Паян Чӑваш Республикинчи ҫамрӑк ӑсчахсемпе специалистсен канашӗн анлӑ ларӑвӗ иртнӗ. Унта 2019-2020 ҫулсенчи вӗренӳ ҫулне видеоконференцҫыхӑну мелӗпе тишкернӗ.

Лару пуҫланас умӗн аслӑ шкулти преподавательсен «Открытая лекция» (чӑв. Уҫӑ лекци) республикӑри IX фестивалӗн ҫӗнтерӳҫисене палӑртнӑ. 1-мӗш вырӑна И.Я. Яковлев ячӗллӗ Чӑваш патшалӑх педагогика университечӗн шкул ҫулне ҫитменнисене пӗлӗвӗн кафедрин аслӑ преподавателӗ Николай Петренко тухнӑ, иккӗмӗшӗнче — Шупашкарти коопераци институчӗн гуманитари дисциплинисемпе ют чӗлхесен кафедрин преподавателӗ Николай Петренко, виҫҫӗмӗшӗнче — Чӑваш патшалӑх аграри университечӗн биотехнологи тата ял хуҫалӑх продукцине тирпейлекен кафедрӑн аслӑ преподавателӗ Олеся Чеченешкина тата И.Н. Ульянов Чӑваш патшалӑх университечӗн доценчӗ Елена Драндрова.

Чӑваш Ен Цифра аталанӑвӗн, информаци политикин тата массӑллӑ коммуникацисен министерстви пӗлтернӗ тӑрӑх, социаллӑ пӗлтерӗшлӗ объектсене пысӑк хӑвӑртлӑхлӑ интернетпа ҫыхӑнтарасси пирӗн республикӑра малалла пырать. «Ростелеком» предприяти специалисчӗсем ҫак енӗпе халӗ виҫӗ районта ҫине тӑраҫҫӗ.

Ҫывӑх вӑхӑтра пысӑк хӑвӑртлӑхлӑ интернет Шупашкар районӗнчи Толик Хураски тата Мӑнал, Элӗк районӗнчи Вутлан, Муркаш районӗнчи Тойкилтӗ ялӗсенче ӗҫлесе кайӗ. Асӑннӑ ялсенчи шкулсем ун чухне тӗнче тетелне ҫӑмӑллӑнах тухайӗҫ. Ҫавӑн пекех Шупашкар районӗнчи Мӑналти фельдшерпа акушер пунктне тӗнче тетелӗпе ҫыхӑнтарӗҫ.

«ОРТ» телеканал Патӑрьелте пулса репортаж хатӗрленӗ.

Патӑрьелте икӗ гектара яхӑн ҫӗре таса мар шывсем вараланӑ. Шурлӑх шӑрши кӗнине вырӑнтисем йӑлари хытӑ каяш шывӗ юхса тӑнипе ӑнлантараҫҫӗ. Канализаци шывӗ тасатмалли сооруженирен юхать иккен. Таса мар шыв ҫутҫанталӑка вараланин сӑлтавне ОТР корреспонденчӗ Марина Рябцева шыранӑ.

Патӑрьелти Дина Ванина каланӑ тӑрӑх, унӑн килӗнчи ҫӑлкуҫри шыв каллех вараланнӑ. Вӑл шӑварма ҫеҫ юрӑхлӑ. Еҫмелли шыва лавккара туянма тивет. Ялта централизациленӗ шыв пӑрӑхӗ ҫукран ҫынсем ҫӑлтан шыв ӑсса пурӑнаҫҫӗ.

Тасатмалли сооружени йӗркеллӗ ӗҫлеменни пирки вырӑнтисем администрацие те, Роспотребнадзорпа прокуратурӑна та ҫырнӑ. Сӑмаха ӗнентерме сӑн ӳкерчӗксемпе видеосем янӑ. Анчах тӳре-шара укҫа ҫук тесе калать-мӗн.

Кӑшӑлвируспа чирленисене Чӑваш Енре икӗ санаторире сиплӗҫ. Ҫакӑн пирки республикӑн сывлӑх сыхлав министрӗ Владимир Степанов ведомствӑн коллегийӗнче ӗнер, утӑ уйӑхӗн 29-мӗшӗнче, пӗлтернӗ. Унта вӑл отраслӗн ӗҫӗ-хӗлӗ ҫинчен доклад тунӑ.

Министр каланӑ тӑрӑх, COVID-19-па чирленисене реабилитацилеме республикӑна тулли медицина никӗсӗ кирлӗ. Ун пек центрсене «Чувашиякурорт» тата «Надежда» (вӑл Ҫӗнӗ Шупашкарта вырнаҫнӑ) санаторисенче йӗркелӗҫ. Вӗсенче кирлӗ пурлӑхпа техника бази пур.

Проекта патшалӑхпа уйрӑм ҫын партнерствин мелӗпе те йӗркелеме палӑртаҫҫӗ.

Кӑшӑлвируспа чирленисене (сӑмах кунта шала кайнӑ чирпе нушаланакансем пирки пырать. Сӑмахран, чӗре чирӗллисем) реабилитацилес ыйтӑва Чӑваш Ене федерацин Атӑлҫи тӑрӑхӗнчи полпречӗ Игорь Комаров килсен сӳтсе явнӑ.

Чӑваш Ен финанс министрӗ пулнӑ Светлана Енилина Питӗр хулинче ӗҫлеме тытӑннӑ. Ҫӗнӗ ҫӗрте ӗҫе вӑл паянтан, утӑ уйӑхӗн 30-мӗшӗнчен, кӳлӗннӗ. Светлана Енилина Питӗр хулинче финанс комитечӗн ертӳҫин ҫумӗ пулса тӑрӑшӗ. Ку хыпара асӑннӑ хула администрацийӗн сайтӗнче пӗлтернӗ.

Ҫӗнӗ ӗҫре Енилина хысна политикин тӑватӑ пайӗншӗн яваплӑ: халӑх социаллӑ хӳтлӗх пайӗшӗн; вӗрентӳшӗн; сывлӑх сыхлавӗшӗн; культурӑшӑн, ҫамрӑксен ӗҫӗшӗн тата спортшӑн.

Светлана Енилина Чӑваш Ен Элтеперӗ пулнӑ Михаил Игнатьевпа пӗр командӑра ӗҫленӗччӗ. Республика Элеперӗн тивӗҫӗсене вӑхӑтлӑха пурнӑҫлама Олег Николаева шансан ӑна ӗҫрен хӑтарнӑччӗ. Светлана Енилина кӑҫалхи ака уйӑхӗнчен пуҫласа утӑ уйӑхӗччен Ленинград облаҫӗнче финанс комитечӗн ертӳҫин ҫумӗнче тӑрӑшнӑ.

azh.kz сӑнӳкерчӗкӗ

Шупашкарта ӳсӗр хӗрарӑм банкра пуҫтахланнӑ. Ӑна РФ Пуҫиле кодексӗн 167-мӗш статйин 1-мӗш пайӗпе айӑпланӑ. Вӑл статья ют пурлӑха ятарласа самай сӑтӑр тунисене «тӑна кӗртет».

Чӑваш Ен прокуратуринче пӗлтернӗ тӑрӑх, ӳсӗр хӗрарӑм кредит учрежденийӗнче пуҫтахланнӑ, банкӑн пурлӑхне сӑтӑр тунӑ. Тӗрӗсрех каласан, терминала сиенлетнӗ. Пӗтӗмӗшле илсен вӑл 300 пине яхӑн тенкӗлӗх шар кӑтартнӑ.

Урӑлсан хӗрарӑм тӑна кӗнӗ. Пуҫтахланнӑшӑн вӑл хытах куляннӑ, ӳкӗннӗ. Суд ӑна ултӑ уйӑх ӗҫлесе юсантарма йышӑннӑ. Ҫав вӑхӑтра шалӑвӑн 5 процентне патшалӑха тытса юлӗҫ. Банка хур тунине те хӗрарӑмӑн саплаштармалла.

Красноармейски салинче те бассейн пулӗ. Кун пирки Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян Красноармейски салинче пулнӑ чух шантарнӑ. ВЫрӑнтисем бассейн пирки питӗ ӗмӗтленеҫҫӗ иккен. Вӗсем ӑна ачасем валли тутарасшӑн.

«Бассейн проекчӗ хатӗр. Ҫулталӑк вӗҫлениччен экспертиза хатӗрлесе ҫитерсен ҫитес ҫул тума пуҫлӑпӑр», – тенӗ республика ертӳҫи.

Олег Николаев каланӑ тӑрӑх, спортпа туслисен йышне 80 процента ҫитермели тӗллеве вӑл республика Правительстви умне лартнӑ. Инфраструктурӑна хатӗрленӗ чухне ҫынсен кӑмӑлне шута илмелле тесе шухӑшлать республика ертӳҫи.

Калӑпӑр, пӗрисем футбол выляма юратаҫҫӗ, теприсем — чупма, ивҫҫӗмӗшӗсем — ишме.

Ӗнер Шупашкарта пурӑнакан 85 ҫулти кинемей полицие пырса пулӑшу ыйтнӑ. Хайхискере ултавҫӑ шӑнман пӑр ҫине лартса хӑварнӑ, унӑн укҫине вӑрланӑ.

Кинемей патне пӗр хӗрарӑм шӑнкӑравланӑ. Хӑй «соцӗҫчен» иккен. Вӑл тивӗҫлӗ канури ҫынсене апат-ҫимӗҫ тивӗҫессине пӗлтернӗ, адреса ыйтнӑ. Хайхи хӗрарӑм кинемейӗн укҫа пуррипе ҫуккипе те кӑсӑкланнӑ. Саккунра улшӑнуесм пулаҫҫӗ-мӗн, ҫавӑнпа вӗсене ылмаштармалла.

Ҫав вӑхӑтрах алӑкран такам шакканӑ. «Нимеҫӗ» иккен. Вӑл карчӑкӑн укҫине илсе тухса кайнӑ. Пӗтӗмпе – 342 пин тенкӗ.

Халӗ полицейскисем ҫав ҫынсене шыраҫҫӗ.

Инкеклӗ лару-тӑру министерстви тунӑ сӑн

Вӑрмар районӗнчи пӗр ҫуртра пушар тухнӑ. Инкеклӗ лару-тӑру министерстви пӗлтернӗ тӑрӑх, ку инкек утӑ уйӑхӗн 28-мӗшӗнче 11 сехет те 31 минутра Кивӗ Вӗренерте пулнӑ.

Ведомство специалисчӗсем палӑртнӑ тӑрӑх, пушар ачасем шӑрпӑкпа вылянӑран тухнӑ. Шел те, пушарнӑйсем темле тӑрӑшсан та ҫурта ҫӑлса хӑварма май килмен. Юрать-ха, ачасем хӑйсем шар курман.

Малтанлӑха палӑртнӑ тӑрӑх, тӑкак 1 миллион тенкӗпе танлашнӑ. Сӑмах май, ҫав талӑкра республикӑра 6 пушар пулнӑ. Телее, вӗсенче аманнисем, вилнисем пулман.

admkrai.krasnodar.ru сайтри сӑн

Чӑваш Енре химипе тата обществознанипе патшалӑхӑн пӗрлехи экзаменне мӗнле тытни паллӑ.

Химипе 805 ҫын экзамен тытнӑ. Вӗсенчен 113-шӗ ППЭне «иккӗлӗх» ҫырнӑ. 137 ҫын 81 балран ытларах пухнӑ. 16 ҫын вара ыйтусене пурне те тӗрӗс хуравласа 100 балл илейнӗ.

Обществознанипе 2366 ҫын пӗлӗвне тӗрӗсленӗ. Вӗсенчен 289-шӗ чи сахал балл та пухайман, 457-шӗ экзамена «пиллӗклӗх» ҫырнӑ. 7 ҫын ку предметпа 100 балл пухнӑ. Вӗсем Патӑрьелти 1-мӗш шкултан, Канашри 7-мӗш шкултан, Ҫӗнӗ Шупашкарти 9-мӗш шкултан, Ҫӗмӗрлери 8-мӗш гимназирен, Шупашкарти 4-мӗш лицейран тата 5-мӗш гимназирен.