«Контактри» сӑн

Йӗпреҫ округӗнчи Ҫирӗклӗ ялӗнче пурӑнакансем Аслӑ Ҫӗнтерӳ пулнӑранпа 80 ҫул ҫитнине халалласа улма-ҫырла садне ҫӗнӗрен чӗртме шухӑшланӑ.

Ҫавна май ҫимӗҫ паракан 80 йывӑҫ лартма йышӑннӑ. Ку хисеп ҫавра юбилейпе кӑна ҫыхӑнман. Ҫирӗклӗ ялӗнчен Тӑван ҫӗршывӑн Аслӑ вӑрҫине хутшӑннӑ 80 салтак киле таврӑнман.

Акцие аслисем пӗрле ачасем те хутшӑннӑ.

«Контактри» сӑн

Ҫӗрпӳ пульницинчи пайӑрка диагностикин уйрӑмӗн заведующийӗ Татьяна Смирнова опытлӑ рентгенолог кӑна мар. Вӑл – спортсмен та.

Татьяна 1996 ҫултах пӗрремӗш хут парашютпа сикнӗ. Ун чухне вӑл шкул ачи кӑна пулнӑ. Темиҫе ҫултан вӑл пушшех те хавхаланнӑ: машӑрӗ десантник-ҫке-ха. Ку таранччен вӑл парашютпа 27 хут сикнӗ.

Амансан та унӑн ӗмӗчӗ сӳнмен. Мӑшӑрӗ унӑн чун киленӗҫне ырлать кӑна. Вӗсем иккӗшӗ те парашют спорчӗн федерацийӗн пайташӗсем. Татьяна Смирновӑн тепӗр тӗллев пур: ҫитес ҫул вӑл татах парашютпа сикесшӗн.

«Контактри» сӑн

Чӑваш Енри Улатӑр хули пирки Мускавра та каласа кӑтартаҫҫӗ. Ун пирки общество транспортӗнчи информаци хӑми ҫинче курма пулать.

«Чӑваш Республикинчи ҫак хула 1552 ҫулта никӗсленнӗ. Унта — 90 ытла ҫурт-палӑк. Ҫав шутра – чукун ҫул деповӗ, ӗлӗкхи чиркӳсем», - ҫапла паллаштараҫҫӗ Мускари общество транспортӗнче.

«Контактри» сӑн

Сӗнтӗрвӑрринче пурӑнакан Иван Веденеев «Кустӑрма» ятлӑ музей уҫнӑ. Ӑна вӑл ӗлӗкхи хула уесӗнчи хуҫалӑха халалланӑ.

Экспозицире – хӑйне евӗр япаласем. Пӗтӗмпе – 100 ытла. Ӗлӗкхи савӑт-сапа, урапапа ҫуна пайӗсем… –тӗрлӗ япала пур унта. Вӗсем XIX–XX ӗмӗрсенче Атӑлҫи тӑрӑхӗнче усӑ курнӑскерсем. Вӗсене вӑл хӑйсен таврашӗнче пухнӑ.

Иван Веденеев хӑй экскурсисем ирттерет, ватӑ ҫынсенчен ыйтса пӗлнӗ информацисемпе паллаштарать.

Хӗрлӗ Чутай районӗнчи Ҫӗмӗрле ялӗнче пурӑнакан арҫын эрех ӗҫсен руль умне ларма юратать. Нумаях пулмасть ӑна патшалӑх автоинспекцийӗн экипажӗ асӑрханӑ. Вӑл мотоблокпа пынӑ. Эрех ӗҫнипе ӗҫменнине тӗрӗсленме вӑл килӗшмен, унӑн водитель прави те нихӑҫан та пулман-мӗн.

45-ри арҫын унччен те ӳсӗрле руль умне ларнӑ. Маларах ӑна мопедпа пынӑ чухне тытса чарнӑ. Ун чухне ӑна административлӑ майпа явап тыттарса 10 талӑклӑха хупса хунӑ. Хальхинче пуҫиле ӗҫ пуҫарнӑ.

www.cap.ru сӑнӳкерчӗкӗ

Чӑваш Енӗн Правительствинче тунтикунсерен иртекен ӗнерхи планеркӑра ҫуллахи кану тапхӑрне епле хатӗрленнине те сӳтсе явнӑ.

Кӑҫал пирӗн республикӑра 8 пляж уҫасшӑн, вӗсенчен 5-шӗ Шупашкарта пулӗ, пӗрерӗшӗ — Ҫӗнӗ Шупашкарта, Куславккапа Етӗрне тӑрӑхӗсенче. Унсӑр пуҫне ҫынсене канмалли 120 ытла вырӑн хатӗрлемелле.

«Часах шӑрӑх ҫанталӑк пуҫланӗ, ҫӗртме уйӑхӗн 1-мӗшӗ хыҫҫӑн ҫынсем пялжсене кайма пуҫлӗҫ. Вӗсене хӑвӑртрах хатӗрлесе ҫитермелле», — хушса каланӑ республика ертӳҫи Олег Николаев.

culture.cap.ru сӑнӳкерчӗкӗ

Ҫу уйӑхӗн 15-мӗшӗнче Чӑваш Енӗн Культура институчӗн концерт залӗнче пултаруллӑ балетмейстерӑн, педагогӑн, Людмила Нянинӑн 85 ҫулхи юбилейне халалланӑ савӑнӑҫлӑ каҫ иртӗ.

Сцена ҫине Культура колледжӗн студенчӗсем, ача-пӑча ансамблӗсен воспитанникӗсем тухӗҫ. Вагаповсем, «Катюша» тата «Сарпике» халӑх ташшин коллективӗсем, Чӑваш патшалӑх юрӑпа ташӑ ансамблӗн артисчӗсем те пулӗҫ.

Пултарулӑх каҫӗ ӳнер ӗҫӗнче нумай ҫул тӑрӑшнӑ Людмила Нянинӑн хӑйне евӗрлӗ пултарулӑхӗпе паллаштарӗ.

www.cap.ru сӑнӳкерчӗкӗ

Чӑваш Енӗн агропромышленноҫӗн малашлӑхлӑ пилӗк бренчӗ «Знай наших» (чӑв. Пирӗннисене пӗл) пӗтӗм Раҫҫейри конкурса хутшӑнать. Конкурс хамӑр ҫӗршыври брендсемпе паллашатарс, вӗсене аталанма пулӑшас тӗллевӗллӗ.

Конкурса «Сильные идеи для нового времени» (чӑв. Ҫӗнӗ саманари вӑйлӑ шухӑшсем) форум ирттернӗ май йӗркелеме йышӑннӑ.

Пирӗн республикӑран конкурса «Пехет» агромаркет, «Чебо» чипс, «Пернатая долина» (Канашри кайӑк-кӗшӗк фабрики), «Чӑваш пылӗ» («Мелилотус») тата «Чӑваш хӑмли» предприятисем заявка панӑ.

Хальхи вӑхӑтра ял-хулара ача-пӑча мотоциклпа вӗҫтерсе ҫӳренине час-часах курма пулать. Ӗнер Шупашкар районӗнчи Янашкасси ялӗнче 12 ҫулхи ача питбайкпа пынӑ. Хӑйӗнпе пӗрле вӑл 15 ҫулти пассажира та лартнӑ.

Урапа ҫулӗпе пынӑ чухне яш руле айккинелле пӑрса янӑ та мотоцикл ҫаврӑнса ӳкнӗ.

Инкекре яшсем аманнӑ, ҫамрӑк водитель вара пульницӑра, травматологи уйрӑмӗнче, сипленӗ.

Питбайк хуҫи — 12-ри ачан ашшӗ-мӗн. Ӑна административлӑ майпа явап тыттарӗҫ. Йӗрке хуралҫисене вӑл ӗнентернӗ тӑрӑх, ывӑлӗ мотоцикла хӑй тӗллӗн, ашшӗнчен ыйтмасӑр чӗртсе тухнӑ имӗш.

"Контактри" сӑн

Улатӑр округӗнчи пульницӑра ҫамрӑк педиатр ӗҫлеме тытӑннӑ. Вӑл унта «Земство тухтӑрӗ» патшалӑх программипе усӑ курса кайнӑ.

Михаил Зайцев ача чухнех педиатр пулма ӗмӗтленнӗ. 5-мӗш класра пулас професси пирки сочинени ҫырма ыйтсан та вӑл кун пирки каланӑ. Ҫавӑнтанпа унӑн шухӑшӗ улшӑнман.

Сӑмах май, пӗлтӗр ку программӑпа 62 тухтӑр тата вӑтам звенори 37 медӗҫчен усӑ курнӑ.