visitvolga.ru сайтри сӑн

Республика влаҫӗ ҫитес ҫул куравсемпе фестивальсем валли мӗн чухлӗ укҫа тӑкаклассине пӗлтернӗ. Хушӑва Правительство председателӗ Сергей Артамонов алӑ пуснӑ.

Пӗтӗмпе 200 ытла пин тенкӗ тӑкаклӗҫ. Списокра – 41 мероприяти, вӗсенчен 12-шӗ – тӗнче шайӗнчи, 15-шӗ – регионсен хушшинчи, 14-шӗ – регион шайӗнчи.

Чи нумай укҫа «Раҫҫейри симӗс ылтӑн» сӑра фестивалӗ валли тӑкакланӗ. Ун валли 49,7 млн тенкӗ пӑхса хунӑ. Кӑҫал, сӑмах май, фестивальте республика 28,8 млн тенкӗ кӑна тӑкакланӑ.

Шупашкарти экономика форумне ирттерме 20 млн тенкӗ пӑхса хунӑ, Чӑваш Ен Элтеперӗн Пысӑк кубокӗ валли – 15,9 млн тенкӗ. Тӗнче шайӗнчи мероприятисене илес тӗк ытларах М.Д.Михайлов ячӗллӗ Пӗтӗм тӗнчери опера фестивалӗнче ытларах тӑкакланма тивӗ, ун валли 6,75 млн тенкӗ пӑхса хунӑ.

cap.ru сӑнӳкерчӗкӗ

Паян, юпа уйӑхӗн 16-мӗшӗнче, Ял хӗрарӑмӗсен кунӗ шутланать. Ҫавна май республика Элтеперӗ Олег Николаев тем пысӑкӑш салам ҫырса хатӗрленӗ.

«Ҫак уяв эсир пуҫарнипе тата пулӑшнипе ҫуралчӗ. Халӗ пирӗн календарьте тепӗр паллӑ кун пулнине уйрӑмах савӑнса палӑртатӑп. Сирӗн ырми-канми ӗҫӗр, тӑван киле, ҫывӑх ҫынсене иксӗлми таса туйӑмпа юратни чӑннипех те пысӑк хисепе тивӗҫ», — тесе пуҫланӑ салама республика ертӳҫи.

«Эсир – килти хӑтлӑхпа йӑла-йӗрке тата чун-чӗре ӑшшин управҫисем. «Кил ӑшши – арӑмран», – тесе халӑхра ахальтен каламаҫҫӗ. Тӑван ҫӗршыва юратни, ҫемьешӗн тӑрӑшни, ҫулталӑк вӑхӑтне пӑхмасӑрах юратни мар тӑвакан кулленхи ӗҫ ҫӗр ҫинчи пурнӑҫ йӗркин никӗсӗ пулса тӑраҫҫӗ. Эсир ачасене пӑхса ҫитӗнтеретӗр, хуҫалӑха тытса пыратӑр, мӑн асаттемӗрсен йӑлисене сыхласа упратӑр, хӑвӑр вара ҫав вӑхӑтрах ку чухнехи, ӗҫлӗ те ӑнӑҫлӑ хӗрарӑмсем пулма пӑрахмастӑр», — мухтанӑ Элтепер.

Уй-хирпе ферма ӗҫченӗсене, агропромышленность комплексӗнче тӑрӑшакансене, ялти вӗрентекенсене, врачсемпе фельдшерсене, культура ӗҫченӗсене те асӑнса хӑварнӑ.

cap.ru сайтри сӑн

«Легендарный Красный» ретропуйӑс юпа уйӑхӗн 21-мӗшӗнчен каллех ҫула тухӗ. Кун пирки Горький чукун ҫулӗ пӗлтерет.

Пуйӑс «Шупашкар – Канаш» маршрутпа ҫула тухать. Хальхинче вӑл юпа уйӑхӗн 25-мӗшӗччен экскурсие илсе ҫӳрӗ.

Пуйӑс Шупашкартан ирхи 8 сехет те 20 минутра тухса Канаша 11:15 сехетре ҫитӗ. Каялла 14:30 сехетре тухӗ те Шупашкара 16:15 сехетре ҫитӗ.

Аса илтерер: пуйӑс йышне Л серири ӗлӗкхи пӑравус тата хальхи йышши вакунсем кӗреҫҫӗ, вӗсене революцичченхи пек стилизаци тунӑ. Пуйӑспа экскурсие кайнӑ чухне театр представленийӗсене те кӑтартаҫҫӗ. Пассажирсене Граждан вӑрҫинчи пулӑмсемпе, революци тата ун хыҫҫӑнхи тапхӑрпа паллаштарӗҫ, историре йӗр хӑварнӑ Василий Чапаев шӑпипе паттӑрлӑхӗ пирки каласа кӑтартӗҫ.

Тепрехинче пуйӑс юпа уйӑхӗн 28-мӗшӗнче ҫула тухӗ те чӳк уйӑхӗн 1-мӗшӗччен маршрутпа ҫӳрӗ.

cap.ru сайтри сӑн

Алякинсен ҫемйи Пӗтӗм Раҫҫейри «Ҫулталӑк ҫемйи — 2026» конкурсра Чӑваш Ен чысне хӳтӗлӗ.

Кӑҫал конкурса пӗтӗм ҫӗршывран 11 800 ҫемье хутшӑнать. 485 финалистран вӗҫленӳ тапхӑрне чи лайӑх 89 ҫеье тухнӑ. Вӗсем — федераци тапхӑрӗнчи ҫӗнтерӳҫӗсем. Хӗрлӗ Чутай округӗнчи Хурашаш ялӗнчи Алякинсен ҫемйи «Тӑван Ҫӗршыв хӳтӗлевҫин ҫемйи» номинацире лауреат пулса тӑнӑ.

Светлана Валериевна хӑйӗн хӗрӗсемпе Анастасийӑпа тата Екатеринӑпа пӗрле Мускавра виҫҫӗмӗш кун лӑпкӑ канса ҫӳрет. Вӗсене интереслӗ экскурсисене, пултарулӑх тӗлпулӑвӗсене илсе ҫӳреҫҫӗ.

Ӗнер каҫхине пысӑк сцена ҫинче Светлана Валериевна хӑйӗн хӗрӗпе Екатерина пӗрле халӑха «Амӑшӗпе хӗрӗ» сӑнарлӑ ташӑ кӑтартнӑ. Ӑна халӑх тӑвӑллӑн алӑ ҫупса кӗтсе илнӗ.

Паян вӗсемшӗн чи яваплӑ самант ҫитнӗ — Патшалӑх Кремль керменӗнче ҫӗнтерӳҫӗ ҫемьесене савӑнӑҫлӑ лару-тӑрура чыслӗҫ.

ШӖМ тунӑ сӑн

44 ҫулти хӗрарӑм каҫхине тӗттӗм тумпа, ҫара ура ҫине тӑхӑннӑ ҫуллахи пушмакпа ҫул хӗррипе пынӑ. Ку юпа уйӑхӗн 9-мӗшӗнче пулнӑ. Хӗрарӑма Куславкка округӗнчи «Елчӗк – Криуш» ҫул ҫинче курнӑ.

Ҫул-йӗр инспекторӗсем пӗччен утакан хӗрарӑма асӑрхасан чарӑннӑ. Ыйтусем парсан хӗрарӑм хӑйӗн пирки нимӗн те калайман, ҫавӑнпа ӑна полици участокне илсе ҫитернӗ, тӑванӗсене шырама пуҫланӑ.

Шалти ӗҫсен отставкӑри майорӗ Светлана Лукьянова ӗҫтешӗсене ҫак хӗрарӑм сӑнне кӑтартнӑ. Часах ӑна палласа илекен ҫын тупӑннӑ, хӗрарӑма килсе илсе ҫитернӗ. Вӑл Сӗнтӗрвӑрри округӗнче пурӑнать, тӑванӗсем ӑна хӑйсем тӗллӗн шырама тытӑннӑ.

cheb.ru сӑнӳкерчӗкӗ

Чӑваш Енри тӳре-шара пӗлӗвне ӳстерме ҫӗнӗ институт туса хунӑ. Ӑна чӑвашла ят панӑ. Тӳре-шарана вӗрентмелли «Аталан» институтра патшалӑхӑн тата муниципалитетӑн служащийӗсене вӗрентӗҫ.

Чӑваш Енӗн Министрсен Кабинечӗ асӑннӑ учреждение автономлӑ туса хума йышӑннӑ. Унӑн тулли ячӗ ҫапларах пулӗ: «Управлени ӑсталӑхӗн «Аталан» институчӗ» хушма професси пӗлӗвӑ паракан автономи учрежденийӗ. Документа правительство шайӗнче юпа уйӑхӗн пуҫламӑшӗнче алӑ пуснӑ, ӑна республикӑн влаҫ органӗсен официаллӑ порталӗнче вырнаҫтарнӑ.

Институт патшалӑх органӗсенче тата вырӑнти хӑйтытӑмлӑхра ӗҫлекенсен пӗлӗвне ӳстерме пулӑшӗ.

Учреждени _Шупашкарти__ Иван Яковлев проспектӗнчи 13-мӗш ҫуртра (унта Пичет ҫурчӗ вырнаҫнӑ) пулӗ, пӗтӗмпе 36 тӑваткал метр лаптӑк йышӑнӗ.

Института республика хысни шучӗпе тытса тӑрӗҫ.

Канашри район сучӗ бортпроводник пулнӑ ҫынран укҫа шыраса илме йышӑннӑ. Тӗрӗсрех каласан, асӑннӑ ҫынран авиакомпани укҫа шыраса илес тенӗ-ха, суд вара тивӗҫтернӗ.

Авиакомпанисенчен пӗри бортпроводникра кӑштах ӗҫлесе пӑхнӑ ҫынна вӗрентсе тӑкакланине саплаштарас тенӗ.

2024 ҫулхи утӑ уйӑхӗнче Д. ятлӑ ҫын авиакомпанипе килӗшӳ алӑ пусса вӗренме кӗнӗ. Вӗренсе пӗтернӗ хыҫҫӑн унӑн ҫулталӑкран кая мар бортпроводникра ӗҫлемелле пулнӑ.

2024 ҫулхи юпа уйӑхӗнче хайхискер вӗренсе пӗтернӗ, ҫав ҫулхи раштав уйӑхӗнче ӗҫлеме пуҫланӑ. Анчах 2025 ҫулхи ҫурла уйӑхӗнче ӗҫрен пӑрахнӑ.

Суд хайхи ҫынна вӗрентме хӑтланса авиакомпани 144 пин тенкӗ ытларах пӗтернине палӑртнӑ. Кунта вӗрентнипе пӗрлех стипенди тӳлени те кӗрет. Кӑштах ӗҫленӗ вӑхӑта кура ҫав ҫыннӑн авиакомпание 41 308 тенкӗ тӳлемелле пулнӑ. Унсӑр пуҫне суд тӑкакӗпе патшалӑх пошлинине тепӗр 4 пин тенкӗ тӳлеттерме йышӑннӑ.

Евгения Гаева тунӑ сӑн

Чӑваш Республикинче пушара хирӗҫле режима пӑрахӑҫланӑ. Хушӑва республика премьер-министрӗ Сергей Артамонов алӑ пуснӑ.

Аса илтерер: пушара хирӗҫле режим Чӑваш Енре ака уйӑхӗн 10-мӗшӗнчен вӑйра пулнӑ. Ҫак тапхӑрта вӑрманта тата ун ҫывӑхӗнче кӑвайт чӗртме, кӑвар ҫинче апат пӗҫерме юраман. Йӗркене пӑсакансене штрафланӑ. Виҫи ахаль ҫынесмшӗн пӗчӗкех мар: 40 пинрен пуҫласа 50 пин тенкӗ таран пулнӑ.

Пушара хирӗҫле режима пӑрахӑҫланӑ хыҫҫӑн халӗ ку чарусем вӑйра мар. Малашне ҫынсем вӑрмана ирӗклӗнех кӗме пултараҫҫӗ.

Ку режим пирӗн республикӑра ҫур ҫула тӑсӑлчӗ.

«Контактри» сӑн

Патӑрьел пульницинче Ача кӗтекен хӗрарӑмсен кунне паллӑ тунӑ. Ҫак тӗлпулӑва 19 пулас амӑшӗ хутшӑннӑ.

Унта хутшӑнакансене ҫемьери атмосферӑна мӗнле йӗркелемелли, мӗнле пулӑшу мелӗсем пурри тата ача ҫураличчен мӗнле хатӗрленмелли ҫинчен каласа панӑ.

Пулас ашшӗ-амӑшӗ икӗ ҫул тултарман ача валли кравать, кӳме, тараса, автомобиль кресли тата ытти пӗрремӗш кирлӗ япаласене вӑхӑтлӑха усӑ курма ахалех парасси ҫинчен пӗлнӗ. Ку ҫемье бюджетне перекетлеме май парать.

Ачасене кӗске вӑхӑтлӑ пӑхма та хӑварма пулать. Ку службӑра профессионал социаллӑ ӗҫченсем вӑй хураҫҫӗ. Ҫак вӑхӑта амӑшӗ тухтӑр патне кайма, кӑткӑс ыйтусене татса пама е кӑштах канса вӑй пухма пултарать.

Пулас амӑшӗсене пулӑшни — медицина пулӑшӑвӗ ҫеҫ мар, ҫемьене шанчӑклӑ туйма май паракан социаллӑ пулӑшу та.

Игорь Степанов (сылтӑмра). medicin.cap.ru сӑнӳкерчӗкӗ

«Фармаци» республикӑн унитарлӑ предприятийӗн генеральнӑй директорне ӗҫрен кӑларнӑ. Асӑннӑ пукана Игорь Степанов йышӑннӑ.

Игорь Владимировича ӗҫрен хӑтарасси ҫинчен калакан йышӑнӑва республикӑн Министрсен Кабинечӗн Председателӗ Сергей Артамонов ӗнер, юпа уйӑхӗн 7-мӗшӗнче, алӑ пуснӑ.

Ӗҫлӗ хута республикӑн влаҫ органӗсен официаллӑ порталӗнчӗ вырнаҫтарнӑ.

«Фармаци» республикӑн унитарлӑ предприятийӗ Чӑваш Енӗн Сывлӑх сыхлав министерствине пӑхӑнса тӑрать. Игорь Степанова мӗншӗн ӗҫрен кӑларнине официаллӑ хутра пӗлтермен. Ку должноҫе ӑна пӗлтӗрхи юпа уйӑхӗн 24-мӗшӗнче лартнӑччӗ. Игорь Степанов 2002 ҫулта Питӗр хулинчи И.И. Мечников ячӗллӗ патшалӑх медицина академийӗнчен вӗренсе тухнӑ. Курганта та, Архангельск облаҫӗнче те ӗҫленӗ.