«Хыпар - Вести Чувашии» МАХри каналтан илнӗ сӑнӳкерчӗк

Пушкӑртстанра «Ачалӑх тӗнчи» ача пахчисенчи шӑпӑрлансен фестиваль-конкурсӗ иртнӗ.

«Хыпар - Вести Чувашии» МАХри каналта пӗлтернӗ тӑрӑх, мероприятие ака уйӑхӗн 16-мӗшӗнче Пушкӑртстанри Ҫтерлӗ хулинче Пионерсен керменӗнче йӗркеленӗ, ӑна Раҫҫейри халӑхсен пӗрлӗхӗн тата Пушкӑртстанри пысӑк та туслӑ ҫемье ҫулталӑкӗсене халалланӑ.

Уява хула администрацийӗнчен, Ӗпхӳрен, Кармаскалӑ районӗнчен хӑнасем пырса ҫитнӗ.

«Конкурса хутшӑнакансем чӑваш наци костюмӗсемпе паллаштарса вӗсем ҫинчен каласа панӑ. Ҫавӑн пекех сӑвӑ-юрӑ янӑранӑ. Фойере вара ача-пӑча учрежденийӗсем хатӗрленӗ тӗлӗнмелле курав иртнӗ. Садиксемпе пӗрле Ҫтерлӗ районӗнчен ҫитнӗ Ольга Патраева пуҫа тӑхӑнмалли хатӗрсене кӑтартнӑ. Авӑркас районӗнчен килсе ҫитнӗ Ефимовсен ҫемьи пурне те тӗлӗнтернӗ», — пӗлтернӗ эпир маларах асӑннӑ ҫӑлкуҫра.

Канала ҫырӑнас

cap.ru сайтри сӑн

Шупашкарта, Чӑваш патшалӑх оперӑпа балет театрӗнче, Пӗтӗм тӗнчери оперетта фестивалӗ пуҫланнӑ. Вӑл «Виват, оперетта!» гала-концертпа тытӑннӑ.

Уяв каҫне икӗ пая уйӑрнӑ. Пӗринче ют ҫӗршыв классикин шедеврӗсем янӑранӑ. Иккӗмӗшӗнче вара хамӑр ҫӗршыври чи лайӑх опереттӑсемпе паллаштарнӑ: Исаак Дунаевский, Юрий Милютин хайлавӗсем янӑранӑ. Халӑх вӗсене тӑвӑллӑн алӑ ҫупса йышӑннӑ.

Фестиваль пӗр эрнене тӑсӑлӗ. Куракансене «Мы хотим танцевать», «Фиалка Монмарта» спектакльсемпе паллаштарӗҫ. Фестиваль «Ваш Андрей Петров» гала-концертпа вӗҫленӗ.

Сӑмах май, билетсене «Пушкин карттипе» те туянма май пур.

cap.ru сайтри сӑн

Чӑваш Енре «Мускав-Ҫӗпӗр ҫулӗ: Чӑваш Енри ҫулсен историйӗ пирки таврапӗлӳҫӗ ҫырса пынисем» кӗнеке кун ҫути курнӑ. Ӑна Татьяна Самылова тата Надежда Титова таврапӗлӳҫӗсем кӑларнӑ.

Трансҫӗпӗр магистральне тӑвиччен Ҫӗпӗр ҫулӗ ҫӗршыври тӗп ҫул шутланнӑ. Вӑл 10 пине яхӑн ҫухрӑма тӑсӑлнӑ. Ҫул Раҫҫейӗн Европа пайне Инҫет Хӗветухӑҫпа тата Китайпа ҫыхӑнтарнӑ. Ун тӑрӑх чей турттаракан каравансем ҫӳренӗ, почта ҫӳретнӗ. Ҫавӑн пекех ҫак ҫулпа ҫынсене Ҫӗпӗре каторгӑна тата ссылкӑна янӑ.

Ҫӗпӗр ҫулӗ Чӑваш Ен урлӑ та выртнӑ: Мӑн тата Кивӗ Сӗнтӗр, Шупашкар, Шӗнерпуҫ тата ытти ялсем витӗр тухнӑ.

Красноармейскинчи тӗп вулавӑшра лавкка хуҫин куравӗ уҫӑлнӑ. Асӑннӑ курав лавккапа паллаштармасть-ха. Унта тӗрленӗ ӳкерчӗксен ытарайми, пӑхса ытарайми илемӗпе паллашма пулать. Ҫав ӗҫсен авторӗ — Марина Егорова.

Марина Егорова вӑрлӑх сутакан лавкка хуҫи. Усламҫӑ пушӑ вӑхӑтра та ахаль ларма пӗлмест, вӑл алла йӗппе ҫип илет те тӗрлеме тытӑнать. Чӑн-чӑн тӗрӗ ӑстин, ылтӑн алӑллӑ хӗрарӑмӑн ӗҫӗсем чӑннипех ҫыпӑҫуллӑ пулса тухаҫҫӗ. Ун пек ӳкерчӗксем кирек епле киле те илемлетме пултараҫҫӗ.

Хӑйӗн ӗҫӗсенче Марина Егорова хӗллехи сӑна та, ҫуллахи илеме те, савӑк ҫуркуннепе тулӑх кӗркуннене те кӑтартса парать.

Куравра пулса курнӑ Трак ен ҫыннисем ӑстан картинисене питех те ырлаҫҫӗ, тӗлӗннине пытармаҫҫӗ.

Хӗрлӗ Чутайсен ентешлӗхӗ тӗлпулӑва чӗнет.

Ку вӑл сумлӑ мероприяти пуласси пирки тавҫӑрма йывӑр мар, мӗншӗн тесен хальхи тӗлпулӑва ентешлӗхӗн 30 ҫулхине халалланӑ.

«Чавал» ентешлӗх уявӗнче «Асамат» эстрада ушкӑнӗ, «Сарпике» халӑх ташӑ ансамблӗ, Чӑваш патшалӑх филармонийӗн солистки Динара Юнисова тата ытти артист та пулмалла.

Ентешлӗх уявӗ ака уйӑхӗн 18-мӗшӗнче, шӑматкун, Шупашкарти трактор тӑвакансен культура керменӗнче иртӗ. Вӑл 11 сехетре пуҫланӗ. Унта тӳлевсӗрех кӗртӗҫ.

«Чавалӑн» 25 ҫулхине халалланӑ уява 2022 ҫулта ирттернӗ чухне унта республика Элтеперӗ Олег Николаев, РФ Патшалӑх Думин депутачӗ Алла Салаева тата ытти пысӑк шайри хӑна хутшӑннӑ. Ун чухне мероприяти Чӑваш патшалӑх филармонийӗнче иртнӗ.

cap.ru сайтри сӑн

Кӗҫех республикӑра «Земство культура ӗҫченӗ» программӑна хутшӑнма кӑмӑл пур специалистсенчен заявка йышӑнма пуҫлӗҫ.

Аса илтерер: ҫак программӑпа яла ӗҫлеме каякансене 1 миллион тенкӗ парӗҫ.

Заявкӑсене паян, ака уйӑхӗн 15-мӗшӗнче, йышӑнма тытӑннӑ. Вӗсене утӑ уйӑхӗн 15-мӗшӗччен ҫак адреспа йышӑнаҫҫӗ: Шупашкар хули, Энтузиастсен урамӗ, 26-мӗш ҫурт, 133-мӗш пӳлӗм.

Кӑҫал ҫак программӑпа республикӑри 20 специалист усӑ курма пултарӗ. Вӗсен ялти культура ҫурчӗсене, ӳнер, музыка шкулӗсене вырнаҫма пулӗ.

culture.cap.ru сӑнӳкерчӗкӗ

Чӑваш Енре те тифлокомментатор пур. Пирӗн республикӑра профессилле ун пек специалист малтан пулман иккен. Халӗ пӗрремӗш ҫавӑн пек специалист пур. Вӑл ҫын — Наталия Перевезенцева, Чӑваш Республикин Л.Н. Толстой ячӗллӗ ятарлӑ вулавӑшӗн директорӗ.

Вулавӑш ӗҫченӗ профессилле тифлокомментаторсен 14-мӗш ушкӑнӗнчен вӗренсе тухнӑ. Пӗлу параканни — Мускаври «Реакомп» институт.

Ҫӗршывӑн тӗрлӗ кӗтесӗнчи специалистсем виҫӗ эрне ҫурӑ вӗреннӗ. Вӗҫемпе «Реакомп» институтӑн профессионалӗсем тата аслӑ категориллӗ тифлокомментаторсем: Г.С. Елфимова, М.М. Сенаторов, П. В. Зотова тата тифлокомментировани ӑсти Я.А. Исаичкина ӗҫленӗ.

Наталия Перевезенцева аслӑ категориллӗ тифлокомментатор пулса тӑнӑ.

«Контактра» халӑх тетелӗнчи сӑн

Чӑваш эстрада тӗнчинче Саша Ҫиларман ятпа палӑрнӑ юрӑҫӑн хӗрӗ Аксиния Никифорова Пӗтӗм Раҫҫейри «Ача-пӑча Ҫӗнӗ хум (выр. «Детская Новая волна») конкурсӑн ҫурмафиналне хутшӑнӗ.

Ҫак кунсенче Хусанта суйлав турӗ иртнӗ, унта федерацин Атӑлҫи округӗнчи 500 ытла пултаруллӑ ача хутшӑннӑ. Анчах жюри ҫурмафинала хутшӑнма 9 ҫӗнтерӳҫе кӑна палӑртнӑ. Ҫав йыша кӗме Чӑваш Енри икӗ ача тивӗҫнӗ: Ҫӗрпӳ округӗнчи Сӑнав поселокӗнчи А. М. Михайлов ячӗллӗ ача-пӑча искусство шкулӗн вӗренекенӗ Аксиния Никифорова (9 ҫулта) тата Шупашкарти «Пять октав» вокал студине ҫӳрекен Елена Еремеева (11 ҫулта).

Ҫурмафинал ака уйӑхӗн 18-19-мӗшӗсенче Мускавра иртӗ.

Чӑваш академи драма театрӗн сӑнӳкерчӗкӗ

Ӗнер, ака уйӑхӗн 13-мӗшӗнче, Чӑваш академи драма театрӗн артисчӗсем Сарту облаҫне тухса кайнӑ. Кун пирки культура учрежденийӗ халӑх тетелӗнчи хӑйӗн страницинче хыпарланӑ.

Театр Энгельс хулинче иртекен Пӗтӗм Раҫҫейри «Za жизнь» патриотла спектакльсен тӑваттӑмӗш фестивалне хутшӑнать. Мероприяти паян пулса иртет. Ун вӑхӑтӗнчечӑваш артсичӗсем «Хуркайӑк ҫулӗ» спектакль кӑтартӗҫ.

Аса илтерер: ӑна Чингиз Айтматов повеҫӗ тӑрӑх лартнӑ. Спектакле «Чӗнтӗрлӗ чаршав» театр конкурсне хак паракансем, ҫав шутра паллӑ критиксем те, ырласа мухтанине эпир унччен пӗлтернӗччӗ. Шупашкара Мускавран килсе ҫитнӗ театровед Валентина Федорова ку ӗҫе: «Кун пек спектакльсем халь Мускавра ҫук...» тесе ырланӑ.

Юрӑпа ташӑ ансамблӗн сӑнӳкерчӗкӗ

Чӑваш патшалӑх юрӑпа ташӑ ансамблӗ кӗҫех Раҫҫейри хуласене гастрольпе тухса кайӗ. Ҫула вӑл «Чӑваш тӗнчи» театризациленӗ концерт программипе тухӗ.

Гастроль ака уйӑхӗн 21-мӗшӗнче Чӗмпӗр хулинче пуҫланӗ. Тепӗр кунне пултарулӑх коллективӗ асӑннӑ облаҫри Димитровград хулинче пулӗ.

Ака уйӑхӗн 23-мӗшӗнче ансамбль Чулхулари «Газ» культура ҫурчӗн сцени ҫине тухӗ. Тепӗр кунне, ака уйӑхӗн 24-мӗшӗнче, Пенза облаҫӗнчи Неверкино ялӗнче концерт кӑтартӗ. Ака уйӑхӗн 26-мӗшӗнче Хусанти куракансем Чӑваш Енри профессилле коллективӑн пултарулахӗпе киленӗҫ.

Сцена ҫине харӑсах 50 артист тухӗ, концерт вӑхӑтӗнче вӗсем 10 ытла тум ылмаштарса тӑхӑнӗҫ. Йышра тӗрлӗ конкурс лауреачӗсем, ят-сума тивӗҫнӗ ытти сцена ӑсти пулӗ.