Чӑваш Енре вӑрмансемпе усӑ курасси ҫинчен калакан республика саккунне улшӑнусем кӗртнӗ. Ку хыпара РФ Патшалӑх Думин депутачӗ Николай Малов Фейсбукра пӗлтернӗ. Саккун проектне Йӗпреҫ районӗнчи Депутатсен пухӑвӗн депутачӗсем хатӗрленӗ.

Ҫӗнӗ саккунта хӑш вӑрманти хӑрӑк турата пухмалли ҫинчен ҫынсене пӗлтермеллине палӑртнӑ. Хыпара Чӑваш Ен Ҫут ҫанталӑк ресурсӗсен тата экологи министерстви хӑйӗн сайтӗнче тата вӑрман хуҫалӑхӗсенчи стендсем ҫинче пӗлтерме тивӗҫ. Лесничийсен вырӑнти хӑй тытӑмлӑх органӗсене пӗлтермелле.

Аса илтерер: кӑҫалхи кӑрлач уйӑхӗн 1-мӗшӗ хыҫҫӑн вӑрмансенчи хӑрӑк турата ҫынсене пуҫтарма ирӗк пачӗҫ. Саккуна федераци шайӗнчех йышӑннӑ.

realnoevremya.ru сӑнӳкерчӗкӗ

Ӗнер, утӑ уйӑхӗн 13-мӗшӗнче, Раҫҫее чикӗ леш енче тӑрса юлнӑ ентешсене ятарлӑ рейспа илсе килнӗ. Хальхинче самолет Арабсен Пӗрлештернӗ Эмирачӗсенчен Хусана килсе ҫитнӗ. Йышра Чӑваш Енри ҫичӗ ҫын пулнӑ.

Дубай хулинчен Тутарстана вӗҫсе килнӗ самолетра Раҫҫей ҫыннисем 158-ӑн пулнӑ. Чӑваш Ен ҫыннисем пирки маларах каларӑмӑр та, вӗсен йышӗнче икӗ ача таврӑннӑ. Ентешӗмӗрсене Муркаш районӗнчи обсерватора ӑсатнӑ.

Паянхи куна чикӗ леш енче Чӑваш Ен ҫыннисем тата 233-ӗн тӑрса юлнӑ, ҫав шутра ҫул ҫитменнисем – 31. Ака уйӑхӗн 10-мӗшӗ хыҫҫӑн 179 ҫынна тӑван тӑрӑха таврӑнма пулӑшнӑ. АПШран, сӑмахран, 35 ҫын килсе ҫитнӗ, Индирен – 29, Таиландран – 16, Китайран – 9.

Иртсе кайнӑ талӑкра пирӗн республикӑра кӑшӑлвирус тата тепӗр ҫын пурнӑҫне татнӑ. Ҫапла вара COVID-19 47 ҫынна леш тӗнчене ӑсатнӑ. Ку вӑл – Чӑваш Ен Сывлӑх сыхлав министерстви пӗлтерекен официаллӑ цифрӑсем ӗнентерни тӑрӑх.

Паян, утӑ уйӑхӗн 14-мӗшӗнче, кӑшӑлвируспа пирӗн республикӑри тата 54 ҫын чирлине палӑртнӑ. «Стопкоронавирус.рф» сайтра хыпарланӑ тӑрӑх, эпидеми пуҫланнӑранпа кӑшӑлвирус диагнозне Чӑваш Енре 5940 ҫыннӑнне тупса палӑртнӑ.

Хальхи вӑхӑтра кӑшӑлвируспа 2665 ҫын чирлет. Вирус алхасма пуҫланӑранпа 3228 пациент сывалнӑ, юлашки талӑкра – 25-ӗн.

Пирӗн ҫӗршывра кӑшӑлвируса хирӗҫ икӗ йышши препарат шухӑшласа кӑларнӑ. Сӑмах май, вакцина тӗрӗслевне те иртереҫҫӗ.

Утӑ уйӑхӗн 15-мӗшӗ хыҫҫӑн Канашран Хусана, Хусантан Канаша электричка ҫӳреме пуҫлӗ. Асӑннӑ маршрута кӑшӑлвирус сарӑлнине пула йышӑннӑ чарусем вӑхӑтӗнче хупнӑччӗ. Халӗ лару-тӑру йӗркеленсе пырать тесе ӗнентереҫҫӗ, ҫавна май пӗр регионтан тепӗр региона ирӗклӗнех (Раҫҫей тӑрӑх ҫула тухма унччен те чарман-ха, анчах тепӗр ҫӗре ҫитсен икӗ эрне карантинта лартатчӗҫ) ҫӳреме ирӗк параҫҫӗ.

«Хусан-Канаш-Хусан» маршрутпа электричкӑсем ҫӳреме пуҫласси пирки «Содружество» пассажир компанийӗн пресс-служби пӗлтернӗ.

6351-мӗш номерлӗ пуйӑс Хусантан 4 сехет 7 минутра хускалӗ, Канаша 6 сехет те 63 минутра ҫитӗ. Канашран вӑл 17 сехет те 57 минутра тапранӗ, Хусана 21 сехетре ҫитсе чарӑнӗ.

Васкавлӑ пулӑшу паракан службӑн тухтӑрӗсене смс-ҫыру ярса чӗнсе илме пулать. Анчах ку пулӑшупа врача телефонпа чӗнсе илейменнисем ҫеҫ усӑ кураяҫҫӗ. Сӑмах хӑлха илтменнисемпе чӗлхесӗррисем пирки пырать.

Смс-ҫырура чирлӗ ҫыннӑн тулли адресне, хушаматне, тухтӑра мӗн сӑлтавпа чӗннине пӗлтермелле. Чир паллисене те кӑтартма ыйтаҫҫӗ. Ун пек тусан оперативлӑ пай ӗҫченне ҫӑмӑл пулӗ, мӗншӗн тесен хӑш бригадӑна чӗнсе илесси унран килет-ҫке.

Смс-ҫыру ямалли номере пур ҫынна каламаҫҫӗ. Ӑна социллӑ учрежденисем е ҫавӑн пек службӑсем хӑйсем пӑхса тӑракансене пӗлтереҫҫӗ.

Хӑлха илтменнисемпе чӗлхесӗррисем валли васкавлӑ пулӑшӑва унчченхилле йӗркепе те (васкавлӑ медицина пулӑшӑвӑн телефонӗпе шӑнкӑравласа) чӗнме май пур.

my.mail.ru сӑнӳкерчӗкӗ

Вырӑс драма театрӗнче пуҫлӑх пулса 12 ҫул ӗҫленӗ 72-ри Светлана Ермолаевӑна тава тивӗҫлӗ канӑва ӑсатнӑ. Ун вырӑнне Шупашкарти паллӑ режиссера Дмитрий Капустина пуҫлӑх тилхепине тыттарнӑ.

Капустина театр пуҫлӑхне лартасси ҫинчен калакан хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян, утӑ уйӑ уйӑхӗн 14-мӗшӗнче, алӑ пуснӑ.

Дмитрий Капустин уявсем йӗркелес енӗпе 20 ҫул ытла ӗҫленӗ. Чаплӑ банкетсем, фуршетсем, йышӑнусем йӗркелессипе те вӑл ӑста специалист. Питӗрте те сумлӑ мероприятисем пӗрре ҫеҫ мар йӗркеленӗ. Укҫана ирӗклӗн тӑкаклакан пуянсем валли те, «кӗмӗле» шутлама кӑмӑллакансем валли те режиссер тата сценарист пулса Дмитрий Капустин кӑсӑклӑ уявсем йӗркелеме пултарать.

Кӑшӑлвирус алхасма тытӑнсан чикӗ леш енчен килекенсене икӗ эрне карантинта лармалли хушу тухрӗ. Палӑртар: каярах пӗр регионтан тепӗр региона каякансен те ик эрне ниҫта тухмасӑр лармалла теме тытӑнчӗҫ. Ку йӗркене пурте пӑхӑннипе пӑхӑнманни пирки ҫирӗплетсе калаймӑпӑр-ха (вӑл урӑх тема тейӗпӗр). Халӗ вара ҫӗршыв шайӗнче ҫӗнӗ йышӑну кӑларнӑ.

Ют ҫӗршывран килекенсен хӑйсем кӑшӑлвируспа чирлеменнине е вӗсем чирлесе сывалнине ҫирӗплетекен справка пулмалла. Ӑна вӗсен чикӗ урлӑ каҫиччен виҫӗ кун маларах илмелле. Ун пек справка ҫуккисен чикӗ урлӑ каҫсан виҫӗ кунта анализ памалла. Чирлӗ пулсан килте сипленмелле, сывӑ ҫынсемпе ҫав вӑхӑтра хутшӑнма юрамӗ.

Ӗнер Ҫӗрпӳ хулинчи П. Иванов урамӗнчи 7-мӗш ҫуртра Олег Николаевӑн халӑх штабӗ уҫӑлнӑ. Ку хыпара Ҫӗрпӳ район администрацийӗн пуҫлӑхӗ Сергей Беккер Фейсбукра пӗлтернӗ.

Аса илтерер: кӑҫалхи авӑн уйӑхӗн 13-мӗшӗнче Чӑваш Ен Элтеперӗн суйлавӗ иртӗ. Республика ертӳҫин тивӗҫӗсене вӑхӑтлӑх пурнӑҫлакан Олег Николаев суйлава хутшӑнма хӑйӗн докуменчӗсене Чӑваш Ен Тӗп суйлав комиссине чи малтан тӑратрӗ. Унтан тата тепӗр тӑхӑр кандидат суйлава хутшӑнма кӑмӑл турӗ. Вӗсем те суйлав умӗнхи мероприятисене пуҫӑнчӗҫ: хӑйсен кадидатуришӗн сасӑ пухаҫҫӗ, хӑйсен партийӗсен районсенчи уйрӑмӗсен пайташӗсемпе тата Депутатсен пухӑвӗсен депутачӗсемпе тӗлпулусем ирттереҫҫӗ.

tverlife.ru сайтри сӑн

Ку талӑкра 56 ҫын кӑшӑлвируспа чирленӗ. Пӗтӗмпе ку таранччен 5886 ҫын инфекциленнӗ.

3205 ҫын кӑшӑлвируса парӑнтарнӑ, юлашки талӑкра 21 ҫын сывалнӑ. Ҫак куна илес тӗк, 2635 ҫын ҫак вирусран сипленет.

Ку таранччен 46 ҫын кӑшӑлвируса пула вилнӗ. Юлашки талӑкра пурнӑҫран уйрӑлнӑ тӗслӗх пулман.

Республикӑра кӑшӑлвирус сарӑлнин индексӗ 1-рен пӗчӗкрех. Халӗ ку хисеп 0,85-пе танлашнӑ. Чарусене пӑрахӑҫламалли иккӗмӗш тапхӑра кӗме ку кӑтарту 0,8-тан пысӑкрах пулмалла мар.

ШӖМ тунӑ сӑн

Шупашкарта пурӑнакан арҫын икӗ велосипед вӑрланӑ. Пӗрне вӑл хӗрне ҫуралнӑ кунпа парнеленӗ, теприне ломбарда панӑ.

Ҫак арҫын унччен те хваттер ҫаратнӑшӑн айӑпланнӑ. Хальхинче те ун тӗлӗшпе пуҫиле ӗҫ пуҫарнӑ.

Утӑ уйӑхӗн пуҫламӑшӗнче 37 ҫулти хӗрарӑм 8-мӗш хутра хваттер умӗнче хӑварнӑ велосипечӗ ҫухалнине пӗлтернӗ. Оперативлӑ шырав мероприятийӗсем ирттерсен ӑна 36-ри арҫын вӑрлани палӑрнӑ. Ӑна вӑл хӗрне ҫуралнӑ кунпа парнеленӗ.

Хайхи арҫын ҫав ҫуртрах тепӗр велосипед вӑрлани тӑрӑ шыв ҫине тухнӑ.