Следстви комитечӗ тунӑ сӑн

Ҫӗмӗрле районӗнчи Хутар ялӗнче пурӑнакан 36 ҫулти арҫын тӗлӗшпе пуҫиле ӗҫ пуҫарнӑ. Вӑл ҫынна вӗлернӗ тесе шутлаҫҫӗ.

Следстви версийӗ тӑрӑх, ака уйӑхӗн 29-мӗшӗнче ҫак арҫын килӗнче 68 ҫулти тӑванӗпе хирӗҫсе кайнӑ. Кӗҫӗнни аслине пуҫӗнчен тимӗр пепельницӑпа 4 хутран кая мар ҫапнӑ. Лешӗ ҫавӑнтах вилнӗ.

36-ри арҫынна тытса чарнӑ. Ӑна следстви вӑхӑтӗнче хупса усрас ыйтӑва пӑхса тухаҫҫӗ. Пуҫиле ӗҫе малалла тӗпчеҫҫӗ.

Следстви комитечӗ тунӑ сӑн

Тӑвай районӗнче пурӑнакан арҫын килте патронсем упранине тупса палӑртнӑ. РФ Следстви комитечӗн Чӑваш Енри следстви органӗсем ун тӗлӗшпе пуҫиле ӗҫ пуҫарнӑ.

Следстви версийӗ тӑрӑх, 2016 ҫулхи ҫулла 50 ҫулти арҫынна пӗлӗшӗнчен 1732 патрон еткерлӗхе лекнӗ. Вӗсем спорт тата сунар пӑшалӗ валли. Экспертиза палӑртнӑ тӑрӑх, патронсен пӗр пайӗ пеме юрӑхлӑ.

Арҫын тӗлӗшпе пуҫарнӑ пуҫиле ӗҫе малалла тӗпчеҫҫӗ. Тӗрлӗ экспертиза ирттерӗҫ, кӳнтеленсенчен ыйтса пӗлӗҫ.

Emirates Mars Mission тунӑ сӑн

«Аль-Амаль» тӗнче уҫлӑхӗн агентствӑн арап планета станцийӗ Марс ҫинче поляр ялтӑравӗн ҫӗнӗ йышши тӗсне асӑрханӑ.

Ӑсчахсем атмосферӑн ҫӳлти сийӗ ялтӑртатнин темиҫе сӑнне ӳкерсе илнӗ, вӗсем хушшинче каярах «кукӑр-макӑр дискретлӑ поляр ялтӑравӗ» ята панӑ паллӑ мар пулӑм асӑрханӑ. Вӑл атмосферӑри темиҫе пин километра тӑсӑлакан хумхануллӑ электронсен эмиссин ӑман евӗрлӗ ярӑмсем пек курӑнать.

Тӗпчеве хӗвелӗн вӑйлӑ ҫил-тӑвӑл вӑхӑтӗнче ирттернӗ, ҫакӑ вара питӗ вӑйлӑ поляр ялтӑравӗсем туса кӑларнӑ. Ку пулӑма Hope EMUS (The Emirates Mars Ultraviolet Spectrometer) ультрафиолет спектрометрӗпе усӑ курса ҫеҫ ӳкерме май килнӗ — вӑл 90-ран пуҫласа 180 нанометрлӑ хумсене сӑнама пултарайрать.

Cap.ru сӑнӳкерчӗкӗ

Ҫу уйӑхӗнчи уявсенче Шупашкартан Мускава тата ҫӗршывӑн тӗп хулинчен пирӗн пата килекен пуйӑссен шучӗ нумайланӗ.

Шупашкартан хушма пуйӑссем ҫу уйӑхӗн 2, 3, 7, 8, 9 тата 10-мӗшӗсенче пулӗҫ, Мускавран хушма рейс ҫу уйӑхӗн 6-8-мӗшӗсенче пулӗҫ.

Сӑмахран, 228/227-мӗш номерлӗ пуйӑс Мускавран ҫу уйӑхӗн 3-мӗшӗнче 12:55 сехетре хускалӗ, Мускава тепӗр кунхине 03:20 сехетре ҫитӗ. Вӑлах Шупашкартан Мускава ҫу уйӑхӗн 10-мӗшӗнче 22:45 сехетре хускалӗ, ҫӗршывӑн тӗп хулинче ҫу уйӑхӗн 13:10 сехетре пулӗ. Расписание хушма рейссем те кӗртнӗ. Вӗсемпе Раҫҫейӗн чукун ҫулсен сайтӗнче паллашма пулать.

Cap.ru сӑнӳкерчӗкӗ

Турра ӗненекенсем Мӑнкун хыҫҫӑн темиҫе кунтан ваттисене асӑнаҫҫӗ. Кӑҫал та ҫаплах. Ҫу уйӑхӗн 3-мӗшӗнче ҫынсем ҫӑва ҫине, леш тӗнчене ӑсаннӑ тӑванӗсен вил тӑпри ҫине ҫитсе килме ӑнтӑлаҫҫӗ.

Ҫав кун Шупашкар хула администрацийӗ 15, 30, 46, 52-мӗш маршрутсемпе, ҫавӑн пекех муниципалитетсем хушшинчи 249-мӗш маршрута Явӑш ялне ҫити ҫӳретме йышӑннӑ. 30-мӗш маршрут вара ҫуллахи расписани ҫине куҫӗ. Асӑннӑ маршрутра Карачура ҫӑви ҫине ҫитерекен рейссен шучӗ нумайланӗ.

Чукун ҫул вокзалӗнчен рейссем 6-30, 7-30, 8-30, 9-30, 10-30, 11-30, 12-30, 13-30, 14-30, 15-30, 16-30, 17-30, 18-30 сехетсенче пулӗҫ; Карачура ҫӑви ҫинчен 7-00, 8-00, 9-00, 10-00, 11-00, 12-00, 13-00, 14-00, 15-00, 16-00, 17-00, 18-00, 19-00 сехетре хускалӗҫ.

Cap.ru сӑнӳкерчӗкӗ

Ырантан, ҫул уйӑхӗн 1-мӗшӗнчен, Шупашкарти юханшыв порчӗнчен пӑрахутсем ҫӳреме тытӑнӗҫ. Ҫынсене «Чувашия» (чӑв. Чӑваш Ен) икӗ палубӑллӑ пӑрахут турттарӗ.

Рейссем кашни кун 13.00, 15.00, 17.00 тата 19.00 сехетре пулӗҫ.

Аслисем валли билет хакӗ 270 тенкӗ пулӗ, 5-10 ҫулхи ачасем валли – 150 тенкӗ. 5 ҫултан кӗҫӗнреххисенчен укҫа илмӗҫ. Багаж хакӗ – 40 тенкӗ.

Круиз сезонӗ пирӗн тӑрӑхра ака уйӑхӗн 28-мӗшӗнче уҫӑлнӑ. Ҫав кун Шупашкарти юханшыв портне Дон ҫинчи Ростовран «Волга Стар» пӑрахут килсе чарӑннӑ.

Ҫӗртме уйӑхӗн 1-мӗшӗнчен Шупашкартан Хусана Атӑл тӑрӑх круизсем уҫӑлӗҫ.

Статистика кӑтартнӑ тӑрӑх, республикӑра вилекенсен йышӗ,ҫуралакансемпе танлаштарсан, нумайрах.

Пуш уйӑхӗнче 1630 ҫын вилнӗ. Пӗлтӗрхи ҫак уйӑхпа танлаштарсан, 6,7 процент нумайрах.

Пуш уйӑхӗнче 861 ача ҫуралнӑ. Пӗлтӗрхинчен 26,7 процент сахалрах.

Республикӑра пуш уйӑхӗнче 769 ҫын сахалланнӑ. Палӑртмалла: пӗлтӗр республикӑра 30496 ҫын вилнӗ. Кунашкалли 21-мӗш ӗмӗрте пулман. Ку - антирекорд.

"Про Город" сайтӗнчи сӑн

Паян Шупашкарта Куҫ микрохирургийӗ патӗнче пилӗк машина ҫапӑннӑ. "Про Город" хаҫата халӑх корреспонденчӗ пӗлтернӗ тӑрӑх, аваришӗн айӑплӑ ҫын ӳсӗр пулнӑ. Ӑна пульницӑна илсе кайнӑ.

ҪҪХПИ пӗлтернӗ тӑрӑх, машинӑсем сулахай енне ҫаврӑнма тӑнӑ. Ҫав вӑхӑтра вӗсем ҫине ӳсӗр водитель пырса кӗнӗ. Унӑн машини самаях вӑйлӑ сиенленнӗ. Водитель хӑй те суранланнӑ.

Республикӑра юлашки талӑкра 33 ҫын кӑшӑлвируспа чирленӗ. Кун пек пӗчӗк кӑтарту тахҫанах, 2020 ҫулхи юпа уйӑхӗнченпе, пулман.

Иртнӗ талӑкра 43 ҫынна пульницӑна вырттарнӑ. 45 ҫын сывалнӑ. Юлашки талӑкра 1 ҫын кӑшӑлвируса пула вилнӗ.

Пандеми пуҫланнӑранпа республикӑра 78635 ҫын инфекциленнӗ. Вӗсенчен 72441-шӗ сывалнӑ. 4607 ҫын кӑшӑлвируса парӑнтараймасӑр вилнӗ.

Паянхи куна илес тӗк, республикӑра 1587 ҫын кӑшӑлвирусран сипленет.

Сӗнтӗрвӑрри район администрацийӗн пуҫлӑхӗ Владимир Мустаев отставкӑна кайнӑ. Мӗнле сӑлтава пула кайнине пӗлтермен. Ака уйӑхӗн 29-мӗшӗнче вырӑнти депутатсем ӑна ку должноҫрен срокран маларах яма йышӑннӑ.

Владимир Мустаев ку должноҫре 2020 ҫулхи авӑн уйӑхӗнченпе ӗҫленӗ. Унччен вӑл администраци пуҫлӑхӗн пӗрремӗш ҫумӗ пулнӑ.

Ҫӗрпӳ район администрацийӗн пуҫлӑхӗ Сергей Беккер вара хӑйӗн должноҫӗнчех юлнӑ. Вырӑнти депутатсем пурте унӑн кандидатуришӗн сасӑланӑ.