cap.ru сайтри сӑн

Роспотребнадзор Ҫӑварние онлайн мелпе ирттерме сӗннӗ. Анчах Чӑваш Ен правительстви кунпа килӗшмен, мӗншӗн тесен ҫынсем ҫавах парка уҫӑлма тухаҫҫӗ.

Ҫӑварние мӗнле уявласси пирки оперштаб ларӑвӗнче калаҫнӑ. Ҫӑварни пушӑн 6-14-мӗшӗсенче иртет. ЧР культура министрӗ Светлана Каликова пӗлтернӗ тӑрӑх, ун чухне 300-е яхӑн мероприяти ирттерме палӑртнӑ. Вӗсене 40 пин ҫын хутшӑнмалла.

Шупашкарта мероприятисем «Амазони» паркра, Николаев паркӗнче, Лакрей вӑрманӗнче, «Салют» тата «Ровесник» культура керменӗсен умӗнче иртӗҫ.

Ҫӑварние уявланӑ вырӑнта шашлӑк пӗҫерме, икерчӗ ӑшалама сӗнмен. Кунсӑр пуҫне пӗр хутчен усӑ курмалли чашӑк-тирӗкпе ҫимелле. 65 ҫултан аслӑраххисене тата вӑраха кайнӑ чирсемпе нушаланакансене килте ларма сӗннӗ.

million-rublej.ru сӑнӳкерчӗкӗ

Ӗнер Шупашкарти йӗрке хуралҫисенчен 28 ҫулти ҫамрӑк пулӑшу ыйтнӑ. Вӑл ултавҫӑсен капкӑнне ҫакланнӑ.

Ҫамрӑк патне палламан ҫын шӑнкӑравласа хӑйӗнпе банк ӗҫченӗ тесе паллаштарнӑ. Каччӑна вӑл такамсем ун ячӗпе кредит илесшӗн тесе ӗнентернӗ. «Банк ӗҫченӗ» каччӑна кредит илме, укҫана банк картти ҫине (номерне ултавҫӑсем хӑйсен каланӑ) куҫарма ӳкӗте кӗртнӗ. Каччӑ ултавҫӑсене ӗненнӗ. 870 пин тенке ют ҫынсене куҫарса панӑ.

Кайран ҫав ҫынсемех телефон номерне ылмаштармалли программӑпа усӑ курса йӗрке хуралҫисем евӗр шӑнкӑравланӑ, 870 пинсӗр юлни пирки полицие пӗлтерме сӗннӗ. Каччӑ шӑп та лӑп ҫавӑн чухлӗ укҫана куҫарса панӑ та.

Пуш уйӑхӗ мӗнлерех килӗ? Пушӑн 2-мӗшӗ ҫулталӑк пуҫланнӑранпа чи ӑшӑ кун пулнӑ.

Кӗҫех унашкал кунсем нумайланӗҫ. Термометр ӑшӑрах та ӑшӑрах кӑтартма тытӑнӗ, юр вырӑнне ҫумӑр ҫӑвӗ. Анчах пӑртак кӗтмелле – уйӑхӑн пӗрремӗш декади хӗл евӗрех пулӗ.

Эрне вӗҫӗнче юр ҫума пӑрахӗ, анчах сивӗтӗ – 10-15 градус пулӗ. Пушӑн 7-мӗшӗнче каҫхине тата тунтикун ҫил-тӑман вӗҫтерӗ. Пушӑн 11-мӗшӗнче сивӗтӗ – 20-25 граду таранах пулӗ. Вара тинех унашкал сивӗсем вӗҫленӗҫ.

Иккӗмӗш декадӑра ҫанталӑк ӑшӑтӗ. Уйӑх варринче юр, ҫумӑр ҫӑвӗ. Виҫҫӗмӗш декадӑра кӑнтӑрла – 5 градус, ҫӗрле 12 градус сивӗ пулӗ.

Кӑҫал юр часах каймӗ. Пӗтӗмӗшле илсен, пуш уйӑхӗ сивӗрех пулӗ.

ok.ru сайтри сӑн

Юлашки талӑкра кӑшӑлвирусран 3 ҫын вилнӗ, ӗнер- 6-ӑн. Ку таранччен 1054 ҫын вируса пула пурнӑҫран уйрӑлнӑ. Вӗсенчен 20-шӗ – пуш уйӑхӗнче.

Паянхи кун тӗлне 21601 ҫын инфекциленнӗ. Вӗсенчен 19765-шӗ сывалнӑ. Юлашки кунра 41 ҫын чире парӑнтарнӑ. 51 ҫын кӑшӑлвируспа чирленине палӑртнӑ.

Хальхи вӑхӑтра республикӑра 782 ҫын стационарта тата килте амбулатори мелӗпе кӑшӑлвирусран сипленет. Аса илтерер: нумаях пулмасть Чӑваш Ене кӑшӑлвирусран хӳтӗленмелли вакцинӑн тепӗр партийӗ килнӗ.

РФ Патшалӑх Думин депутачӗ Алена Аршинова аслашшӗн ашшӗ Василий Чапаевпа пӗрле ҫапӑҫни пирки пӗлтернӗ. Кун пирки вӑл «Советская Чувашия» хаҫата панӑ интервьюра каланӑ.

Алена Аршинова каланӑ тӑрӑх, ӑна кун пирки асламӑшӗ каласа кӑтартнӑ. Аслашшӗн ашшӗ Чапаев дивизийӗнче пулнӑ, вӗсен килӗнче унпа пӗрле тунӑ сӑнӳкерчӗк те упраннӑ. Анчах ӑна архивпа пӗрле НКВД туртса илнӗ. Халӗ Аршиновсен ҫемйи ӑна шырать.

Алена Аршинова унччен асламӑшӗ хӑйне чӑваш тесе шутланине те каланӑ.

«АвтоВАС» акционерсен обществи республикӑри автовокзалсене тытса тӑма пӑрахассине Чӑваш халӑх сайчӗ унччен хыпарланӑччӗ. Республикӑн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, ҫӗнӗ оператор ака уйӑхӗн 1-мӗшӗнче ӗҫе тытӑнӗ.

Ҫӗнӗ оператор аллине «АвтоВАСран» Шупашкарти 2 автовокзал, районсенчи 17 диспетчерпа касса пункчӗ куҫӗ.

«Предприятин директорсен канашӗ пурлӑха контрагента тара пама йышӑннӑ. Ҫӗнӗ оператор автовокзал ӗҫӗпе тӑрӑшӗ», – уҫӑмлатнӑ транспорт тата ҫул-йӗр хуҫалӑхӗн министрӗн ҫумӗ Юрий Арлашкин.

«Тарифсем те, пассажирсене турттаракансем те ҫавсемех юлӗҫ. Лару-тӑру япӑхланасран шикленме кирлӗ мар. Манӑн трафика пысӑклатас килет, ҫавӑнпа сервиса лайӑхлатӑпӑр», – ӗнентернӗ ҫӗнӗ оператор. Унӑн ятне Транспорт тата ҫул-йӗр хуҫалӑхӗн министерствин сайтӗнче кӑтартман.

cap.ru сӑн ӳкерчӗкӗ

ЧР Аслӑ сучӗ «Суор» строительство компанийӗн экс-директорӗ тӗлӗшпе пуҫарнӑ пуҫиле ӗҫе пӑхса тухнӑ. Кун пирки «Коммерсантъ» пӗлтерет.

Пуҫиле ӗҫе Ермолаев тӗлӗшпе пуҫарнӑ. Вӑл пенисене тата штрафсене шута илсе пӗтӗмпе 108 миллион ытла тенкӗ парӑма татнӑ. Аслӑ суд ҫакна шута илнӗ, приговора ҫемҫетмелли сӑлтав вырӑнне йышӑннӑ.

Ермолаев Аслӑ судран айӑплава тӗрмене лартмасӑр пурнӑҫлама ирӗк ыйтнӑ. Анчах суд хирӗҫленӗ. Экс-директора колонире 2,5 ҫул лармалла тунӑ. Срокран ҫур ҫул катнӑ.

Аса илтерер: Ермолаева пӗлтӗр налук тӳлеменшӗн пӗтӗмӗшле режимлӑ колоние ӑсатнӑ.

pravlife.org сайтри сӑн

Шупашкарта пурӑнакан 30 ҫулти хӗрарӑма 12 преступленишӗн айӑпласшӑн. Вӑл наркотикпа ҫыхланнӑ тесе шутлаҫҫӗ.

Следовательсем тӗпчесе пӗлнӗ тӑрӑх, Шупашкарти Ленин районӗн сучӗ унччен ун тӗлӗшпе ҫакнашкал преступленишӗн пуҫарнӑ пуҫиле ӗҫе пӑхса тухнӑ ӗнтӗ. Анчах ку хӗрарӑма ниме те вӗрентмен, вӑл ҫаплипех вӑрттӑн вырӑнсенчен наркотик кайса илнӗ.

Следстви вӑхӑтӗнче наркотике туртса илнӗ, пуҫиле ӗҫе суда пӑхса тухма янӑ.

Ӗнер «ИрАэро» авиакомпани Шупашкара пӗрремӗш рейспа килсе ҫитнӗ. Ҫӗнӗ Уренгой хулинчен 64 пассажир килнӗ. Вӗсенчен ҫурри ытла Минеральные Воды хулине ҫул тытнӑ. Самолетра пушӑ вырӑнсем 20 процентран ытла пулман. Апла тӑк ҫӗнӗ авиарейса пассажирсем кӑмӑлласа йышӑннӑ.

Ҫӗнӗ маршрутпа «Сухой Суперждип 100» самолет турттарать. Унта пассажирсем валли 103 вырӑн пӑхса хӑварнӑ.

Самолет Ҫӗнӗ Уренгойран юнкун хускалать, Шупашкара ҫитнӗ хыҫҫӑн ҫав кунах Минеральные Воды хулине тухса каять. Унтан Шупашкара таврӑнсан 18 сехет те 20 минутра Краснодара илсе каять. Краснодар крайӗнчен Шупашкара кӗҫнерникун 8 сехет те 40 минутра вӗҫсе килет. Ҫав кунах Ҫӗнӗ Уренгоя тухса каять. Минеральные Воды хулине 2 сехет вӗҫет, Ҫӗнӗ Уренгоя – 2 сехет те 50 минут, Краснодара – 2 сехет.

Ҫул укҫине йӳнетме республика бюджетӗнчен укҫа уйӑраҫҫӗ.

Пурнӑҫри йывӑр лару-тӑрӑва лекнӗ ачасене пулӑшакан фонд ачасене тата ачаллӑ ҫемьесене пулӑшакан ятарлӑ соцслужбӑсем йӗркелемелли конкурс ирттерет. Фонда ҫӗршывӑн тӗрлӗ кӗтесӗнчен 115 заявка пырса ҫитнӗ. Ҫав шутра Чӑваш Енрен – ҫиччӗ.

Конкурс темиҫе тапхӑрпа иртет. Унӑн иккӗмӗш ӑстрӑмне Раҫҫей Федерацийӗн 44 субъектӗнчен 81 заявка суйласа илнӗ, ҫав шутра пирӗн республикӑран тӑратнӑ пиллӗк проект кӗнӗ. Юрӑхлисене хатӗрленисен йышӗнче – Халӑха социаллӑ пулӑшу кӳрекен Ҫӗрпӳри центр, Халӑха социаллӑ пулӑшу кӳрекен Шупашкарти центр, Халӑха социаллӑ пулӑшу кӳрекен Куславккари центр, Ҫул ҫитмен ачасен Ҫӗнӗ Шупашкарти социаллӑ реабилитаци центрӗ, Чӑваш Ен Ӗҫлев тата социаллӑ хӳтлӗх министерствин Ачасен реаблитаци центрӗ.