Ӗнер Чӑваш Енӗн Элтеперӗ Михаил Игнатьев пресс-конференци ирттернине Чӑваш халӑх сайчӗ пӗлтернӗччӗ-ха. Унта пулнисем каланӑ тӑрӑх, журналистсем тем пирки те ыйтма ӑнтӑлнӑ: ача ҫураласлӑх шайӗ мӗншӗн чакнине ӑнланасшӑн пулнӑ, ӗҫ укҫин виҫи пӗчӗкки пирки ыйту хускатнӑ, Элтеперӗн сывлӑхӗпе кӑсӑкланнӑ.

Журналистсенчен пӗри Шупашкарти аэропорта тӗнче уҫлӑхне ҫӗкленнӗ ҫӗршыври виҫҫӗмӗш летчик-космонавт, легендарлӑ ентешӗмӗр Андриян Николаев ятне парас ыйтӑва хускатнӑ. Михаил Игнатьев ку шухӑша ырласа та, хурласа та йышӑнман. Республика ертӳҫи шухӑшланӑ тӑрӑх, ыйтӑва татса париччен халӑхпа сӳтсе явмалла.

Маларах Чӑваш халӑх сайчӗ Шупашкарти аэропорт кӑҫалхи чӳк уйӑхӗнче амбулифт туянассине пӗлтернӗччӗ.

#пресс-конференцисем, #аэропорт, #Шупашкар, #Элтепер