vladimir.mk.ru сайтри сӑн

Чӑваш Енри 51 ҫулти библиотекарь хӑйӗн директорӗпе калаҫнине ӗненсе ултавҫӑсене 700 пин ытла тенкӗ куҫарса панӑ.

Чӑннипе, банк унӑн счетне блокировка туман-тӑк тӑкакӗ тата нумайрах пулма пултарнӑ. Ӗҫ-пуҫ вара ҫапларах пулса иртнӗ. Ун патне мессенджерта ҫыру килнӗ. Хӗрарӑм ӑна директор ҫырни пирки иккӗленмен, мӗншӗн тесен аватарка ҫинче унӑн сӑн ӳкерчӗкӗ пулнӑ. «Директор» библиотекӑра тӗрӗслев пулассине пӗлтернӗ. Ултавҫӑ анлӑ схемӑпа усӑ курнӑ: такамсем унӑн счечӗ урлӑ Украинӑна укҫа куҫараҫҫӗ имӗш, ҫавӑнпа унӑн куншӑн явап тытма тивӗ.

Хӑраса ӳкнӗ хӗрарӑм ҫӗнӗ телефон, сим-картта туяннӑ. Банка кайса счечӗ ҫинчи 755 пин тенкине илсе ултавҫӑсем каланӑ счет ҫине куҫарнӑ. Вӗсем хушнипех тепӗр банка кайнӑ. Юрать-ха, унта унӑн счетне блокласа хунӑ. Кун хыҫҫӑн тин хӗрарӑм ултавҫӑсен аллине лекнине ӑнланнӑ.

чувашинформ.рф сӑнӳкерчӗкӗ

Чӑваш Енри ветеринари инспекторӗсем ҫак енӗпе саккуна пӑхӑннине пилотсӑр вӗҫекен аппаратсемпе тӗрӗслеҫҫӗ. Ку ӗҫе вӗсем кӑҫалхи авӑн уйӑхӗнче тытӑннӑ.

Кӗске вӑхӑтрах Муркаш, Патӑрьел, Елчӗк, Сӗнтӗрвӑрри тата Шупашкар тӑрӑхӗсенчи 14 объекта тӗрӗсленӗ. Тӑхӑр объектра дезинфекци хӳтлӗхӗ, ятарлӑ карта пулман. Пӗр хуҫалӑхра шута илмен 15 выльӑха тупса палӑртнӑ.

Кӑлтӑк тӗлӗшпе хуҫалӑхсен ертӳҫисем ячӗпе асӑрхаттару хучӗсем ҫырса панӑ.

Чӑваш Енри тӑватӑ ял чи лайӑх стелӑна палӑртмалли конкурса хутшӑнать. Вӗсем – Тӑвай, Кӳкеҫ, Ҫӗмӗрле тата Етӗрне.

Тӑвай «Пысӑк йышши ял тӑрӑхӗ» категорире тупӑшать. Ҫӗмӗрле, Етӗрне тата Кӳкеҫ «Пӗчӗк хуласем тата поселоксем» категорири сасӑлава хутшӑнаҫҫӗ.

Чи нумай сасӑ пухнӑ проектсем финала тухӗҫ.

Прокуратура тунӑ сӑн

Пӑрачкавра самосвал водительне пула 100 яхӑн ҫурт газсӑр юлнӑ.

Раштавӑн 12-мӗшӗнче 18 сехет тӗлӗнче самосвал кузовне антармасӑр Октябрь урамӗнче ҫул урлӑ арка евӗр хывнӑ газ пӑрӑхне пырса лекнӗ. Руль умӗнче 20 ҫулти каччӑ пулнӑ.

Газ тухассине специалистсем хӑвӑртах чарнӑ. Ҫанталӑка пула ҫӗрле юсав ӗҫӗсене чарса лартнӑ, ирхине малалла тӑснӑ.

Газсӑр юлнӑ ҫынсене вӑхӑтлӑха вырнаҫтармалли вырӑна районти культура ҫуртӗнче йӗркеленӗ.

«Контактри» сӑн

Чӑваш Ене Раҫҫейри паллӑ актер Влад Канопка килесси пирки сайтра унччен пӗлтернӗччӗ. Вӑл Ҫӗмӗрлери шкул ачисем тӗл пулнӑ.

Влад Канопкӑна ытларах «Молодежка» сериал тӑрӑх пӗлеҫҫӗ. Унта ӳкерӗнсе чапа тухнӑ актер ачасене мӗнле кӗнекесем вулама кӑмӑлланине каласа кӑтартнӑ.

Ку тӗлпулу «Знание» обществӑн проекчӗпе килӗшӳллӗн иртнӗ. Влад ачасене хӑй мӗнле кӗнекесем кӑмӑлланине пӗлтернӗ: Федор Достоевскин, Лев Толстойӑн тата Александр Пушкинӑн хайлавӗсене вулама юратать вӑл. Ҫавӑн пекех вӑл ӑсталӑх класӗ йӗркеленӗ.

cap.ru сайтри сӑн

Йӗпреҫ округӗнчи Агеевсем пурнӑҫ ҫулӗпе пӗрле утса 5 ача ӳстернӗ, халӗ 11 мӑнукӗпе савӑнса пурӑнаҫҫӗ. Ҫак кунсенче Сергей Николаевичпа Ольга Евгеньевна ылтӑн туйне паллӑ тунӑ.

Сергей Николаевич Горькинчи чукун ҫул ҫинче ӗҫленӗ. Ольга Евгеньевна колхозра бухгалтерта чылай ҫул тӑрӑшнӑ, кайран 18 ҫул почта уйрӑмӗн пуҫлӑхӗ пулнӑ.

Мӑшӑра Кӗлӗмкасси территори уйрӑмӗн пуҫлӑхӗ Валерий Никонов саламланӑ.

Муркаш округӗнчи Оринин ялӗнче пурӑнакан Васильевсем пӗрлешнӗренпе 55 ҫул ҫитнӗ. Вӗсем 3 хӗр те 2 ывӑл ҫуратса ӳстернӗ. Халӗ вӗсен 7 мӑнук тата 2 кӗҫӗн мӑнук пур.

Вячеслав Прохорович салтакра чухне «1-мӗш класлӑ радист» палла тата Морзе азбукине йышӑнассипе пӗрремӗш разряд илнӗ. Ҫартан таврӑнсан культура тытӑмӗнче ӗҫленӗ, Орининти культура ҫурчӗн директорӗ, киномеханикӗ пулнӑ. Халӗ вара халӑх театрне выляма ҫӳрет. Вӑл – ЧР культурӑн тава тивӗҫлӗ ӗҫченӗ.

Галина Ивановна Шупашкарти кулинари училищинчен вӗренсе тухсан поварта 37 ҫул ӗҫленӗ.

ru.pinterest.com сайтри сӑн

Ҫӗнӗ ҫулхи каникулта Шупашкартан Мускава самолетсем ытларах вӗҫӗҫ. Кун пирки аэропорт пресс-служби пӗлтерет.

«Победа» авиакомпани расписание хушма рейссем кӗртме йышӑннӑ. Ку раштав уйӑхӗн 28-мӗшӗнчен пуҫласа кӑрлачӑн 11-мӗшӗччен вӑйра пулӗ.

Сӑмах май, Раҫҫей чукун ҫулӗ те Ҫӗнӗ ҫулхи каникулта хушма пуйӑссем яма палӑртнӑ.

Инкеклӗ лару-тӑру министерстви тунӑ сӑн

Чӑваш Енре ӗнертенпе Инкеклӗ лару-тӑру режимӗ пулнине пӗлтернӗччӗ. Специалистсем пилотсӑр вӗҫекен аппаратсем Шупашкарти ҫуртсене мӗн чухлӗ тӑкак кӳнине шутланӑ – 20 миллион ытла тенкӗлӗх.

Аса илтерер: 15 ҫурт сиенленнӗ, вӗсенчен 10-шӗ – нумай хваттерлӗ ҫурт, пӗри – ача пахчи. 14 ҫын аманнӑ. Ӗнер ЧР Сывлӑх сыхлавӗн министерстви пӗлтернӗ тӑрӑх, 7 ҫын пульницӑра сипленет, тепӗр 7-шӗ ¬– килте, вӗсен йышӗнче ача та пур.

Ӗнер шар курнӑ ҫынсене техникум общежитийӗнче вырӑн сӗннӗ. Тӑватӑ ҫын килӗшнӗ, ыттисем тӑванӗсем патӗнче хӳтлӗх тупнӑ.

ugo-lnk.kemobl.ru сайтри сӑн

Паян ЧР Элтеперӗ Олег Николаев республикӑра регион шайӗнче инкеклӗ лару-тӑру режимӗ пулнине палӑртнӑ.

Вӑл каланӑ тӑрӑх, ку Шупашкарта беспилотникрен шар курнисене пулӑшма тата тӑкаксене саплаштарма пӗтӗм ресурса мобилизацилеме май парать. Хальхи вӑхӑтра тӑкаксене шутлаҫҫӗ, юсав ӗҫӗсене пуҫӑннӑ ӗнтӗ.

Правительство лару-тӑрӑва ҫирӗп сӑнаса тӑрать.