culture.cap.ru сӑнӳкерчӗкӗ

Иртнӗ эрнере Чӑваш патшалӑх академи драма театрӗнче Мордва Республикин тава тивӗҫлӗ писателӗн (ун пек ят та пур иккен) Валентина Мишанинан «Куйкӑрӑш» мистикӑллӑ драмине кӑтартнӑ.

Спектакль режиссёрӗ – Раҫҫейӗн, Азербайджанӑн, Калмӑк тата Тува республикисен тава тивӗҫлӗ ӳнер ӗҫченӗ, Чӑваш Енӗн патшалӑх премийӗн лауреачӗ Борис Манджиев.

Сценографипе Мария Шуплецова художник-постановщик тата ҫутӑ художникӗ Михаил Добрышин ӗҫленӗ. Композиторӗ – Калмӑк Республикин искусствӑсен тава тивӗҫлӗ ӗҫченӗ Аркадий Манджиев. Ташшисене Пушкӑртстанӑн тава тивӗҫлӗ ӗҫченӗ Рамиза Мухаметшина лартнӑ.

culture.cap.ru

Чӑваш патшалӑх пукане театрӗн режиссёрӗ Раҫҫей Правительствин премине тивӗҫнӗ. Вӑл — культурӑпа ӳнер енӗпе пултаруллӑ 43 лауреат йышӗнче.

Денис Андронов — ҫамрӑк та пултаруллӑ режиссёр. Режиссер-постановщикра вӑл 2021 ҫулта ӗҫлеме тытӑннӑ та 2024 ҫулта тӗп режиссёр пулса тӑнӑ.

Унӑн пӗрремӗш ӗҫӗ — «Хранители» патриот спектаклӗ. Ӑна вӑл Тӑван ҫӗршывӑн аслӑ вӑрҫи вӑхӑтӗнче тылра ӗҫленисене халалланӑ.

Денис Андронов ҫулталӑкра пурӗ 240 пин тенкӗ премие тивӗҫӗ.

«Варкӑш» архивӗнчи сӑн

Ҫыравҫӑсемпе поэтсем ЧР Наци вулавӑшӗ умне литература пикникне пухӑннӑ. Ӑна «Варкӑш» литература клубӗ йӗркеленӗ.

Пултаруллӑ ҫынсес сӑвӑсем вуланӑ. Ку кӑна мар, юрӑсем те шӑрантарнӑ. Елчӗк округӗнчи Ирӗк Килтӗш ӳнерҫӗ гитара каланӑ. Чӑваш халӑх поэчӗ Светлана Асамат вара сӗрме купӑс каласа кӑтартнӑ. ЧР тава тивӗҫлӗ вӗрентекенӗ Геронтий Никифоров, ЧР тава тивӗҫлӗ артисчӗ Геннадий Кириллов, Зоя Сывлӑмпи, Галина Кӗмӗл, Нина Пӑрчӑкан, Данил Медведев, Мальвина Петрова, Ольга Австрийская, Лариса Петрова поэтсем, Чӑваш кӗнеке издательствин тӗп редакторӗн ҫумӗ Ольга Федорова, Наци библиотекин ӗҫченӗсем Ольга Тимофеева, Татьяна Семенова, Антонина Андреева сӑвӑсем вуланӑ.

Шупашкарта тепӗр мурал пулӗ. Ӑна Хӗвеллӗ урамӗнче ӳкерӗҫ. Мурал «Хальхи тата иртни» ятлӑ пулӗ. Авторӗ — «ФормаАРТ» фестивале хутшӑнакан Яна Ежова.

Атӑлҫи тӑрӑхӗнче «ФормАРТ» фестиваль улттӑмӗш хут иртет. Унта 18-35 ҫулсенчи ӳнерҫӗсем хутшӑнаҫҫӗ. Кӑҫал фестивале Тӑван ҫӗршыв хӳтӗлевҫин ҫулталӑкне халалланӑ. Ҫӗнтерӳҫе 200 пин тенкӗ преми парӗҫ. Иккӗмӗшпе виҫҫӗмӗш вырӑншӑн – 150 тата 100 пин тенкӗ.

Яна Чӑваш патшалӑх ӳнер музейӗнче ӗҫлет, И.Я.Яковлев ячӗллӗ ЧППУра магистратурӑра вӗренет.

cap.ru сӑнӳкерчӗкӗ

Ҫӗртме уйӑхӗн 24-мӗшӗнче, Республика кунӗнче, Шупашкарта Акатуй иртессине эпир пӗлтернӗччӗ-ха. Вӑл Хӗрлӗ лапамра 15 сехетре пуҫланӗ. Уява ака-суха ӗҫӗ вӗҫленнине тата Чӑваш автономине йӗркеленӗренпе 105 ҫул ҫитнине халаллӗҫ.

Унта Чӑваш Енри чи пултаруллӑ коллективсем ҫеҫ мар, Самар, Ӗренпур, Чӗмпӗр облаҫӗсенчи, Санкт-Петербургри, Чулухлари, Пушкӑртстанри, Мари Элти тата Тутарстанри коллективсем килсе ҫитӗҫ.

Чӑваш академи драма тата Ҫамрӑксен театрӗсен коллективӗсем те унта хутшӑнӗҫ.

culture.cap.ru сӑнӳкерчӗкӗ

Ҫеҫпӗл Мишши ячӗллӗ Чӑваш патшалӑх ҫамрӑксен театрӗ тӗрӗк халӑхӗсен пӗтӗм тӗнчери «Науруз» фестивалӗнчен таврӑннӑ. Унта вӑл Марина Карягина пьесипе лартнӑ «Ҫӗн Кун Ачи» спектакльпе хушӑннӑ. Фестиваль Хусанта иртнӗ.

Спектакль умӗн иртнӗ пресс-конференцире театр директорӗ Ольга Иванова тата Борис Манджиев режиссёр спектакле епле хатӗрлени ҫинчен каласа кӑтартнӑ. «22 ҫул ҫеҫ пурӑнса ҫавӑн чухле ӗҫ туса хӑварма пултарнӑ ҫын чухлӗ эпир хамӑр ӗмӗрте тӑваймӑпӑр. Чӑваш Ен ун пек ҫын пуррипе мӑнаҫланать. Спектакль урлӑ манӑн ҫамрӑк кураканран 25 ҫулта вӑл тӑван ҫӗршывшӑн хӑйӗн ҫине ҫавӑн чухлӗ яваплӑх илме тата уншӑн пурнӑҫне пама пултарассине ыйтас килчӗ», — каласа кӑтартнӑ рассказал Борис Наминович.

Тӗрӗк халӑхӗсен XVII «Науруз» пӗтӗм тӗнчери фестивалӗн ҫӗнтерӳҫисене ҫӗртме уйӑхӗн 22-мӗшӗнче палӑртӗҫ тата чыслӗҫ.

Лилия Яковлева архивӗнчи сӑн

Шупашкарти Лилия Яковлева граффити ӳкерсе ҫӗнтернӗ.

Халӗ унӑн ӳкерчӗкӗ Чулхулари Кремле илемлетет. Пӗтӗм Раҫҫейри граффити фестивалӗ шӑпах унта иртнӗ.

Лилия Шупашкар гербӗ ҫинчи пилӗк кӑвакала ӳкернӗ. Вӑл «Этника стилӗ» номинацире палӑрса мала тухнӑ.

Сӑмах май, Лилия – ЧР Патшалӑх Канашӗн Ҫамрӑксен палатин членӗ, регионти «Динамо» аэробика уйрӑмӗн ертӳҫи. Кунсӑр пуҫне вӑл Шупашкарти Н.В.Никольский ячӗллӗ професси колледжӗнче вӗрентет.

cap.ru сайтран илнӗ сӑнӳкерчӗк

Ҫӗрпу тӑрӑхӗнче археологсем ӗҫлеҫҫӗ. Калӑпӑшлӑ ӗҫсем унти «Звездный» ача-пӑча уйлӑхӗнчен инҫе мар вырӑнта пыраҫҫӗ.

Чӑваш патшалӑх гуманитари ӑслӑлӑхӗсен институчӗн ученӑйӗсем педагогика университечӗн историк-студенчӗсемпе тата нимеҫӗсемпе пӗрле авал пурӑннӑ ҫынсем чарӑнса тӑнӑ вырӑна тӗпчеҫҫӗ. Унта ӗҫ мастерскойӗ пулнӑ тесе шухӑшлаҫҫӗ. Тупса палӑртнӑ артефактсем ҫав вырӑнти ҫынсем чултан япала ӑсталама пӗлнине ҫирӗплетсе параҫҫӗ иккен. Палӑк территорийӗ – 7 пин ытла тӑваткал метр. Ҫынсем унта палеолит саманин вӗҫӗнче, пирӗн ӗмӗрчченхи 11-12 ӗмӗрсенче пурӑннӑ тесе шухӑшлаҫҫӗ.

«Чеб.ру» сайтри сӑн

Паян Чӑваш наци музейне тӳлевсӗрех кӗртеҫҫӗ.Анчах унта пуҫа тӑхӑнмалли наци хатӗрӗпе килмелле. Ку акцие Раҫҫей кунне халалланӑ. «Шапочное знакомство» курав вара авӑн уйӑхӗн 21-мӗшӗччен ӗҫлет. Унта – 36 япала: кокошник, очипок, тюбетейка, тастар, кичка, дьябака… Паллашма питӗ кӑсӑклӑ.

Музея паян кӑнӑ тӳлевсӗр кӗртеҫҫӗ. Васкӑр! Наци пуҫ хатӗрне тӑхӑнма ан манӑр. Музей паян 20 сехетчен ӗҫлет.

Ҫеҫпӗ Мишши ячӗллӗ Чӑваш патшалах ҫамрӑксен театрӗ черетлӗ сезона ҫӗртме уйӑхӗн 19-мӗшӗнче хупӗ. Ҫав кун унта куракансене Ева Лисинӑн «Ҫӑкӑр чӗлли» калавӗ тӑрӑх лартнӑ спектакле кӑтартӗҫ.

Ева Лисина калава Тӑван ҫӗршывӑн аслӑ вӑрҫи хыҫҫӑнхи ҫулсенче выҫӑпа вилнӗ ачасене асӑнса ҫырнӑ. «Ашшӗсӗр тӑрса юлнӑ ҫемьен йывӑр пурнӑҫӗ калавра хӗрача куҫӗпе уҫӑлса пырать. Ҫула май чӑваш халӑхӗн наци характерӗ те курӑнсах тӑрать кунта.

«Ҫут тӗнчере савӑнӑҫпа хурлӑх пӗр тан валеҫӗнес пулсан, ман ҫӗршывӑм тахҫанах ырӑлӑхра пурӑнмалла», – пӗтӗмлетсе калать автор вӗҫӗнче», — хыпарланӑ театр сайтӗнчи анонсра.