dneprovec.by сайтри сӑн

Шупашкарта пурӑнакан арҫын, тивӗҫлӗ канӑва тухнӑскер, Мари Эл вӑрманне ҫырла пуҫтарма кайсан ҫухалса кайнӑ. Вӑл Звенигово районӗнче пулнӑ, каялла тухма ҫул тупайман.

Иртнӗ канмалли кунсенче дежурнӑй пульчӗ ҫине ватӑ арҫын ҫухалса кайни пирки хыпар ҫитнӗ. Ӑна шырама Кокшайскри аварипе ҫӑлав ушкӑнӗ ҫула тухнӑ. Вӑхӑт питех нумай иртмен – Шупашкар арҫыннине ултӑ сехетрен тупнӑ. Вӑл хӑйне чиперех туйнӑ. Ӑна тухтӑрсен пулӑшӑвӗ кирлӗ пулман, киле йӗркеллех ҫитнӗ.

Аса илтерер: нумаях пулмасть Патӑрьел районӗнче тӑватӑ хӗрарӑм кӑмпана кайсан ҫухалса кайнӑ. Вӗсене шыраса тупнӑ.

Юрий Шакеев тунӑ сӑн

Паян Чӑваш Ене РФ премьер-министрӗ Михаил Мишустин вӗҫсе килнӗ. Вырӑнти оппозиционер Юрий Шакеев федераци шайӗнчи тӳре-шара хӑйне тимлӗх уйӑртӑр тесе машинисене Правительство ҫурчӗ умне килсе лартнӑ. ГАЗельсенчен пӗрин ҫине Шупашкар сити-менеджерӗ тӗлӗшпе ҫырни пур.

«Про Город» хаҫат Юрий Шакеевпа ҫыхӑнса вӑл ҫакна мӗншӗн тунипе кӑсӑкланнӑ. «Манӑн суйлавпа ҫыхӑннӑ пӑтӑрмахсене палӑртас килет. Вӑл иртнӗ чухне йӗркене пӑснӑ тӗслӗхсем пулнӑ. Ача пахчисемпе, шкулсемпе, Китай экспансийӗпе ҫыхӑннӑ ыйтусем те пур тата», - тенӗ оппозиционер.

13 сехет те 10 минутра Шакеевӑн машинисене ятарлӑ техникӑпа тата троспа ҫул ҫинчен илсе кайма хӑтланнӑ.

Cap.ru сӑнӳкерчӗкӗ

Чӑваш Енри икӗ фристайлҫӑна уйӑхсерен укҫа тӳлесе тӑрӗҫ. Стипендие тивӗҫнисем — Китайри Пекинта 2022 ҫулхи хӗлле иртекен XXIV Олимп вӑййине хутшӑнма Раҫҫей командине кӗмелли кандидатсем Дмитрий Мулендеев тата Лана Прусакова.

Ҫамрӑксене кӑҫалхи авӑн уйӑхӗн 1-мӗшнчен пуҫласа 2022 ҫулхи нарӑс уйӑхӗн 28-мӗшӗччен уйӑхсерен 30-шар пин тенкӗ стипенди тӳлесе тӑрӗҫ. Ҫапла хушӑва республика Элтеперӗ Олег Николаев паян алӑ пуснӑ. Шупашкарти олимп резервӗн 2-мӗш спорт шкулӗнче вӗренекен каччӑпа хӗре укҫа тӳлесе тӑрассишӗн Чӑваш Ен Спорт министерстви яваплӑ.

Ҫӗмӗрлере пурӑнакан арҫын лавкка хыҫӗнчи пахчара кантӑр ӳстернӗ. Наркотик хутӑшӗллӗ ӳсен-тӑран ҫитӗнтернӗрен ун тӗлӗшпе пуҫиле ӗҫ пуҫарнӑ.

Пахчара 45 тӗм кантӑр пулнӑ. Вӗсен тавралли ҫӗре пӑхсах тӑнӑ, ҫум ӳсмен. Палӑртмалла: 34 ҫулти арҫын лаптӑка тара илнӗ. Пӳлӗме тата ҫывӑхри территорие тӗрӗсленӗ хыҫҫӑн типӗтнӗ кантӑр та тупнӑ, ӑна та туртса илнӗ. Ӳсен-тӑрана тата туртмалли ятарлӑ хатӗре экспертизӑна янӑ.

Арҫынна тытса чарнӑ. Хӑй каланӑ тӑрӑх, вӑл кантӑра хӑйӗн валли ӳстернӗ. Вӑл медицина тӗрӗслевӗ витӗр тухма хирӗҫленӗ.

Инкеклӗ лару-тӑру министерстви тунӑ сӑн

Атӑл леш енче тата Улатӑр районӗнчи Первомайски вӑрман хуҫалӑхӗнче пушар алхаснӑ. Кун пирки Инкеклӗ лару-тӑру министерстви пӗлтерет.

Атӑл леш енче Октябрьски поселокӗ ҫывӑхӗнче вӑрманти ҫӗр ҫинчи сий ҫуннӑ. Улатӑр районӗнче те ҫавнашкалах пӑтӑрмах пулнӑ. Икӗ тӗслӗхре те пушар ҫулӑмпа асӑрханманран тухнӑ тесе шухӑшлаҫҫӗ.

Палӑртмалла: ҫулталӑк пуҫланнӑранпа Чӑваш Енре типӗ курӑк ҫуннӑ 133 тӗслӗхе шута илнӗ. Пӗтӗмпе 600 гектар ытла ҫуннӑ. Кунсӑр пуҫне ҫӳп-ҫапа ҫулӑм ярса илнӗ 250 тӗслӗх пулнӑ. Пур пушар та тенӗ пекех ҫын айӑпӗпе пулнӑ. Паянхи кун тӗлне типӗ курӑк ҫунтарнӑшӑн 170 яхӑн административлӑ ӗҫ пуҫарнӑ.

pln-pskov.ru сӑнӳкерчӗкӗ

Чӑваш Ен Элтеперӗ Олег Николаев 2020 ҫулхи утӑ уйӑхӗн 27-мӗшӗнче алӑ пуснӑ Хушӑва улшӑну кӗртнӗ. Ҫапла вара 65 ҫултан аслӑрах, ҫаплипех ӗҫе ҫӳрекен ҫынсем килте ларма пултарӗҫ. Уншӑн вӗсене укҫа тӳлӗҫ.

Килте лармалли вӑхӑта юпа уйӑхӗн 5-мӗшӗнчен пуҫласа 18-мӗшӗччен тата юпа уйӑхӗн 19-мӗшӗнчен пуҫласа чӳк уйӑхн 1-мӗшӗччен тесе палӑртнӑ. Чӑваш Ен Элтеперӗн пресс-службинче пӗлтернӗ тӑрӑх, кайран ҫаввӑхӑта тата тӑсма пултарӗҫ.

Ҫак йышӑнӑва ҫынсем тӗрлӗ вирус чирӗпе, ҫав шутра, паллах, кӑшӑлвируспа, ан чирлеччӗр тесе тунӑ.

frocush.livejournal.com сайтри сӑн

Патшалӑх запкупкисен порталӗнче К.В.Иванов ячӗллӗ Чӑваш патшалӑх драма театрӗн умне юсама аукцион иртесси пирки пӗлтернӗ. Палӑртмалла: вӑл – республика пӗлтерӗшлӗ культура еткерлӗхӗн палӑкӗ.

Аукциона хутшӑнасси пирки пӗр организаци ҫес заявка панӑ. Вӑл – «Дизайн» тулли мар яваплӑ общество. Организаци юсав ӗҫне 18 миллион та 94 пин те 170 тенкӗпе пурнӑҫлӗ. Реконструкцие 2021 ҫулхи ҫӗртмен 15-мӗшӗнче вӗҫлемелле.

Театр ҫуртне 1961 ҫулта ҫӗкленӗ. Вӑл – тӑватӑ хутлӑ, путвал та пур. Пӗтӗмпе – 2772 тӑваткал метр.

Паллӑ ҫыравҫӑ, Шупашаар районӗнчи Тойтерек (унччен Чуралькасси) ялӗнче ҫуралса ӳснӗ Иван Илларионов (Иван Мучи) ҫуралнӑранпа авӑнӑн 29-мӗшӗнче 125 ҫул ҫитрӗ. Ҫавна май Л.В. Пучков ячӗллӗ Чӑрӑшкасси шкулӗнче вӗренекенсем Иван Мучи ҫинчен чылай тӗпчесе пӗлнӗ, унӑн кун-ҫулӗнчи паллӑ самантсемпе ҫывӑхрах паллашнӑ.

Шкулта чӑваш чӗлхипе литературине вӗрентекен Алина Никооаева пӗлтернӗ тӑрӑх, Иван Мучин пурнӑҫӗпе, ӗҫӗ-хӗлӗпе паллашма ҫыравҫӑн хӗрӗ Людмила Ивановна Фомина ҫемье архивӗнчи материалӗсене шкула парнелени пысӑк пулӑшу кӳрет. Вӗренекенсем 1928-мӗш ҫулхи, 1930-1940-мӗш ҫулсенчи «Капкӑн» журналсемпе (пичет кӑларӑмне шӑпах Иван Мучи никӗсленӗ) кӑсӑклансах паллашнӑ, ҫемьен сӑн ӳкерчӗкӗсен альбомне пӑхса тӗлӗннӗ, хайлавӗсене вуласа тишкернӗ.

«Иван Ивановичӑн пурӗ 113 псевдоним пулнӑ, вӗсен шутӗнче Утик, Хӑймала, Мами, Сӑнакан, Илтекен, Куракан... Халӑхра ӑста сатирик Иван Мучи тенипе асра юлнӑ», – тесе хыпарлать Алина Николаева.

Сӑмах май, ӗнер Чӑваш Ен Наци вулавӑшӗнче сатирика асӑнса литература каҫӗ иртнӗ.

Нумаях пулмасть Республикӑри вӑрҫӑ ветеранӗсен клиника госпиталӗнчен 66 ҫулти хӗрарӑм сывалса тухнӑ. Вӑл ура ҫине тӑрасса тухтӑрсем малтанласа, тен, шанман та пулӗ. Апла пулин те вӗсем хӑйсен тивӗҫне тӳрӗ кӑмӑлпа тата таса чунпа пурнӑҫланӑ.

Республикӑн аякри районӗсенчен пӗринче пурӑнакан хӗрарӑм кӑшӑлвируспа чирленӗ. Унран та ытларах — сахӑр диабечӗ те пулнӑ унӑн, мӑнтӑр пирки те нушаланнӑ, чӗрепе юн тымарӗсен чирӗсем асаплантарнӑ. Хӗрарӑмӑн пневмоние пула ӳпки 100 проценчӗпе шыҫнӑ. Йывӑр чирлӗскере анестезиологипе реанимаци уйрӑмне вырттарнӑ. Унта уйӑх ытла сипленӗ. Хӗрарӑм пурнӑҫне ҫӑлса хӑварнӑ-хӑварнах.

Тухтӑрсем вируспа инфекци чирӗсенчен асӑрханма чӗнсе калаҫҫӗ.

Шупашкарти Пӗтӗм тӗнчери балет фестивальне кӑҫал юпа уйӑхӗнче ирттерессине пӗлтернӗччӗ-ха. Аса илтерер: ытти ҫулхине ӑна ҫуркунне йӗркеленӗ, кӑҫал кӑшӑлвируса пула май килмен.

Кӑҫалхи фестивале «Хуркайӑк ҫулӗ» балетпа уҫӗҫ. Унӑн либреттине пӗтӗм тӗнчери конкурссен дипломанчӗ, Чӑваш патшалӑх оперӑпа балет театрӗн балетмейстерӗ Данил Салимбаев чӑваш юмахӗсене тӗпе хурса ҫырнӑ. Музыкине хайлама Александр Галкин (ӑна «Аттила – халап ҫурални» балет тӑрӑх чылайӑшӗ пӗлет) композитора ыйтнӑ. Шӑпӑрлансенчен пуҫласа ваттисем таранах кӑсӑклантартӑр тесе хатӗрленӗ ӗҫри кӗвве «Аттила – халап ҫурални» балетран кӑшт ҫӑмӑлтарах ҫырма тӑрӑшнӑ. Ҫӗнӗ ӗҫ вӑрӑмах мар икӗ пайран (пӗрремӗшӗ — 40 минут, иккӗмӗшӗ — 35 минута яхӑн) тӑрӗ. Балетра наци кӗввипе те усӑ курнӑ.

Ҫӗнӗ ӗҫӗн балетмейстерӗ – Данил Салимбаев, художникӗ – Валентин Федоров, дирижерӗ – театрӑн илемлӗх ертӳҫи Дмитрий Банаев.