"Контактри" сӑн

Вӑрнар округӗнчи Малтикас ялӗнчи вулавӑш республикӑри ялти чи лайӑх 7 культура учрежденийӗ йышне кӗнӗ. Куншӑн вӑл 175 пин тенке тивеҫнӗ. Ку укҫапа вулавӑшри интертьера ҫӗнетӗҫ.

Ку, вулавӑшра пурнӑҫ вӗресе тӑрать: ӑсталӑх класӗсем, викторинӑсем иртеҫҫӗ, мини-музей ӗҫлет. Ҫаксене йӑлтах Елена Германова библиотекарь йӗркелесе пырать. Вӑл унта 2008 ҫултанпа ӗҫлет. Унччен вӑл инженер-строительте вӑй хунӑ.

«Хавхалану» клубӑн халӑх тетелӗнчи страницинчен илнӗ сӑнӳкерчӗк

Чӑваш наци вулавӑшӗнче поэзие юратакансем «Хавхалану» клубӑн черетлӗ ларӑвӗ иртнӗ. Унта раштав уйӑхӗнче ҫуралнӑ чӑваш халӑх поэчӗн Раиса Сарпин тата Владимир Андреев педагогӑн сӑввисемпе паллашнӑ.

«Вениамин Пехил пурӑннӑ пулсан кӑҫал 70 ҫул тултарнӑ пулӗччӗ. Василий Кервен, унпа пӗрле аслӑ шкулта вӗреннӗскер, Пехилӗн пурнӑҫӗпе пултарулӑхӗ ҫинчен кӗскен каласа пачӗ, ҫак хушма ята мӗнле тупса пани ҫинчен те пӗлтерчӗ», — пӗлтернӗ клубӑн халӑх тетелӗнчи страницинче.

www.nbchr.ru сӑнӳкерчӗкӗ

Нарӑс уйӑхӗн 28-мӗшӗнче 18 сехетре Чӑваш Енӗн Наци вулавӑшӗнчи «Варкӑш» клубра «Хуҫасӑр ҫуртри сехет сасси» кӗнекене хӑтлӗҫ. Унӑн авторӗ — Дмитрий Моисеев журналист тата ҫыравҫӑ.

Ҫӗнӗ кӑларӑм Чӑваш кӗнеке издательствинче кун ҫути курнине эпир унччен пӗлтернӗччӗ-ха. Ӑна аслӑ классенчи шкул ачисем валли тесе кӑларнӑ.

Дмитрий Моисеевӑн пӗрремӗш кӗнеки 2022 ҫулта «Ют пахчари хӑмла ҫырли» ятпа пичетленсе тухнӑ. Унта авторӑн калавӗсем кӗнӗ.

chuvdram.ru сӑнӳкерчӗкӗ

Чӑваш патшалӑх академи драма театрӗнче Пётр Осипов драматург, театрӑн пӗрремӗш актерӗсенчен пӗри ҫуралнӑранпа 125 ҫул ҫитнине халалласа «Сурхури сӑри» спектакль кӑтартӗҫ.

Театрта пӗлтернӗ тӑрӑх, «пьесӑра пулса иртекен пӑтӑрмахсем 1917 ҫулхи революци саманипе ҫыхӑннӑ пулсан та, тӗп вырӑнта чӑваш ялӗнчи ҫынсен хутшӑнӑвӗсем. Унӑн жанрне «детективлӑ триллер» теме те пулӗ. Режиссерпа художник, композитор сюжетри вӑхӑтпа усӑ курса, халӑхӑн илемлӗ йӑлисене кӑтартма шутланӑ. Ку вара хальхи куракансемшӗн ҫав тери кӑсӑклӑ».

Ку ӗҫе режиссёр ҫуралнӑранпа 120 ҫул ҫитнӗ тӗле хатӗрленӗ пулнӑ. Унӑн режиссёрӗ — Наталья Сергеева, художникӗ — Наталья Зверева, музыкине Лолита Чекушкина ҫырнӑ.

Спектакле кӑрлач уйӑхӗн 27-мӗшӗнче кӑтартӗҫ.

culture.cap.ru сайтран илнӗксӑнӳкерчӗк

Ф.П. Павлов ячӗллӗ музыка училищинче вӗренекенсем Елена Межова (Певчая) фолк-юрӑҫпа тӗл пулнӑ. Вӑл Раҫҫейри тӗрлӗ наградӑна тивӗҫме ӗлкӗрнӗ. Хальхинче «Звезда» телепроектра ӳкерӗнме кайма тухнӑ, хӑй пӗлӳ илнӗ вӗренӳ заведенине ҫула май тенӗ пек кӗрсе тухнӑ.

Юрӑҫ вырӑс фольклорне кӑмӑллать, автор юррисене ҫӗршыври тӗрлӗ музыка платформи ҫине вырнаҫтарать.

Ҫамрӑксене юрӑҫ сонграйтинг, продакшн, дистрибьюшн, монетизаци тата ытти япала мӗне пӗлтерни ҫинчен те каласа кӑтартнӑ.

Шупашкар муниципаллӑ округӗнчи Апаш тӑрӑхӗнче пурӑнакансем хӑйсен паллӑ ентеше Борис Алексеева, СССР халӑх артистне, асӑннӑ тӑрӑхри Паҫпак ялӗнче ҫуралса ӳснӗскере ырӑпа аса тытаҫҫӗ.

Апашри халӑх театрӗнче пӗлтернӗ тӑрӑх, 4 ҫул каялла театра Борис Алексеев ятне панӑ, 3 ҫул каялла халӑх артисчӗн ентешӗсем Борис Алексеев ячӗпе Паҫпак ялӗнче палӑк лартнӑ. Апаш халӑх театрӗн артисчӗсем чапа тухнӑ артист ятне тивӗҫтерес енӗпе ырӑ йӑлана малалла тӑсма шут тытнӑ, театр логотипӗпе ятарласа футболкӑсем туса хатӗрленӗ.

cap.ru сӑнӳкерчӗкӗ

Пирӗн республикӑри авторсен коллективӗ культура тытӑмӗнче премие тивӗҫнӗ. Ӑна Михаил Мишустин премьер-министр аллинчен ЧР культура министрӗ Светлана Каликова тивӗҫнӗ.

Унпа пӗрле Чӑваш наци музейӗн директорӗ Ирина Меньшикова премие илнӗ. Вӗсем ӑна «Раҫҫейӗн тӗрленӗ картти» проекта пурнӑҫланӑшӑн тивӗҫнӗ.

Палӑртмалла: пӗтӗмпе 7 проект пурнӑҫланӑ 16 ҫын преми илнӗ. Унӑн пӗтӗмӗшле виҫи – 1 миллион тенкӗ.

www.cap.ru сӑнӳкерчӗкӗ

Чӑваш Енри пултарулӑх коллективӗсем халӑх коллективӗ ята хӳтӗлӗҫ.

Карлач уйӑхӗн 21-30-мӗшӗсенче Республикӑри халӑх пултарулӑхӗн центрӗнче (вӑл Шупашкарти Трактор тӑвакансен культура ҫуртӗнче вырнаҫнӑ) Шупашкарти тӗп клуб тытӑмӗнчи, «Салют» культура ҫуртӗнчи, Вӑрмар тата Ҫӗрпӳ муниципаллӑ округсенчи халӑх коллективӗсен концерчӗсем иртӗҫ.

Кӑрлач уйӑхӗн 21-23-мӗшӗсенче Шупашкарти тӗп клуб тытӑмӗн йышӗнчи 7 коллективӑн пултарулӑхне хаклӗҫ. Ҫав шутра «Уяв» фольклор ансамблӗ, «Мадригал» академи камера хорӗ, «Нарспи» юрӑ ансамблӗ, «Сарпике» ташӑ ансамблӗ, «Тантӑш» ача-пӑча ташӑ ансамблӗ.

culture.cap.ru сӑнӳкерчӗкӗ

Нарӑс уйӑхӗн 8-28-мӗшӗсенче «Атӑл Опера» театрта Чӑваш музыкин фестивалӗ иртӗ.

Фестиваль А. Галкинӑн «Хуркайӑк ҫулӗ» балетпа уҫӑлӗ. Унӑн либреттине чӑваш эпосӗ, юмахӗсем, авалхи легендӑсем тӑрӑх хатӗрленӗ.

Г. Хирпӳн «Нарспи» опери композитор пурӑннӑ чухнех чӑваш опера ӳнерӗн классики пулса тӑнӑ. Ӑна К. Иванов поэми тӑрӑх хатӗрленӗ.

А. Галкинӑн «Аттила. Рождение легенды» балечӗ те кӑсӑклӑ пулмалла.

Фестиваль «Тӗнчен наци музыки» гала-концертпа вӗҫленӗ. Ӑна Питӗрти ACID HASID ансамбль тата театрӑн симфони оркестрӗ лартса парӗҫ.

chuvbook.ru сӑнӳкерчӗкӗ

Чӑваш кӗнеке издательстви «Чӑваш романӗ» литература конкурсне кӑҫал та ирттерет.

Конкурса тӑратнӑ ӗҫсем чӑвашла пулмалла, урӑх чӗлхерен чӑвашла куҫарнӑ хайлавсене пӑхса тухмӗҫ. Конкурса халиччен пичетленмен хайлавпа хутшӑнмалла.

Конкурса тӑратакан хайлавсен тематики ирӗклӗ, калӑпӑшӗ – А4 форматпа 700 страницӑран ытла мар.

Конкурс ӗҫӗсене кӑҫалхи юпа уйӑхӗн 1-мӗшӗччен (авӑн уйӑхӗн 30-мӗшӗнче юлашки кун йышӑнаҫҫӗ) fed_ol@mail.ru электрон адреспа е почтӑпа ҫак адреспа ярса памалла: 428019, Шупашкар хули, Иван Яковлев проспекчӗ, 13-мӗш ҫурт, Чӑваш кӗнеке издательстви, «Чӑваш романӗ» конкурса».