Ҫӗмӗрле хулинче пурӑнакан Ольга Яфаркина 103-мӗш хутчен ҫуралнӑ кунне паллӑ тунӑ. Хӑй вӑл Тутар Республикинче ҫуралнӑ, йышлӑ хресчен ҫемйинче ҫитӗннӗ. Ашшӗне кулак тесе айӑпласан ссылкӑна ӑсатнӑ. Кун хыҫҫӑн хӗрачана Ҫӗмӗрлери тӑванӗсем илсе кайнӑ. Ольга темиҫе ҫултан каялла тӑван тӑрӑхнех таврӑннӑ.

1937 ҫулта вӑл ялти каччӑпа ҫемье ҫавӑрнӑ. Вӗсен икӗ хӗр ҫуралнӑ. Мӑшӑрне вӑрҫа илсе кайнӑ, унта вӑл йывӑр аманнӑ, ҫапах, телее, киле таврӑннӑ. Каярахпа ҫемье Ҫӗмӗрле хулине пурӑнма куҫнӑ.

Ольга Яфаркинӑна сумлӑ ҫуралнӑ кунпа саламламашкӑн тӳре-шара ҫитнӗ.

Чӑваш Енре 57 ҫулти арҫынна шыраҫҫӗ. Вӑл иртнӗ кӗҫнерникун ҫухалнӑ.

Арҫын хӗрлӗ тӗслӗ «Фольксваген» микроавтобус рулӗ умӗнче пулнӑ. ЧР ШӖМӗ Виталий Сергеевич Барсуков, 1960 ҫулта ҫуралнӑскер, ӑҫта ҫухалнине тӗпчет.

Ҫӗртме уйӑхӗн 29-мӗшӗнче вӑл хӑйӗн машинине ларнӑ та Ҫӗмӗрле районӗнчи пӗр ялтан тухса кайнӑ. Вӑл ӑҫталла ҫул тытни паллӑ мар. Машинӑн патшалӑх номерӗ - Е248КО 21rus.

Хӑй 55 ҫулти пек курӑнать, 170 сантиметр ҫӳллӗш, ҫӳҫӗ ҫырӑ тӗслӗ. Барсуков тӗттӗм кӑвак кӗпе тӑхӑннӑ пулнӑ. Ӑна курсан 02 номерпе шӑнкӑравлама ыйтаҫҫӗ.

Тӑвай районӗнче 45 ҫулти хӗрарӑма амӑшӗн правинчен хӑтарнӑ. Анча вӑл хӑйӗн йӑнӑшне ӑнланса илнӗ, тӳрӗ ҫул ҫине тӑнӑ. Ҫавна май каярахпа унӑн правине тавӑрнӑ.

Ӑна амӑшӗн правинчен 2016 ҫулхи юпа уйӑхӗнче хӑтарнӑ. Вӑл 5, 6 тата 13 ҫулсенчи ачисене пӑхман, кил-ҫуртра пуҫтарман, апат пӗҫермен, кӗпе-йӗм ҫуман. Кунсӑр пуҫне икӗ ачине шкула кайма хатӗрлемен. Пӗррехинче амӑшӗ ачисене килте хӑварса тухса кайнӑ, икӗ эрне ҫухалса ҫӳренӗ. Килте вара шыв та пулман.

Ачасене приюта илсе кайсан ҫеҫ хӗрарӑм киле таврӑннӑ. Суда вӑл пыман, ун чухне ӑна амӑшӗн правинчен хӑтарнӑ. Анчах йӑнӑшне ӑнланнӑ хӗрарӑм ӗҫе вырнаҫнӑ, ачасене тумтир илсе панӑ, вӗсен сывлӑхӗпе кӑсӑкланнӑ. Кун хыҫҫӑн ӑна амӑшӗн правине тавӑрса панӑ.

Муркаш районӗнче Ҫамрӑксен кунне хӑйне евӗрлӗ паллӑ тунӑ. Кун пирки Муркаш район администрацийӗн порталӗнче пӗлтернӗ.

Муркашсем Ҫамрӑксен кунне ҫӗртме уйӑхӗн 30-мӗшӗнче паллӑ тунӑ. Унта темиҫе интерактивлӑ лапам ӗҫленӗ: ачасем, арҫынсем тата хӗрарӑмсем валли. Хӗрсем туй кӗпипе тухни уйрӑмах асра юлнӑ.

Кӗпесене Муркашри туй кӗпи салонӗ панӑ. Хӗрсем лапама 1951 ҫулта кӑларнӑ «Москвичпа» ҫитнӗ. Ку машина Эдуард Терентьевӑн.

Муркаш хӗрӗсем куракансене чӑннипех те тӗлӗнтернӗ. Ара, унашкал чиперккесене, туй кӗпи тӑхӑннӑскерсене, ӑҫта курма май пултӑр тата?

Пӑрачкаври ача ҫурчӗн директорӗн ҫумӗ 200 пин тенкӗ преми илнӗ. Анчах ку укҫапа вӑл нумаях савӑнса пурӑнайман – ун тӗлӗшпе пуҫиле ӗҫ пуҫарнӑ.

Следстви версийӗ тӑрӑх, пӗлтӗрхи раштав уйӑхӗн 19-мӗшӗнче тата 23-мӗшӗнче вӑл, директор тивӗҫне пурнӑҫланӑскер, хӑйне преми парасси пирки хушу кӑларнӑ. Ҫапла майпа унӑн кӗсйине 200 пин тенкӗ ытла кӗнӗ. Вӑл унпа хӑйне кирлӗ пек усӑ курнӑ.

Директор ҫумӗ ача ҫуртне тӑкак кӳнӗ. Ӗҫ вырӑнӗпе усӑ курса укҫа-тенке тӑкакланӑшӑн ун тӗлӗшпе пуҫиле ӗҫ пуҫарнӑ. Халӗ ӑна малалла тӗпчеҫҫӗ.____

Шупашкар районӗнчи Ӑстакасси ҫывӑхӗнче срокран тухнӑ эмел купине тупнине сайтра унччен пӗлтернӗччӗ. Аса илтерер: купана кӑмпаҫӑсем вӑрманта ӑнсӑртран асӑрханӑ. Вӑл – ял ҫывӑхӗнчех. Унта вара ачасем выляҫҫӗ. Инҫех мар ӗнесем ҫӳреҫҫӗ. Эмелсем ачасене илӗртме пултарнӑ-ҫке-ха. Шӑпӑрлансем ӑна ҫӑвара хыпнӑ пулсан ку мӗнпе вӗҫленнине калама та хӑрушӑ.

ЧР Сывлӑх сыхлавӗн официаллӑ даннӑйӗсене ӗненес тӗк, 1,5 тонна эмел Чӑваш Енри складра упранма пултарайман. Эппин, вӗсене урӑх регионтан килсе тӑкнӑ.

Специалистсен пӗтӗмлетӗвӗ вара лӑплантармасть: эмелсем ҫыншӑн вилмелле хӑрушлӑх кӑларса тӑратнӑ. Вӗсене тӗп тума йышӑннӑ. Ку ӗҫе «Экология» НПО ООО производство базинче пурнӑҫланӑ.

Пӑрачкав районӗнче Республика кунӗнче йывӑҫ скульптурӑсем лартнӑ. Ку яла илем кӳнӗ. Анчах ҫак кунсенче икӗ скульптура ҫухалнӑ.

Ӑҫта кайса кӗнӗ-ха вӑл? Пӑрачкавра йывӑҫран кӳлепесем касса кӑларакан ӑстасен хушшинче конкурс иртнӗ. Вӗсенчен кашни 7 пин тенке яхӑн кайса ларнӑ. Пӗри ҫухалнине вырӑнти ҫынсем асӑрханӑ. Евгений Акимовпа Александр Иванов ӑстасен кӳлепи ҫухалнӑ-мӗн. Ӑна тӳрех тупнӑ. «Йытӑ тата кушак» скульптурӑна 55-ри тата 50 ҫулти хӗрарӑмсем вӑрланӑ иккен.

Тепӗр скульптура та «ураланнӑ». Ӑна халӗ те тупайман. Ку тӗлӗшпе тӗрӗслев пырать.

Утӑ уйӑхӗн 1-мӗшӗнче Чӑваш Енре вӑйлӑ ҫумӑр ҫунӑ, аслати кӗмсӗртетнӗ.

Ҫав кун Шупашкарти кӳлмекре кимӗ ҫаврӑнса ӳкнӗ. Юрать, унти пилӗк ҫын шар курман. Вӑрнар районӗнче вара икӗ ӗне вилнӗ. Вӑйлӑ ҫил алхаснӑ хушӑра йывӑҫ турачӗсем электричество пралукӗ ҫине таяннӑ, ҫавна май пралук ӳкнӗ. Шӑпах ҫавӑн чухне ӗнесене киле хӑваланӑ. Пралук икӗ ӗне ҫине ӳкнӗ.

Чӑваш Енри ГКЧС вӑйлӑ ҫил алхаснӑ чухне электричество пралукӗнчен инҫерех тӑма хушать. Ҫавӑн пекех реклама щичӗсенчен, ҫӳллӗ ҫӗрте ӗҫлемелли строительство техникинчен инҫерех пулмалла.

Шупашкар районӗнчи Кӑшавӑш ял тӑрӑхӗн пуҫлӑхӗ

Чӑваш Енри пӑхаттир-пуҫлӑх Шупашкар районӗнчи Кӑшавӑш ял тӑрӑхне ертсе пырать.

Паян Шупашкар районӗнчи Станьялӗнче Муниципалитет пӗрлешӗвӗн служащийӗн тата пуҫлӑхӗн X кунӗ иртнӗ. Унта республикӑри тӗрлӗ тӳре-шара, Михаил Игнатьев Элтепер хутшӑннӑ.

Виҫӗ енлӗ спорт ӑмӑртӑвӗнче Шупашкар районӗнчи Кӑшавӑш ял тӑрӑхӗн пуҫлӑхӗ Сергей Мульдияров пӗрремӗш вырӑн йышӑнса «Пӑхаттир-пуҫлӑх» номинацире палӑрнӑ, иккӗмӗш вырӑнта – Тӑвай районӗнчи Йӑнтӑрччӑ ял тӑрӑхӗнчи Анатолий Семенов, виҫҫӗмӗшӗнче – Йӗпреҫ районӗнчи Кӗлӗмкасси ял тӑрӑхӗнчи Денис Денисов.

Утӑ чи вӑйлӑ ҫулакан пуҫлӑх — Хӗрлӗ Чутай район администрацине ертсе пыракан Александр Башкиров, иккӗмӗшӗнче — Шупашкар район администрацийӗн пуҫлӑхӗн тивӗҫне пурнӑҫлакан Владимир Димитриев, виҫҫӗмӗшӗнче — Йӗпреҫ район администрацийӗн пуҫлӑхӗ Сергей Горбунов.

Шупашкар районӗнчи Ӑстакасси ялӗ ҫывӑхӗнчи вӑрманта кӑмпаҫӑсем эмел купи тупнине ӗнер Чӑваш халӑх сайчӗ .Тӗлӗнмелле эмел купи вырӑнне паян Чӑваш Енӗн Сывлӑх сыхлав министерствин специалисчӗсем ҫитсе тӗрӗсленӗ.

Ҫак ведомствӑн сайтӗнче ҫырнӑ тӑрӑх, вӑрманта пӗр производителӗн икӗ йышши эмелне тупнӑ. «Ун чухлӗ эмел пульницӑсенче те, фармацевтсен склачӗсенче упранма пултарайман», — пӗлтернӗ Сывлӑх сыхлав министерствин пурлӑхпа ресурс пайӗн пуҫлӑхӗ Наталья Маслова вырӑна тухса тӗрӗсленӗ хыҫҫӑн.

Вӑрманта эмел сапаланнине халӗ республикӑн прокуратури те тӗрӗслет, шалти ӗҫсен пайӗн специалисчӗсем те ку фактпа ӗҫлеҫҫӗ. Эмел купине вырӑнти Ҫӗньял ял администрацийӗ хӑйӗн вӑйӗпе тасатать.