«Контактри» сӑн

Чӑваш Енри ӳкерҫӗ Санкт-Петербургра мӑн асламӑшӗнчен юлнӑ еткерӗн куравне уҫнӑ.

Сӑмах — Полина Маркова пирки, вӑл Поли Марко ятпа паллӑ. Пӗррехинче вӑл мӑн асламӑшӗн авалхи тӗррине курнӑ — ун ҫинче ҫынсем пулнӑ, пуҫӗсем ҫинче – чечексем. Ҫапла унӑн ӗҫӗсенче «чечек ҫыннисем» пулса кайнӑ: ҫунат евӗр пысӑк алӑ-ураллӑ сӑнарсем. Халӗ вӗсене Петербургра «Чечек ҫыннисем: тупра» куравра курма пулать.

Ӳкерҫӗн мӑн асламӑшӗ Федосия Васильева ятлӑ пулнӑ, вӑл 1886 ҫулта Аслӑ Мами ялӗнче ҫуралнӑ. Шӑпах унӑн пуянлӑхӗ — сӗтел ҫиттисем, алшӑллисем, тумтирсем, пуҫа тӑхӑнмалли тӗрӗллӗ хатӗрсем — хӗре илӗртнӗ.

Чылай вӑхӑт Полина хӑйӗн йӑх тымарӗсене вӑрттӑнлӑхра упранӑ. Унӑн аслашшӗ пӗр вӑхӑт вӗсене тӑван чӗлхепе культурӑна вӗренме чарнӑ. «Эпӗ никама та чӑваш пулнине калама тӑрӑшман. Халӗ ҫакна аса илме те намӑс», —тет автор.

Анчах вӑл этнографи музейне лексен, хӑйӗн халӑхӗ культуринче мӗн чухлӗ илем упраннине курсан йӑлтах улшӑннӑ. Ҫавӑнтанпа вӑл чӑваш культурине ҫул хывнӑ.

Курав юпа уйӑхӗн 4-мӗшӗччен «Пушкинская, 10» арт-уҫлӑхра ӗҫлет. Кӗрсе курма тӳлевсӗр.

Малалла...

Чӑваш академи драма театрӗн сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗнче Кӗр сӑри уявӗ иртӗ.

Культура учрежденийӗ халӑх тетелӗнчи хӑйӗн пабликӗнче пӗлтернӗ тӑрӑх, уяв чӳк уйӑхӗн 14-мӗшӗнче 17 сехетре пуҫланӗ. Мероприятие Чӑваш Ен Культура министерствин ҫамрӑксен канашӗпе пӗрле йӗркелеҫҫӗ иккен.

Чӑваш культурине халалланӑ каҫа ирттерме Элтияр Александров пулӑшассине пӗлтернӗ.

Режиссёрӗ – чӑваш халӑх артисчӗ Наталия Сергеева.

«Йӑла-йӗрке ҫинчен лекцисем, хӑйне евӗрлӗ театр арт-объекчӗсем, чӑваш юррисем тата ташшисем пулӗҫ», – тесе пӗлтернӗ Чӑваш академи драма театрӗ халӑх тетелӗнчи хӑйӗн пабликӗнче.

Сӑмах май каласан, республикӑри культура ҫурчӗсенче те чӑваш йӑла-йӗркипе ҫыхӑннӑ мероприятисене ирттереҫҫӗ.

Хусан хулинче «Раҫҫейри халӑхсен костюмӗсем» фестиваль иртнӗ. Унта 31 регионтан 430 ытла ҫын хутшӑннӑ.

Чӑваш Ен чысне Ҫӗнӗ Шупашкар хулинчи Ирина Вирясова хӳтеленӗ. Вӑл ал ӗҫ ӑсти тата Чӑваш Енри ал ӑстисен гильдийӗн пайташӗ.

Ирина Сабировна фестивальте хӑйӗн проекчӗпе «Наци тумӗллӗ пукане» номинацире паллаштарнӑ. Вӑл «Чӑваш тӑрӑхӗнчи (Чӗмпӗр кӗпӗрни пулнӑ) вырӑс халӑхӗн костюмне тӑхӑннӑ пуканесем» коллеци хатӗрленӗ.

Эксперт канашӗ унӑн ӗҫне пысӑка хурса хакланӑ. Коллекци ҫирӗп суйлав витӗр тухса фестиваль вӑхӑтӗнче Хусанти хӑйне евӗр ӑсталӑх центрӗн экспозицине илем кӳнӗ.

Ирина Сабировна фестиваль уншӑн питӗ усӑллӑ пулнине, пысӑк опыт пухма май панине палӑртнӑ.

Праски Витти ҫуралнӑранпа Шупашкар хулинче «Мозаикӑллӑ этномир» проект кӑтартӗҫ.

Ку — пӗрремӗш хут! Хулара пӗрремӗш хут Чӑваш халӑх ӳнерҫин, Раҫҫейӗн тава тивӗҫлӗ ӳнерҫин эскизӗсем тӑрӑх хатӗрленӗ мозаикӑллӑ панно пулӗ. «Ҫамрӑк машӑр. Чӑвашсем» ӗҫ ҫурт фасадне илемлетӗ.

Праски Витти (Виталий Петров) ятне тӗнчипех пӗлеҫҫӗ. Халӗ унӑн хайлавӗсем Шупашкар хулин архитектора сӑн-сӑпатне те илемлетӗҫ. Ҫӗнӗ панно «Эрешсен ҫулӗпе» туризм маршручӗн тӗп пайӗ пулӗ.

Палӑртса хӑварар: проекта «Асамат кӗперӗ» культурӑпа курав центрӗ Культура пуҫарӑвӗсен президент фончӗ пулӑшнипе пурнӑҫланӑ.

Хӑтлав паян 15 сехетре «Асамат кӗперӗ» культурӑпа курав центрӗнче пулнӑ.

(Олег Прокопьев сӑввисен алҫырӑвӗ)

Алҫыру «Несӗлсен тӑмхисем» ятлӑ. Тӑмха мӗнне пӗлетӗп-ха (япаласене пайӑрлатса ҫапнӑ паллӑ). Хирти анасен, михӗ-шӑналӑксен, патшалӑха илнӗ лашасемпе ӗнесем ҫине ҫапатчӗҫ. Ваттисен хӑйсен чӗлхи-ҫырӑвӗччӗ ун чухне.

Хитре каланӑ алҫырура – япӑх илтрӗм ҫав. Нимле тӑмха та курмарӑн – ни тӳррӗн сӑнланине, ни шахвӑртса сӑвӑрнине. «Тухату ярӑмра» е ятарласа пайра чунри авалхи тӑмхасене тупса пулинех... Вӑхӑтпа ҫирӗппӗн палӑртнӑ вӗсене – юпа уйӑхӗн 30-мӗшӗ, 2025 – ҫурла уйӑхӗн 31-мӗшӗ, 2026 хушшинче ҫырнӑ. Ҫыраканӗшӗн вӑхӑчӗ пӗлтерӗшлӗ пулӗ те, поэзишӗн ҫакӑ питех апла мар. Ҫапах та, пӗр хавхапа пӗр тапхӑрта вӗри те вӑхӑтлӑ шӑратнӑ сӑвӑсем ӗмӗрсене юлни чылай. Фетпа футуристсем, Блокпа пӗрле Андрей Петтокин «Кӑвак инҫет» ярӑмӗ аса килет.

Халь кӑна паллӑ ҫынсем – патшалӑх ертӳҫи пулнӑ Анатолий Лукиянов, Российӑ следстви комитечӗн председателӗ Александр Бастрыкин, хамӑрӑн паллӑ депутат Юрий Моляков ҫырнӑ сӑвӑсене савӑнса вуланӑччӗ. Шухӑшлӑ. Илемлӗ. Таса сӑмах, чунри вут кирек кама та тыткӑна илме, кӑмӑлне уҫма пултарать ҫав.

Малалла...

cap.ru сайтри сӑн

Ҫӗрпӳ округӗнчи Пӗчӗк Кӑнаш ялӗнче ҫӗнӗ клуб уҫӑлнӑ. Ӑна 60 ҫын вырнаҫмалӑх хута янӑ.

Клуба авӑн уйӑхӗн 14-мӗшӗнче савӑнӑҫлӑ лару-тӑрура уҫнӑ. Унта Ҫӗрпӳ округӗн пуҫлӑхӗ Владимир Глухов, Чӑваш наци музейӗн ертӳҫи Ирина Меньшикова тата ытти сумлӑ ҫынсем хутшӑннӑ.

Клуба «Ниме – Халӑх хысни» программӑпа килӗшӳллӗн хута янӑ. «Тӑван кӗтес культури» проектпа килӗшӳллӗн пурлӑхпа техника базине ҫӗнетме 1 миллион тенкӗ уйӑрнӑ.

Ҫак ял тата акӑ мӗнпе паллӑ: кунта 1971 ҫулта ЧР культура министрӗ Светлана Каликова ҫуралнӑ. Анчах вӑл клуб официаллӑ майпа уҫӑлнӑ чухне пулман.

Палӑртса хӑварар: Пӗчӗк Кӑнаш ялӗ пысӑках мар. 2020 ҫул тӗлне унта 64 ҫын пурӑнни паллӑ.

Елена Николаева страницинчен илнӗ сӑнӳкерчӗк

Чӑвашсем Пӗтӗм тӗнчери театр олимпиадине хутшӑнасшӑн. Кун пирки Чӑваш патшалӑх академи драма театрӗн директорӗ Елена Николаева халӑх тетелӗнчи хӑйӗн страницинче пӗлтернӗ.

Паян вӑл Санкт-Петербургра иртнӗ Раҫсейри наци театрӗсен ассоциацийӗн канашӗн ларӑвне хутшӑннӑ. Унта театр пӗрлӗхӗн малашлӑхне сӳтсе явнӑ. Тӗлпулура 2027-2028 ҫулсенчи плансем пирки калаҫнӑ. Тӗп пулӑмсенчен пӗри вӑл – Наци театрӗсен III конгресне Шупашкарта ирттересси. Ӑна СССР халӑх артистки Вера Кузьмина ячӗллӗ наци театрӗсен III фестивалӗ вӑхӑтӗнче йӗркелесшӗн.

Питӗрти ларура Пӗтӗм тӗнчери театр олимпиадине хутшӑнассине те сӳтсе явнӑ. 2028 ҫулта вӑл Грецире «Возвращение к истокам» (чӑв. Иртни патне таврӑнса) ятпа ирттересшӗн.

Авӑн уйӑхӗн 18-мӗшӗнче Чӑваш патшалӑх ӳнер музейӗнче РСФСР тава тивӗҫлӗ ӳнерҫин, Чӑваш халӑх ӳнерҫин Виталий Петровӑн (Праски Витти) куравӗ уҫӑлӗ. Экспозицие вӑл ҫуралнӑранпа 90 ҫул ҫитнине халалланӑ.

Куравра – 200 ытла хайлав: живопись, графика, эмальсем, керамика, Раҫҫейри тӗрлӗ хулари монмументлӑ-декоративлӑ эскизсем. Ку курав – вӑл леш тӗнчене кайнӑранпа пӗрремӗшӗ. Экспозиципе юпа уйӑхӗн 18-мӗшӗччен паллашма май пулӗ.

Аса илтерер: Праски Витти кӑҫал кӑрлач уйӑхӗн 30-мӗшӗнче ҫут тӗнчерен уйрӑлнӑ. Вӑл 89 ҫулта пулнӑ. Праски Витти Вӑрнар районӗнчи Малти Ишек ялӗнче 1936 ҫулхи авӑн уйӑхӗн 17-мӗшӗнче ҫуралнӑ.

Республикӑн халӑх пултарулӑх ҫурчӗ сӑнӳкерчӗкӗ

Чӑваш Енре автоклубсем пур та вӗсене ахаль тӑратасшӑн мар. Авӑн уйӑхӗн пӗрремӗш эрнинче вӗсем 18 яла ҫитсе концерт кӑтартнӑ. Автоклубпа килнӗ артистсене курма 1410 ҫын пухӑннине ӗнентерет Республикӑн халӑх пултарулӑх ҫурчӗ.

Вӑрнар тӑрӑхӗнче автоклуб Оттикӑвӑ тата Хураҫырма ялӗсенче пулнӑ. «Санар» фольклор ансамблӗ «Кӗрхи салам!» программа хатӗрленӗ, авалхи юрӑсене шӑрантарнӑ, куракансене халӑх инструменчӗсен сасси те тыткӑнланӑ.

Сӗнтӗрвӑрри тӑрӑхӗнче автоклуб Малти Чиперуй тата _Макаҫкасси ялӗсенче пулнӑ. Макаҫкасси ялӗнче Урхас Кушкӑри вырсарни шкулӗнче вӗренекен ачасем те куракансен умне тухнӑ.

Шупашкар районӗнче автоклуб Арккассинче__ концерт кӑтартнӑ. Унта авӑн уйӑхӗн 5-мӗшӗнче ял кунӗ иртнӗ, автоклуб ҫавӑнта пырса ҫитнӗ.

Николай Семёнов страницинчен илнӗ сӑнӳкерчӗк

Чӑваш наци библиотекинче Владимир Карсакова халаланӑ кӗнекене хаклама пуҫтарӑннӑ. Кӗнеке авторӗ — Зоя Илларионова. Аса илтерер: Владимир Карсаков (10.09.1961–02.09.2019) — режиссёр тата телеоператор.

Чӑваш Енӗн патшалӑх телерадиокомпанийӗн режиссёрӗ Николай Семёнов халӑх тетелӗнчи хӑйӗн страницинче пӗлтернӗ тӑрӑх, кӗнеке презентацине халӑх йышлӑн пуҫтарӑннӑ: тӑванӗсем, ӗҫтешӗсем, вӗренекенӗсем туха-туха калаҫнӑ. Николай Анатольевич пӗлтернӗ тӑрӑх, кӗнеке те, тӗпрен илсен, вӗсен асаилӗвӗсемпе пуян, автор самай ҫынпа калаҫнӑ, тӗрлӗ тапхӑра пӗр ҫӗре пуҫтарнӑ.

Режиссёрӑн мӑшӑрӗ Елизавета Никитична упӑшки туса пӗтермен ӗҫ нумай хӑварнине палӑртса хӑварнӑ.

Астӑвӑм каҫне пухӑннисем режиссера ырӑпа нумай аса илнӗ.