chuvbook.ru сӑнӳкерчӗкӗ

«Варкӑш» литература клубӗнче урӑх улах иртессине эпир унччен пӗлтернӗччӗ-ха.

Ытти чухне варкӑшҫӑсем пӗр-пӗр кӗнеке вуласа пырса ӑна сӳтсе явнипе ҫырлахнӑ пулсан хальхинче вӗсем Чӑваш Наци вулавӑшне улаха пуҫтарӑннӑ.

Уява литература клубӗн гимнӗнчен пуҫланӑ. Унӑн авторӗ – Ирӗк Килтӗш (Валерий Краснов) ӳнерҫӗ иккен. Ольга Австрийская Чӑваш кӗнеке издательствин сайтӗнче пӗлтернӗ тӑрӑх, юрӑҫа итленӗ май ҫыравҫӑсемпе журналистсем скетчсем ӳкернӗ, литературоведсемпе артистсем сӑвӑ шӑрҫаланӑ.

Ирӗк Килтӗшпе Чӑваш Республикин тава тивӗҫлӗ артисчӗ Геннадий Кириллов ӳнерҫӗн юптаруллӑ такмакӗсене вуланӑ. Урӑх улаха пухӑннисем сӑвӑсем вуланӑ, хӑйсем ӳкернӗ ӳкерчӗкӗсене кӑтартнӑ. Улах пурне те килӗшнӗ.

«Контактри» сӑн

Йӗпреҫ округӗн халӗ тӗрленӗ картти пур. Ӑна Пучинке ялӗнче пурӑнакан ӑста, Зоя Акчурина, тӗрленӗ.

Зоя Алексеевна ялти шкулта 25 ҫул ытла ӗҫленӗ, чӑваш тӗррин кружокне ертсе пынӑ, ку ӑсталӑха ачасене вӗрентнӗ.

Тӗрленӗ карттӑпа вӑл 8 уйӑх ӗҫленӗ. Ун ҫинче ял тӑрӑхӗсен чиккисем лайӑх курӑнаҫҫӗ, ялсемпе саласен ячӗсене те ҫырнӑ, тӗп усадьбӑсем хӑҫан йӗркеленнине те палӑртнӑ. Картта ҫинче чиркӳсемпе храмсене те уйӑрса илме пулать – вӗсене те тӗрленӗ.

Ҫеҫпӗл Мишши ячӗллӗ Чӑваш патшалӑх Ҫамрӑксен театрӗнче «Салтан патша ҫинчен хунӑ юмах» аудиоспектакль хатӗрленӗ. Ку проекта Раҫҫейри театр ӗҫченӗсен пӗрлӗхӗ пулӑшнипе пурнӑҫланӑ.

Авторӗ – Чӑваш Республикин тава тивӗҫлӗ артистки Наталья Ахмед. «Салтан патша ҫинчен хунӑ юмаха» Георгий Ефимов куҫарнӑ. Вулаканӗсем — Владимир Григорьев, Наталья Ахмед, Альбина Агеева. Ку аудиоспектакль япӑх куракан ачасем валли. Аудиоверси республикӑри тата чӑваш халӑхӗ пурӑнакан регионсенчи библиотекӑсенче тата шкулсенче пулӗ.

Аудиоспектакль хӑтлавӗ раштавӑн 3-мӗшӗнче, Сусӑрсен пӗтӗм тӗнчери кунӗнче, Республикӑри Л.Н.Толстой ячӗллӗ ятарлӑ вулавӑшра пулӗ.

Чӑваш Енри ҫыравӑҫӑсен пӗрлешӗвӗн сӑнӳкерчӗкӗ

Раштав уйӑхӗн 5-мӗшӗнче чӑваш поэзийӗн «Золотой салют колосьев…» антологине хаклама пуҫтарӑнӗҫ. Ку кӗнекене классиксен тата хальхи вӑхӑтри авторсен сӑввисем кӗнӗ. Кӗнеке хӑтлавне Халӑхсен туслӑхӗн ҫуртне (вӑл Хусанкай урамӗнчи 20-мӗш ҫуртра вырнаҫнӑ) 15 сехете чӗнеҫҫӗ.

Кӗнекене Симферополь хулинчи И. Гаспринский ячӗллӗ медиацентр кун ҫути кӑтартнӑ. Ҫӗнӗ кӑларӑма хатӗрлессие чӑваш халӑх поэчӗсем Юрий Сементер тата Светлана Асамат, Чӑваш Республикин культурӑн тава тивӗҫлӗ ӗҫченӗ Светлана Гордеева ӗҫленӗ.

Кӗнекене Константин Ивановӑн, Ухсай Яккӑвӗн, Ҫеҫпӗл Мишшин тата Петер Хусанкайӑн хайлавӗсем кӗнӗ. Унсӑр пуҫне Геннадий Айхин, Порфирий Афанасьевӑн, Алексей Воробьевӑн, Георгий Ефимовӑн, Митта Ваҫлейӗн, Стихван Шавлин, Николай Шелепин пултарулӑхӗпе паллашма пулать.

Хальхи вӑхӑтри поэтсенчен Юрий Сементерӑн, Светлана Асаматӑн, Валери Туркайӑн, Раиса Сарпин, Лидия Филиппован, Светлана Гордееван, Марина Карягинан, Валентина Белован, Лариса Петрован, Людмила Исаеван, Лидия Кубашинан, Владимир Мишшанӑн тата ыттисен сӑввисене те пичетленӗ.

Чӑваш Енӗн Наци вулавӑшӗнче чӑваш халӑх поэчӗн Ухсай Яккӑвӗн «Ҫырнисен пуххи = Собрание сочинений. Т. 8: Тӗрлӗрен» тата «Чӑваш дивизийӗ ҫинчен каласа паракан поэма = Поэма о чувашской дивизии» кӗнекисене хаклассине эпир унччен пӗлтернӗччӗ-ха.

Мероприятие писательсем, журналистсем, преподавательсем, литературоведсем, общество хастарӗсем тата студентсем хутшӑннӑ.

Ашшӗ ҫинчен ӑшшӑн аса илсе хӗрӗ, Ольга Яковлевна, хумханса каласа кӑтартнӑ. Унсар пуҫне вӑл маларах асӑннӑ икӗ кӑларӑма мӗншӗн кун ҫути кӑтартни ҫинчен ӑнлантарса панӑ.

cap.ru сайтри сӑн

Паян 15 сехет ҫурӑра Шупашкарта Халӑхсен туслӑхӗн ҫуртӗнче «Пӗрле тӑватпӑр» этномастерской уҫӑлать.

Унта хутшӑнакансем паян эрешсемпе паллашӗҫ, хӑйсен аллипе мӗн те пулин ӑсталӗҫ. «Йӑх паллисем» курав иртнине тата пуласлӑха ҫыхӑнтаракан кӗпер пулӗ. Унта хӑйне евӗр тутӑрсен тӗслӗхӗсем пулӗҫ, вӗсем — салтаксемпе рекрутсем валли сыхчӑ пек тӗрленисем.

cap.ru сӑнӳкерчӗкӗ

Чӑваш академи драма театрӗнче шкул театрӗсен «АСАМ» фестивалӗн ҫӗнтерӳҫисене палӑртма йӗркелӳ комитечӗ пуҫтарӑннӑ. Кун пек фестиваль пирӗн республикӑра кӑҫалхипе виҫҫӗмӗш хут иртет.

Тӳресем асӑрханӑ тӑрӑх, театр ӳнерӗпе кӑсӑкланакансен йышӗ кӑҫал самай ӳснӗ. Фестивале хутшӑнакансем репертуара та тӗплӗнрех суйласа илнӗ, спектакльте вылякансене те.

Кӑҫалхи фестивале 309 вӗрену учрежденийӗ 310 ӗҫпе хутшӑннӑ. Сцена ҫине 4031 ача тухнӑ.

Кӗҫех кам ҫӗнтерни паллӑ пулӗ.

vk.com/gov_cap_ru сӑнӳкерчӗкӗ

«Трактор тӑвакансен культура керменӗ» республикӑри халӑх пултарулӑхӗн ҫурчӗ «Дом культуры. Новый формат» (чӑв. Культура ҫурчӗ. Ҫӗнӗ формат) пӗтӗм Раҫҫейри конкурсра ҫӗнтернӗ.

Культура ҫурчӗ «Клуб йышши регион шайӗнчи культурӑпа кану учрежденийӗ пурнӑҫа кӗртнӗ проект» номинацире «Тӗрленӗ Раҫҫей» пӗтӗм Раҫҫейри фестиваль ирттернипе палӑрнӑ.

Ҫӗнтерӳҫӗсене Мускавра, Раҫҫейӗн Культура министерствин Пысӑк кинозалӗнче, чысланӑ.

Конкурса 72 регионтан 150 проектпа хутшӑннӑ. Вӗсенчен тӑххӑрӑшне суйласа илсе чысланӑ.

cap.ru сӑнӳкерчӗкӗ

«Ҫавал» ансамбль солисчӗ-вокалисчӗ Чӑваш Енӗн Патшалӑх Канашӗн Председателӗнчен Леонид Черкесовран пулӑшу ыйтнӑ.

Республикӑн влаҫ органӗсен официаллӑ порталӗнчи кӗске хыпарта йышӑнӑва пынӑ ҫын епле ыйтӑва хускатнине пӗлтермен. Халӑх пултарулӑхне аталантарассине сӳтсе явнӑ тесе типпӗн ҫеҫ палартса хӑварнӑ.

«Хӑйне евӗр чӑваш культурине упракан коллективсене пур енлӗн пулӑшмалла», - тесе каланӑ иккен Леонид Черкесов.

chuvbook.ru сӑнӳкерчӗкӗ

Чӑваш Енӗн Наци вулавӑшӗнче ыран, чӳк уйӑхӗн 25-мӗшӗнче, 18 сехетре кӑсӑклӑ мероприяти иртмелле.

Чӑваш кӗнеке издательствин сайтӗнчи анонсра ку мероприяти пирки ҫапла хыпарланӑ:

«Ку – урӑх улах… Кунта художниксем юптараҫҫӗ, ҫыравҫӑсем ӳкереҫҫӗ, вулавӑшҫӑсем юрлаҫҫӗ, вулакансем ҫыраҫҫӗ…

Ку – урӑх улах… Чӑрсӑр шухӑшсене, ҫӗнӗ пуҫарусене пурнӑҫа кӗртмелли хӑйне евӗрлӗ хутлӑх. Кунта Ирӗк тата хавхалану сывлӑшӗ хуҫаланать, пултарулӑх ҫӑлкуҫӗ иксӗлми вӑйпа тапса тӑрать.

Мӗн пулса тухассине хамӑр та пӗлместпӗр!

Пурне те хапӑл туса кӗтетпӗр!»