Чӑваш Енре пулнӑ. Вӑл Сӑр оборона чиккине чавма хутшӑннӑ Елена Щербакова патӗнче пулнӑ. Кинемей 95 ҫул тултарнӑ. Вӑл Шупашкар районӗнчи Пархикасси ялӗнче пурӑнать.

«Мухтавлӑ чӑваш хӗрарӑмӗ нумай орденпа медале тивӗҫнӗ, ҫав шутра Аслӑ аттелӗх вӑрҫин орденне те», — пӗлтернӗ Анатолий Аксаков.

«Сывлӑх сунатӑп нумай-нумай пурӑнма!» — вырӑсла поста чӑвашла вӗҫленӗ депутат.

Сӑнӳкерчӗксем тӑрӑх, Анатолий Аксаков кинемее ӑшӑ кӑмӑлтан саламлани курӑнать. Ӑна вӑл ыталаса илнӗ.

Ку ҫулталӑк кӑларса тӑратнӑ чи пысӑк хӑрушлӑх вӑл, паллах, COVID-19 кӑшӑлвирус. Унӑн витӗмне пула тӗнче экономики ҫеҫ мар, нефть хакӗ те чакрӗ, ҫынсен пурнӑҫ йӗрки йӑлт арпашӑнса кайрӗ.

Чи малтанах, республикӑра пӗр ҫын та чирлемен чухне, ҫак кӑшӑлвирус питӗ хӑрататчӗ. Пӗрремӗш чирлисене тупнӑ чухне халӑх питӗ тӗлӗнетчӗ — анализ кӑшӑлвирус пуррине палӑртнӑ пулсан ма вара ӑна республикӑна илсе килмелле-ха? тесе ыйтатчӗ. Ним явапӗ те ҫук тесе вӑрҫатчӗҫ ҫав ҫынсене. Уйрӑмах Мари Эле пирӗн республика урлӑ каҫнӑ пӗр хӗрарӑма астӑвасса ятлатчӗҫ.

Чире сарас мар тесе уйӑх ытла халӑх килте ларчӗ. Ресторансемпе кафесене хупса лартрӗҫ... Ӗҫлеме чарнине пула чылай предприниматель шар курчӗ. Юрать-ха каярах вӗсене майӗпен уҫӑлма ирӗк пачӗҫ, анчах хӑшӗ-пӗри халь те ӗҫе пуҫлаймасть. Калӑпӑр, чӑваш эстрада юрӑҫисем пысӑк шар курчӗҫ — хӗлренпе вӗсем пӗр концерт та ирттермен. Ҫак сӑлтава пулах ман укҫа конверчӗсем те сутӑнма пӑрахрӗҫ...

Тем каласан та COVID-19 хӑратакан пулӑм.

Статистикӑна пӑхас пулсан ку чир сана ҫакланмӗ тесе шухӑшлама пулать.

Малалла...

Шӑматкун, ҫурла уйӑхӗн 29-мӗшӗнче, Ҫӗнӗ Шупашкарта ача пахчи уҫӑлнӑ. Ӑна чӑвашла ят панӑ. Вӑл — «Телей». Шкул ҫулне ҫитменнисен учрежденине 220 вырӑнлӑх тунӑ.

Ҫӗнӗ ача пахчинче шӑпӑрлансене кирли йӑлтах пур. Музыка тата физкультура залӗсем, методика, логопед, тухтӑр, психолог пӳлӗмӗсем, LEGO-студи пӑхса хӑварнӑ. Столовӑя та хальхи вӑхӑт ыйтнине шута илсе тунӑ. Картишӗнче ачасене вылямалли тата уҫӑлса ҫуремелли вырӑнсем пур. Вӗсене тӗрлӗ кӳлепепе илемлетнӗ.

«Телей» ача пахчи Ҫӗнӗ Шупашкарӑн тӑххӑрмӗш микрорайонӗнче вырнаҫнӑ. Ӑна тума тӗрлӗ бюджетран 126 миллион тенкӗ ытла тӑкакланӑ.

Патӑрьел районӗнчи Хирти Пикшикре пурӑнакан Гузель Алигберова сусӑр пулнӑран кӳмепе ҫӳрет. Пурнӑҫа юратакан хӗр хуҫӑлман, вӑл малалла ҫирӗппӗн ӑнтӑлать. Сусӑрскер ялта пысӑках мар лавкка тытать.

Усламҫӑ ӗҫӗпех лӑпланса лармасть ҫамрӑкскер. Хӑй пекех кӳмеллисене асӑннӑ хатӗрпе ҫӳреме вӗрентет. Инструктор-стажер пулса вӑл кӳме вӑрттӑнлӑхӗпе паллаштарать. Сусӑрсене ҫынран пулӑшу ыйтмасӑр пурӑнма хӑнӑхтарас тесе тӑрӑшать.

Хӗр психологипе кӑсӑкланнӑ май ҫак енӗпе чылай кӗнеке вулать. Ытти литературӑпа та кӑсӑкланать вӑл. Спортпа интересленет, хӑйне пур енлӗн аталантарма тӑрӑшать.

kislovodsky.stv.sudrf.ru сайтри сӑн

Вӑрнар районӗнче пурӑнакан 42 ҫулти арҫын суд сакки ҫине ларнӑ. Ун тӗлӗшпе приговор вуланӑ – ӑна тӗрмене хупмасӑр 1 ҫул та 6 уйӑхлӑха айӑпланӑ.

Ҫак арҫын ватӑ тӑванне тимӗр костыльпе хӗненӗ. Шар курнӑ 73 ҫулти арҫын – унӑн ҫывӑх тӑванӗ. Ҫамрӑкки ватӑраххин сывлӑхне самай сиен кӳнӗ, сылтӑм аллине суранлатнӑ.

Арҫын хӑйӗн айӑпне йышӑннӑ. Суд унӑн 18 ҫул тултарман ача пуррине шута илсе судья ҫӳлерех асӑннӑ приговор кӑларнӑ. Приговор саккунлӑ вӑя кӗмен-ха.

nash.live сайтри сӑн

Юлашки тӑлӑкра Чӑваш Енре 30 ҫын кӑшӑлвируспа чирлениен палӑртнӑ. Палӑртмалла, юлашки уйӑхра кунсерен 30-35 ҫын инфекциленет.

Ку таранччен республикӑра 7743 ҫын кӑшӑлвируспа чирленӗ. Юлашки талӑкра тепӗр 27 ҫын вируса парӑнтарнӑ. Ку, пӗр талӑкра чирленисемпе танлаштарсан, сахалрах. Статистика кӑтартнӑ тӑрӑх, республикӑра инфекциленнисен 70 проценчӗ сывалнӑ. Ку – 6401 ҫын. Вилекенсен йышӗ ҫавӑн пекех: 70 ҫын.

Аса илтерер: Улатӑр районӗнче кӑшӑлвируспа чирленӗ 97 ҫулти ветерана сыватнӑ.

Ыран, ҫурла уйӑхӗн 31-мӗшӗнче, Чӑваш наци вулавӑшӗнче Борис Чиндыков ҫыравҫӑна, драматурга, тӑлмача литература тӗпелне йыхравланӑ.

Ҫыравҫӑ ҫак уйӑхӑн 1-мӗшӗнче 60 ҫул тултарчӗ. Вӑл Етӗрне районӗнчи Палтай ялӗнче ҫуралнӑ. 1984 ҫулта Мускаври А.М. Горький ячӗпе хисепленекен литература институтӗнчен вӗренсе тухнӑ. Вӑл калем ӑсти ҫеҫ мар, хаҫат-журнал редакторӗнче те ӗҫленӗ. 1990 ҫулта, тӗслӗхрен, «Аван-и» хаҫат кӑларма тытӑннӑ. 1994-1997 ҫулсенче «ЛИК Чувашии» журнал редакторӗ пулнӑ. Пӗр вӑхӑт Шупашкар районӗнчи «Тӑван Ен» хаҫат редакторӗнче ӗҫленӗ чух пичет кӑларӑмне содержани тата дизайн енчен палӑрмаллах ҫӗнетме ӗлкӗрнӗ.

Борис Чиндыковпа йӗркелекен литература тӗпелне вулавӑшӑн YouTube каналӗнче https://www.youtube.com/watch?v=Gb1nw1hTpwU&feature=youtu.be пӑхма май килӗ. Вӑл 11 сехетре пуҫланӗ.

Справки по телефону: (8-352) 23-02.17, доб. 145.

Чӑваш Ен Аслӑ судӗнче Красноармейски районӗнче пурӑнакан ҫамрӑк хӗрарӑмпа ҫыхӑннӑ ӗҫе пӑхса тухнӑ.

27 ҫулти амӑшне ачисене алимент тӳлеменшӗн РФ Пуҫиле кодексӗн 157-мӗш статйин 1-мӗш пайӗпе явап тыттарма йышӑннӑ. Алимент парӑмӗллӗ виҫӗ ачаллӑ хӗрарӑма Красноармейски районӗн сучӗ ӗҫлесе юсантарас тенӗ.

Анчах вырӑнти прокуратура айӑплава ытла та ҫемҫе тесе аппеляци мелӗпе республикӑн Аслӑ судне ҫитнӗ.

Алимент тӳлеменшӗн хӗрарӑма унччен явап тыттарнӑ. Унӑн парӑмӗ 461 пин тенке ҫитнӗ. Амӑш прависӗр юлнӑскер тӗпренчӗкӗсем пирки пачах та шухӑшламан тейӗн. Унсӑр пуҫне вӑл ют пурлӑха вӑрласа судпа айӑпланнӑ.

Чӑваш Ен Аслӑ сучӗ хӗрарӑма пӗтӗмӗшле режимлӑ колоние 4 уйӑхлӑха ӑсатма йышӑннӑ.

⠀

Шупашкар хули ҫулсерен илемленсе капӑрланса пырать ҫеҫ мар, пысӑкланать те. Ҫӗнӗ микрорайонсем йӗркеленеҫҫӗ, вӗсенче – ҫӗнӗ урамсем.

Пирӗн куҫ тӗлне Шупашкарти пӗр урам ячӗ лекрӗ. Шупашкарти «Премьер» микрорайонта @chebmedia ҫӳренӗ-ха. Унти вырӑнсене вӑл ӳкерсе илсе Инстаграма лартнӑ.

Урам ятне икӗ чӗлхепе: чӑвашла тата вырӑсла – ҫырма тӑрӑшни сисӗнет. Анчах сӑнӳкерчӗкре «Автономная урамӗ» тата «Автономная улица» тесе ҫырни курӑнчӗ.

Ҫак йӗркесен авторне «Автономная урамӗ» тесе шӑрҫалани тӗлӗнтерчӗ.