t.me/Chuv_today канала вырнаҫтарнӑ сӑнӳкерчӗк

Чӑваш чиперкки Александра Козлова — Йывӑр атлетика енӗпе Раҫҫей чемпионачӗн виҫӗ хут бронза призерӗ.

В.С. Соколов ячӗллӗ спорт шкулӗн воспитанници Александра Козлова Ҫӗнӗ Уренгой хулинче иртекен ҫӗршыври ӑмӑртӑва хутшӑннӑ. Хӗрӗн пулӑшса тата вӗренсе пыраканӗ — Раҫҫейӗн тава тивӗҫлӗ тренерӗ Геннадий Иванов.

Йывӑр спорт инвентарьне йӑтса илессипе ӑмӑртнӑ чухне хӗр икӗ тӗрлӗ ӑмӑртура 195 килограма парӑнтарнӑ. Ку вӑл ӑна бронза медале ҫӗнсе илме май панӑ.

Республика кунӗнче Ҫӗнӗ Шупашкарта Раҫҫейри паллӑ юрӑҫсем сцена ҫине тухассине пӗлтернӗччӗ. Ун чухне камсем килессине каламанччӗ.

Вӑрттӑнлӑха уҫнӑ. Спутник хула ҫыннисене "Краски" ушкӑн савӑнтарӗ. Вӑл каҫхине Атӑл хӗрринчи лапамра юрлӗ.

Палӑртмалла: 2000 ҫулсен пуҫламӑшӗнче анлӑ сарӑлнӑ ушкӑнра ун чухнехи юрӑҫсенчен нихӑшӗ те юлман. Пурте - ҫӗнӗ ҫынсем.

Прокуратура тунӑ сӑн

Элӗк районӗнчи тӑлӑх прокуратура пулӑшнипе кӑна хваттерлӗ пулнӑ. Каччӑна ашшӗ-амӑшӗсӗр тӑрса юлсан ҫурт-йӗр тивӗҫмешкӗн черете тӑратнӑ.

Хайхискер 18 ҫул тултарнӑ, хваттер вара паман. Хӑй ҫемьеленнӗ, харпӑрлӑхӗнче ҫурт-йӗр пулман. Ҫавна май унӑн укҫа тӳлесе хваттер тара илме тивнӗ. Ҫапла самай нухрат тӑкакланӑ.

Прокуратура вырӑнти администрацие тӑлӑха хваттерпе тивӗҫтерме ыйтса тавӑҫ тӑратнӑ. Кун хыҫҫӑн тин ӑна ҫӗнӗ те хӑтлӑ ҫуртра хваттер уйӑрса панӑ.

Маргарита Красотина страницинчен илнӗ сӑнӳкерчӗксем

Шупашкарти трикотаж чӑваш сӗмӗллӗ футболкӑсем кӑларнӑ. Вӗсем сӑнавлӑ парти пулӗҫ-и (тен, Республика кунӗ тӗлне туса кӑларнӑ-ши) — ӑна калама пӗлместпӗр.

Вӗсене фабрика Константин Ивановӑн «Нарспи» поэминче иллюстрацисемпе усӑ курса хатӗрленӗ. Кун пирки Маргарита Красотина журналист халӑх тетелӗнчи хӑйӗн страницинче пӗлтернӗ.

«Вӑтӑр ҫул та иртмерӗ, Праски Витти монументалистӑн, эмалёрӑн и графикӑн тӗлӗнмелле пултарулӑхне пӗчӗкшерӗн те пулин вырӑнти дизайнерсем халӑхра сарма тытӑнчӗҫ», — тесе ҫырнӑ постра.

ptoday.ru сайтри сӑн

Ҫак кунсенче математика предмечӗпе ППЭ кӑтартӑвӗсем паллӑ пулнӑ. Чӑваш Ерри 11 ҫамрӑк ӑна 100 баллӑх тытнине палӑртма кӑмӑллӑ.

Вӗсен йышӗнче Шупашкарти 3-мӗш лицейри Александр Разухин, Яна Федорова, Владимир Федоров, Станислав Волков, Руслан Киселев, Елизавета Кожемякова, тӗп хулари 44-мӗш лицейри Михаил Гаврилов, 4-мӗш лицейри Екатерина Мирошник, 61-мӗш шкулти Иван Кузнецов тата иртнӗ ҫул вӗренсе тухнӑ Сергей Ефремов тата Алексей Ярдухин.

Аса илтерер: Виктория Котусенко химипе тата вырӑс чӗлхипе 100-шер балл пухнӑ.

chuvashia.sledcom.ru сӑнӳкерчӗкӗ

Тепӗр ҫынсен алли питех те ҫӳлте. Шупашкар хулинче пурӑнакан 40 ҫулти вӑйпитти те ҫавӑн йышшисен ретӗнчен пулнӑ.

Ҫӗртме уйӑхӗн 2-мӗшӗнче хайхи ен ҫемйинче пӑтӑрмах сиксе тухнӑ. Арҫын сӑмахпа калани ҫителӗксӗр тенӗ курӑнать — вӑйпа усӑ курас тенӗ. Ур а кайнӑ этем хӗрарӑма икӗ хутран кая мар хырӑмӗнчен тапнӑ. Хӗнекен ҫын хӗрхенсе хӗнемест ӗнтӗ — хӗрарӑм ҫавӑнтах вилсе кайнӑ.

Усал арҫынна пакунлисем тытса чарнӑ. Пӑтӑрмах тӗлӗшпе пуҫиле ӗҫ пуҫарнӑ. Халӗ ӗҫе тӗпченӗ май кӳнтеленсемпе калаҫаҫҫӗ, тӗрлӗ экспертиза ирттерӗҫ.

t.me/pro_cheby каналта илнӗ сӑнӳкерчӗк

Шупашкарта дача вӑрри ҫакланнӑ.

Ют ҫын пурлӑхне ҫав ҫын ҫуркуннех иленнӗ-ха. Пӗри патне кӗрсе ҫаратнӑ, тепри патне. Вӗрен темле тӑсӑлсан та вӗҫӗ пулать теҫҫӗ-и-ха?..

Юнашар вырнаҫнӑ пахча юлташлӑхӗсенчен полицие пурӗ 6 заявлени ҫитсе выртать. Вӗсем пурте вӑрра пула шар курнӑ.

Ака уйӑхӗн 7-мӗшӗнче 44 ҫулти арҫын хӑйӗн дачине ҫитет те, ҫурта такам чӳречерен кӗнине ӑнланса илет. Дача ҫуртӗнчи телевизор ҫухалнӑ. Ҫав уйӑхӑн 20-мӗшӗнче 63 ҫулти арҫын пакунлисенчен пулӑшу ыйтать — унӑн дача ҫуртне ҫакӑнса тӑракан ҫӑрана ватса такам кӗнӗ, бензинпа ӗҫлекен пӑчкӑна йӑтса тухса кайнӑ.

Вӑрлаканни унччен те ҫын пурлӑхне тытма юратнӑ 38 ҫулти арҫын пулнӑ иккен. Ҫавӑншӑн ӑна унччен темиҫе хутчен те явап тыттарнӑ.

Инкеклӗ лару-тӑру министерстви тунӑ сӑн

Паян ирхине Ҫӗнӗ Шупашкарта Женя Крутова урамӗнче 16-мӗш ҫуртра 3-мӗш хутра пушар тухнӑ. Ҫав вӑхӑтра вара кил хуҫи ним сисмесӗр ҫывӑрнӑ.

Тӗтӗм шӑршине кӳршисем сиснӗ те пушарнӑйсене чӗннӗ. Ҫӑлавҫӑсем килсен кил хуҫине ҫунакан хваттертен илсе тухнӑ. Ӑна, сӗрӗмпе наркӑмӑшланнӑскере, пульницӑна илсе ҫитернӗ.

Пушар вӑхӑтӗнче ҫуртран 10 ҫынна урама кӑларнӑ. Юрать, вӗсенчен нихӑшӗ те шар курман.

mvdmedia.ru сайтри сӑн

Полици капитанӗ Сергей Ежов Ҫӗнӗ Шупашкар ҫывӑхӗнче Атӑл ҫинче катерпа патрульте пулнӑ. Ӑнсӑртран вӑл пулӑшу ыйтса кӑшкӑрнине илтнӗ.

Пӗр арҫын путма пуҫланӑ иккен, шывран тухаймасть. Сергей Ежов ӗҫтешӗпе Максим Атласкинпа ӑна шывран туртса кӑларнӑ та катер ҫине хунӑ. Ӑна шӑнӑр туртса лартнӑ, хӑй тӑнне ҫухатман-ха.

Путма пуҫланӑ арҫын 30 ҫулта, вӑл – Самара ҫынни. Палӑртмалла: Сергей Ежов полици тытӑмӗнче 30 ҫула яхӑн ӗҫлесе 3 ҫынна путасран ҫӑлнӑ.

РФ ШӖМӗн Шупашкарти пайӗн видеовӗнчен илнӗ сӑнӳкерчӗк

Шупашкарти полицейскисем Красноярскри хӗрарӑма тытса чарнӑ.

Ҫамрӑк хӗрарӑм пирӗн ҫӗршывра усӑ курма юраман халӑх ушкӑнӗнче страница уҫнӑ. Унта вӑл хӗрарӑмсем валли тӗрлӗ тавар сутни ҫинчен пӗлтерӳ вырнаҫтарнӑ.

Пӗлтерӳ тӑрӑх тавар туянас ӗмӗтлисем тупӑннӑ. Вӗсем укҫан пӗр пайне куҫарса панӑ.

Анчах сутуҫӑ тавара ярса паман. Красноярск хӗрарӑмӗ ҫавӑн пек майпа 10 хутчен улталани паллӑ. Пурӗ 30 пин тенкӗ ытлалӑх.

Йӗрке хуралҫисене вӑл ҫынсене улталанӑшӑн ӳкӗнетӗп, урӑх ун пек хӑтланмӑп тесе ӗнентерме хӑтланнӑ.