Ҫӗнӗ Шупашкарти больницӑна ҫӗҫӗпе суранланса пӗтнӗ хӗрарӑма илсе ҫитернӗ. Унӑн хырӑмӗ тӗлӗнче ултӑ хутчен ҫӗҫӗпе чикни паллӑ пулнӑ. Пысӑк юн тымарӗ суранланнӑран юн шала кайнӑ.

Больницӑна илсе ҫитериччен хӗрарӑм 1 литра яхӑн юн ҫухатнӑ. Унӑн пурнӑҫӗ хӑрушлӑхра пулнӑ. Ӑна тӳрех операци тунӑ. Вӑл питӗ кӑткӑс пулнӑ: шалти органсем суранланнӑ, хӗрарӑма ҫӑлма вӑхӑт сахал юлнӑ.

Операци ӑнӑҫлӑ иртнӗ. Пациент икӗ кун реанимацире выртнӑ. Ҫав тапхӑрта та тухтӑрсем унӑн пурнӑҫӗшӗн кӗрешнӗ. 10 кунран хӗрарӑма киле янӑ.

Паян хитре те уяр ҫанталӑк тӑрать. Анчах, синоптиксем пӗлтернӗ тӑрӑх, пирӗн пата циклон ҫывхарать. Кӗҫӗр каллех ҫил-тӑман вӑйлӑ вӗҫтерӗ.

Ҫил-тӑман Шупашкарта ҫурҫӗр иртни 2 сехетре тухӗ. Ыранта чарӑнмӗ. Ирхине, кӑнтӑрлаччен, ҫил вӑйланӗ, ҫеккунтра 18-23 метр хӑвӑртлӑхпа вӗрӗ. Ҫӗрле 10-15 градус сивӗ тӑрӗ, ыран вара термометр 0 градус кӑтартӗ.

Эрнекун каҫхине ҫил-тӑман лӑпланӗ. Шӑматкун каллех юр ҫӑвӗ. Ҫил лӑпланӗ, 1-3 градус кӑна сивӗ пулӗ. Шӑматкун ҫӗрле юр ҫума чарӑнӗ. Тунтикун валли юр хулӑнӑшӗ ҫур метра ҫитме пултарать.

cap.ru сӑнӳкерчӗкӗ

Ҫӗрпӳ муниципаллӑ округӗнчи Сӑнав поселокӗнче пурӑнакан Нина Иванова кӑрлачӑн 17-мӗшӗнче 100 ҫул тултарнӑ.

Нина Николаевна пысӑк ҫемьере ҫуралнӑ, чи кӗҫӗнни пулнӑ. Вӑрҫӑ пуҫланнӑ чух вӑл шкулта вӗреннӗ, 10-мӗш класс хыҫҫӑн Электроаппарат савутӗнче ӗҫлеме пуҫланӑ. Хӗр канмалли кунсемсӗр икӗ сменӑпа тӑрӑшнӑ. Апат йӗркеллӗ ҫименнипе тӑтӑшах чирленӗ пулсан та вӑл пӗтӗм вӑйран ӗҫленӗ, Ҫӗнтерӳ пирки ӗмӗтленнӗ.

Вӑрҫӑ хыҫҫӑн Нина Ял хуҫалӑх институтӗнче вӗреннӗ, пӗр курсри Николай Иванова качча тухнӑ. Иккӗшӗ те зоотехник пулнӑ. Вӗсем икӗ ача ҫуратнӑ, пӗрле чылай ҫул пурӑннӑ.

www.banki.ru сӑнӳкерчӗкӗ

Кӑрлач уйӑхӗн 13-мӗшӗнче кредит учрежденийӗсенчен пӗринче ӗҫлекен 54 ҫулти кассир патне палламан ҫын шӑнкӑравланӑ.

Хӑйӗнпе вӑл Тӗп банк ӗҫченӗ тесе паллаштарнӑ. Ӑна вӑл Патшалӑх пулӑшӑвӗсен порталӗнчи уйрӑм пӳлӗмне ватнӑ, кредит илме хӑтланаҫҫӗ тесе ӗнентернӗ.

Хӗрарӑм йӗрке хуралҫисем патне шӑнкӑравланӑ. Унтисем ӑна ултавҫӑсем тесе хуравланӑ. Апла пулин те кассир ют ҫынпа ҫыхӑну тытма пӑрахман, 150 пин тенкӗ кредит илсе куҫарса панӑ.

Чӑваш Енӗн Наци вулавӑшӗн сӑнӳкерчӗкӗ

Кӑрлач уйӑхӗн 18-мӗшӗнче Чӑваш Енӗн Наци вулавӑшӗнче Николай Максимов ҫыравҫӑн тата журналистӑн 80 ҫулхине уявлама пултарулӑх каҫне пуҫтарӑнӗҫ.

Николай Николаевич – паллӑ прозаик, журналист, куҫаруҫӑ, Чӑваш Республикин культурӑн тава тивӗҫлӗ ӗҫченӗ. Вӑл – хальхи вӑхӑтри чӑваш литературинчи ятлӑ-сумлӑ авторсенчен пӗри. Николай Максимов чӑвашла та, вырӑсла та пӗр пек ӑста калӑплать. Авторӑн уйрӑмах паллӑ кӗнекисем: «Майра патша парни», «Шурӑ акӑш ҫулӗ», «Пӗр хӗрес айӗнче», «Спасение Европы», «Дар императрицы», «Камаево поле» тата ыттисем.

chrio.rchuv.ru сӑнӳкерчӗкӗ

Кӑрлач уйӑхӗн 16-мӗшӗнче чӑваш чӗлхи учебникӗсен авторӗ Галина Абрамова чӗри тапма чарӑннӑ. Галина Васильевна 60 ҫулта пулнӑ.

Галина Абрамова (Андреева) Галина 1963 ҫулхи ҫӗртме уйӑхӗн 10-мӗшӗнче Канаш районӗнче ҫуралнӑ. Чӑваш патшалӑх университетӗнче, Чӑваш педагогика институтӗнче (халӗ – университет) вӗреннӗ, аспирантурӑра та пӗлӳ илнӗ. Шупашкарти 59-мӗш вӑтам шкулта ӗҫленӗ. Вӑл – вырӑс шкулӗсенче чӑваш чӗлхине вӗрентмелли вӗренӳпе меслетлӗх ӗҫӗсен, электрон пособисен авторӗ.

Чӑваш Енри Писательсен союзӗ халӑх тетелӗнче вырнаҫтарнӑ сӑнӳкерчӗк

Чӑваш Енӗн Наци вулавӑшӗнчи «Варкӑш» литература клубӗн ҫитес эрнери ларӑвӗнче Александр Трофимов пултарулӑхӗпе ҫывӑхрах паллашма палӑртнӑ. Лару вулавӑшра кӑрлач уйӑхӗн 26-мӗшӗнче 18 сехетре пуҫланӗ.

Ҫыравҫӑ Хӗрлӗ Чутай районӗнчи (халӗ – муниципаллӑ округ) Турхан ялӗнче кӑрлач уйӑхӗн 10-мӗшӗнче ҫуралнӑ. И.Я. Яковлев ячӗллӗ пединститутран вӗренсе тухса Архангельск облаҫне хут комбинатне хӑпартма тухса кайнӑ. Хӗрлӗ Чутай районӗнчи шкулсенче учитель, завуч, директор пулса тӑрӑшнӑ. Унӑн хайлавӗсем район тата республика хаҫачӗсенче паян та пичетленеҫҫӗ.

cap.ru сайтри сӑн

Инновацисене пурнӑҫа кӗртме пулӑшакан фонд «Умник» грант конкурсне пӗтӗмлетнӗ. Ҫӗнтерӳҫӗсен йышне виҫӗ ҫамрӑк ӑсчах кӗнӗ. Вӗсем хӑйсен проектне пурнӑҫлама 500-шер пин тенкӗ илӗҫ.

Ҫӗнтерӳҫӗсен йышӗнче – Любовь Юманова, Федор Хлебников тата Ефим Воробьев. Вӗсем И.Н.Ульянов ячӗллӗ ЧПУра, Шупашкарти политехника институтӗнче вӗренеҫҫӗ.

Сӑмах май, унччен Федор Хлебников тата Ефим Воробьев ҫак фондӑн «Студентсен стартапӗ» гранта тивӗҫнӗ. Вӗсем 2022 ҫулта тепӗр ҫамрӑк ӑсчахпа пӗрле проекта аталантарма 1 миллион тенке тивӗҫнӗ.

forum.na-svyazi.ru сайтри сӑн

Кӗҫӗр вӑйлӑ ҫил Шупашкарти Богдан Хмельницкий урамӗнчи 57-мӗш «а» ҫуртӑн тӑррине сӳсе пӑрахнӑ. Унта – лавккасем, кафе, парикмахерски… Ҫурт самаях сиенленнӗ. Тӑррине ҫил сӳнӗрен мачча та курӑнать.

Кӗҫӗр ҫил-тӑман, ҫил вӑйлах алхаснӑ «Чӑваш Енри ҫанталӑк» проект авторӗ Владимир Михайлов пӗлтернӗ тӑрӑх, ҫӗрле Шупашкарта ҫил ҫеккунтра 20 метр хӑвӑртлӑхпа вӗрнӗ. Паян ҫил лӑпланнӑ. Эрнекун ирхине вара вӑл каллех вӑйланӗ, ҫеккунтра 20-22 метр хӑвӑртлӑхпа та вӗрме пултарӗ.

forum.na-svyazi.ru сайтри сӑн ӳкерчӗк

Пӗлтӗр республикӑри Ҫырла фестивалӗ пӗрремӗш хут иртнӗ. Ӑна кӑҫал та йӗркелеме палӑртнӑ. Кунӗ те паллӑ: утӑ уйӑхӗн 20-мӗшӗ. Вырӑнӗ ҫавах: Шупашкар муниципаллӑ округӗнчи «Ивушка» питомник.

Аса илтерер: пӗлтӗр Ҫырла фестивалӗ Питравра, утӑ уйӑхӗн 12-мӗшӗнче иртнӗ. Кӑҫал ӑна канмалли кун йӗркелеме палӑртнӑ.