ШӖМ тунӑ сӑн

Авӑн уйӑхӗн пуҫламӑшӗнче полицие хыпар ҫитнӗ: Патӑрьел тата Комсомольски муниципаллӑ округӗсенче такам ҫул ҫинчи 70 ытла палла касса кайнӑ, тӗпӗсем кӑна юлнӑ. Ҫапла 30 ҫухрӑм ҫинчи паллӑсем ҫухалнӑ.

Ҫакна кам тунине палӑртма полицейскисене сехет те кирлӗ пулман - паллӑсене тиесе кайнӑ Газеле тупса палӑртнӑ. Ҫак ӗҫе Самар облаҫӗнче пурӑнакан арҫын тума пултарнине палӑрнӑ. Вӑл вӗсене тимӗр-тӑмӑра кайса пама шутланӑ иккен.

Арҫын тӗлӗшпе пуҫиле ӗҫ пуҫарнӑ.

cap.ru сӑнӳкерчӗкӗ

Чӑваш Енӗн ача-пӑчапа ҫамрӑксен вулавӑшӗ социаллӑ тата культура проекчӗсен конкурсӗнче ҫӗнтернӗ. Ҫавна май унта чӑвашла ҫутӗҫ программи хатӗрлӗҫ.

«Родной язык чувашской сказки» (чӑв. Чӑваш юмахӗн тӑван чӗлхи) проект «Лукойл» организаци Владимир, Вологда, Ярославль облаҫӗсенче, Мари Эл, Мордва Респуликинче, Чӑваш Енре ирттернӗ конкурсра ҫӗнтернӗ.

Грант укҫипе вулавӑш «Чӗвӗл-чӗвӗл чӗкеҫсем = Щебет ласточек» ҫутӗҫ программине хатӗрлӗ. Вӑл шкул ҫулне ҫитмен ачасем валли пулӗ. Ӑна чӑваш халӑх юмахӗсене тӗпе хурса пукане юмахӗ лартма 7 сценари хатӗрлӗҫ.

Алина Николаеван халӑх тетелӗнчи страницинчен илнӗ сӑнӳкерчӗк

Республикӑри тӗрлӗ район вӗрентекенӗсем Шупашкар муниципалитет тӑрӑхӗн Мӑнал шкулӗнче уҫӑ уроксенче пулнӑ.

Асӑннӑ тӑрӑхри Чӑрӑшкассинче чӑваш чӗлхипе литературине вӗрентекен Алина Николаева пӗлтернӗ тӑрӑх, Ишлей шкулӗнчи С.П. Гаврилова вӗрентекен «Манӑн тӑван ҫӗршыв» темӑпа текстпа ӗҫленӗ чухнехи вӑрттӑнлӑхсемпе паллаштарнӑ, Мӑнал шкулӗнчи А.Ю. Московцева рэп ӑсталӑхне кӑтартнӑ, Чӑрӑшкасси шкулӗнчи А.М. Николаева «Сӑвӑ тӗнчин асамлӑхӗ» темӑпа урок ирттернӗ.

«Кӗске вӑхӑт хушшинче саккӑрмӗшсем тата республикӑри чылай районти чӑваш чӗлхипе литература вӗрентекенӗсем сӑвӑ ҫырас теорипе паллашрӗҫ, тӗрлӗ мелпе сӑвӑсем ҫырса урока пӗтӗмлетсе вӗреннине ҫирӗплетрӗҫ», — хыпарланӑ Алина Михайловна халӑх тетелӗнчи хӑйӗн страницинче.

Чӑваш Енри продукци Индие ӑсанӗ. Кунта сӑмах «Вӑтам Атӑл — Каспи тинӗсӗ — Персид заливӗ» пӗрлехи суту-илӳпе логистика маршрутне йӗркелесси пирки пырать. Вӑл маршрут — «Ҫурҫӗр — Кӑнтӑр» пӗтӗм тӗнчери транспорт коридорӗн пӗр пайӗ.

Ятарлӑ килӗшӗве республика Элтеперӗ Олег Николаев тата Чӗмпӗр облаҫӗн кӗпӗрнаттӑрӗ Владимир Разумков «Раҫҫейре туса кӑларнӑ» пӗтӗм тӗнчери экспорт форумӗнче алӑ пуснӑ.

Проект Вӑтам Атӑл тӑрӑхӗнчи портсенчен, Атӑлҫипе Раҫҫейӗн Евопӑри пайӗнчен продукцие Каспи тинӗсӗ хӗрне, унтан Персид заливӗпе Инди таран ӑсатма май парӗ.

w-dog.ru сайтри сӑн

Шупашкарти Мускав районӗн ЗАГС ӗҫченӗсем хӑйне евӗр ята регистрациленӗ. Вӑл икӗ ятран тӑрать. Ашшӗ-амӑшӗ тин ҫуралнӑ хӗр пӗрчине Анна-Мишель тесе чӗнме шутланӑ.

Раҫҫейре иккӗллӗ ятсем хальлӗхе анлӑ сарӑлманнине палӑртмалла. Вӗсем хӑйне евӗр тата ашшӗ ячӗпе ытлах килӗшсе тӑмаҫҫӗ тесе шутлаҫҫӗ.

Иккӗлӗ ята ҫуралнине ӗнентерекен свидетельствӑра дефис урлӑ ҫыраҫҫӗ.

Инкеклӗ лару-тӑру министерстви тунӑ сӑн

Ӗнер, юпа уйӑхӗн 19-мӗшӗнче, 16 сехет ҫурӑра Шупашкарта «Раща» сад юлташлӑхӗнче икӗ хутлӑ ҫурт ҫунма пуҫланӑ. Иккӗмӗш хут ҫуннӑ.

Дача хуҫи, 68 ҫулти арҫын, пушара хӑй тӗллӗн сӳнтерме тытӑннӑ. Анчах вӑл хӑй шар курнӑ. Вӑл сӗрӗмпе наркӑмӑшланнӑ. Ӑна пульницӑна илсе ҫитернӗ.

Малтанлӑха пӗлтернӗ тӑрӑх, пушар кӑмакапа тӗрӗс мар усӑ курнӑран тухнӑ.

"Лиза Алерт" архивӗнчи сӑн

«Лиза Алерт» шыравпа ҫӑлав отрячӗн хастарӗсем Шупашкарти 37 ҫулти арҫынн пиллӗкмӗш кун шыраҫҫӗ. Дмитрий Вячеславович Герасимов юпа уйӑхӗн 15-мӗшӗнче килтен тухса кайнӑ та таврӑнман.

Вӑл 175 сантиметр ҫӳллӗш, куҫӗ кӑвак, ҫӳҫӗ тӗттӗм. Килтен кайнӑ чухне тӗттӗм кӑвак куртка, кӑвак джинс шӑлавар, сӑрӑ кроссовка тӑхӑннӑ.

Дмитрий Герасимов пирки мӗн те пулин пӗлетӗр тӗк ҫак номерсеме шӑнкӑравлама ыйтаҫҫӗ: 8(800)700-54-52 е 112. Лиза Алерт» инфоргӗ Ольга (Рыба), 89278443533.

Чӳк уйӑхӗн 8-мӗшӗнче Чӑваш патшалӑх филармонийӗнче «Пять вечеров» (чӑв. Пилӗк каҫ) фестиваль иртӗ. Ӑна Раҫҫейӗн Культура министерствипе Раҫсейӗн композиторсен союзӗ ирттереҫҫӗ. Ӑна ҫӗнӗ ятсемпе тата музыкӑри ҫӗнӗ енсемпе паллаштарас тӗллевпе йӗркелеҫҫӗ.

Кӑҫалхипе пиллӗкмӗш хутчен иртекен фестиваль вӑхӑтӗнче концертсем тӗрлӗ ҫӗрте пулӗҫ. Ҫав шутра — Мускаври академи филармонийӗ, «Зарядье» концерт залӗ, Мускаври П.И. Чайковский ячӗллӗ консерватори. «Мускаври концертсемсӗр пуҫне симфони, камера тата хор программисене ҫичӗ хулара – Барнаулта, Чулхулара, Петрозаводскра, Санкт-Петербургра, Сартура, Хабаровскра тата Шупашкарта — кӑтартӗҫ», — каласа кӑтартнӑ Раҫҫейри композиторсен союзӗн генеральнӑй директорӗ Карина Абрамян.

pravdapfo.ru сӑнӳкерчӗкӗ

Чӑваш Енӗн Патшалӑх ветеринари службин пуҫлӑхӗн ҫумне ӗҫрен кӑларнӑ. Ҫавӑн ҫинчен калакан йышӑнӑва ӗнер, юпа уйӑхӗн 18-мӗшӗнче алӑ пуснӑ.

Асӑннӑ должноҫра Николай Харитонов тӑрӑшнӑ. Асӑннӑ пукана вӑл 2014 ҫулта йышӑннӑ.

Чӑваш Енӗн Патшалӑх ветеринари службин пуҫлӑхӗн Александр Шакинӑн паянхи кну тӗлне пӗр заместитель тӑрса юлнӑ. Вӑл ҫын – Дмитрий Моисеев.

ШӖМ архивӗнчи сӑн

Чӑваш Енре «Халӑх участковӑйне» суйланӑ. Кӑҫал ку ята Вӑрмар поселокӗнчи Александр Сотников тивӗҫнӗ.

Вӑрмарта участковӑйӗнче вӑл виҫҫӗмӗш ҫул ӗҫлет. Ҫапах кунти икӗ участока кӑна мар, пӗтӗм поселока пӗлет вӑл. Халӗ вӑл пӑхса тӑракан территорире 10 пин ҫын пурӑнать.

Александр Сотников мӗн ачаран полицире ӗҫлеме ӗмӗтленнӗ. Халӗ унӑн аслӑ ывӑлӗ полицейски пуласшӑн, ҫынсене пулӑшасшӑн.