cap.ru сӑнӳкерчӗкӗ

Шупашкар районӗнчи «Чурачикское» акционерсен обществи асӑннӑ муниципалитетри пысӑк ял хуҫалӑх предприятийӗсенчен пӗри. Халӗ унта 510 пуҫ пӑру вырнаҫмалӑх тепӗр корпус уҫнӑ. Ҫӗнӗ инвестици проектне хуҫалӑх 80 миллион тенкӗ укҫа хывнӑ.

Ӳлӗмрен выльӑх-чӗрлӗх комплексне тата анлӑлатасшӑн-пысӑклатасшӑн. Тепӗр 750 пуҫлӑх вите тума пуҫланӑ, пуррисене вара юсаса ҫӗнетеҫҫӗ. Унсӑр пуҫне 1000-шер ӗне вырнаҫмалӑх тепӗр икӗ корпус хута яма ӗмӗтленеҫҫӗ.

Хуҫалӑхра республика Элтеперӗ Олег Николаев пулса курнӑ.

Ҫулла вӗҫлениччен К.В. Иванов ячӗллӗ Чӑваш патшалӑх академи драма театрӗнче «Последняя попытка» (чӑв. «Юлашки шанчӑк») камит кӑтартӗҫ. Ӑна ҫурла уйӑхӗн 29-мӗшӗнче курма пулать.

Спектакле Михаил Задорновӑн пьеси тӑрӑх хатӗрленӗ. Сцена ҫинче – «юрату виҫкӗтеслӗхӗ». Мӑшӑр пӗрлешнӗренпе 20 ҫул ҫитнине паллӑ тума хатӗрленет. Кӗтмен ҫӗртен ҫамрӑк хитре хӗрарӑм шока кӗртсе ӳкерекен хыпарпа кӗрсе тӑрать.

Мӗн пӗлтерет вӑл? Спектакле кайса курсан пӗлетӗр.

Уҫӑ ҫӑлкуҫсенчи сӑн.

ЮТВ телеканал йӑлана кӗнӗ премие курма йыхравлать. Вӑл хӑйӗн кураканӗсене К.В. Иванов ячӗллӗ Чӑваш патшалӑх академи драма театрӗҫче кӗтет. Мероприяти кӑҫал унта ҫурла уйӑхӗн 28-мӗшӗнче иртӗ.

Уяв каҫне Алина Выйгетовӑпа Данила Ленский, Александра Голубевӑпа Александр Белов ертсе пырӗҫ. Палӑртмалла: ҫак мероприяти ҫулталӑкра пӗрре иртет. Унта чӑваш эстрада артисчӗсем хӗрлӗ кавир тӑрӑх утӗҫ, хӑйсен пултарулӑхӗпе савӑнтарӗҫ. Ҫавӑн пекех ҫулталӑк юрӑҫисене, шоуменне, шоувуменне палӑртӗҫ. Кунсӑр пуҫне кӑҫалхи чи чаплӑ юрра, чи пултаруллӑ дуета суйлӗҫ.

cap.ru сӑнӳкерчӗкӗ

Красноармейски округӗнчи Мӑн Шетмӗ ялӗнче тӗпленнӗ Власовсем ылтӑн туйне паллӑ тунӑ.

Вӗсем иккӗшӗ те «Мичуринец» колхозра ӗҫленӗ. Галина Васильевна тӗп агроном пулнӑ, Николай Иванович – механизатор. Мӑшӑр виҫӗ ача ҫуратса ӳстернӗ. Халӗ 7 мӑнукпа, 2 кӗҫӗн мӑнукпа савӑнса пурӑнаҫҫӗ. Власовсем халӗ те хастар, общество ӗҫӗсене хутшӑнаҫҫӗ.

Ҫемье ҫирӗплӗхӗ мӗнре-ха? Вӑрттӑнлӑха уҫнӑ вӗсем: пӗр-пӗрне юратма, хисеплеме, пулӑшма, каҫарма пӗлнинче.

Артём Павлетич архивӗнчи сӑнсӑн

Кӳкеҫре ҫӗнӗрен те ҫӗнӗ муралсем ӳкереҫҫӗ. Поселока халӗ тепӗр ӳкерчӗк илемлетет. Вӑл ача-пӑча темипе ҫыхӑннӑ.

Мурала Совет урамӗнчи 86/1-мӗш ҫурт стени ҫине ӳкернӗ. Ҫак илем аякранах курӑнать.

Ӳнерҫи – Сергей Петров. Эскиз дизайнӗ – графика дизайнерӗн Артём Павлетичӑн.

Чӑваш Енӗн ШӖМӗн сӑнӳкерчӗкӗ

Шӑмӑршӑ районӗнчи пӗр ялта пурӑнакан 55 ҫулти лесник вӑрман каснӑ.

Полицие трактор рулӗ умӗнче пулнӑ ҫынна тата трактор ҫинчи пассажирсене илсе пынӑ. Вӗсен йывӑҫ касма документсем пулман.

Арҫын 17 чӗрӗ тата хӑрнӑ 1 йывӑҫа касма хушнӑ. Ҫапла вӑл ҫутҫанталӑка ҫур миллиона яхӑн тенкӗлӗх тӑкак кӳнӗ.

Халӗ вӑрманҫӑ тӗлӗшпе пуҫиле ӗҫ пуҫарнӑ. Йывӑҫ каснӑшӑн унччен ӑна икӗ хутчен явап тыттарнӑ, анчах ӑна пӗрех вӑрманта ӗҫлеме чарман.

Муркаш районӗнчи прокуратура ачасем валли чарӑну тума хистенӗ.

Калайкассинчи вӑтам шкул умӗнче автобус кӗтсе тӑма ятарлӑ вырӑн пулман. Юр-ҫумӑр ҫунӑ чухне автобус кӗтсе тӑма пушшех те япӑх.

Прокуратура шкул умӗнче чарӑну туса пама хистенине кура халӗ район администрацийӗ ӑна вырнаҫтарнӑ.

Чӑваш Республикин ВКри хӑйӗн пабликӗнче вырнаҫтарнӑ сӑнӳкерчӗк

Паян, ҫурла уйӑхӗн 26-мӗшӗнче, паллӑ ентешӗмӗр, спортсмен, Олимпиада Иванова, 55 ҫул тултарнӑ.

Олимпиада Владимировна 1970 ҫулхи ҫурла уйӑхӗн 26-мӗшӗнче Ҫӗрпӳ районӗнчи Мӑнҫут ялӗнче ҫуралнӑ. Шупашкарта Ардалион Игнатьев ячӗллӗ спорт шкулӗнче, И.Я. Яковлев ячӗллӗ Чӑваш патшалӑх педагогика институтӗнче физвоспитани факультетӗнче вӗреннӗ.

Спортри утӑма вӑл Шупашкарта уҫӑлнӑ спорт профилӗллӗ шкул-интерната (халӗ вӑл вӗренӳ заведенийӗ Шупашкарти Олимп резервӗллӗ училище шутланать) вӗренме кӗнинчен пуҫланӑ. Йӗлтӗрпе чупма юратнӑ пулин те ҫӑмӑл атлетика секцине лекнӗ, унта ӑна хӑвӑрт утассине хӑнӑхма, ҫав енӗпе тӑрӑшма сӗннӗ. Икӗ эрне тренировка ирттернӗ хыҫҫӑнах вӑл республика чемпионки пулса тӑнӑ. Унтан Раҫҫейри ӑмӑртусенче ҫӗнтернӗ. Кайран XXVIII XXVIII Ҫуллахи олимп вӑййинче кӗмӗл призер пулса танӑ, унсӑр пуҫне вӑл — тӗнче чемпионики тата рекордсменки.

dzen.ru сайтри сӑн

Чӑваш Енре пилотсӑр вӗҫекен аппарат тапӑннине сӑн тата видео ӳкерме чарӗҫ. Ку йышӑнӑва оперштаб ларӑвӗнче тунӑ.

Инкеклӗ лару-тӑру министерстви ӑнлантарнӑ тӑрӑх, беспилотник тапӑннине, ӑна персе антарнине, вӑл ӳксен мӗн пулнине сӑн тата видео ӳкерме, ҫакна тӗнчен тетелне кӑларма юрамасть. Ҫакна информаци тӑшман патне ан ҫиттӗр тесе тӑваҫҫӗ.

Йӗркене пӑсакансене административлӑ майпа явап тыттарӗҫ. Чи пысӑк штраф виҫи 300 пин тенкӗпе танлашать.

forum.na-svyazi.ru сӑнӳкерчӗкӗ

Пӑрачкавра та Вилӗмсӗр ҫулӑм ҫунма пуҫланӑ. Ӑна Тӑван ҫӗршывӑн аслӑ вӑҫинче пуҫ хунисене асра тытса лартнӑ мемориалта авӑн уйӑхӗн 23-мӗшӗнче чӗртнӗ.

Вӑрҫа ҫав тӑрӑхри 8 519 ҫын тухса кайнӑ, 5 230-шӗ каялла таврӑнайман.

Мемориала 1967 ҫултах уҫнӑ. Ӑна газификацилеме халӗ 83 метр тӑршшӗ газ пӑрӑхӗ хунӑ.

Вилӗмсӗр ҫулӑм пирӗн республикӑра ҫапла вара 13 ҫӗрте ҫунать: Шупашкарти «Ҫӗнтерӳ» мемориал паркӗнче тата 1-мӗш масар ҫинчи тӑванла вил тӑпри ҫинче, Канашра, Кӳкеҫре, Ҫӗрпӳре, Патӑрьелте, Красноармейскинче, Шӑмӑршӑра, Етӗрнере, Куславкка районӗнче уҫнӑ Сӑр чиккине чавнисене асра тытса уҫна мемориалта, Шупашкар районӗнчи Урай Макаҫра.