cap.ru сайтри сӑн

Ҫӗнӗ Шупашкарти 4-мӗш шкулта нумай ача апатпа наркӑмӑшланнӑ. Пульницӑна пулӑшу ыйтма 20 ҫын пынӑ, вӗсенчен 19-шӗ – ачасем.

Виҫҫӗшне инфекци уйрӑмне вырттарнӑ. Ыттисене медпулӑшу панӑ хыҫҫӑн киле сипленме янӑ. Пульницӑна пынӑ пӗтӗм ҫыннӑн пӗр пек чир паллисем пулнӑ: вӗсем апатпа ҫыхӑннӑ.

Прокуратура тата Следстви комитечӗн Чӑваш Енри Следстви управленийӗ тӗрӗслев пуҫарнӑ. Ҫакӑ паллӑ: ҫак шкулта апатланӑва йӗркелекенни – Шупашкарти 2-мӗш ҫӑкӑр савучӗ.

Алина Петрова страницинчен илнӗ сӑнӳкерчӗк

Элӗк тӑрӑхӗнчи Чӑваш Сурӑм шкулӗнче Ҫеҫпӗл Мишши ҫуралнӑранпа 125 ҫул ҫитнине «Кӑвар чӗреллӗ сӑвӑҫ» литература каҫӗ ирттернӗ. Кун пирки Алина Петрова вӗрентекен халӑх тетелӗнчи хӑйӗн страницинче пӗлтернӗ.

Ҫеҫпӗл пурнӑҫӗпе тата пултарулӑхӗпе тӗплӗнрех паллашас тӗллевлӗ уяв каҫӗнче ачасем кӑвар чӗреллӗ Ҫеҫпӗлӗн ҫулӑмлӑ сӑввисене тӑрӑшса вуланӑ. Унӑн пурнӑҫӗн хӑш-пӗр тапхӑрӗсене тӗпе хурса инсценировка та лартса панӑ.

«Ҫамрӑк ӑру – пирӗн пуласлӑх. Ҫамрӑксен ӑс-тӑнӗнче сӑмах ӳнерӗ пулӑшнипе ырӑлӑх, сӑпайлӑх, ҫынлӑх туйӑмӗсене ҫирӗплетесси – пирӗн тивӗҫ», — ҫапларах пӗтӗмлетет литература каҫне йӗркеленӗ вӗрентекен.

"Контактри" сӑн

«Раҫҫей мисӗ», Чӑваш Енре ҫуралса ӳснӗ Валентина Алексеева, хальхи вӑхӑтра Мексикӑра Раҫҫей чысне хӳтӗлет.

Шупашкарта ҫуралнӑ хӗр Мексикӑна 6 чӑматан парне илсе кайнӑ. Вӑл конкурса хутшӑнакансене толстовка парнеленӗ. Ун ҫинче – чӑваш эрешӗллӗ вырӑс матрюшки. Ун ҫинчех Анне палӑкӗ курӑнать.

Илем конкурсне хутшӑнӑкансем Валентинӑн парнисене хаваспах йышӑннӑ.

Леонид Черкесовӑн страницинчен илнӗ сӑнӳкерчӗк

Федерацин травматологи, ортопеди тата эндопротезировани центрӗн тӗп врачӗ Николай Николаев «Раҫҫӗй Федерацийӗн тава тивӗҫлӗ врачӗ» ята тивӗҫнӗ.

Николай Станиславович асӑннӑ центр уҫӑлнӑранпах ӑна ӑнӑҫлӑ ертсе пырать. Общество пурнӑҫне те хастар хутшӑнать.

ШӖМ тунӑ сӑн

Чӑваш Енре «Ӳсӗр водитель» рейд ирттерме палӑртнӑ. Вӑл

чӳк уйӑхӗн 15-17-мӗшӗсенче иртӗ. Ҫул-йӗр инспекторӗсем ытларах транспорт нумай ҫӳрекен вырӑнсенче пулӗҫ. Водительсене чарса вӗсем эрех-сӑра ӗҫнипе ӗҫменнине тӗрӗслӗҫ.

Сӑмах май, ҪҪХПИ инспекторӗсем кунашкал рейдсене тӑтӑшах ирттереҫҫӗ.

Лариса Мышева страницинчен илнӗ сӑнӳкерчӗк

Шупашкарти Уруков урамӗнче вырнаҫнӑ Патшалӑх истори архивӗнче «Минуты счастья в четыре руки» курав уҫӑлнӑ.

Унӑн авторӗсем — пултаруллӑ та ҫамрӑк Мария Евишева тата ӑна пулӑшса пыракан художникӗ-живописҫи, педагогӗ, Ҫӗнӗ Шупашкарти Ӳнер музейӗн ӑслӑлӑх ӗҫченӗ Наталия Нагорнова.

Куравра Машӑн тӗрлӗ техникӑпа тата стильпе пурнӑҫланӑ ӗҫӗсен коллекцийӗпе паллашма пулать.

Архив директорӗ Галина Ертмакова хӗрачана пулӑшса пынӑшӑн Наталия Юрьевнӑпа Владимир Порфирьевич Нагорновсене тав тунӑ.

Сусӑр ачасене пулӑшса пыракансене ырласа ыттисем те сӑмах каланӑ.

«Хочу в Чувашию» каналтаюи видеоран илнӗ сӑнӳкерчӗк

Шупашкарти аэропорт хитреленнӗҫемӗн хитреленсе пырать. Ҫавна ҫак йӗркесен авторӗ те асӑрхарӗ. Ҫурла уйӑхӗнче аэропорт патне пымалли тротуарсене те сарманччӗ пулсан, халӗ ҫав ӗҫе вӗҫленӗ.

Аэровокзалта пассажирсене самолёт кӗтсе лармалли хӑтлӑ зонӑсем, кафе, касса тата япала упрамалли камерӑсем, багажа автомат мелпе йышӑнмалли тунӑ. Ачаллисем валли уйрӑм пӳлӗм пур.

"Контактри" сӑн

Пӗрремӗш канал Чӑваш Енре «Народный ледниковый» проектӑн ҫӗнӗ сезонӗ валли сюжет ӳкерет. Вӑл – федераци каналӗ валли пӑрлӑ шоу йӗркелекен паллӑ Илья Аврбухпа пӗрле.

Раҫҫейӗн тава тивӗҫлӗ спорт мастерӗ, Олимп вӑййисен призерӗ, Европа тата тӗнче чемпионӗ Илья Авербух Шупашкара килнӗ. Сюжете Шупашкарти «Ҫӗнӗ хула» микрорайонта нумаях пулмасть уҫӑлнӑ «Пӑрлӑ Аренӑра» ӳкерӗҫ.

"Контактри" сӑн

Чӳк уйӑхӗн 17-мӗшӗнче «Россия-Культура» канала яма ан манӑр. 12 сехет те 20 минутра пуҫланакан «Неизведанные маршруты России» кӑларӑма пӑхмалла.

Унта ертӳҫӗ Чӑваш Енпе паллаштарӗ, чей ӗҫмелли йӑла-йӗркене кӑтартӗ, Хӗл мучипе тӗл пулӗ, тракторпа ярӑнӗ. Ҫавӑн пекех хӑйне евӗр процедурӑсем кӗтеҫҫӗ ӑна: йӗппе тирсе сипленни, вакра шыва кӗни…

Чи вӑрттӑнни вара – халӑх хушшинче анлӑ сарӑлнӑ кӗпере кӑтартни.

Татьяна Вашуркина страницинчен илнӗ сӑнӳкерчӗк

Чӑваш Енӗн Наци вулавӑшӗн директорӗ Роза Лизакова тата Республикӑри ача-пӑчапа ҫамрӑксен вулавӑшӗн директорӗ Татьяна Вашуркина Питӗрте иртекен канашлӑва хутшӑнаҫҫӗ. Унта федерацин тата регионсенчи тӗп библиотекӑсен директорӗсен ҫулсерен иртекен канашлӑвне хутшӑнаҫҫӗ.

Вӗсем Хӗллехи керменти иккӗмӗш Николай патшан библиотекинче пулнӑ. Халӗ унта Патшалӑх Эрмитажӗн ӑслӑлӑх вулавӑшӗн вырӑс уйрӑмӗ вырнаҫнӑ.