Кӑрлач уйӑхӗн 2010 ҫултанпа чи сивӗ уйӑх пулӗ. Ыран термометр 0 градусран ӑшӑрах кӑтартӗ, ҫил-тӑман тухӗ.

Юнкун хӗвел тухӗ, ҫил лӑпланӗ, кӑнтӑрла 2-7 градус сивӗ пулӗ. Нарӑс юрлӑ ҫанталӑкран пуҫланӗ. Эрнекун те вӑл чарӑнмӗ. Термометр 0 градус патнелле кӑтартӗ.

Нарӑсӑн 3-4-мӗшӗсенче пӗлӗтсем сирӗлӗҫ, вырӑнӑн-вырӑнӑн кӑна юр ҫӑвӗ. Урамра 5-10 градус сивӗ пулӗ.

"Чеб.ру" сайтри сӑн

Шупашкарти 10-мӗш шкулта вӗрентекен 46 ҫулти хӗрарӑм икӗ класа ҫунтарса яма тӑнӑ. Анчах ӗҫне вӗҫлемелле хуралҫӑ чӑрмантарнӑ. Ку хыпар паян тӗрлӗ телеграм-каналта сарӑлнӑ.

Ҫак хӗрарӑмах ашшӗ-амӑшӗн чатне Раҫҫей Хӗҫ-пӑшаллӑ вӑйӗсене дескридитаци тӑвакан видео янӑ. Видеона пӑхсан ҫакӑ паллӑ: хӗрарӑм ҫыхӑнуллӑ калаҫмасть, усал сӑмахсемпе пӗркелешет, ӑнланмалла мар сӑвӑсем вулать. Юлашкинчен Украинӑна мухтакан сӑмахсем калать.

Вӗрентекен тытса чарнӑ.

21.мвд.рф сӑнӳкерчӗкӗ

Шупашкар хулинче пурӑнакан 18 ҫулти ҫамрӑксене ҫын машинине хускатса кайнӑшӑн тытса чарнӑ.

Кӑрлач уйӑхӗн 23-мӗшӗнче пакунлисенчен 23 ҫулти ҫамрӑк пулӑшу ыйтнӑ. Вӑл хӑйӗн «Лада Приора» автомобильне такамсем вӑрланине пӗлтернӗ. Машинӑна вӑл Хӗвеллӗ микрорайонта лартса хӑварнӑ иккен. Кайран машинӑна тепӗр урамра асӑрханӑ.

Асӑннӑ машинӑна 18 ҫулти икӗ ҫамрӑк хускатса кайнӑ. Алӑкне питӗрмен машинӑра вӗсем малтан музыка итленӗ, кайран автомобиле хускатса район тӑрӑх ярӑнса ҫӳренӗ. Унтан автомобиле Лаврентий Таллеров урамӗнче лартса хӑварнӑ.

Каччӑсен тӗлӗшпе пуҫиле ӗҫ пуҫарнӑ.

bfm74.ru сӑнӳкерчӗкӗ

Улатӑр хулинче пурӑнакан хӗрарӑм каллех улталаннӑ. Малтанхинче вӑл газ уҫлакан предприятие инвестици хывас тесе ултавҫӑсен капкӑнне ҫакланнӑ, хальхинче хӑйӗн патне банк ӗҫченӗ тесе шӑнкӑравланӑ этеме ӗненнӗ.

53-ри хӗрарӑм пакунлисене каласа кӑтартнӑ тӑрӑх, ун патне палламан ҫын шӑнкӑравланӑ, хӑйӗнпе банк ӗҫченӗ тесе паллаштарнӑ. Вӑл ӑна такамсем ун ячӗпе 199 пин тенкӗ кредит илесшӗн тесе тыттарнӑ. Укҫана «хӑрушсӑр» счет ҫине куҫарма ыйтнӑ. Каланине итленӗ хӗрарӑм. Тепӗр кунне вӑл тата тепӗр 78 пин тенкӗ куҫарса панӑ. Ҫапла майпа вӑл икӗ кунта 277 пин тенкӗсӗр тӑрса та юлнӑ.

Росстат сайтӗнчи сӑн

2024 ҫулхи кӑрлач уйӑхӗн 1-мӗшӗ тӗлне пирӗн республикӑра 1 млн та 167 пин те 362 ҫын пурӑннине палӑрнӑ. Ҫапла пӗлтерет Росстат.

Халӑх йышӗ чакнӑ. Чӑваш Енре ҫакӑн чухлӗ ҫын иртнӗ ӗмӗрӗн 60-мӗш ҫулӗсенче пурӑннӑ. Ведомство пӗлтерне тӑрӑх, кӑрлачӑн 1-мӗшӗ тӗлне хулара 753 пин те 313 ҫын пурӑнни паллӑ, ялта - 414 пин те 49 ҫын.

Палӑртмалла: 2022 ҫулхи кӑрлачӑн 1-мӗшӗ тӗлне республикӑра 1 млн та 183 пин те 908 ҫын пурӑннӑ.

cv.m.wikipedia.org сӑнӳкерчӗкӗ

Кӑрлач уйӑхӗн 27-мӗшӗнче Лавентий Таллеров (1929-2013) чӑваш ҫыравҫи ҫуралнӑранпа 95 ҫитнӗ.

Вӑл Комсомольски районӗнчи Нӗркеч ялӗнче ҫуралнӑ. Комсомольски районӗнчи «Октябрь ялавӗ» хаҫатра, «Коммунизм ялавӗ» хаҫатра, «Тӑван Атӑл» журналта ӗҫленӗ, Чӑвашрадио корреспонденчӗ пулнӑ.

Лаврентий Таллеров — паллӑ прозаик, очеркист, публицист, куҫаруҫӑ. Иртнӗ ӗмӗрӗн 60-70-мӗш ҫулӗсенчи поэзине вӑл истори темине халалланӑ.

21.мвд.рф видеовӗнчен илнӗ сӑнӳкерчӗк

Чӗмпӗр хулинче пурӑнакан, Шупашкарти аслӑ шкулсенчен пӗринче вӗренекен пике килне каникула кайма билет илес тесе укҫасӑр тӑрса юлнӑ.

Пӗрремӗш курсра вӗренекенсер билет туянса хурас тенӗ. Ҫула май лартса каякансен сервисӗнчи пӗр каҫӑпа иртсе унта банк реквизичӗсене кӑтартнӑ. Кӗҫех хӗрӗн картти ҫинчен 10 пин тенкӗ ытла укҫа ҫухалнӑ та.

Хӑй улталаннине ӑнланса илнӗ хыҫҫӑн хӗр йӗрке хуралҫисенчен пулӑшу ыйтнӑ.

culture.cap.ru сӑнӳкерчӗкӗ

К.В. Иванов ячӗллӗ Чӑваш патшалӑха кадеми драма театрӗ кӑрлач уйӑхӗн 27-мӗшӗнче Александр Островскийӗн «Хӑв пурӑнас килнӗ пек ан пурӑн» драмӑна кӑтартрӗ. Ку вӑл ытахальтен мар. Шӑпах ҫав кун, 106 ҫул каялла, ҫав спектакльпе уҫӑлнӑ та чӑваш театрӗ.

Ӑна Иоаким Максимов-Кошкинский Хусанта пуҫарса янӑ. Вырӑс классикӗн пьесине пуҫласа чӑвашла лартнӑ. Спектакле Хӗрарӑмсен медицина институтӗнче кӑтартнӑ. Чӑваш АССРне туса хунӑ хыҫҫӑ театра Шупашкара куҫарса килнӗ.

Халӗ чӑваш театрӗнче кӑтартакан Александр Островский пьесине Наталия Сергеева режиссёр лартнӑ.

drama21.ru сӑнӳкерчӗкӗ

Мускаври теар критикӗсем шупашкара килӗҫ. Вӗсем Чӑваш патшалӑх академи драма театрӗн тӑватӑ спектакльне хаклӗҫ.

Нарӑс уйӑхӗн пуҫламӑшӗнче пирӗн тӑрӑхра Раҫҫейри театр ӳнерӗн институчӗн — ГИТИСӑн икӗ театровечӗ пулӗ.

Чӑваш театрӗнче пӗлтернӗ тӑрӑх, асӑннӑ аслӑ шкулпа 1940 ҫултанпах ҫыхӑну ытаҫҫӗ. Ҫав ҫулхине ГИТИС ҫумӗнче чӑваш театрӗн студине йӗркеленӗ, 1947 тата 1961 ҫулсенче унтан чӑваш театрӗ валли актёрсем вӗренсе тухнӑ.

Хальхинче Шупашкара искусствоведени кандидачӗ, Константин Райкинӑн театр шкулӗн доценчӗ Екатерина Морозова тата драматург тата режиссёр, театр лабораторийӗсемпе фестивалӗсен кураторӗ Александр Вислов килӗҫ.

«Ҫӗршывӑн тӗп хулинчен кунта килекен кашни театр критикӗ пирӗншӗн пӗлтерӗшлӗ. Кирек мӗнле театра та ырӑ критика кирлӗ, унсӑр аталанаймастӑн», — тенӗ Чӑваш академи драма театрӗн директорӗ Елена Николаева.

"Про Город" сайтӗнчи сӑн

Ҫак самантра Шупашкарти Ленин Комсомолӗн урамӗнчи 40-мӗш ҫуртра, 1-мӗш корпусра, пушар тухнӑ. Ҫӑлавҫӑсем вырӑна ҫитнӗ.

Ҫурт - 9 хутлӑ, панельтен тунӑскер. Халӑх корреспонденчӗ «Про Город» хаҫата пӗлтернӗ тӑрӑх, ҫӑра тӗтӗм подъезд чӳречисенчен тухать.