culture.cap.ru сӑнӳкерчӗкӗ

Чӑваш халӑх артисчӗ Борис Кукин театрта ӗҫлеме пӑрахӗ. Паян, ҫӗртме уйӑхӗн 29-мӗшӗнче, вӑл хӑйӗншӗн тӑван пулса тӑма ӗлкӗрнӗ Вырӑс драма театрӗнче «Леди на день» спектакльте сцена ҫине тухӗ. Унтан вӑл театртан кайӗ.

Борис Васильевич пултарулӑх ӗҫӗнче 1964 ҫултанпа тӑрӑшать. Ун чухне вӑл Чӑваш АССРӗн Министрсен Кабинечӗ ҫумӗнчи Радиовещани тата телевидени комитетӗнче дикторта ӗҫлеме тытӑннӑ. 1968 ҫулта Сарту хулинчи И.А. Слонов ячӗллӗ театр училищинчен вӗренсе тухнӑ. Училище хыҫҫӑн пӗр вӑхӑт Алтай крайӗнчи ҫамрӑксен театрӗнче (Барнаул хули) ӗҫленӗ.

1971 ҫулта ӑна Шупашкарти Вырӑс драма театрне чӗнсе илнӗ. Унта Борис Кукин 53 ҫул ытла тӑрӑшнӑ. Ҫав вӑхӑтрах темиҫе ҫул радиора ертӳҫӗ те пулнӑ.

cap.ru сӑнӳкерчӗкӗ

Шупашкарти Олимп резервӗн 10-мӗш спорт шкулӗн ҫурчӗ ҫине самбо енӗпе тӗнче класлӑ СССР спорт мастерне, Александр Трофимова, асра тытса асӑну хӑми вырнаҫтарнӑ.

Александр Трофимов Чӑваш Енӗн Патшалӑх Канашӗн виҫҫӗмӗш тата таваттӑмӗш созыври депутачӗ пулнӑ. Пурӑннӑ пулсан вӑл ӗнер 61 ҫул тултаратчӗ.

Савӑнӑҫлӑ митинга (вӑл Александр Трофимов ячӗллӗ спорт шкулӗ умӗнче иртнӗ) республикӑн Патшалӑх Канашӗн Председателӗ Леонид Черкесов, республикӑн спорт министрӗ Василий Петров, Шупашкар хулин пуҫлӑхӗ Владимир Доброхотов тата ыттисем хутшӑннӑ. Унта ҫавӑн пекех Александр Трофимовӑн тӑванӗ Вячеслав Иванович, мӑшӑрӗ Лидия Александровна, ачисем Александр тата Мария, ятлӑ-сумлӑ спортсменсем пырса ҫитнӗ.

Альбина Юрату страницинчен илнӗ сӑнӳкерчӗк

«Чӑваш Ен» патшалӑх телерадиокомпанийӗн журналисчӗ Алексей Енейкин 2023 ҫулшӑн ҫамрӑксен патшалӑх премине тивӗҫнӗ. Кун пирки Альбина Юрату сӑвӑҫ халӑх тетелӗнчи хӑйӗн страницинче хӑпартланса пӗлтернӗ.

Сӑмах май каласан, 2022 ҫулта Алексей Ҫемен Элкер премийӗн лауреачӗ ята тивӗҫнӗччӗ. Ун чухне журналистӑн Сӑр тата Хусан хӳтӗлев чиккисене чавма хутшӑннисене халалласа хатӗрленӗ «Военное детство» (чӑв. Ҫар ачалӑхӗ) телепрограммӑсен ярӑмне ҫавӑн пек сума суса хакланӑччӗ.

Ҫамрӑксен театрӗн афиши

Ҫеҫпӗл Мишши ячӗллӗ Чӑваш патшалӑх ҫамрӑксен театрӗ Иосиф Дмитриев-Трера асра тытать. Паян, ҫӗртме уйӑхӗн 27-мӗшӗнче, 13 сехетре театрта «Иосиф Трер. Учитель – друг, наставник, вдохновитель» (чӑв. Иосиф Трер. Учитель — юлташ, вӗрентекен, хавхалантаркан) проектпа килӗшӳллӗн «Наследие. История чувашского театрального искусства и кинематографа» (чӑв. Эткерлӗх. Чӑваш театр ӳнерӗпе кинематографин историйӗ) лекци иртӗ.

Паллӑ актёр, режиссёр, театр педагогӗ, поэт, фольклор куҫаруҫи, этнотеатровед Иосиф Дмитриев пурӑннӑ пулсан паян 77 ҫул тултаратчӗ. Унӑн пурнӑҫ усал чире пула татӑлчӗ.

Лекцие кирек кам та кайса итлесе ларма пултарать. Унта тӳлевсӗр кӗртӗҫ.

Оксана Балденкова архивӗнчи илнӗ сӑнӳкерчӗк

Шупашкар хулинчи халӑхӑн социаллӑ ыйтӑвӗсене твиӗҫтерекен комплекслӑ центрӗнчи Оксана Балденкова «Эпӗ — хӗрарӑм» регионсем хушшинчи конкурса хутшӑнса топ-100 списока лекнӗ.

Ҫамрӑк хӗрарӑм мӗн ачаран психолог пулма ӗмӗтленнӗ. Ятарлӑ пӗлӳ илнӗ хыҫҫӑн вӑл 10 ҫул Шупашкарти вӗренӳ учрежденийӗсенчен пӗринче психологра ӗҫленӗ, халӗ социаллӑ центрта тӑрӑшать.

«Чунӑма эпӗ ачасене паратӑп, вӗсем те манпа ҫавӑн пекех», — тет ӑшӑ кӑмӑллӑ ҫамрӑк хӗрарӑм. Специалист ачасене психологи пулӑшӑвӗ кӳнӗ май кашнинпе уйрӑммӑн ӗҫлет. «Ача-пӑча ҫулӗнчи нейропсихологи» курсра илнӗ пӗлӳпе те вӑл нумай усӑ курать.

Оксана Владимировна хӑйӗн 6 ҫулти хӗрӗпе Марийӑпа театрсене, куравсене, тӗрлӗ ӑсталӑх лаҫҫисене ҫӳрет. Ҫемьери тепӗр ырӑ йӑла — кӗнеке вуласси. Амӑшӗпе пӗчӗк хӗрӗ спортпа та туслӑ, вӗсем уҫӑ сывлӑшра фитнеспа аппаланма юратаҫҫӗ.

cheb.ru сӑнӳкерчӗкӗ

Чӑваш патшалӑх гуманитари ӑслӑлӑхӗсен институчӗн искусствоведени енӗпе ӗҫлекен тӗп ӑслӑлӑх ӗҫченне, искусствоведени докторне, профессора, Михаил Кондратьева ӗмӗр тӑршшӗпе уйӑхсерен 5-шер пин тенкӗ пособи парса тӑрӗҫ.  

Михаил Кондратьев чӑваш халӑх музыка искусствин теорин шкулне пуҫарса яраканӗ шутланать.

Владивостокра ҫуралнӑ ҫав ҫын 300 ытла публикаци тата 16 монографи авторӗ. Чӑваш Республикин тата Раҫҫей Федерацийӗн искусствӑсен тава тивӗҫлӗ ӗҫченӗ.

Заслуженный деятель искусств Чувашской Республики (1991), заслуженный деятель искусств Российской Федерации (2001

cap.ru сайтри сӑн

Элӗк округӗнчи Мӑш Шӗвӗш ялӗнче пурӑнакан Гликерия Романова 105 ҫул тултарнӑ. Вӑл 1919 ҫулхи ҫӗртмен 19-мӗшӗнче ҫак ялтах хресчен ҫемйинче ҫуралнӑ.

Вӗсем пиллӗкӗн ӳснӗ. Вӑҫрҫӑ пуҫланнӑ чухне Гликерия Степановна Етӗрнере ҫул тунӑ ҫӗрте ӗҫленӗ. Кайран Сӑр тата Хусан чиккисене чавнӑ ҫӗрте вӑй хунӑ. Вӑрҫӑ хыҫҫӑн колхозра тӑрӑшнӑ вӑл. Граждан вӑрҫинчен сусӑрланса таврӑннӑ ашшӗн те пӑхма ӗлкӗрнӗ. Вал вилсен аппӑшӗпе тата унӑн ачисемпе пурӑннӑ.

Хальхи вӑхӑтра Гликерия Степановна Муркаш окуругӗнчи Йӳҫкассинчи интернатра пурӑнать.

cap.ru сӑнӳкерчӗкӗ

Шупашкарти нумай ача амӑшне путакан ҫынна ҫӑлнӑшӑн чысланӑ. Надежда Цветкова ҫӗртме уйӑхӗн 11-мӗшӗнче Атӑл хӗрринче каннӑ чухне ним шухӑшламасӑр путма пуҫланӑ хӗре ҫӑлма кайнӑ. Хӗре туртса кӑларнӑ кӑна – вӑл унпа тепӗр ҫын путни пирки пӗлтернӗ.

Надежда тепре чӑмса каччӑна шыраса тупнӑ. Лешӗ, хӑраса ӳкнӗскер, хӗрарӑма ярса тытнӑ. Надежда ӑна аран-аран туртса кӑларнӑ. Ҫапла нумай ачаллӑ амӑшӗ икӗ ҫын пурнӑҫне ҫӑлнӑ.

Ҫӗртме уйӑхӗн 17-мӗшӗнче ЧР Общество палати тата Пӗтӗм Раҫҫейри шыври ҫӑлавҫӑсен обществи Надежда Цветковӑна тав тунӑ, Кубок панӑ.

Станислав Воронов. наследиечувашии.рф сӑнӳкерчӗкӗ

Станислав Воронов художника «Чӑваш Республикин тава тивӗҫлӗ художникӗ» ят пама йышӑннӑ. Хушӑва республика Элтеперӗ Олег Николаев иртнӗ эрнере алӑ пуснӑ.

Станислав Воронов – «Раҫҫейри художниксен пултарулӑх союзӗ» пӗтӗм Раҫҫейри общество организацийӗн пайташӗ.

Пултаруллӑ художник 1957 ҫулхи ҫурла уйӑхӗн 20-мӗшӗнче Элӗк районӗнчи Тури Хурасанта ҫуралнӑ. Хусанти университетра юридици факультетӗнче вӗреннӗ. Халӗ вӑл Мускавра пурӑнать. Унӑн ӗҫ биографийӗнче район прокуратуринчи, Чӑваш Ен прокуратуринчи должноҫсем те пур. 1982 ҫулта ентешӗмӗр патшалӑхӑн хӑрушсӑрлӑх органӗсенче ӗҫлеме тытӑннӑ. Федерацин хӑрушсӑрлӑх службин Чӑваш Енри управленине те ертсе пынӑ.

Чӑваш Енри профессионал писательсен ушкӑнӗнчи сӑнӳкерчӗк

Хӗрӳ чунлӑ Ҫеҫпӗл Мишши ҫак тӗнчерен уйрӑлса кайнӑ кун, ҫӗртме уйӑхӗн 15-мӗшӗнче, Шупашкарти унӑн палӑкӗ умӗнче савӑнӑҫлӑ лару-тӑрура пуху иртӗ. Ӑна вилӗмсӗр Ҫеҫпӗлӗмӗре асра тытса йӗркелӗҫ.

Мероприяти 9 сехетре пуҫланӗ.

Аса илтерер: Канаш районӗнчи (халӗ — муниципаллӑ округ) Касаккасси Шӗкӗр (халӗ Ҫеҫпӗл) ялӗнче ҫуралнӑ чӑваш поэчӗ 1922 ҫулхи ҫӗртме уйӑхӗн 15-мӗшӗнче Украинӑри Старогородка салинче вилнӗ.