mixyfotos.ru сайтри сӑн

Паян каҫхи 10 сехетре Шупашкарти Введени кафедра соборӗнче асап туснӗ Георгий Победоносецӑн хӑватне, унӑн ковчегне, илсе килӗҫ. Ыран, юпа уйӑхӗн 12-мӗшӗнче, пӗрремӗш кӗлӗ пулӗ, ӑна Савватий атте ертсе пырӗ. Пурте ҫӗнтерӳшӗн кӗлтӑвӗҫ.

Храм ирхи 6 сехетрен уҫӑ пулӗ. Ӑна юлашки ҫын киличчен те хупмӗҫ. Юпан 13-мӗшӗнче вара ҫветтуй патӗнче 6-19 сехетсенче кӗлӗ тума пулать. 19 сехетре ковчега ӑсатӗҫ.

cap.ru сайтри сӑн

Ҫӗмӗрлери 41 ҫемье ҫӗнӗ ҫуртра пурӑнма тытӑнӗ. Хваттер уҫҫисене вӗсене ӗнер савӑнӑҫлӑ лару-тӑрура панӑ.

Унччен ҫак ҫемьесем Уруков урамӗнчи 27-мӗш ҫуртра пурӑннӑ. Ҫурт авариллӗ тесе йышӑннӑ. Халӗ вӗсене Францев урамӗнче вырнаҫнӑ нумай хваттерлӗ ҫуртри уҫӑсене панӑ.

Кашни хваттер хӑтлӑ, харпӑр кӑмакаллӑ. Картишре ача-пӑча тата спорт лапамӗсем пур. Палӑртмалла: кӑҫал ҫулталӑк вӗҫлениччен Ҫӗмӗрлере авариллӗ ҫуртра пурӑнакан тепӗр 52 ҫынна хваттер уҫҫи памалла.

Синоптиксем пӗлтернӗ тӑрӑх, ыран, юпан 12-мӗшӗнче, республикӑра ҫил вӑйланать, ҫеккунтра 20-25 метр таран хӑвӑртлӑхпа вӗрет. Асӑрханӑр: япӑх ҫирӗплетнӗ конструкцисем, йывӑҫсем ӳкме, пралуксем татӑлма пултараҫҫӗ. Ҫил вӑйланнӑран сивӗрех пек туйӑнӗ.

Эрнекун уяртӗ, канмалли кунсенче ҫумӑр ҫумӗ. Пукравра, шӑматкун, 15-20 градус таран ӑшӑтма пултарать. Танлаштарма: 2009 ҫулта Пукравра 20,9 градус ӑшӑ пулнӑ.

cap.ru сӑнӳкерчӗкӗ

2024 ҫулта Шупашкарпа Ҫӗнӗ Шупашкара виҫӗ троллейбус маршручӗ ҫыхӑнтарӗ. Чи малтан 62-мӗш номерли ҫула тухӗ. Вӑл республикӑн тӗп хулинчи Чапаев ячӗллӗ приозводство пӗрлешӗвӗнчен пуҫласа Ҫӗнӗ Шупашкарти «Иваново» чарӑнӑва ҫитӗ хутлӗ.

Ку хыпара республика Элтеперӗ Олег Николаев «Грани» хаҫат редакцине панӑ интервьюра пӗлтернӗ.

«Муниципалитетсен хушшинчи автобус маршурчӗсене троллейбуссемпе ылмаштарасшӑн. Троллейбуссем хӑтлӑрах, хӑрушсӑртарах, вӗсен салонӗ те пысӑкрах», – тенӗ Олег Николаев.

Каярах ҫула 60-мӗш (Шупашкарти «Университет» – Ҫӗнӗ Шупашкарти «Химтехникум») тата 61-мӗш маршрутсем (Шупашкарти «Медицина центрӗ» – Ҫӗнӗ Шупашкарти «Иваново») тухӗҫ.

Хӗрлӗ Чутай районӗнчи Акчикассинче пурӑнакан Перасковья Васюкова юпа уйӑхӗн 10-мӗшӗнче 102 ҫул тултарнӑ.

Унӑн пурнӑҫӗ те тантӑшӗсенни пекех пулнӑ. Вӑрҫӑ ҫулӗсем тата ун хыҫҫӑнхи йывӑр самана. Апла пулин те хӗрарӑм пуҫ усман.

Ҫуралнӑ кунӗнче ун патӗнче Хӗрлӗ Чутайӗнчи халӑхӑн социаллӑ ыйтӑвӗсене тивӗҫтерекен центр ӗҫченӗсем тата вырӑнти тӳре-шара пулнӑ, кинемее ҫуралнӑ кунпа саламланӑ.

t.me/chuv_kray каналтан илнӗ сӑнӳкерчӗксем

Шупашкар хулинче ҫуралнӑ хӗрарӑм Питӗрти илем конкурсне хутшӑнӗ.

Анастасия Степанова тӑван республикӑра пӗлӳ илнӗ хыҫҫӑн Питӗр хулине тухса кайнӑ. Хӗрарӑм тахҫанах ҫемьеллӗ ӗнтӗ. Вӑл мӑшӑрӗпе тата йышлӑ ачипе савӑнса пурӑнать.

Телейлӗ хӗрарӑм юратнӑ ӗҫӗнче тӑрӑшнипех ҫырлахмасть. Унӑн чун канӑҫӗ шутӗнче — илем конкурсӗсене хутшӑнни те. Кӑҫал вӑл Хӗрлӗ гварди районӗнче иртнӗ илем конкурсӗнче иккӗмӗш «Вице миссис» ята ҫӗнсе илнӗ.

37 ҫути хӗрарӑм хальхинче Питӗр хулинчи илем конкурсне хутшӑнӗ.

Максим Иванов тунӑ сӑн

Улатӑрта ача пахчи пулнӑ ҫурта каллех сутма лартнӑ. Кунта сӑмах – «Хӗвел» ятли пирки.

Ача пахчин территорине те пӗрлех сутаҫҫӗ. Малтанхи хака палӑртнӑ: 19 миллион та 785 пин тенкӗ. Чи пӗчӗк хак – 9 миллион та 892 пин те 500 тенкӗ. Ӑна аукционра чӳк уйӑхӗн 13-мӗшӗнче сутӗҫ.

Палӑртмалла: ача пахчине 2020 ҫулта авариллӗ лару-тӑрура тесе хупнӑ. Ӑна пӗлтӗр сутма хӑтланнӑ. Анчах туянакан пулманран аукцион иртмен.

/t.me/pro_cheby каналтан илнӗ сӑнӳкерчӗк

Чӑваш Енри учительсен оклачӗ пурӑнма кирлӗ чи пӗчӗк виҫерен пӗчӗкрех иккен. Кун пирки Телеграмри каналсенчен пӗринче ӗнер пӗлтернӗ. Асӑннӑ ҫӑлкуҫра хыпарланӑ тӑрӑх, оклад эпир маларах асӑннӑ виҫерен икӗ хута яхӑн пӗчӗкрех.

Категорисӗр тата стажсӑр уительсен оклачӗ пирӗн республикӑра 8533 тенкӗпе танлашать-мӗн. Атӑлҫи тӑрӑхӗнчи регионсене илсен унтан пӗчӗкреххи Мари Элта ҫеҫ. Унта вӑл — 8265 тенкӗ. Ку вӑл — юпа уйӑхӗн 4-мӗшӗ тӗлне илсен.

Тутарстанри учительсен оклачӗ — 16157 тенкӗ, Чулхуларисен — 13467 тенкӗ.

t.me/oanikolaev каналтан илнӗ сӑнӳкерчӗксем

Ӗнер, юпа уйӑхӗн 10-мӗшӗнче, Чӑваш Енри виҫӗ кинемей 100 ҫул тултарнӑ.

Вӗсенчен иккӗшӗ, Анна Иванова тата Мария Кручинина, Шупашкарта пурӑнаҫҫӗ, Шемсия Сафина — Патӑрьел муниципаллӑ округӗнчен.

Вӑрҫӑ ҫулӗсенче Мария Христофоровна тата Шемсия Алиулловна фронтра ӗҫленӗ, аслӑ Ҫӗнтерӗве ҫывхартма пулӑшнӑ. Анна Титовна II Прибалтика фронтӗнче ҫарта пулнӑ.

Анна Иванова вӑрҫӑ ҫулӗсенче телейлӗ те вӑрӑм ӗмӗр пирки ӗмӗтленнӗ. Халӗ вара вӑл ҫынсене кӳрентерес марччӗ тесе пурӑнать.

Кинемейсене Телеграмри хӑйӗн каналӗнче республика Элтеперӗ Олег Николаев саламланӑ.

Ҫӗрпӳ муниципаллӑ округӗнче Виҫпӳрт ялӗ ҫывӑхӗнче строительство ҫӳп-ҫап купине тупнӑ. Унта тимӗр бетон конструкцийӗсем, кивӗ асфальт катӑкӗсем выртнӑ. Пӗтӗмпе - 1260 тӑваткал метр ҫинче.

Свалка ял хуҫалӑх пӗлтерӗшлӗ ҫӗрсем ҫинче. Россельхознадзор ҫӗр хуҫине асӑрхаттару панӑ, ӑна рекультиваци тума сӗннӗ.

Ҫӗр хуҫи строительство ҫӳп-ҫапне илсе тухнӑ, рекультиваци тумалли проект хатӗрлеме заявка хӑварнӑ.