"На связи" форумри сӑн

Шупашкарти «Университет» микрорайонти шкул<h2></h2>а 2022 ҫулхи ҫулла тума тытӑннӑ. Ун чухне ӑна 2024 ҫулхи утӑ уйӑхӗнче туса пӗтерме палӑртнӑ. Ҫулталӑкран влаҫ шкула 2024 ҫул вӗҫнелле кӑна хута ярассине каланӑ.

Анчах Министрсен Кабинечӗн пӗлтӗрхи ӗҫсен кӑтартӑвӗн отчетӗнче ҫак шкула кӑҫал утӑ уйӑхӗнче туса пӗтерессине палӑртнӑ. Эппин, кӑҫал авӑнӑн 1-мӗшӗнче шкул хӑйӗн алӑкне уҫмалла.

Александр Сухарев кӗнекин хуплашкийӗ

Канаш тӑрӑхӗнчи Мӑкӑр кӗперӗ ҫулҫӳревҫӗн кӗнекине кӗнӗ.

Мӑкӑр кӗперне ӳкерсе илнӗ ҫын – «Нетуристическая Россия» кӗнеке авторӗ Александр Сухарев.

Александр – фотограф тата ҫӗршыв тӑрӑх курса ҫӳреме юратакан ҫын. Тусемпе тинӗссемпе киленме пурте пултараҫҫӗ, анчах пушӑ пӳрт чӳречин илемне кашни ҫынах асӑрхаймӗ тесе шухӑшлать вӑл.

Александр Сухарев хӑйӗн кӗнекин хуплашкине Мӑкӑр кӗперӗпе илемлетнӗ.

Кӗнеке авторӗ ҫынсене хӗвеланӑҫӗнчен хӗвелтухӑҫне, Калининградран Сахалина ҫити курса ҫӳреме йыхравлать.

Следстви комитечӗн Чӑваш Енри управленийӗн сӑнӳкерчӗкӗ

Патӑрьел тӑрӑхӗнчи пӗр ялта пушар пулнӑ килте арҫын виллине тупнӑ.

Патӑрьел муниципаллӑ округӗнчи Кивӗ Катек ялӗнче пӗр ҫыннӑн килӗнче пушар тухнӑ. Вут-ҫулӑма сӳнтерсен 53 ҫулти кил хуҫин виллине тупнӑ.

Инкек нарӑс уйӑхӗн 16-мӗшӗнче пулнӑ.

Тӗпчевҫӗсем малтанласа шухӑшланӑ тӑрӑх, кил хуҫи пирус туртнӑ чух асӑрханса ҫитереймен.

shilk-pravda.ru сайтри сӑн

Улатӑрта пурӑнакан 31 ҫулти хӗрарӑм палламан ҫынсемпе телефонпа калаҫса 1,5 миллион тенкӗ ҫухатнӑ.

Вӑл палламан ҫынсемпе икӗ эрне калаҫнӑ. Лешсем ӑна 1 миллион та 413 пин те 400 тенкине темӗнле инвестицисене хывма ӳкӗте кӗртнӗ. 1 миллиона яхӑн тенкине вӑл кредит илнӗ, ыттине пӗлӗшӗсенчен кивҫен ыйтнӑ. Палламан ҫынсем татах та татах укҫа ыйтнӑ, тупӑша вара пама васкаман. Ҫавӑн чухне тин хӗрарӑм ултавҫӑсен аллине лекнине ӑнланнӑ. Вӑл нарӑс уйӑхӗн 17-мӗшӗнче полицие пырса заявлени ҫырнӑ.

"Чӑваш Ен" ПТРК тунӑ видео скринӗ

Муркаш муниципаллӑ округӗнчи Чуракассинче ҫӗнӗ ФАП уҫӑлнӑ. Ку ялти ҫынсемшӗн чӑннипех те пысӑк савӑнӑҫ.

Унччен унта 1962 ҫулта йывӑҫран тунӑ ҫурт пулнӑ. Шыв та, канализаци те пулман. Хальхи хӑтлӑхсем медпунктра 37 ҫул ӗҫлекен Елена Морозовӑшӑн пысӑк савӑнӑҫ. «Шыв йӑтнӑ, кӑмака хутнӑ», - тет вӑл. Елена Морозова ку ялтах пурӑнать, ҫавӑнпа кашни ҫынна лайӑх пӗлет. Ҫынсем те ӑна хисеплеҫҫӗ.

Ҫӗнӗ ФАПа ансӑр специалистсем те килсе ҫӳрӗҫ. Ку та питӗ меллӗ. Ара, район пульници 26 ҫухрӑмра вырнаҫнӑ, каймалӑх пур.

"Контактри" сӑн

Чӑваш Енре пӗр йӑхӑн педагогика стажӗ 800 ҫултан иртнӗ. ЧР Вӗренӳ министерстви пӗлтернӗ тӑрӑх, Титовсен-Андреевсен-Лазаревсен-Жуковсен ӗҫ династийӗ 1903 ҫулта пуҫланнӑ.

Ҫемьери ӗҫ династине Шупашкарти 5-мӗш гимнази директорӗн воспитани енӗпе ӗҫлекен канашҫи Ленина Жукова тӗпченӗ. Истори Гермоген Титовран пуҫланнӑ, вӑл ялсенче пуҫламӑш классене вӗрентнӗ. Ленинӑн ашшӗ-амӑшӗ, пӗртӑванӗсем, тӑванӗн ачисем те педагогикӑра ӗҫленӗ. Нумаях пулмасть мӑнукӗ вӗрентекен пулма йышӑннӑ.

Чӑваш Енре дистанци мелӗпе электронлӑ сасӑлава хутшӑнас тесе нумаййӑн регистрациленеҫҫӗ. Ку енӗпе пирӗн регион ТОП-10 йыша кӗрет. Ҫапла пӗлтерет РФ Цифра министерстви.

Нарӑсӑн 13-мӗшӗ тӗлне Раҫҫейре пурӑнакан 2 миллион ытла ҫын дистанци мелӗпе сасӑлама йышӑннӑ. Нарӑсӑн 16-мӗшӗ тӗлне 3,2 миллион заявлени панӑ. Вӗсенчен 2 миллион та 361-шӗ дистанци мелӗпе сасӑлама йышӑннӑ, 874 пинӗшӗ - «Мобильлӗ суйлавҫӑ» тытӑм пулӑшнипе. Мускав ҫыннисем кунти нихӑш статистикӑна та кӗмен. Вӗсен дистанци сасӑлавӗ регионти порталта пулать.

«Пятница» телеканал сӑнӳкерчӗкӗ

Шупашкарти мӑшӑр «Пятница» телеканал кӑтартакан «Четыре свадьбы» (чӑв. Тӑватӑ туй) проектра мала тухайман.

Аса илтерер: ҫав проекта качча каякан хӗрсем хутшӑнаҫҫӗ. Пӗтӗмпе тӑватӑ хӗр чи лайӑх туй ята илессишӗн ӑмӑртать. Пӗр-пӗрин туй кӗпине, каччине, сӗтел ҫине лартнӑ ӗҫме-ҫимене хаклаҫҫӗ. Пурте тенӗ пекех пӗрне-пӗри каҫса каялла хурлаҫҫӗ-тиркеҫҫӗ. Чи пысӑк балл пухнӑ ҫемьене телеканал канма кайма путёвка парать.

Черетлӗ кӑларӑмсенчен пӗрне Шупашкарти 27 ҫулти Еленӑпа Владимир хутшӑннӑ. Хӗр – банк ӗҫченӗ, каччӑ – ландшафт дизайнерӗ. Туй тума вӗсем, хӑйсем ӗнентернӗ тӑрӑх, 900 пин тенкӗ тӑкакланӑ.

Телеграмри t.me/mintrud_21 каналтан илнӗ сӑнӳкерчӗк

Шупашкарта вырнаҫнӑ Социаллӑ адаптацин республикӑри центрӗн социаллӑ патруль ӗҫченӗсем хула тӑрӑх пӗрмаях рейдпа ҫӳреҫҫӗ. Нарӑс уйӑхӗн 15-мӗшӗнче вӗсем хулари Калинин районӗнче ҫӳренӗ.

Рейда тухнӑ специалистсем килсӗр ҫынсене ӑҫта тата камсем епле мапа пулӑшнине пӗлтерекен буклетсем валеҫсе ҫӳренӗ. Аса илтерер: маларах асӑннӑ центрта килсӗр-ҫуртсӑр ҫынсем ҫӗр каҫма пултараҫҫӗ, вӗсене ҫухатнӑ документсене тума, кайран интерната вырнаҫтарма пулӑшаҫҫӗ.

Килсӗр-ҫуртсӑр ҫынна курсан е хӑвӑр йывӑр лару-тӑрӑва лексен ӗҫ кунӗсенче ирхи 8 сехетрен пуҫласа 17 сехетчен 88352-63-13-33 телефонпа шӑнкӑравлама ыйтаҫҫӗ.

pipla.ru сайтри сӑн

Шупашкар хула администрацийӗн Мускав районӗн ЗАГС пайӗ хӑйне евӗр ята регистрациленӗ. Ашшӗ-амӑшӗ ачине Тим ят панӑ.

Вӑл Тимоти ятӑн кӗскетнӗ варианчӗ. Грек чӗлхинче Тимотеос ят пур. Тим «Турра хисеп туни» тенине пӗлтерет.

ЗАГС ӗҫченӗсем тин ҫуралнӑ ачан ашшӗ-амӑшне саламланӑ, ачан пӗрремӗш документне, ҫуралнине ӗнентерекен свидетельствӑна, панӑ.