21chkt.ru сӑнӳкечрӗкӗ

Чӑваш Енре ҫуралса ӳснӗ, тӗнчипе ятлӑ-сумлӑ тӗпчевҫӗ Никита Бичурин ҫуралнӑранпа килес ҫулхи авӑн уйӑхӗнче 250 ҫул ҫитӗ. Ҫавна пирӗн республикӑра сумлӑн уявлама палӑртаҫҫӗ.

Чӑваш Енре тӗрлӗ мероприяти ирттернӗ, ун валли ӗҫлӗ ушкӑн туса хурӗҫ. Кун пек йышӑнӑва Чӑваш Ен Элтеперӗ Олег Николаев раштав уйӑхӗн 6-мӗшӗнче алӑ пуснӑ.

Никита Яковлевич, — монголовед, синолог, прозаик, очеркист, сӑвӑҫ. 1777 ҫулхи авӑн уйӑхӗн 9-мӗшӗнче Ҫӗрпӳ уесӗнчи (халӗ Чӑваш Енӗн Шупашкар районӗ) Типнер ялӗнче ҫуралнӑ. 1853 ҫулхи ҫу уйӑхӗн 23-мӗшӗнче Санкт-Петербург хулинче вилнӗ.

Бичурин ӗҫӗсене Раҫҫейре кӑна мар, Европӑра та хакланӑ. 1828 ҫулта ӑна Раҫҫей ӑслӑлӑхсен академийӗн член-корреспондентне суйласа илнӗ. 1831 ҫулта Парижри Ази обществин шутне кӗртнӗ. 1834, 1839, 1843, 1849 ҫулсенче вӑл Раҫҫейӗн ӑслӑлӑх шайӗнчи чи пысӑк паллине, Демидов премине, тивӗҫнӗ.

Чӑваш академи драма театрӗн сӑнӳкерчӗкӗ

Ӗнер, раштав уйӑхӗн 7-мӗшӗнче, Чӑваш Республикин тава тивӗҫлӗ артисткин Надежда Воюцкаян юбилейне халалланӑ каҫ иртнӗ. Унта «Пӗртен-пӗр шанӑҫ» спектакль кӑтартнӑ. Спектакльте Надежда Сильвестровна Елена Владимировна ролӗнче вылянӑ.

Надежда Воюцкая 1960 ҫулхи чӳк уйӑхӗн 25-мӗшӗнче Вӑрнар районӗнчи Шинер ялӗнче ҫуралнӑ. 1983 ҫулта М.С. Щепкин ячӗллӗ Аслӑ театр училищинчен (институтӗнчен) вӗренсе тухнӑ та ҫавӑнтанпа Чӑваш академи драма театрӗнче ӗҫлет.

Юбиляра театр директорӗ Елена Николаева, Вӑрнар муниципалитет тӑрӑхӗн пуҫлӑхӗ Надежда Никандрова, Вӑрнарсен ентешлӗхӗн ертӳҫи Валерий Кузьмин тата ыттисем саламланӑ.

vk.com/club211725618 сӑнӳкерчӗкӗ

Чӑваш Енӗн Наци вулавӑшӗнчи «Варкӑш» клубӑн ҫак уйӑхри ларӑвӗнче Нина Артемьеван «Ӗмӗрхи кӗвӗ» кӗнекине тишкерӗҫ. Мероприяти раштав уйӑхӗн 23-мӗшӗнче 18 сехетре пуҫланӗ.

«Ӗмӗрхи кӗвӗ» кӗнеке 1 пин тиражпа Чӑваш кӗнеке издательствинче кӑҫал пичетленсе тухнӑ. Асӑннӑ кӑларӑм авторӗ, Нина Артемьева (Нина Мокина), Тутарстанри Аксу районӗнчи Ҫӗмӗртлӗ ялӗнче ҫуралнӑ. Емелькинӑри тулли мар вӑтам шкултан вӗренсе тухсан Шупашкара куҫса килнӗ, пир-авӑр комбинатӗнче ӗҫленӗ, каҫхи вӑтам шкулта вӗреннӗ.

Чӑваш кӗнеке издательствинче пӗлтернӗ тӑрӑх, 1977 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ хыҫҫӑн 1977–2003 ҫулсенче «Хатӗр пул» (каярахпа – «Ҫилҫунат», «Самант») журнал редакцийӗнче ӗҫленӗ. Нина Артемьева сӑввисем «Ялав», «Тӑван Атӑл» журналсенче, «Хусан», «Поэзия» альманахсенче, «Ҫӗнӗ кӗвӗ» коллективлӑ сборникра, «Чӑваш литературин антологийӗнче» (Поэзи) тата ытти кӑларӑмра пичетленнӗ.

Нина Артемьева – Раҫҫейӗн Журналистсен союзӗн, Раҫҫей Писателӗсен союзӗн пайташӗ, Марфа Трубина ячӗллӗ преми лауреачӗ.

cap.ru сайтри сӑн

Шупашкарти 201-мӗш ача пахчин аслӑ воспитателӗ Ирина Дергунова Пӗтӗм Раҫҫейри «Раҫҫейри воспитательсем» конкурсра ҫӗнтерӳҫӗсен йышне лекнӗ.

Пирӗн ентеш «Шкул умӗнхи инклюзивлӑ вӗренӗве пурнӑҫланин чи лайӑх практики» номинацире виҫҫӗмӗш вырӑн йышӑннӑ. ЧР Вӗренӳ министерстви палӑртнӑ тӑрӑх, Ирина Дергуновӑн практики ача пахчине хӑтлӑ тума, унти шӑпӑрлансене аталанма пулӑшать.

Сӑмах май, конкурса ҫӗршыври 500 ытла воспитатель хутшӑннӑ.

Чӑваш Ене «Молодежка» сериалта ӳкерӗннӗ актер килме палӑртнӑ. Влад Канопка Ҫӗмӗрлери 1-мӗш шкулта вӗренекен ачасемпе тӗл пулӗ.

Влад паллӑ актер кӑна мар, Раҫҫейри «Знание» обществӑн лекторӗ те. Влад ачасемпе тӗл пулса «Кӗнеке вулани — культура тренчӗ» темӑпа калаҫу ирттерӗ, хӑй ача чухне мӗнле кӗнекесем вулама юратни пирки каласа кӑтартӗ. Унсӑр пуҫне вӑл хайлава илемлӗ вулас енӗпе ӑсталӑх класӗ ирттерӗ.

agro.cap.ru сӑнӳкерчӗкӗ

«Новочебоксарский» теплица комплексӗнчи Екатерина Аввакумова пахчаҫӑ-агроном «Лучший по профессии» (чӑв. Профессире чи лайӑххи) конкурсра «Пахчаҫӑ» номинацире ҫӗнтернӗ. Наградӑпа ӑна ҫӗршывӑн ял хуҫалӑх министрӗ Оксана Лут чысланӑ. Пӗрремӗш вырӑн йышӑннӑшӑн 1 миллион тенкӗ преми панӑ.

Екатерина Аввакумова унччен республикӑри ҫавӑн пек конкурсра ҫӗнтернӗ, кайран вӑл федераци шайӗнчи ӑмӑртӑва хутшӑннӑ.

«Контактра» халӑх тетелӗнчи сӑн

Шупашкарта пурӑнакан Оксана Янукова, KSYFLEUR студи йӗркеленӗскер, ултӑ ҫул ӗнтӗ аромаҫуртасем, гипсран тата бетонран тӗрлӗ япаласем ӑсталать.

Вӑл вазӑсемпе алка-эреше чӑваш наци стилистикипе капӑрлатнине уйрӑмах палӑртмалла. Кӑҫал вара Оксана совет тапхӑрӗнче чӑрӑша илемлетнӗ теттесем евӗр ҫуртасем тума пуҫланӑ. Ӗҫӗсене вӑл маркетплейссенче сутать.

Унӑн студийӗнче ӑсталӑх класӗсем те иртеҫҫӗ.

Яндекс сӑнӳкерчӗкӗ

Чӑваш Енӗн пӗрлештернӗ командисен спорт енӗпе хатӗрлекен А. Игнатьев ячӗллӗ центр директорӗ пулма Геннадий Егоров шаннӑ.

Геннадий Егоров унччен 11-мӗш спорт шкулӗн директорӗ пулнӑ, чӑваш наци кӗрешӗвӗн федерацийӗн президенчӗ.

Республикӑн Спорт министерствинче шухӑшланӑ тӑрӑх, Геннадий Егоров А. Игнатьев ячӗллӗ центра ертсе пыма чӑннипех те тивӗҫ.

«Контактри» сӑн

Ҫӗнӗ Шупашкарти Марина Нехаева «Раҫҫей 1» каналпа кӑтартакан «Сто к одному» шоу ҫӗнтерӳҫи пулса тӑнӑ. Вӑл «Чревовещатели» командӑпа пӗрле тупӑшса 100 пин тенкӗ выляса илнӗ. Команда 397:126 шутпа мала тухнӑ.

Марина шоуна хӑйӗн Ляля ятлӑ пуканипе кайнӑ. Вӑл ӑна хӑйӗн копийӗ тет. Пирӗн ентеш Раҫҫейри ытти ертӳҫӗпе пӗрле командӑра пулнӑ.

Палӑртмалла: Марина Ҫӗнӗ Шупашкарта ҫуралса ӳснӗ. Мӗн ачаран сӑнарсем валли сасӑсем хатӗрлеме юратнӑ, паллӑ ӑстапа Ольга Лифенцевӑпа паллашсан вӑл чревовещатель профессине суйланӑ. Ляля пуканене вӑл Пермьри ӑстаран саккас панӑ.

Елизавета Долгова страницинчен илнӗ сӑнӳкерчӗк

Евгений Ерагина Чӑваш наци ӑслӑлӑхпа ӳнер академийӗн Президентне тепӗр хутчен суйланӑ. Асӑннӑ академин отчетпа суйлав пухӑвӗ чӳк уйӑхӗн 29-мӗшӗнче пулса иртнӗ.

Евгений Евстафьевич 1955 ҫулхи чӳкӗн 21-мӗшӗнче Муркаш районӗнчи Ярак ялӗнче ҫуралнӑ. Чылай вӑхӑт хушши районти Калайкасси вӑтам шкулӗнче чӑваш чӗлхипе литературине вӗретнӗ. Таврапӗлӳҫӗ. Чылай кӗнеке авторӗ. Чӑваш халӑх ӑс-хакӑлӗпе ӳнер академийӗн президенчӗ. Халӑх академикӗсене ертсе пынӑ май чылай мероприяти йӗркелет, унта хутшӑнать.