Лидия Филиппова архивӗнчи сӑнӳкерчӗк

Ку хайлав Лидия Филиппова журналист-ҫыравҫӑн хӑйӗн ентешне – Ҫеҫпӗл Мишши поэта – халалласа ҫырнӑ иккӗмӗш поэми ӗнтӗ. Пӗрремӗшӗ 2022 ҫулта «Хальхи самана» («Век нынешний») ятпа кун ҫути курнӑ.

Ҫӗнӗ поэмӑна тӑван чӗлхепе пӗрлех вырӑсла (куҫаруҫи Любовь Петрова), акӑлчанла (Надежда Колесникова), украинла (Надежда Лисовая) тата марилле (Дина Рычкова) тӗрӗс тата илемлӗ куҫарма пултарнӑ. Ҫакӑ вулакансен йышне тата та ӳстерме май парать. Сӑмах май, вырӑсла тата акӑлчанла куҫару варианчӗсем виҫҫӗ таранах пулса кайнӑ иккен. Ҫавӑнпа вӗсене уйрӑм кӗнекен кӑларас шухӑш пуррине те пӗлтерчӗ Лидия Ивановна.

Поэмӑра автор Ҫеҫпӗл Мишшин пурнӑҫӗпе пултарулӑхӗн ҫулӗпе утать, Шӑхасанта, Теччӗре, Хусанта, Мускавра, Евпаторире, Харьковра, Киевра, Остерта «пулать», унӑн шӑпине, чун ыратӑвӗне тата хастарлӑхне ӑнланма тӑрӑшать.

«Ҫеҫпӗл йӗрӗпе» поэма - чӑваш литературин хаклӑ еткерӗ пулса тӑчӗ. Вӑл вулакансене Ҫеҫпӗл Мишшин таланчӗпе ҫывӑхрах паллашма, унӑн сӑввисене тарӑнрах ӑнланма хистет.

Поэма хӑйӗн илемӗпе тата шухӑш тарӑнӑшӗпе тыткӑнлать. Лидия Филиппова сӑвӑ йӗркисемпе Ҫеҫпӗл Мишшин чунне уҫса парать, унӑн пурнӑҫ ҫулӗнчи йывӑрлӑхсене, ӗмӗт-шухӑшӗсене вулакан патне ҫитерет.

Малалла...

Паян Чӑваш Енӗн культурӑн тава тивӗҫлӗ ӗҫченӗ Валерий Игнатьев 75 ҫул тултарнӑ. Вӑл — аранжировщик, сасӑ режиссерӗ тата композитор.

Валерий Викторович республикӑри чи пултаруллӑ профессионал аранжировщиксенчен пӗри шутланать. Чӑваш патшалӑх филармонийӗнче пӗлтернӗ тӑрӑх, вӑл тӗрлӗ енлӗ наци музыкине аталантарма нумай тӳпе хывнӑ. Ҫав шутра «Нарспи» чӑвашла пӗрремӗш мюзиклпа, «Авалхи сас» программӑпа ӗҫленӗ.

cheb-centr.soc.cap.ru сӑнӳкерчӗкӗ

Авӑн уйӑхӗн 7-мӗшӗнче Шупашкарта пурӑнакан Валентина Андреева хӑйӗн черетлӗ ҫуралнӑ кунне уявланӑ. Юлашки вӑхӑтра ӑна хулари халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗ Наталия Николаева пулӑшса пынӑ май хваттере тирпейлесе тӑрать.

Валентина Андреева паллӑ чӑваш ҫыравҫин, Аркадий Ӗҫхӗлӗн, хӗрӗ. Вӑл космос отраслӗнче 22 ҫул программистра ӗҫленӗ. Унӑн упӑшки, шкулта пӗрле вӗреннӗ каччӑ, лётчика вӗренсе тухнӑ. Ҫамрӑк арӑм унран юлас темен — пӗрле тухса кайнӑ. 22 ҫултан вӗсем тӑван тӑрӑха, Шупашкара, таврӑннӑ.

Мӑшӑр пӗр хӗр ҫуратса ӳстернӗ, анчах вӑл сарӑмсӑр вилнӗ. Кинемее паян юратнӑ мӑнукӗ Максим чунтан юратса пӑхать.

"Контактри" сӑн

Канаш округӗнче пурӑнакан кинемей 100 ҫулхи юбилейне паллӑ тунӑ. Наталия Ильинана Канашри элеватор ертӳлӗхӗ те саламланӑ. Вӑл тивӗҫлӗ канӑва тухиччен унта весовщицӑра ӗҫленӗ.

Унӑн пӗтӗмӗшле ӗҫ стажӗ – 45 ҫул. Тӳрӗ чунпа нумай ҫул вӑй хунӑшӑн ӑна ӗҫ ветеранӗн ятне панӑ.

Наталия Борисовна мӑшӑрӗпе Василий Ильичпа 4 ача ҫуратса ӳстернӗ. Халӗ вӑл 8 мӑнукпа, 10 кӗҫӗн мӑнукпа савӑнса пурӑнать.

shumer.cap.ru сайтран илнӗ сӑнӳкерчӗк

2029 ҫулхи авӑн уйӑхӗн 5-мӗшӗнче СССР лётчик-космонавчӗ, икӗ хут Совет Союзӗн Геройӗ, авиацин генерал-майорӗ ҫуралнӑранпа 100 ҫул ҫитӗ.

Ҫав куна республикӑра анлӑн та тивӗҫлипе уявлама хатӗрленеҫҫӗ. Ҫавна май паян, авӑн уйӑхӗн 5-мӗшӗнче, республика Элтеперӗ Олег Николаев ятарлӑ йышӑнӑва алӑ пуснӑ. Унта 2029 ҫулта тӗрлӗ мероприяти туса ирттересси ҫинчен каланӑ, ун валли мероприятисен планне хатӗрлеме хушнӑ.

Чӑваш кӗнеке издательствин сӑнӳкерчӗкӗ

Чӑваш Республикин культурӑн тава тивӗҫлӗ ӗҫченӗ Петӗр Яккусен (Петр Яковлевич Яковлев) пурӑннӑ пулсан кӑҫалхи ҫурла уйӑхӗн 26-мӗшӗнче 75 ҫул тултаратчӗ. Иртнӗ уйӑхӑн вӗҫӗнче чӑваш ҫыравҫисен пӗр ушкӑнӗ – Юрий Исаев, Владимир Степанов тата Олег Кульев – поэтӑн тӑван ялӗнче, Красноармейски тарӑхӗнчм Упаҫырми ялӗнче, пулнӑ. Кун пирки Чӑваш кӗнеке издательстви халӑх тетелӗнчи хӑйӗн пабликӗнче пӗлтернӗ.

Калем ӑстисем Петр Яковлевичӑн арӑмӗпе Светлана Зиновьевнӑпа курса калаҫнӑ, унтан ҫӑва ҫине кайса килсе поэта асӑннӑ.

Ҫеҫпӗл ячӗллӗ вулавӑш пабликӗнчи сӑнӳкерчӗк

Чӑваш кӗнеке издательствинче Николай Агаковӑн «Хӗвел ӑшшиллӗ туйӑм» кӗнеки пичетленсе тухнӑ.

Николай Агакова Канаш тӑрӑхӗнче аван пӗлеҫҫӗ тесе хыпарланӑ Ҫеҫпӗл ячӗллӗ вулавӑшра. Унӑн калавӗсем, повеҫӗсем, очеркӗсем «Канаш ен» хаҫатра час-часах пичетленеҫҫӗ.

Ҫӗнӗ кӗнеке редакторӗ – Ольга Федорова, художникӗсем – Игорь Кугураков тата Наталия Орлова.

Кӗнекене аслӑ классенче вӗренекен шкул ачисем валли тесе кӑларнӑ.

Николай Михайлович 1955 ҫулхи авӑн уйӑхӗн 5-мӗшӗнче Канаш районӗнчи Шуркассинче ҫуралнӑ.

«Контактри» сӑн

«Фирма Акконд-Агро» АОра ӗҫлекен Екатерина Георгиева ӗне сӑвакан операторсен Пӗтӗм Раҫҫейри конкурсне хутшӑннӑ. Вӑл Владимир облаҫӗнче иртнӗ.

Ӑмӑртӑва 50 регионти 58 специалист хутшӑннӑ. Унта операторсен пӗлӗвне, санитари хатӗрленӗвне, ӗне сумалли аппарата мӗнле сӳтсе пуҫтарнине тӗрӗсленӗ.

Пирӗ ентеш 8-17 ҫул ӗҫлекен хӗрарӑмен хушшинче 8-мӗш вырӑн йышӑннӑ. Пӗтӗмӗшле зачетра вара – 21-мӗш, вӑл 87,06 балл пуҫтарнӑ.

Сӑмах май, Екатерина ӗне сӑвакан операторта 10 ҫул ытла ӗҫлет.

"Контактри" сӑн

Шупашкарти Иван Смелов ТНТпа кӑтартакан «Погоня» экстремаллӑ шоура ҫӗнтернӗ. Вӑл пӗрремӗш вырӑна Никита Джигурдапа пайланӑ.

Иван шоуна камит каҫӗнче сцена ҫине тухнӑ хыҫҫӑн лекнӗ – кастинг-директор видеовизитка хатӗрлеме сӗннӗ. Ҫапла вӑл суйлав витӗр тухнӑ.

Иван палӑртнӑ тӑрӑх, уйрӑмах Никита Джигурдапа калаҫни унӑн асӗнче юлнӑ. Шоура вӑл 457,5 пин тенкӗ выляса илнӗ. Ку укҫапа ҫемйипе тинӗс хӗррине кайма планланӑ.

Палӑртса хӑварар: хальхи вӑхӑтра Иван Мускавра пурӑнать, Шупашкара тӑтӑшах килсе ҫӳрет.

«Контактри» сӑн

Чӑваш Республикинче чи лайӑх ветеринар тухтӑр-ветсанэксперт кам пулнине палӑртнӑ. Ку ята Шупашкарта пурӑнакан Зинаида Андреева тивӗҫнӗ.

Вӑл Шупашкар хулинчи чӗрчунсен чирӗсемпе кӗрешекен станцире ветеринарипе экспертиза лабораторийӗн заведеющийӗнче ӗҫлет. Ку профессире вӑл 21 ҫул вӑй хурать, ҫӗнӗ тӗпчев меслечӗсене пурнӑҫа кӗртет.

Палӑртмалла: конкурса 14 специалист хутшӑннӑ. Унта хутшӑнакансем тест ыйтӑвӗсене хуравланӑ, аш-какая пӑхнӑ, продукцин пахалӑхне тӗпченӗ.