obrazov-rcheb.edu21-test.cap.ru сӑнӳкерчӗкӗ

Шупашкар муниципаллӑ округӗнчи Тутаркасси ялӗнчи шкулта ӗҫлекен Альбина Ишовӑна «Чӑваш Республикин халӑх учителӗ» хисеплӗ ят пама йышӑннине Чӑваш халӑх сайчӗ пӗлтернӗччӗ-ха. Ку ята вӑл педагогикӑра тата воспитани ӗҫӗнче чылай ҫул тӑрӑшса ӗҫленӗшӗн тивӗҫнӗ.

Альбина Валентиновна Тутаркассинчи шкулта ачасне чӑваш чӗлхипе литературине вӗрентет. Вӑл — Чӑваш Республикин тава тивӗҫлӗ учителӗ, аслӑ категориллӗ вӗрентекен.

Альбина Ишован вӗренекенӗсем яланах тӗрлӗ конкурсра ҫӗнтереҫҫӗ. Хастар учитель хӑй вӑхӑтӗнче шкулта класс-музей уҫнӑ. Унта тӑван халӑхӑмӑр йӑли-йӗркипе палалшма пулать, ҫавӑнтах уроксем иртеҫҫӗ.

cap.ru сӑнӳкерчӗкӗ

Патӑрьел округӗнчи Шӑнкӑртамра пурӑнакан Нурулла Резяпов авӑнӑн 27-мӗшӗнче 100 ҫул тултарнӑ.

Вӑл - Тӑван ҫӗршывӑн Аслӑ вӑрҫин ветеранӗ, фронта 17 ҫулта лекнӗ. Кайран Япони вӑрҫине хутшӑннӑ. Нурулла Велиуллович киле 1947 ҫулта кӑна таврӑннӑ.

Кун хыҫҫӑн вӑл тӗрлӗ ҫӗрте ӗҫленӗ: платникре, колхозра, склад заведующийӗнче. Тивӗҫлӗ канӑва тухсан ялти туберкулез пульницинче 20 ҫул вӑй хунӑ. Паянхи кун вӑл 23 мӑнукӗпе, 24 кӗҫӗн мӑнукӗпе савӑнса пурӑнать.

culture.cap.ru сӑнӳкерчӗкӗ

Авӑн уйӑхӗн 26-мӗшӗнче Чӑваш Енӗн Наци вулавӑшӗнче Ева Лисинӑна саламлама пуҫтарӑннӑ.

Ева Лисина – паллӑ чӑваш ҫыравҫи, куҫаруҫи, МиттаВаҫлейӗн премийӗнлауреачӗ, педагог.

Вулавӑша ҫыравҫӑн 85 ҫулхине халалласа пуҫтарӑннисем унӑн пур енлӗ пултарулӑхне хакласа ӑшшӑн калаҫнӑ.

«Раҫҫей мисӗ» наци илем конкурсӗ пуҫланнӑ. Лайӑх хыпар: Шупашкарти 18 ҫулти Валентина Алексеева финала тухнӑ. 85 пин чиперккерен финала 50-шӗ кӑна тухнӑ. Вӗсен йышӗнче - пирӗн ентеш те.

Валентина хальхи вӑхӑтра Мускавра пурӑнать, унтах вӗренет. Шупашкара хӑнана тӑванӗсем патне килет. Унӑн чун киленӗҫӗ: йога, ташӑ, фитнес, макияж тӑвасси.

Халӗ Валентина финала хатӗрленет, Чӑваш Ене тивӗҫлипе хӳтӗлесшӗн. Вӑл юпа уйӑхӗн 5-мӗшӗнче иртет.

Ӗнер, авӑн уйӑхӗн 25-мӗшӗнче, режиссер, сценограф, тӑлмач, профессор, СССР халӑх артисчӗ, патшалӑх премийӗне лауреачӗ, Шупашкар хулин тата Чӑваш Республикин хисеплӗ ҫынни, Чӑваш патшалӑх академи драма театрӗн илемлӗх ертӳҫи Валерий Яковлев 85 ҫул тултарнӑ.

Сцена ӑсти Шӑмӑршӑ районӗнчи Виҫпӳрт Шӑмӑршӑ ялӗнче ҫуралнӑ. Актер тата режиссер ӑсталӑхне Мускавра, Театр ӳнерӗн А.В. Луначарский ячӗллӗ патшалӑх институтӗнче вӗреннӗ.

Чӑваш патшалӑх академи драма театрӗнче 57 ҫул ытла ӗҫлет.

Шупашкарти 7-мӗш шкул директорӗн канашҫи Надежда Аполлонова Пӗтӗм Раҫҫейри патриотлӑх воспитанийӗн «Быть, а не казаться!» конкурсра ҫӗнтернӗ. Вӑл «Наставник-профессионал» номинацире мала тухнӑ.

Конкурс финалӗ Волгоград хулинче иртнӗ. Унта хутшӑнакансене тӗрлӗ енчен тӗрӗҫленӗ. Тӗслӗхрен, вӗсем уҫӑ уроксем ирттернӗ, социаллӑ проектсем хатӗрленӗ, ҫарпа спорт мероприятийӗсене ирттернӗ… Надежда Аполлонова чи лайӑх кӑтартусемпе палӑрса пуринчен те иртнӗ.

Лидия Филиппова страницинчен илнӗ сӑнӳкерчӗк

Хусанта Праски Витти художник ӗҫӗсен куравӗ ӗҫлет. Ӑна авӑн уйӑхӗн 17-мӗшӗнче унти Хальхи вӑхӑтри ӳнер галерейинче уҫнӑ.

Виталий Петров (Праски Витти) — Раҫҫей тава тивӗҫлӗ художникӗ, Чӑваш халӑх художникӗ. Вӑл — художник-монументалист, живописҫӑ, график, иллюстратор, вӗри эмаль ӳнерӗн ӑсти. Ӑна Атӑлҫи тӑрӑхӗнчи этнофутуризм ашшӗ тесе те калаҫҫӗ-мӗн. Праски Витти этномодернизм юхӑмне тӗнчӗре аталантаракансенчен пӗри шутланать.

Курава уҫнӑ кун художник 88 ҫул тултарнӑ.

Лидия Филиппова сӑнӳкерчӗкӗ

Ҫак уйӑхра Шупашкарта Николай Полоруссов-Шелепи палӑкне уҫма палӑртнӑ. Кун пирки Лидия Филиппова писатель, публицист тата журналист мессенджерсенчен пӗринчи ушкӑнра пӗлтерет.

Лидия Ивановна хыпарланӑ тӑрӑх, палӑка авӑн уйӑхӗн 27-мӗшӗнче, эрнекун, 12 сехетре хулари Богдан Хмельницкий урамӗнчи 1-мӗш масар ҫинче уҫӗҫ.

Аса илтерер: Николай Полоруссов–Шелепи — пӗрремӗш чӑваш халӑх поэчӗ. Унӑн палӑкне тума Хусан чӑвашӗсем тата поэтӑн тӑванӗсем пулӑшнӑ иккен.

Чӑваш Енри пике Светлана Ярандайкина Пӗтӗм тӗнчери «Стюардессӑсен топӗ» конкурс финалне лекнӗ. Пӗтӗмпе 2586 заявка килнӗ, Светлана – вӗсен йышӗнче.

Вӑл 20 ҫултанпа бортпроводникре ӗҫлет. Хальччен вӑл 4 пине яхӑн вӗҫеве тухнӑ. Светлана – Хӗрлӗ Чутай округӗнчен. Вӑл тахҫанах Мускавра пурӑнать.

Хӑй палӑртнӑ тӑрӑх, Чӑваш Ене вӑл хаваспах вӗҫет, чӑвашла калаҫнине илтсен ачалӑха аса илет.

«Контактри» сӑн

Тӑвай округӗнчи Татьяна Юркина сыр пӗҫерес енӗпе чӑн-чӑн ӑста. Качотта, сулугуни, халуми, ламбер… Тӗрлӗрен сыр хатӗрлет вӑл.

Татьяна Пӗтӗм Раҫҫейри «Ӗҫ ҫыннисем» конкурса хутшӑнма заявка панӑ. Вӑл «Ӗҫлӗ хӗрарӑм» номинацире тупӑшӗ.

Татьяна Юркина хӑйӗн ӗҫне аталантарма патшалӑхран пулӑшу илнӗ. 2023 ҫулта унӑн предприятийӗнче 800 килограма яхӑн сыр тунӑ. Кӑҫал вара ку кӑтартӑва тата пысӑклатасшӑн. Унӑн сырӗсене Вӑрмар, Тӑвай, Канаш Ҫӗрпӳ, Патӑрьел округӗсенче, Шупашкарта, Ҫӗнӗ Шупашкарта пурӑнакансем юратса ҫиеҫҫӗ.