«СОУР» тулли мар яваплӑ обществӑн тӗп директорӗ тӗлӗшпе пуҫиле ӗҫ пуҫланӑ. Следстви шухӑшӗпе, Владимир Ермолаев 2014 ҫулхи авӑн уйӑхӗнчен пуҫласа пӗлтӗрхи раштавччен ҫынсен тупӑшӗн налукне куҫарса паман. Пӗтӗмпе — 139 миллион тенкӗ.

Следстви комитечӗн Чӑваш Енри следстви управленийӗ пӗлтернӗ тӑрӑх, пуҫлӑх налука вӑхӑтра тӳлемен. Куншӑн 200–500 пин тенкӗ штраф тӳлеттерме, 5 ҫул ӗҫлеттерме (кунсӑр пуҫне хӑш-пӗр должноҫе 3 ҫул йышӑнма юрамӗ) е ирӗкрен 6 ҫуллӑха хӑтарма пултараҫҫӗ.

Шупашкарта суд унччен ЧР спорт министрӗн ҫумӗ пулнӑ Борис Атамановӑн аппеляцине пӑхса тухнӑ. Аса илтерер: кӑҫал ҫулла чиновник руль умне ӳсӗрле ларнине кура ӑна йӗрке хуралҫисем тытса чарнӑ. Борис Атаманов тытса чарнӑ чухне хӑй айӑплӑ маррине пӗлтернӗ.

Анчах суд унӑн сӑмахӗсемпе килӗшмен. Унччен Атаманова 100 пин тенкӗлех штрафланӑ тата водитель правине туртса илнӗ. Экс-чиновник кунпа килӗшмесер суда аппеляци панӑ.

Суд ҫӑхава ҫур сехетре пӑхса тухнӑ. Суд Борис Атаманов майлӑ пулман. Экс-чиновник судья приговор вуласса кӗтмен – залран тухса утнӑ.

Юлашки вӑхӑтра «Чӑваш бройлерӗнче» лару-тӑру ҫивӗчленни пирки калаҫаҫҫӗ. Предприяти суд урлӑ панкрута тухма хӑтланнӑ.

Суд чӳк уйӑхӗн 10-мӗшӗнче пулнӑ. Тавӑҫ тӑратаканӗ – «Ваша марка» тулли мар яваплӑ общество. Вӑл «Чӑвашбройлерне» панкрута кӑларма ыйтнӑ. Анчах суд тавӑҫа тивӗҫтермен.

Чӳк уйӑхӗн 23-мӗшӗнче «Чӑвашбройлерӗн» акцийӗсене приватизацилес енӗпе электронлӑ майпа аукцион иртӗ. Заявкӑсене чӳк уйӑхӗн 17-мӗшӗнче 12 сехет ҫурӑра регистрацилеме чарӑнӗҫ.

2017 ҫулта Республика кунӗ хӑш районта иртесси паллӑ. Ҫитес ҫул ӑна Шупашкарта тата Пӑрачкав районӗнче йӗркелӗҫ.

Муниципалитет районсенчи тата хула округӗсенчи конкурсра кам ҫӗнтернине чӳк уйӑхӗн 10-мӗшӗнче палӑртнӑ. Унта Пӑрачкав районӗ ҫӗнтернӗ.

Халӗ Республика кунӗнче ирттермелли мероприятисен планне хатӗрлеҫҫӗ. Пӑрачкав районӗ Чӑваш Ен Элтеперӗн грантне тивӗҫӗ. Ку укҫапа общество инфратытӑмне аталантарӗҫ.

Сӑмах май, Республика кунне уявламашкӑн республика хыснинчен 10 миллион тенкӗ уйӑрма палӑртнӑ.

Пӑрачкаври ветеринара Африка мурӗ пуррине вӑхӑтра пӗлтермешӗн суд тенкелӗ ҫине лартнине унччен пӗлтернӗччӗ. Ку ӗҫре тепӗр айӑплине тупнӑ. Улатӑр районӗнчи Междуречье ялӗнчи ветеринари участокӗн заведующийне те явап тыттарасшӑн.

Следстви шухӑшӗпе, 57 ҫулти Александр Вялов сыснасем Африка мурӗнчен вилнине пуҫлӑхсене пӗлтермен. Ҫурла уйӑхӗн 6-14-мӗшӗсенче Сӑрҫи Майданӗ ялӗнче тӑватӑ сысна Африка мурӗнчен вилнӗ. Вӗсене сипленӗ ветеринар кун пирки пуҫлӑхсене пӗлтермен, сысна виллисене тӗрӗслеттерме илсе кайман. Хуҫисем вара вилесене тимӗр контейнера хурса ял хӗррине илсе тухнӑ.

Кун пирки Улатӑр районӗн администрацийӗ ирттерӗ канашлура (унта шӑпах Африка мурне сарӑлма парас марри ҫинчен калаҫнӑ) ҫеҫ пӗлнӗ.

Халӑх туслӑхӗн ҫурчӗ кунта вырнаҫӗ

Авӑн уйӑхӗн 10-мӗшӗнче Шупашкарта республикӑра пурӑнакан халӑхсен сьезчӗ иртрӗ. Унта Чӑваш Енри тӳре-шарапа пӗрлех «В мире животных» телекӑларӑма ертсе пынипе палӑрнӑ Николай Дроздов та хутшӑннӑччӗ. Асӑннӑ мероприятире Чӑваш Енре пурӑнакансен ассамблейине йӗркеленӗччӗ. Ӑна ертсе пыма Лев Куракова шаннӑччӗ.

Сьезд иртнӗ хыҫҫӑн икӗ уйӑхран ассамблея киллӗ пулса тӑнӑ. Ӑна Социаллӑ университетӑн филиалӗ вырнаҫнӑ ҫурта пама йышӑннӑ. Шупашкарти Хусанкай урамӗнчи 20-мӗш ҫуртра вырнаҫнӑскере Лев Кураков ҫывӑх вӑхӑтра хӑтлӑх кӗртесшӗн.

Ҫак кунсенче Мускавра Еврази халӑхӗсен ассамблейине йӗркеленӗ. Пирӗн республикӑри ассамблея унта чи малтан кӗнӗ. Лев Кураков Мускавра иртнӗ Раҫҫейри тата Евразири халӑхсен пӗрремӗш форумне хутшӑннӑ май мероприяти пирки кӗнеке те пичетлесшӗн.

ШӖМ ҫурчӗ

Чӑваш Енре йӗрке хуралҫине пуҫласа тава тивӗҫлӗ ят панӑ. Ку чыса ЧР ШӖМӗн полицин оперативлӑ ӗҫӗ енӗпе тимлекен пуҫлӑхӗн ҫумӗ Александр Николаев тивӗҫнӗ. Ӑна «Чӑваш Республикин шалти ӗҫсен органӗн тава тивӗҫлӗ ӗҫченӗ» хисеплӗ ят парасси пирки Михаил Игнатьев Элтепер 161-мӗш номерлӗ хушу кӑларнӑ. Кун пек награда Чӑваш Енре унччен пулман, ӑна юпа уйӑхӗн 20-мӗшӗнче иртнӗ Чӑваш Патшалӑх Канашӗн сессийӗнче ҫирӗплетнӗ.

Шалти ӗҫсен органӗнче ӗҫлекенсем паян хӑйсен професси уявне паллӑ тӑваҫҫӗ те, ҫак тытӑмри ытти хӑш-пӗр ҫынна та республика наградисемпе чыслама йышӑннӑ. Отставкӑри Михаил Киселев генерал-майора тата отставкӑри Андрей Тимофеев полковника «Чӑваш Республики умӗнчи тава тивӗҫлӗ ӗҫсемшӗн» орден, ШӖМӗн муниципалитетсем хушшинчи Ҫӗмӗрлери пайӗн пуҫлӑхне Сергей Тарасова асӑннӑ орденӑн медалӗпе чыслассине каланӑ. ШӖМӗн муниципалитетсем хушшинчи Комсомольскинчи пайӗн пуҫлӑхӗ Геннадий Кокшин Чӑваш Енӗн Хисеп грамотиллӗ пулӗ. Элтепер хушӑвӗпе чыслама йышӑннисем хушшинче тата ытти хӑш-пӗр йӗрке хуралҫи те пур.

Чӑваш Енре миграци йӗркине пӑснӑ тепӗр тӗслӗхе тупса палӑртнӑ. Кун пирки РФ ШӖМӗн Чӑваш Енри пресс-служби пӗлтерет.

Автобус Ташкента Чӑваш Ен урлӑ кайнӑ. Ӑна ҪҪХПИ ӗҫченӗсем тӗрӗслемешкӗн чарнӑ. Салонра Узбекистанри 50 ҫын пулнӑ. Вӗсенчен тӑххӑрӗшӗн Раҫҫейре пулма юрамасть — срок тухнӑ.

Йӗркене пӑснӑ ҫынсен тӗлӗшпе протоколсем ҫырнӑ. Кашнине 2-шер пин тенкӗ тӳлеттерме йышӑннӑ. Кунсӑр пуҫне вӗсен Раҫҫее хальлӗхе килме юрамӗ.

Полици ӗҫченӗсен кунӗ умӗн РФ ШӖМӗ ачасен «Манӑн атте-анне полицире ӗҫлет» сӑнӳкерчӗксен конкурсне ирттерет. Шӑпӑрлансем хӑйсен ӗҫӗсенче аслисем ӑҫта ӗҫленине уҫса кӑтартма тӑрӑшнӑ.

Чӑваш Енре «Полицейские — ырӑ сӑмах» видеосаламсен клнкурсне ирттерме шухӑшланӑ. Чи лайӑх ӗҫсене Чӑваш патшалӑх оперӑпа балет театрӗнче кӑтартӗҫ.

Жюри ачасен 30 ытла ӗҫне пӑхса тухнӑ. Чи пӗчӗкки — 4 ҫулта. Дарья Николаева ӗҫне «Атте — командировкӑра» ят панӑ. Муркашри шкулта вӗренекенскер виҫҫӗмӗш вырӑн йышӑннӑ. Шупашкарти 48-мӗш шкулта ӑс пухакан Валерия Архипова «Полици пире сыхлать» ӗҫӗпе иккӗмӗш вырӑна тухнӑ.

Ҫӗнтерӳҫӗ — Шупашкарти 4-мӗш гимназире вӗренекен Анастасия Свеклова. Вӑл ӗҫне «Анне патӗнче ӗҫре» ят панӑ. Малти вырӑнсене тухнӑ ӗҫсем Раҫҫей шайӗнче иртекен финала хутшӑнӗҫ.

Чӳк уйӑхӗн 8-мӗшӗнче 9 уйӑхра комӑра выртнӑ Ксения Максимова вилнӗ. Аса илтерер: вӑл кӑҫалхи кӑрлач уйӑхӗнче ӑмӑртура йӗлтӗрпе чупнӑ чухне хӑйне япӑх туйнӑ. Тухтӑрсем унӑн пуҫ мими вилнине палӑртнӑ. Амӑшӗ ӑна ку таранччен пӗр шит уйрӑлмасӑр пӑхса тӑнӑ.

Ксюша 14-ра ҫеҫ пулнӑ. Тухтӑрсен диагнозӗ приговор пекех янӑранӑ: нимӗн те тума пулмасть, Ксюшӑн пуҫ мими вилнӗ. Ӑна ятарлӑ аппаратпа сывлаттарнӑ. Амӑшӗ пӗрех парӑнман. Вӑл ӑна 10 уйӑх пӑхса пурӑннӑ. Шел те, Ксюша куҫне уҫман.

Ксюша Етӗрне районӗнчи Урпаш ялӗнче ҫуралнӑ. Унти шкулта вӗреннӗ. Амӑшӗ Ирина хӗрӗн пурнӑҫне ҫӑлас тесе тем тума та хатӗрччӗ. Анчах шел, пӳрмен Ксюшӑна пурӑнма…