"Контактри" сӑн

Ҫӗнӗ Шупашкарти фольклор ансамблӗ «Теветкел» тӗнче шайӗнчи икӗ конкурсра лауреат пулса тӑнӑ: Хусанта иртнӗ «Культурӑсен пӗрлешӗвӗ» тата Питӗрте пулнӑ «Нева проспекчӗсем» конкурссенче. Иккӗшӗнче те пӗрремӗш вырӑн йышӑннӑ.

Ансамбле 2010 ҫулта «Химик» культура ҫуртӗнчи чӑваш халӑх театрӗ ҫумӗнче Альбина Алексеева пуҫарӑвӗпе йӗркеленӗ. Паянхи кун унӑн репертуарӗ пуян: 50 ытла юрӑпа ташӑ, вӗсем – тӗрлӗ жанрлӑ.

Ансамбль малашне те ҫулҫӳревсене тухасшӑн, чӑваш халӑх этнокультурипе паллаштарасшӑн.

culture.cap.ru сӑнӳкерчӗкӗ

Чӑваш патшалӑх юрӑпа ташӑ ансамблӗ ҫӗн сезона ҫитес уйӑхра уҫӗ. Концерт юпа уйӑхӗн 17-мӗшӗнче Шупашкарти трактор тӑвакансен культура керменӗнче иртӗ.

Концерт программине «В семье единой» (чӑв. Пӗрлехи ҫемьере) ят панӑ. Ӑна вӑл Раҫҫейри ҫемье ҫулталӑкне халалланӑ.

«Пӗр шухӑшлӑх ҫемьере те, ҫӗршывра та пӗлтерӗшлӗ. Унран пирӗн, ҫемье тата патшалӑх пуласлӑхӗ килет. Чӑваш Енри пӗрлехи ҫемьере нумай халӑх наци ҫынни пурӑнать. Программӑра вӗсен пултарулӑхне пӗрлехи вокалпа хореографи концерчӗ урлӑ кӑтартса парӑпӑр», – тенӗ ансамблӗн ӳнер ертӳҫин тивӗсне пурнӑҫлакан Алексей Тимошенко.

Ҫитес ҫул Шупашкарти Пӗтӗм тӗнчери кинофестиваль 18-мӗш хут иртӗ. Вӑл хӑҫан пуласси халех паллӑ: ҫу уйӑхӗн 22-28-мӗшӗсенче.

Яланхи пекех конкурса хутшӑнакан тата хутшӑнман фильмсене кӑтартӗҫ. Ҫавӑн пекех ӑсталӑх класӗсем, общество акцийӗсем пулӗҫ, фильмсене авторӗсемпе пӗрле сӳтсе явӗҫ.

Палӑртса хӑварар: кинофестивале пӗрремӗш хут 2008 ҫулхи ҫӗртме уйӑхӗнче ирттернӗ.

Чӑваш патшалӑх пуканӗ театрӗ вырнаҫтарнӑ сӑнӳкерчӗк

Шупашкара Сахалинти театр килӗ. Чӑваш патшалӑх пукане театрӗнче пӗлтернӗ тӑрӑх, унччен вӑл пирӗн патра пулман.

Юпа уйӑхӗн 2-5-мӗшӗсенче театр «Пысӑк гастроль» проектпа килӗшӳллӗн килӗ. Ӑна Росконцерт ҫӗршывӑн Культура министерствин гастрольпе концерт планне тӗе хурса йӗркелет.

Чӑваш патшалӑх пуканӗ театрӗн сцени ҫинчи аякри хӑнасем «Золотой Цыпленок», «Убить Бобрыкина» и «Расскажи мне про Красную Шапочку» спектакльсем кӑтартӗҫ.

Чӑваш патшалӑх гуманитари ӑслӑлӑхӗсен институтӗнче Ҫеҫпӗл Мишшине халалланӑ Пӗтӗм Раҫҫейри ӑслӑлӑхпа практика конференцийӗ иртӗ.

«Национальные картины мира в литературах народов Волго-Уралья» (чӑв. Тӗнчери наци сӑн-сӑпачӗ Атӑлпа Урал тӑрӑхӗнчи халӑхсен литературинче) ят панӑ мероприяти чӳк уйӑхен 14–15-мӗшӗсенче иртӗ.

Ӑслалӑх форумӗн тӗллӗвӗ — ӑслӑлӑхпа тӗпчев организациӗсен, преподавательсен, педагогсен, аспирантсемпе магистрантсен Атӑлпа Урал тӑрӑхӗнчи халӑхсен литературине тӗпчес ӗҫне пухса пӗрлештерсси.

Чӑваш кӗнеке издательствин сӑнӳкерчӗкӗ

Чӑваш кӗнеке издательстви «Чӑваш кӗнеки. Пултаруллӑ ҫамрӑксем» регионсем хушшинче вун виҫҫӗмӗш хут иртекен конкурса хутшӑнма йыхравлать. Кун пирки издательство халӑх тетелӗнчи хӑйӗн пабликӗнче пӗлтернӗ.

Ӗҫсене ҫурла уйӑхӗн 30-мӗшӗнче йышӑнма пуҫланӑ, вӗсене юпа уйӑхӗн 31-мӗшӗччен йышӑнӗҫ. Конкурс тӑватӑ номинаципе иртет. «Юратнӑ кӗнеке ҫинчен ҫырнӑ чи лайӑх хаклав» номинацие аслисен те хутшӑнма юрать иккен. Унта хутшӑнакансен Чӑваш кӗнеке издательствинче тухнӑ кӑларӑма вуланӑ хыҫҫӑн ҫуралнӑ шухӑш-кӑмӑла уҫса памалла. Хаклава fed_ol@mail.ru электрон почтӑпа ярса пама юрать. Ҫырӑва ӑсатнӑ чухне «Чӑваш кӗнеки. Пултаруллӑ ҫамрӑксем» конкурса» тесе палӑртма ыйтаҫҫӗ.

«Юратнӑ хайлаври чи интереслӗ самант» темӑпа хатӗрленӗ ӳкерчӗк» номинацире хутшӑнакансен кӗнекери пӗр-пӗр саманта ӳкерсе парӗҫ.

Кӑҫал Ҫеҫпӗл Мишши чӑваш классикӗ ҫуралнӑранпа 125 ҫул ҫитнине шута илсе «Ҫеҫпӗл Мишши хайлавӗсем тӑрӑх хатӗрленӗ ӳкерчӗк» номинаци те пур.

«Ача хатӗрленӗ чи лайӑх кӗнеке» номинацире ачан хӑй шухӑшласа кӑларнӑ хайлава кӗнеке пек хатӗрлесе памалла.

"Контактри" сӑн

Етӗрне округӗнчи «Вирьял» ансамбль регионсен хушшинче иртнӗ славянсен ӳнерӗн фестивалӗнче палӑрнӑ. Вӑл «Вырӑс уйӗ» /выр. «Русское поле»/ ятпа иртнӗ. Ансамбль фестивальте ятарлӑ премие тивӗҫнӗ. «Халӑх йӑли-йӗркине упранӑшӑн» ятлӑ вӑл.

Палӑртмалла: фольклор ушкӑнӗ 1990 ҫулта Тури Ачак культура ҫурчӗ ҫумӗнче йӗркеленнӗ. Ӑна пуҫарма РФ тата ЧР культурӑн тава тивӗҫлӗ ӗҫченӗ Аркадий Айдак сӗннӗ.

Саламлатпӑр пултаруллӑ ушкӑна!

chuvbook.ru сӑнӳкерчӗкӗ

Чӑваш Ен Наци вулавӑшӗ «Литература Чӑваш Енӗ: 2023 ҫулти кӗнеке конкурс» ирттерет. Фестиваль-конкурса йӗркелеме Чӑваш Енӗн Культура министерстви пулӑшать. Ҫавӑн пекех Чӑваш Енри Профессионал писательсен союзӗ, Чӑваш кӗнеке издательстви, Чӑваш патшалӑх гуманитари ӑслӑлӑхӗсен институчӗ хутшӑнать.

Конкурса ҫак номинацисемпе ирттереҫҫӗ: «Чи лайӑх ӑслӑлӑх кӗнеки (гуманитари енӗпе)»; «Тӑван тӑрӑх ҫинчен чи лайӑх кӗнеке»; «Илемлӗ прозин чи лайӑх кӗнеки», «Чи лайӑх поэзи кӗнеки», «Ачасемпе ҫамрӑксем валли чи лайӑх кӗнеке», «Чи хитре илемлетнӗ кӗнеке», «Чи вулакан кӗнеке».

саp.ru сайтри сӑн. Кавал шкулӗ

Чӑваш Енри виҫӗ ҫурта культура еткерлӗхӗсен шутне кӗртнӗ. Кун пирки ЧР Культура министерстви пӗлтерет.

Пӗрремӗшӗ – Вӑрмар округӗнчи Кавал шкулӗ. Ӑна 1012 ҫултах тума тытӑннӑ. Ун чухнехи фасачӗ тата шалти планировки паянхи кунччен сыхланса юлнӑ. Ҫурт стилӗ – эклектика.

Ҫавӑн пекех Шупашкарти 12-мӗш шкул тата 36-мӗш ача пахчи культура еткерлӗхӗ шутланаҫҫӗ. Вӗсене классика стилӗпе конструктивизм стилӗпе усӑ курса хута янӑ.

cap.ru сӑнӳкерчӗкӗ

Чӑваш патшалӑх ҫамрӑксен театрӗнче Гримм пӗртӑвансен юмахӗпе «Бременские музыканты» мюзикл лартма хатӗрленеҫҫӗ. Премьерӑна авӑн уйӑхӗн 14-мӗшӗнче кӑтартӗҫ. Трубадурпа унӑн тусӗсен мыскарисем ҫинчен каласа кӑтартакан ӗҫпе театрӑн тӗп режиссёрӗ Дмитрий Михайлов ӗҫлет. Мюзикла театрти пӗтӗм труппа тенӗ пекех хутшӑнӗ.

Мюзиклти юрӑсен авторӗ – Игорь Столяров музыкант тата композитор. Унпа театр унччен те килӗштерсе ӗҫленӗ. Художник-постановщикӗ — Питӗрти Мария Шуплецова. Вӑл маларах Марина Карягина пьеси тӑрӑх «Ҫӗн Кун Ачи», Михаил Лермонтовӑн «Мцыри» ӗҫне лартма хутшӑннӑ.

Пластика режиссёрӗ — Пушкӑртстанӑн искусствӑсен тава тивӗҫлӗ ӗҫченӗ тата тава тивӗҫлӗ артисчӗ Рамиз Мухаметшин. Вӑл чӑваш театрӗнче «Снежная королева» юмах, «Ҫӗн Кун Ачи», «Шурҫамка», «Куккук куҫҫулӗ» спектакльсем лартма хутшӑннӑ.