AquaDom. «Коммерсантъ» телеграмӗнчи сӑн

Берлинти Dom Aquaree отельти тӗнчери чи пысӑк AquaDom цилиндр аквариум ҫурӑлнӑ. Унӑн калӑпӑшӗ 1 млн литр пулнӑ, унта 1,5 пин пулӑ пурӑннӑ.

Der Spiegel пӗлтернӗ тӑрӑх, пӑтӑрмаха пула икӗ ҫын шар курнӑ. Вӗсене госпитализациленӗ. Кӑларӑм ҫырнӑ тӑрӑх, малтан вӑйлӑ сас тухнӑ, кайран урамалла отель фасачӗн пайӗсем сирпӗнсе тухнӑ, шыв юхса тухнӑ.

Халӗ пӑтӑрмах вырӑнӗнче ҫӑлав службисем ӗҫлеҫҫӗ, пӗтӗмӗшле вӗсен йышӗ 100 ҫынна яхӑн. AquaDom-а 2003 ҫулта уҫнӑ, проект хакӗ — €12,8 млн. Аквариум ҫӳллӗшӗ 16 метр, диаметрӗ — 11,5 метр. Ун ­ӑшӗнче 100 яхӑн тӗс ­пулӑ ­ишсе ҫӳренӗ.

Туризм

Хальлӗхе йывӑҫ ҫуртра та — ҫӑтмах!

Туризма аталантармалли программӑпа килӗшӳллӗн, ҫывӑх ҫулсенче Баскак паҫҫулккинче виҫӗ хутлӑ эко-гостиница тума палӑртнӑ.

Ҫук, ку пӗрре те шӳтлесе калани мар: пирӗн тӑрӑх туристсем валли ҫав тери илемлӗ пулнине Мускав та ӑнланса илнӗ. «Чӑваш вӑрманӗ» Наци паркӗ малашне Раҫҫейри чи илемлӗ вырӑнсенчен пӗри пулмалла.

Проектпа смета документацине хатӗрлес ӗҫ пуҫланнӑ та ӗнтӗ. Строительствӑри мӗнпур вӑрттӑнлӑха уҫса памӑпӑр — асаттесем тытман упа тирне сӳме хушманнине асра тытар. Ҫакна ҫеҫ калар: хӑна ҫурчӗн комплексӗн пӗтӗмӗшле хакӗ 50 миллион тенкӗрен кая лармӗ. «Мускавшӑн ҫак укҫа нумай-и вӑл?» — тейӗҫ хӑшӗсем. Бюджет укҫи питӗ шутлӑ пулнине, ҫиччӗ виҫсе пӗрре касма тивнине манар мар.

Туризма аталантарас тесен, районта тирпей-илем енӗпе ҫав тери нумай ӗҫлемелле. Шӑтӑк-путӑк ҫулсемпе, ҫӳп-ҫап тӑкса тултарнӑ ҫырмасемпе, хыт-хура ҫеҫ ашкӑрса ӳсекен пушӑ ҫуртсен пахчисемпе эпир туристсене илӗртме пултарӑпӑр-ши?

Тирпей тума чӑн малтан район центрӗнчен пуҫламалла.

Малалла...

cap.ru сӑнӳкерчӗкӗ

Ҫулталӑк пуҫланнӑранпа республикӑра 196,8 миллион ҫӑмарта туса илнӗ. Пӗлтӗрхипе танлаштарсан, ку 33,3% нумайрах.

Ҫӑмарта нумайрах туса илме пуҫлани чӑх-чӗп хапрӑкӗсем ҫӗнелнипе ҫыхӑннӑ. Ҫапла пӗлтерет регионти Ял хуҫалӑх министерстви.

Сергей Артамонов министр палӑртнӑ тӑрӑх, юлашки икӗ ҫулта чи пысӑк проектсенчен пӗрне "Муркаш" чӑх-чӗп хапрӑкӗ пурнӑҫланӑ. Республикӑра туса илнӗ ҫӑмартан 86,6 проценчӗ - ҫак предприятин.

cap.ru сӑнӳкерчӗкӗ

Шупашкарта пӗр-пӗр вокзал патне утса пынӑ чухне машинӑпа республикӑн тӗрлӗ кӗтесне (уйрӑмах Канаш, Патӑрьел тата Елчӗк районӗсене) илсе каяс кӑмӑллисем яланах йышлӑ. Вӗсем — ятарласа регистрациленмен, вӑрттӑн ӗҫлекен усламҫӑсем.

Ҫавсене тупса палӑртас тӗллевпе кӑҫал Чӑваш Енӗн Транспорт тата ҫул-йӗр хуҫалӑхӗн министерстви патшалӑхӑн ҫул-йӗр автоинспекцийӗн ӗҫченӗсемпе пӗрле 7 тӗрӗслев ирттернӗ, ҫав вӑхӑтра 6 водителе административлӑ майпа явап тыттарнӑ.

Пассажирсене вӑрттӑн турттаракансем ҫинчен ӗнер республикӑн Правительствинче иртнӗ ведомствӑсем хушшинчи ларура сӳтсе явнӑ, тивӗҫлӗ мерӑсем йышӑнасси пирки сӑмах хускатнӑ.

cap.ru сӑнӳкерчӗкӗ

Ӗнер кӑна республикӑра электролинисене юсаса пӗтерни пирки хыпарларӑмӑр. Ӗнер каҫхинех ялсенче каллех ҫутӑ сӳнме пуҫланӑ иккен.

Канаш, Вӑрмар тата Ҫӗрпӳ районӗсенче пурӑнакансем килте электричество ҫукки пирки пӗлтерме тытӑннӑ. Ҫак тӑрӑхсенче авари бригадисем ӗҫлеҫҫӗ. Электролинисене ҫывӑх вӑхӑтра йӗркене кӗртме шантарнӑ.

Аса илтерер: республикӑра ҫил-тӑман вӗҫтернӗ, пӑрлӑ ҫумӑр ҫунӑ хыҫҫӑн электролинисем йывӑҫсем ӳкнипе татӑлма пуҫланӑ.

«Станислав Садальский — пирӗн ентеш. Эсир ҫавна пӗлнӗ-и?» — хыпарланӑ «Ентешсем I Земляки» телеканалта.

Станислав Садальский «Раҫҫей 2» телеканалпа кӑтартакан Андей Малаховӑн «Привет, Андрей!» кӑларӑмне хутшӑннӑ, хайӗн ялти пурнӑҫӗ ҫинчен каласа кӑтартнӑ.

Садальский ӳкерӗннӗ телекӑларӑм ыран, раштав уйӑхӗн 17-мӗшӗнче, 17 сехетре эфира тухӗ.

Садальский «Контактра» ҫапларах ҫырса хунӑ: «Чӑваш халӑх артисчӗн ӗмӗчӗ тинех ҫитрӗ! Пӗлменнисем валли... эпӗ Чӑваш Республикинчи Патӑрьел районӗнчен».

Асӑннӑ телекӑларӑма пирӗн тепӗр ентешӗмӗр Ирина Шоркина та хутшӑннӑ.

2023 ҫулхи кӑрлачӑн 1-мӗшӗнчен Чӑваш Енри пӗтӗм район муниципалитет округӗ пулӗ. Ҫапла йышӑннӑ ЧР Министрсен Кабинечӗн кӑҫалхи юлашки ларӑвӗнче.

Хальччен республикӑра 5 хула округӗ тата 21 муниципалитет районӗ пулнӑ. Ҫак статуса чи малтан йышӑннисем – Красноармейски тата Ҫӗмӗрле районӗсем. Кӑрлачӑн 1-мӗшӗнчен ытти 19 район муниципалитет округӗ пулӗ.

Мӗн улшӑнӗ? Ял тӑрӑхӗсенче депутат корпусӗ пулмасть, муниципалитет округӗн шайӗнчисем кӑна юлаҫҫӗ.

Тӳре-шара ӑнлантарнӑ тӑрӑх, кун пек улшӑнӑвӑн лайӑх енӗ кӑна: укҫа-тенкӗ пӗр алӑра пулӗ, ыйтусем хӑвӑртрах татӑлӗҫ. Ҫапла майпа халӑх пурнӑҫӗн пахалӑхӗ те лайӑхланӗ.

Вӗсен ячӗсем пӗр пекрех янӑраҫҫӗ: «Макфа» тата «Вакма» Анчах пӗри – Мускаври паллӑ компани, тепри - Шупашкарти хапрӑк.

Шупашкарти предприяти паллӑ брендпа кӑларакан макарон ячӗпе усӑ курас тенӗ-ши – хӑйсем туса кӑларакан продукци валли ҫавнашкалтарах тӗс, ят суйланӑ.

Икӗ фирма тахҫантанпах ҫапӑҫаҫҫӗ. 2020 ҫулта Шупашкарти хапрӑк автор прависене пӑснӑшӑн судра выляса янӑ. Кӑҫал «Макфа» ӑна каллех суда панӑ, тавар паллине хӳтӗлесе 5 миллион тенкӗ саплаштарма ыйтнӑ.

Мӗнпе вӗҫленнӗ ку ӗҫ? Икӗ ен мирлешнӗ, ӑна ЧР Арбитраж сучӗ ҫирӗплетнӗ. Компенсаци виҫине пӗчӗклетнӗ: 1,5 миллион тенкӗ хӑварнӑ. «Вакмӑн» ӑна кӑрлачӑн 27-мӗшӗччен парса татмалла.

cap.ru сайтри сӑн

Унччен Шупашкар хула администрацийӗ Граждан урамӗнчи ҫула раштавӑн 25-мӗшӗччен уҫассине пӗлтернӗччӗ. Ҫакӑ, ахӑртнех, чӑна ҫаврӑнать.

Граждан урамӗнче асфальт сарнӑ. Хальлӗхе – икӗ сий. Виҫҫӗмӗш сийне ҫитес ҫул сарӗҫ. Урамра ҫутӑ пур, каҫхине специалистсем троллейбуссен линине сыпӑнтараҫҫӗ. Хальхи вӑхӑтра бордюр хураҫҫӗ, тепӗр 700 метр юлнӑ. Ливневкӑсене те кӗҫех туса пӗтерӗҫ.

Ҫитес ҫул виҫҫӗмӗш сий асфальт сарнисӗр пуҫне тротуар тӑвӗҫ.

Инкеклӗ лару-тӑру патшалӑх комитечӗ тунӑ сӑн

Чӑваш Енре тинех электролинисене юсаса пӗтернӗ. Ӗнер каҫхине юлашки икӗ ялта ҫутӑ ҫутӑлнӑ. Кун пирки Инкеклӗ лару-тӑру патшалӑх комитечӗ пӗлтерет.

Ӗнерхи каҫ тӗлне икӗ ялта кӑна ҫутӑ пулман. Ку – Вӑрмар районӗнче. Каҫхине ҫав икӗ ялта та халӑха электроэнергипе тивӗҫтернӗ.

Аса илтерер: раштавӑн 10-14-мӗшӗсенче юр нумай вӗҫтернӗрен, пӑрлӑ ҫумӑр ҫунӑран 214 ялти 55 пин ҫын ҫутӑсӑр юлнӑ. Чӑваш энергетикӗсене пулӑшма кӳршӗ регионсенчи специалистсем те килнӗ.