Ольга Захаровӑн халӑх тетелӗнчи сӑнӗ

ЧР вӗренӳ министрӗн Дмитрий Захаровӑн мӑшӑрӗ Ольга Захарова «Чӑваш Республикин тава тивӗҫлӗ вӗренӳ ӗҫченӗ» ята тивӗҫнӗ. Хушӑва паян, утӑ уйӑхӗн 29-мӗшӗнче, ЧР Элтеперӗ Олег Николаев пуснӑ.

Ольга Захарова 2021 ҫултанпа Шупашкарти Мониторинг тата вӗренӳ аталанӑвӗн центрне ертсе пырать. Вӑл Мускаври М.А.Шолохов ячӗллӗ патшалӑх гуманитари университетне «учитель-логопед» специальноҫпе пӗтернӗ. Кайран унтах «патшалӑх тата муниципалитет управленийӗ» специальноҫе илнӗ. Малтан вӑл асӑннӑ центрта методист, ертӳҫӗ ҫумӗ пулнӑ. Унта 2016 ҫулта ӗҫлеме вырнаҫнӑ.

Мӑшӑрӗпе Дмитрий Захаровпа пӗрле вӗсем ывӑл ӳстереҫҫӗ. Вӑл 4 ҫулта кӑна-ха.

culture.cap.ru сӑнӳкерчӗкӗ

Паян, утӑ уйӑхӗн 29-мӗшӗнче, Чӑваш Енӗн Наци вулавӑшӗнче «И.П. Прокопьев – учитель, воин, государственный деятель» курав уҫӑлнӑ. Ӑна Илья Прокопьев ҫуралнӑранпа 100 ҫул ҫитнине халалланӑ. Вӑл – Тӑван ҫӗршывӑн аслӑ вӑрҫин участникӗ, 1974-1988 ҫулсенче КПСС Чӑваш обкомӗн пӗрремӗш секретарӗ пулнӑ. Ӑна ултӑ хутчен Чӑваш АССР Аслӑ Канашӗн депутачӗ пулнӑ.

Куравра Илья Прокопьев кӗнекисен коллекцийӗ вырӑн тупнӑ. Ҫав шутра ӑна паллӑ ҫынсем автографпа парнеленӗ кӗнекесем те пур. Вӗсене Андриян Николаев космонавт, Расул Гамзатов поэт, Федор Моргун аграри-ученӑй, Василий Дмитриев историк, Вера Кузьмина артистка, Николай Овчинников художник тата ыттисем алӑ пусса парнеленӗ.

Куравра сӑнӳкерчӗксем, архив докуменчӗсем те пур.

cap.ru сайтри сӑн

Канаш округӗнче Тӑван ҫӗршывӑн Аслӑ вӑрҫине хутшӑннӑ юлашки ветеран пурнӑҫран уйрӑлнӑ. Мария Назарова 98 ҫулта пулнӑ.

Мария Александровна Псков облаҫӗнче ҫуралнӑ. 1941 ҫулта нимӗҫсем вӗсен хули патне ҫывхарсан эвакуаци пуҫланнӑ. Вӑл амӑшӗпе, кукамӑшӗпе тата виҫӗ пӗртӑванӗпе тӑван тӑрӑхӗнчен тухса кайнӑ. Эвакуаци вӑхӑтӗнче вӗсене совет салтакӗсем ҫитернӗ.

1943 ҫулта Мария Александровна виҫӗ ҫул аслӑрах тенӗ те хӑйӗн ирӗкӗпе фронта кайнӑ. Документсенче вӑл 1925 ҫулта ҫуралнине кӑтартнӑ. Хӗр ҫар-почта базине лекнӗ, ҫырусене малти линие илсе ҫитернӗ. Ҫӗнтерӗве вӑл Берлин ҫывӑхӗнче кӗтсе илнӗ.

1956 ҫулта Мария мӑшӑрӗпе Борис Иванович Назаровпа распределенипе Сума облаҫӗнчи Шостка хулине лекнӗ, унта «Импульс» ҫар савутӗнче ӗҫленӗ. Вӗсем хӗр ӳстернӗ.

Юлашки ҫулсенче Мария Александровна Канаш округӗнчи Шӑхасан ялӗнче пурӑннӑ.

Марина Карягина страницинчен илнӗ сӑнӳкерчӗк

Марина Карягина тележурналист Виталий Станьял патӗнче пулнӑ. Кун пирки вӑл халӑх тетелӗнчи хӑйӗн страницинче пӗлтернӗ.

«Сирӗн саламӑра ҫитертӗм. Пурне те хирӗҫ салам калама ыйтрӗ.

Никитинсем тӑван ялӗнчи ҫуртра ҫу каҫаҫҫӗ. Кил пирӗштийӗ, Зоя Петровна, пире тараватлӑн сӑйларӗ, хыҫа юлнӑ пуян та кӑткӑс кун-ҫулӗ ҫинчен каласа пачӗ. Вӗсем пӗрлешнӗренпе ҫитес уйӑх вӗҫӗнче 50 ҫул ҫитет! Мӑшӑра ылтӑн туй ячӗпе патшалӑх та саламласса шанатпӑр.

Виталий Петрович тӑватӑ хут инсульт, пӗр хут инфаркт чӑтса ирттерсе ура ҫине тӑнӑ! Тем те тӳснӗ ҫирӗп ӑрӑвӑн паттӑр ывӑлӗ, вӑрҫӑ ачи! Ҫӗре ҫити пуҫа таятӑп.

Канӑҫсӑр шухӑшлавҫӑ паянхи кун сулахай аллин пуҫ пӳрнипе сас паллисене пӗрерӗн-пӗрерӗн пусса ҫӗнӗ алҫырӑвне пичетлет», — тесе хыпарланӑ вӑл.

«Контактра» халӑх тетелӗнчи сӑн

Хӗрлӗ Чутай округӗнчи Кивӗ Ирчемес ялӗнче пурӑнакан Елизавета Белова 99 ҫул тултарнӑ.

Вӑрҫӑ ҫулӗсенче вӑл ыттисемпе тан ӗҫленӗ, Ҫӗнтерӗве тылра ҫывхартма пулӑшнӑ. Вӑрҫӑ пӗтсен ҫемье ҫавӑрнӑ. Елизавета Николаевна мӑшӑрӗпе виҫӗ ачана пурнӑҫ парнелесе ура ҫине тӑратнӑ. Вӗсем икӗ хӗрпе пӗр ывӑл ӳстернӗ.

Кинемей – ялта хисеплӗ ҫын. Вӑл яланах ҫынсене пулӑшма тӑрӑшнӑ, нихӑҫан та никама та ӑмсанман. Вӑл халӗ те ырӑ туни каялла ырӑпах таврӑннине ӗненсе пурӑнать.

Кинемее 99 ҫулпа юрласа-ташласа саламланӑ.

«Контактри» сӑн

Ҫӗнӗ Шупашкар хулинчи спортсмен амӑшне ҫуралнӑ кунпа саламлас тесе Волгограда чупса ҫитнӗ.

Вӑл – Олимп резервӗсен 3-мӗш спорт шкулӗн бокс тренерӗ, Чӑваш Енри юристсен Ассоциацийӗн пайташӗ Владимир Дряблов. Спортсмен 750 ҫухрӑм аякра вырнаҫнӑ хулана 21 кун чупнӑ. Унӑн амӑшӗ Волгоград хулинче пурӑнать.

Владимир тӑванӗсене машинӑпа ҫула тухни пирки пӗлтернӗ. Чупса ҫитни пирки юлашкинчен кӑна каланӑ.

Малтанах вӑл 1 пин ытла ҫухрӑм парӑнтарма тӗллев лартнӑ. Анчах ҫул йывӑртарах килнӗ. Ҫавна май хӑш-пӗр ҫӗрте спортсмен ывӑнсан е ҫӗр выртмалли вырӑн е кафе тупаймасан попуткӑсемпе кайнӑ. Ҫапла майпа ҫитсе вӑл амӑшӗшӗн кӗтмен парне тунӑ.

Сӑмах май, Владимир Дряблов Волгоград хулине 2024 ҫулта велосипедпа ҫитнӗ. Ун чухне ҫул ҫине 6 кун тухса кайнӑ.

agro-in.com сӑнӳкерчӗкӗ

«Агро-Инновации» автономи учрежденийӗн директорне Николай Васильева ӗҫрен кӑларнӑ. Ун пек хушӑва республикӑн Министрсен Кабинечӗн Председателӗ Сергей Артамонов ӗнер, утӑ уйӑхӗн 23-мӗшӗнче, алӑ пуснӑ.

Николай Васильева ӗҫрен мӗншӗн кӑларнине хушура каламан. Документа республикӑн влаҫ органӗсен официаллӑ порталӗнче ӗнер вырнаҫтарнӑ.

Эпир маларах асӑнса хӑварнӑ предприяти республикӑн Ял хуҫалӑх министерствине пӑхӑнса тӑрать.

Николай Иванович 1962 ҫулта ҫуралнӑ. 1984 ҫулта вӑл Чӑваш ял хуҫалӑх институтӗнчен зоотехника вӗренсе тухнӑ. Ял хуҫалӑх чӗрчунӗсен генетикин пӗтӗм союзри ӑслӑлӑхпа тӗпчев институтӗнчен, каярах аспирантурӑран вӗренсе тухнӑ. Биологи наукисен кандидачӗ, доцент.

Николай Максимов страницинчен илнӗ сӑнӳкерчӗк

Николай Максимов писатель халӑх тетелӗнчи хӑйӗн пабликӗнче нумаях пулмасть пӗлтернӗ тӑрӑх, унӑн «Спасение Европы» тата «Камаево поле» кӗнекисем «Озон» маркетплейсра сутӑнса пӗтнӗ. Автор каланӑ тӑрӑх, вӑл кӗнекесем — «хамӑр халӑх историйӗпе ҫыхӑннӑ» романсем.

««Вайлдберризра» вара кӑштах пур-ха. Шел пулин те, республикӑри Культура министерстви вӗсене библиотекӑсем валли туянман. Анчах, ман шутпа, ҫак икӗ романа хӑйне чӑваш текен кашни ҫыннӑн вуласа тухмаллах. Вӗсене эпӗ ҫырнӑран мар, эпир хамӑрӑн историе пӗлме тивӗҫрен. Ҫавӑнпа ҫак икӗ кӗнеке Раҫҫейре сутӑнса пӗтиччен вӗсене туянса юлма сӗнетӗп. Уйрамах, икӗ пин ҫурӑ тенке шеллемесӗр, тӑван ял библиотеки валли туянни питӗ вырӑнлӑ пулӗччӗ. Ман сӗнӗвӗме чуна хывакансене пысӑк тав! Пурсӑра та хисеплесе Николай Максимов», — ҫапла ҫырса хунӑ вӑл.

Унтан хушса ҫырни те пур. «Озонра» унӑн «Дар императрицы» тата «Сокровища юродивого» романӗсем те сутӑнса пӗтнӗ иккен. Вӗсем те чӑваш историйӗпе тачӑ ҫыхӑннӑ.

«Муркаш сасси» пабликран илнӗ сӑнӳкерчӗк

«Раҫҫей чӑваш пики» конкурс ҫӗнтерӳҫи ята Муркаш пики Мария Кириллова тивӗҫнӗ. Конкурса нумаях пулмасть Тутарстанри Сиктӗрмери «Сӑвар» этнокомплексра ирттернӗ.

Халӑх тетелӗнчи «Муркаш сасси» пабликра пӗлтернӗ тӑрӑх, Мария кӑҫал Муркаш шкулӗнчен кӗмӗл медальпе вӗренсе тухнӑ, вӑл учитель профессине алла илме ӗмӗтленет. Пике Муркашри ӳнер шкулӗнче вӗреннӗ май музыка инструменчӗсемпе калама вӗреннӗ, хитре ташлать тата юрлать.

Конкурс вӑхӑтӗнче Мария Муркаш тӑрӑхӗпе паллаштарнӑ, кӗскен хӑйӗн пирки сӑвӑлласа каласа панӑ. Пултарулӑх конкурсне Ҫуткӳлпе ҫыхӑнтарнӑ.

Конкурса хатӗрленме пикене Муркаш муниципалитет округӗн депутатсен пухӑвӗн председателӗ Александр Давыдов, Муркаш муниципалитет округӗн администрацийӗн культура тата архив ӗҫӗсен пайӗн пуҫлӑхӗ Любовь Рыжкова чылай пулӑшнӑ.

Мордвари кӗнеке издательствин сӑнӳкерчӗкӗ

Мордвари кӗнеке издательстви чӑваш писателӗн кӗнекине кун ҫути кӑтартнӑ. Кунта сӑмах хальхи вӑхӑтри пултаруллӑ калем ӑстисенчен пӗри, Николай Максимов, пирки пырать.

Ҫӗнӗ кӑларӑма ҫыравҫӑн икӗ романӗ: «Сон шизофреника» тата «Последний оптимист» романӗсем кӗнӗ. Кӗнеке тиражӗ — 1 пин экземпляр.

Кӗнекене Мордвари кӗнеке издательствин лавккисенче туянма пулать, унсӑр пуҫне тата «Вайлдберриз» маркетплейс урлӑ ҫырӑнса илме май пур.

Николай Николаевич 1944 ҫулхи кӑрлач уйӑхӗн 6-мӗшӗнче Чӑваш Енре ҫуралнӑ. Мордва Республикинчи Н.П. Огарев ячӗллӗ патшалӑх университетӗнче «Вырӑс чӗлхипе литератури» специальноҫа алла илнӗ, унсӑр пуҫне вӑл Горький (хальхи Чулхула) хулинчи Аслӑ парти шкулӗнчи журналистика уйрӑмӗнче вӗреннӗ. Журналистикӑри ӗҫ биографине район хаҫатӗнчи пай заведующийӗнчен пуҫланӑ, «Советская Чувашия» хаҫатӑн генеральнӑй директорӗ — тӗп редакторӗ таран пулса ӗҫленӗ. Чӑваш Республикин культурӑн тава тивӗҫлӗ ӗҫченӗ.

Писатель чӑвашла та, вырӑсла та ҫырать. 12 роман, 20 ытла повесть, калав, пьесӑсен авторӗ.