|
Статистика
 Чӑваш Енре пурӑнакансем миҫе тенкӗ шалупа ҫырлахма хатӗррине пӗлтернӗ. «Про Город» хаҫат тӗнче тетелӗнчи халӑх ушкӑнӗсенчен пӗринче ыйтӑм йӗркеленӗ. Унта хутшӑннӑ Чӑваш Ен ҫыннисенчен 4,82 проценчӗ халӗ чи пӗчӗк ӗҫ укҫи илсе пурӑннине пӗлтернӗ. Ҫавӑнпа вӗсем кӑҫал 20 пин тенкӗ илсен те савӑнӗччӗҫ. 3,53 проценчӗ 25 пин тӳлесен ҫырлахӗ. 9,67 проценчӗ 25-35 пин тенкӗ илме ӗмӗтленет, 18,07 проценчӗ — 35-45 пин тенкӗ, 17,1 проценчӗ — 45-55 пин, 12,77 проценчӗ — 55-75 пин, 11,28 проценчӗ 75-100 пин тенкӗ, 22,76 проценчӗ кӑҫал 100-150 пин тенкӗрен кая мар ӗҫлесе илессе шанать. Ыйтӑма 4 024 ҫын хутшӑннӑ. Хыпар ҫӑлкуҫӗ:
|
|
Раҫҫейре
 Ӗҫсӗр тӑрса юлнисене кӑҫал та кӳрентермӗҫ. Вӗсене уйӑхсерен тӳлекен пособин чи пысӑк виҫи 12 130 тенкӗ пулӗ, чи пӗчӗкки – 1500 тенкӗ. Малтанхи виҫӗ уйӑхра шалӑвӑн 75 проценчӗ чухлӗ, анчах пособин чи пысӑк виҫинчен ытла мар, тӳлӗҫ; унтан тепӗр виҫӗ уйӑх — 60 процент, анчах 5 пинрен ытла мар. Аса илтерер: ӗҫсӗррисене тӳлекен пособин чи пысӑк виҫи 8 пин тенкӗччӗ. Пӗлтӗрхи пуш уйӑхӗн 25-мӗшӗнче ӑна 1,5 хута яхӑн ӳстерме йышӑнчӗҫ. Ҫавна вӑхӑтлӑх тесе пӗлтернӗччӗ те, анчах кӑҫал та пӑрахӑҫламӗҫ. Ҫак кунсенче Раҫҫей премьер-министрӗ Михаил Мишустин ун пирки тивӗҫлӗ йышӑну тунӑ. Хыпар ҫӑлкуҫӗ:
|
|
Пӑтӑрмахсем
 "Про Город" сайтран илнӗ сӑн Паян Шупашкарти ҫӗнӗ кӑнтӑр районӗнчи арҫын виллине тупнӑ. Вӑл подъезд умӗнче выртнӑ. Кун пирки «Про Город» хаҫата халӑх корреспонденчӗ пӗлтернӗ. «Эпир патне пыман. Ахӑртнех, арҫыннӑн вилли. Унта йӗрке хуралҫисем ӗҫлетчӗҫ. Вилене илсе кайманччӗ-ха» - каласа кӑтартнӑ халӑх корреспонденчӗ. Вӑл 46 ҫулти арҫыннӑн вилли пулнӑ. Халӗ йӗрке хуралҫисем кун тӗлӗшпе тӗрӗслев ирттереҫҫӗ. Хыпар ҫӑлкуҫӗ:
|
|
Сывлӑх
 nypost.com сайтри сӑн Юлашки талӑкра республикӑра 93 ҫын кӑшӑлвируспа инфекциленнӗ. Юлашки кунсенче чирлекенсен йышӗ майӗпен чакса пырать. Анчах вилекенсем кашни кунах пур. Паян тепӗр 10 ҫыннӑн пурнӑҫӗ кӑшӑлвируса пула татӑлнине палӑртнӑ. Ку таранччен пӗтӗмпе 601 ҫын каварлӑ вируса пула вилнӗ. Паяхи кун тӗлне Чӑваш Енре 17090 ҫын инфекциленнӗ. Вӗсенчен 15406-шӗ сывалнӑ. Палӑртмалла: кӑрлач уйӑхӗнче кӑшӑлвирусран вилекенсем нумайланнӑ. Раштав уйӑхӗнче пӗр эрнере 47 ҫыннӑн пурнӑҫӗ татӑлнӑ пулсан 2021 ҫулӑн пӗрремӗш эрнинче – 73 ҫыннӑн. Хальхи вӑхӑтра республикӑра кӑшӑлвирус диагнозӗ лартнӑ 1086 ҫынна тухтӑрсем сӑнаса тӑраҫҫӗ. Хыпар ҫӑлкуҫӗ:
|
|
Чӑвашлӑх
 Сурхурине уявланӑ Кафе Тимӗр Тяпкин тата ыттисем йӗркелекен Сурхури уявне кӑҫал «Кафе»-ре палӑртнӑ. Ку уява чӑваш хастарӗсем ҫулсерен «Ҫӑлкуҫра» пухӑнса палӑртатчӗҫ. Кӑҫал вырӑнӗ улшӑнмарӗ, анчах кафе хӑйӗн ятне ҫухатни паллӑ пулчӗ. Енчен те малтан алӑк тӑрринче «Ҫӑлкуҫ» тесе ҫырни пурччӗ пулсан, халь вара «Кафе» тени ҫеҫ ҫутатса тӑрать. Кӑшӑлвирус алхаснӑран пухӑннисен йышӗ пысӑках пулмарӗ. Ҫапах та ҫӗнӗ ҫынсем те пулчӗҫ — ку вӑл Мальвина Петровӑна Олеся Руссакова. Вӗсем малтан наци телекуравӗнче ӗҫленӗччӗ, халь Чӑваш патшалӑх оперӑпа балет театрӗнче вӑй хураҫҫӗ. Унсӑр пуҫне уява кашни ҫул килекен Вера Афанасьева (Вера аппа) та ҫитнӗччӗ. Вӑл, 88 ҫула ҫитсе пырать пулин те, уява халӑх юррисемпе пуянлатрӗ, тӗрлӗ такмаксемпе савӑнтарчӗ. Сурхури уявне уҫма ку хутӗнче Праски Виттине шанса пачӗҫ. Кайран, йӑлана кӗнӗ тӑрӑх, «Алран кайми аки-сухине» юрларӗҫ. Уява пынисене мӑйӑрпа, килте пӗҫернӗ кукӑльпа, пӑрҫапа хӑналарӗҫ. Тимӗр Тяпкин ятарласа чӑваш апатне, шӳрпе, хатӗрленӗ. Кафе хуҫисем улшӑннӑ пулин те вӑл ку апатпа хӑналама май тупрӗ. Сӑмах май, тӑватӑ ҫул каялла, 2017 ҫулта, Сурхурие уявлама Олег Николаев та пынӑччӗ. |
|
Персона
 Паян, кӑрлач уйӑхӗн 7-мӗшӗнче, чӗлхеҫӗ, поэт, ҫыравҫӑ, куҫаруҫӑ, ЧР культурӑн тава тивӗҫлӗ ӗҫченӗ, филологи ӑслӑлӑхӗсен кандидачӗ, доцент Петр Яковлевич Яковлев пурнӑҫран уйрӑлнӑ. Литературӑра ӑна Петӗр Яккусен ятпа пӗлеҫҫӗ. Вӑл Чӑваш патшалӑх гуманитари ӑслӑлӑхӗсен институтӗнче ӑслӑлӑхӑн аслӑ ӗҫченӗ пулнӑ. Петӗр Яккусен 1950 ҫулхи ҫурла уйӑхӗн 26-мӗшӗнче Красноармейски районӗнчи Упаҫырми ялӗнче ҫуралнӑ. Мӑн Шетмӗ шкулӗнче вӗреннӗ, унтан И.Н.Ульянов ячӗллӗ ЧПУн историпе филологи факультетне кӗнӗ 1990 ҫулта филологи ӑслӑлӑхӗсен кандидачӗ пулса тӑнӑ, 1996 ҫулта – доцент. Вӑл куҫару ӗҫӗпе те тӑрӑшнӑ, ытларах – тӗн литератури енӗпе. Петр Яковлевич «Евангелия от Луки», «Четвероевангелия», «Библия для детей», «Новый Завет» тата ытти кӗнекене чӑвашла куҫарнӑ. Вӑл «Кумаляк», «Эснереш», «Тӑм тӑвайкки вӑййисем», «Уй варринче», «Юман чӗлхи» тата ытти кӗнеке авторӗ. Петр Яковлевпа кӑрлач уйӑхӗн 9-мӗшӗнче 9.30-10.30 сехетсенче Шупашкарта Республика пульницин асӑнмалли залра сывпуллашӗҫ. Хыпар ҫӑлкуҫӗ:
|
|
Сумлӑ сӑмах
Чӑвашлӑх
Редакцирен: Ку статьяна автор «ӑ», «ӗ», «ҫ», «ӳ» саспаллисемсӗр ярса пачӗ. Эпир вӗсене ҫеҫ юсаса тухрӑмӑр (хӑш-пӗр вырӑнта куҫа лекменни те пулма пултарать, тӳрех каҫару ыйтатпӑр). Стилистикине вара йӑлт авторӑнне хӑвартӑмӑр. Сӑмах май аса илтеретпӗр, ку — Тимӗр Акташӑн, пирӗн сайтра вырнаҫнисенчен, пӗрремӗш чӑвашла ҫырнӑ статья мар. Вӑл унччен те чӑвашла ҫырса парсаччӗ. Калаҫма та Тимӗр Акташ журналист чӑвашла йӗркеллех калаҫать. Пирӗнешкел, ачаранах чӑвашла ӳснисемпе танлаштарма ҫук-ха ӗнтӗ, анчах кунта чи пахи — вӑл чӑн та чӑвашла калаҫма тӑрӑшнинче, чӑваш чӗлхи мана кирлех мар тесе тӑманнинче (унашкал темиҫе ҫын пур: хӑйсем чӑвашлӑха тӗпчеҫҫӗ, чӑвашлӑхпа пурнӑҫне ҫыхӑнтарнӑ, анчах чӑвашла ниепле те вӗренесшӗн мар; Акташ вӗсен йышне, тем тесен те, кӗмест).
«...70 ҫул хушшинче хӑйӗн тӑван чӗлхине вӗренеймен Тимӗр Акташ», — ҫырать Юрий Яковлев «Ҫиелтинчен тарӑнӑша»... хӑйӗн статьяра Чӑваш халӑх сайтӗнче 2021-мӗш ҫулхи кӑрлач (январь) уйӑхӗн 3-мӗшӗнче. Ку масӑллӑ информаци хатӗрӗнче каланӑ шухӑш — тӗрӗс мар! |
|
Республикӑра
 fondrp.ru сайтри сӑн 4 ҫулти Кира Ҫӗнӗ ҫулта пукане ҫуртне парнелессе кӗтнӗ. Унӑн ӗмӗтне ЧР строительство министрӗ Александр Героев пурнӑҫланӑ. Ҫемьере 5 ача ӳсет – тӑватӑ арҫын ача тата пӗр хӗрача. Кира хӑйӗн ӗмӗтне «Ӗмӗтсен чӑрӑшӗ» сайтра ҫырса пӗлтернӗ. Чӑрӑш ҫинчи теттене строительство министрӗ Александр Героев уҫнӑ – Кирӑна Ҫӗнӗ ҫулпа пукане ҫуртне парнеленӗ. Министр ачан куҫӗ телейпе ҫиҫнине курса савӑннине пӗлтернӗ. «Ку чӑннипех те Ҫӗнӗ ҫулхи тӗлӗнтермӗш», - тенӗ вӑл. Палӑртмалла: «Ӗмӗтсен чӑрӑшӗ» акципе килӗшӳллӗн нумай ачаллӑ ҫемьенчи тата йывӑрлӑха лекнӗ ачасен ӗмӗчӗсене пурнӑҫлаҫҫӗ. Хыпар ҫӑлкуҫӗ:
|
|
Хулара
 "Про Город" сайтран илнӗ сӑн Ӗнер Шупашкарта вун-вун ҫурт ҫутӑсӑр тӑрса юлнӑ. Ҫынсем управляющи компанине шӑнкӑравласа ҫитеймен. Кӑрлач уйӑхӗн 5-мӗшӗнче 15 сехет те 30 минутра Эгер бульварӗнче, Хевеш урамӗнче тата Мир проспектӗнче пурӑнакансем ҫутӑсӑр юлнӑ. Урамра чарӑнусенчи информаци хӑмисем те, юпасем ҫинчи хунарсем те ӗҫлемен. Мӗн пулнӑ? Ку ыйту ҫутӑсӑр юлнӑ ҫынсене те пӑшӑрхантарнӑ. 17 сехетсенче майӗпен ҫуртсене ҫутӑ пама тытӑннӑ. Мӗн пулса иртни пирки хальлӗхе пӗлеймерӗмӗр. Хыпар ҫӑлкуҫӗ:
|
|
Сывлӑх
 businessman.ru сайтри сӑн Юлашки талӑкра республикӑра 92 ҫын кӑшӑлвируспа чирленӗ. Кунашкалли, 100 ҫынран сахалрах чирлени, тахҫантанпах пулман. Паянхи кун тӗлне 16997 ҫын кӑшӑлвируспа инфекциленнӗ. Вӗсенчен 15321-шӗ сывалнӑ. Шел те, каварлӑ вируса пула вилекенсем пулнӑ. Хальхинче 11 ҫыннӑн пурнӑҫӗ татӑлнӑ. Республикӑра ку таранччен 591 ҫын кӑшӑлвируса парӑнтарайман. Хальхи вӑхӑтра республикӑра кӑшӑлвирус диагнозӗ ҫирӗпленнӗ 1085 ҫынна тухтӑрсем сӑнаса тӑраҫҫӗ. Ӳпке шыҫҫипе аптӑракансем те пур. Хыпар ҫӑлкуҫӗ:
|
+26.3 °C
