cheb-centr.soc.cap.ru сӑнӳкерчӗкӗ

Шупашкар хулинче пурӑнакан Лина Емельянова чылай ҫул Италире ӗҫленӗ, вӑл унти ватӑсене пӑхса пурӑннӑ. Халӗ хӗрарӑм Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрта социаллӑ ӗҫчен пулса тӑрӑшать.

Паян 50 ҫул тултарнӑ Лина Аркадьевна пӗлтернӗ тӑрӑх, ватӑсене хӗрхенсе пулӑшас тени шӑпах Италирен пуҫланнӑ та. Вӑл паян 10 ватта пӑхса тӑрать, вӗсенчен ҫиччӗшӗ патне кунсерен кайса тӑрать.

"Контактри" сӑн

Елчӗк округӗнче пурӑнакан Оксана Александровна социаллӑ контракт пулӑшнипе пӗчӗк коптильня уҫнӑ. Вӑл малтан бизнес-план хаӗрленӗ, ӑна ӑнӑҫлӑ хӳтӗлесе патшалӑхран 350 пин тенкӗ илнӗ. Унпа вӑл хӑйӗн ӗҫне пуҫарнӑ.

«Патшалӑх пулӑшнипе эпӗ сахал мар ӗҫлесе илме тытӑнтӑм. Хам ҫине кӑна ӗҫлетӗп, ку мана питӗ килӗшет», – тенӗ Оксана.

Сӑмах май, сахал тупӑшлӑ ҫемье патшалӑхран пулӑшу илме пултарать.

Владимир Димитриев. Чӑваш Енӗн Гостехнадзорӗн сӑнӳкерчӗкӗ

Икӗ пуҫлӑха тава тивӗҫлӗ ят панӑ Чӑваш Енри икӗ тӳре-шара тава тивӗҫлӗ ят панӑ.

«Чӑваш Республикин транспортӑн тава тивӗҫлӗ ӗҫченӗ» ята республикӑн транспорт тата ҫул-йӗр хуҫалӑхӗн министрӗн ҫумӗ Юрий Арлашкин тивӗҫнӗ. Ку хисепе вӑл «строительствӑри тава тивӗҫлӗ ӗҫсемшӗн тата нумай ҫул тӑрӑшса ӗҫленӗшӗн» тивӗҫнӗ.

Ял хуҫалӑхӗнчи тава тивӗҫлӗ ӗҫсемшӗн тата нумай ҫул тӑрӑшса ӗҫленӗшӗн Чӑваш Енӗн Гостехнадзорӗн инспекцийӗн пуҫлӑхне Владимир Димитриева «Чӑваш Республикин ял хуҫалӑхӗн тава тивӗҫлӗ ӗҫченӗ» ят панӑ.

Чӑваш патшалӑх аграри университечӗн студенчӗ Никита Громов Пӗтӗм тӗнчери «Агроинновации: путь к устойчивому развитию» конкурсра ҫӗнтернӗ. Вӑл купӑстана амантмасӑр пуҫтармалли хатӗр шухӑшласа кӑларнӑ.

Никитӑн проекчӗ хальхи технологисем ял хуҫалӑхӗнчи ӗҫ тухӑҫлӑхне ӳстерме пулӑшнине кӑтартать.

drama21.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗн режиссёрӗ, художник-постановщикӗ, актёрӗ президент пулӗ.

Асӑннӑ театрта ҫавӑн пек должноҫа ҫирӗплетесси пирки ӗнер юбилей каҫӗнче пӗлтерчӗҫ. Кун пирки Чӑваш Ен Элтеперӗн Олег Николаевӑн вырӑсла саламне республикӑн вице-премьерӗ — ял хуҫалӑх министрӗ Сергей Артамонов юбиляр патне ҫитернӗ чухне палӑртса хӑварнӑ.

«Чӑваш патшалӑх академи драма театрӗн президенчӗн ҫӗнӗ должноҫне ҫирӗплетме сӗнетӗп», — тесе ҫырнӑ Олег Николаев халӑх тетелӗнчи хӑйӗн страницинче те. Республика ертӳҫи палӑртса хӑварнӑ тӑрӑх, Валерий Яковлев кун пек чыса чӑваш театр ӳнерӗнче нумай ҫул тӑрӑшса ӗҫленипе тивӗҫнӗ.

Марина Карягинӑн халӑх тетелӗнчи страницинчен илнӗ сӑнӳкерчӗк

Марина Карягинӑн «Ҫӗн Кун ачи» пьеси тӑрӑх Чӑваш патшалӑх ҫамрӑксен театрӗнче спектакль лартнине эпир унччен пӗлтернӗччӗ-ха. Сӑмах май каласан, ҫитес уйӑхра, чӳк уйӑхӗн 15-мӗшӗнче, театрта ҫав спектакле курма пулать.

Аса илтерер: пьесӑна автор Ҫеҫпӗл Мишши ҫуралнӑранпа 125 ҫул ҫитнине халалласа ҫырна.

Пьесӑн тулли вариантне вулас тесен кӗнеке хальлӗхе авторта пур. Ӑна Марина Карягина почта урлӑ та ярса парайӗ.

Лидия Филиппова страницинчен илнӗ сӑнӳкерчӗк

Ӗнер, юпа уйӑхӗн 23-мӗшӗнче, чӑваш Улӑпӗ И.Я.Яковлев ҫут тӗнчерен уйрӑлса кайнӑ кун, Шупашкарта патриархӑмӑр палӑкӗ умне чечек хунӑ.

Кун пирки Лидия Филиппова журналист халӑх тетелӗнчи хӑйӗн страницинче пӗлтернӗ.

«Ӗнер Шупашкара тепӗр чӑваш Улӑпӗ Иван Казанков килсе ҫитрӗ.

Тӗрлӗ ыйтӑва сӳтсе явнипе пӗрлех ЮТВ телеканал валли «Ҫынсем. Ҫулсем. Еткерлӗх» — «Люди. Годы. Наследие» кӑларӑм ӳкертӗмӗр, И.Я.Яковлев палӑкӗ умне пуҫ тайса чечек хутӑмӑр… Наци радиовӗнче вара хӑйнеевӗрлӗ марафон иртрӗ – 2 сехете яхӑн тӳрӗ эфирта Иван Казанков ентешӗмӗр-мухтавӑмӑр пулчӗ…», — хыпарланӑ Лидия Филиппова.

culture.cap.ru сӑнӳкерчӗкӗ

Чӑваш Енӗн Наци вулавӑшӗнчи «Мерчен» хӑна пӳлӗмӗнче Анатолий Печниковӑн «Илӗртӳллӗ манми Чӑваш ен» нота пуххине хаклама пуҫтарӑнӗҫ.

Мероприятие музыкантӑн 70 ҫулхине тата пултарулӑхӗнчи 55 ҫулхине халаллӗҫ.

Кӗнекене пахалама культура, ӳнер тата литература ӗҫченӗсем, ӗҫтешӗсем, ентешӗсем пуҫтарӑнӗҫ. Программӑна «Чун юрлать» кӗнекепе иллюстраци куравӗ, культура ӗҫченӗсен пултарулӑхӗ, автор юррисен «Савнӑ Чӑваш Енӗм!» концерчӗ илем кӳрӗ.

Анатолий Печников Хӗрлӗ Чутай тӑрӑхӗнчи Туктамаш ялӗнче ҫуралнӑ. Педагог, композитор, РФ халӑх вӗрентӗвӗн отличнике, Чӑваш Енри композиторсен ассоциацийӗн членӗ. Шупашкар районӗнчи Иккасинчи культура ҫуртӗнче «Ҫӑлкуҫ» вокал ансамбльне тата «Ҫамрӑк хуткупӑсҫӑ» кружока 35 ҫул ытла ертсе пынӑ.

николай архивӗнчи сӑн

Николай пулӑ тытма юратать. Ку – унӑн чун киленӗҫӗ. «Контактра» халӑх тетелӗнчи страницинче те вал кун пирки нумай ҫырса кӑтартать.

Хальхинче Николай Атӑла пулӑ тытма кайсан ҫӑрттанпа кӗрешнӗ. Ӑна туртса кӑларас тесе унӑн самаях тарлама тивнӗ. Ара, 5 килограмм ытларах таякан пулла туртса кӑларма ансат мар вӗт.

Ҫапах тӑрӑшсан-тӑрӑшсан, кӗрешсен-кӗрешсен опытлӑ пулӑҫ ҫӑрттана туртса кӑларнах.

culture.cap.ru сӑнӳкерчӗкӗ

Юпа уйӑхӗн 31-мӗшӗнче Чӑваш патшалӑх академи драма театрӗнче РСФСР халӑх артисчӗ Виктор Родионов ҫуралнӑранпа 100 ҫул ҫитнине халалласа астӑвӑм каҫӗ иртӗ.

Театрта палӑртнӑ тӑрах, Виктор Иосифович – ят ҫеҫ мар, легенда. Сцена ҫинче 40 ҫул вылянӑ хушӑра вӑл 350 ытла роль калӑпланӑ. Вӑл театрта ӗҫленипе пӗрлех музыкант тата диктор пулнӑ. Чӑваш радиона итлекенсем ӑна «чӑваш Левитанӗ» те тенӗ.

Виктор Родионов «Хумсем ҫырана ҫапаҫҫӗ» спектакльти Иван Яковлев сӑнарӗшӗн К.С. Станиславский ячӗллӗ патшалӑх премине тивӗҫнӗ.