t.me/pro_cheby каналти видеоран илнӗ сӑнӳкерчӗк

Ҫӗнӗ Шупашкарта пӗр хӗрарӑм машина ҫине хӑпарса кайнӑ. Автомобиль хулари Никольски микрорайонта ларнӑ.

Асӑннӑ видео тӑрӑх хакласан, малтан вӑл автомобиль тӗкӗрне ватнӑ, унтан машина капочӗ ҫине улӑхнӑ, ун ҫинче сикнӗ, машина чӳречине ватнӑ.

Пӑтӑрмаха курнисем хӗрарӑма лӑпланма ыйтнӑ, вӑл вӗсене хӑйӗн машинипе кирек мӗн тума пултарнине пӗлтернӗ.

Хӗрарӑм хӑйӗн тарӑхӑвне ҫапла сирнине унӑн тусӗ сӑнаса тӑнӑ.

Пӑтӑрмаха курнисем шухӑшланӑ тӑрӑх, хӗрарӑм тепӗр хӗрпе явӑҫса кайнӑ каччине тарӑхнипе ҫапла тавӑрас тесе пултарнӑ. Машинӑна кӑштахран ҫамрӑк арҫын кӗрсе ларнӑ, машинӑна вӑл хускатса кайнӑ.

Михаил Зыков. cap.ru сайтри сӑн

Ӗнер республикӑра чи лайӑх педагогсене палӑртнӑ. Вӗсене 11 номинацире чысланӑ.

Кӑҫал «Чӑваш Енри учитель» ята Шупашкарти 4-мӗш лицейра ачасене историпе обществознани предмечӗсене вӗрентекен Михаил Зыков тивӗҫнӗ. Хӑй вӑл Шӑмӑршӑри шкултан вӗренсе тухсан И.Я.Яковлев ячӗллӗ ЧППУра диплом илнӗ. Лицейра 2018 ҫултанпа ӗҫлет.

«Ҫулталӑкри воспитатель» ята Куславккари «Звездочка» ача пахчин вӑй-хал культурин инструкторӗ тивӗҫнӗ. «Чи лайӑх класс ертӳҫи» - Улатӑрти 6-мӗш гимнази вӗрентекенӗ Елена Ахметова. «Чи лайӑх педагог-психолог» номинацире Ҫӗмӗрлери 1-мӗш шкулти Елена Яшпугалова ҫӗнтернӗ.

«Чи лайӑх социаллӑ педагог» - Шупашкарти 65-мӗш шкулти Екатерина Панькова. Шупашкарти пуҫламӑш шкулти Марина Борисова чи лайӑх дефектолог пулнӑ.

«Тӑван чӗлхепе литературин чи лайӑх вӗрентекенӗ» номинацире Шупашкар районӗнчи Мӑнал шкулӗн педагогӗ Анжела Московцева мала тухнӑ.

Ыран – ҫулла. Вӑл пӗлтӗрхи пекех шӑрӑх тата типӗ пуласси пирки калаҫаҫҫӗ.

Анчах синоптиксен прогноз урӑхла: ҫав тери шӑрӑх тата типӗ пулмӗ. Ҫапах ку ҫӗртме уйӑхне пырса тивмест. Ун чухне сывлӑш температури вӑтамран 17,5 градус ытларах пулӗ. Ҫумӑр 64 миллиметртан сахалрах ҫӑвӗ.

Пӗрремӗш декадӑра сивӗрех ҫанталӑк тӑрӗ. Унтан ӑшӑтма пуҫлӗ. Иккӗмӗш декадӑра термометр 30 градус таран кӑтартӗ. Ҫумӑр ытларах иккӗмӗш тата виҫҫӗмӗш декадӑсенче ҫӑвӗ. Ахӑртнех, вырӑнӑн-вырӑнӑн ҫӑвакан аслатиллӗ ҫумӑр пулӗ.

Инкеклӗ лару-тӑру министерстви тунӑ сӑн

Ӗнер, ҫу уйӑхӗн 30-мӗшӗнче, кӑнтӑрла иртсен 14 сехетре Шупашкар районӗнчи Оппукасси ялӗнче икӗ хутлӑ ҫурт ҫунма тытӑннӑ. Ҫав вӑхӑтра кил хуҫи, 67 ҫулти хӗрарӑм, килте пулман, аякка кайнӑ.

Кӳршисен 7 ҫулти мӑнукӗ пӳртре ҫулӑм тухнине пӗрремӗш асӑрханӑ. Вӑл кун пирки аслисене каланӑ. Вӗсем вара тӳрех пушарнӑйсене чӗннӗ.

Ҫӑлавҫӑсем пушара 11 минутра сӳнтернӗ. Ҫулӑм тӗпеле кӑна сиенлетсе ӗлкӗрнӗ.

Уголовлӑ ӗҫпе юсав тытӑмӗнче тӑрӑшакансемпе ветерансем чӑваш халӑхӗн паллӑ ывӑлне – шалти служба майорне Василий Федорова асӑнса чысларӗҫ. Вӑл 2017 ҫулхи ҫу уйӑхӗнче йывӑр чирленӗ хыҫҫӑн пурнӑҫран уйрӑлнӑ.

Ҫу уйӑхӗн 29-мӗшӗнче ир-ирех ведомство ӗҫченӗсем республикӑри Тӑвай районӗнчи Тӗмер тӑрӑхне Василий Валериановичӑн вилтӑпри ҫине чечек хума тата ӑна асӑнса пӗр минут шӑп тӑма ҫитнӗ.

Мероприятие Раҫҫей ФСИН регионти управленийӗн пуҫлӑхӗн ҫумӗ Вадим Адров, ведомствӑн ветерансен организацийӗн председателӗ Александр Яковлев, уголовлӑ ӗҫпе юсав тытӑмӗн ҫамрӑк ӗҫтешӗсем, ҫавӑн пекех тӑван пиччӗшӗ Владимир хӑйӗн ывӑлӗпе хутшӑннӑ.

Василий Валерианович вӗреннӗ Тӗмер шкулӗн директорӗ чӗннипе ведомство ӗҫченӗсем шалти службӑн чаплӑ выпускникне, Федорова В. В. генерал-майора халалланӑ ҫар мухтавӗн кӗтесне ҫитсе курчӗҫ. Хӑйӗн пурнӑҫӗн 35 ҫулне вӑл Тӑван ҫӗршывшӑн халалланӑ. Афганистанри ҫапӑҫусене хутшӑннӑскер, вӑл ӑслӑлӑх ӗҫне кӳленнӗ, преподаватель пулса ӗҫленӗ. Юридици ӑслӑлӑхӗсен кандидачӗ, доцент, 100 ытла ӑслӑлӑх ӗҫӗсен авторӗ.

Ентешӗсемпе ӗҫтешӗсем унпа чӑннипех те мухтанаҫҫӗ, ҫитӗнекен ӑрӑва ӑна тӗслӗх вырӑнне лартаҫҫӗ.

Малалла...

Кармалти пӗве. "Ҫыхӑнура" порталти сӑн

Куславкка районӗнчи Кармал ялӗнче тата Красноармейски районӗнчи Ҫеҫмерте 2020 ҫулта ҫуралнӑ арҫын ачасем путса вилнӗ.

Кармалта инкек ҫу уйӑхӗн 29-мӗшӗнче пулнӑ, Ҫеҫмерте вара – ҫу уйахӗн 30-мӗшӗнче.

Палӑртмалла: юлашки эрнере республикӑра 5 ача путса вилнӗ. Аса илтерер: Канаш районӗнчи Шӑхасан ялӗнче 8-9 ҫулсенчи 3 хӗрача шыва анса кайнӑ. Вӗсем Кӗҫӗн Ҫавалта шыва кӗнӗ.

chuvbook.ru сӑнӳкерчӗкӗ

Иван Яковлевӑн «Сармантей» юмахӗ нумаях пулмасть ҫӗнӗрен пичетленсе тухнӑ. Юмаха Чӑваш кӗнеке издательствинче икӗ чӗлхепе – чӑвашла тата вырӑсла – кун ҫути кӑтартнӑ.

Чӑваш кӗнеке издательсвтинче пӗлтернӗ тӑрӑх, кӗнекен кашни страницинче ӳнерҫӗ пӗр-пӗр пулӑма сӑнласа панӑ, пӗчӗк ачасен вара вӗсене тӗрлӗ тӗспе сӑрласа илемлетмелле.

Сӑрласа илемлетмелли кӗнекене Ольга Федорова редактор хатӗрленӗ. Ӳнерҫи – Светлана Бритвина.

Кӗнеке тиражӗ – 2000 экземпляр.

culture.cap.ru сӑнӳкерчӗкӗ

Трактор тӑвакансен культура керменӗнче «Пултарулӑх ҫуркунни» отчёт мероприятийӗсен ярӑмӗ иртнӗ. Концертсене ака уйӑхӗн 23-мӗшӗнчен пуҫласа ҫу уйӑхӗн 30-мӗшӗччен лартнӑ.

Сцена ҫине «Тайны Востока» (чӑв. Хӗвелтухӑҫ вӑрттӑнлӑхӗ) ташӑн халӑх шкулӗ; «Сувар» тата «Суварята» (чӑв. Суварҫӑсем) халӑх ташшисен халӑх ансамблӗсем; «Golden Flash» эстрада ташшин халӑх ансамблӗ; «Солнцеклеш» эстрада ташшин халӑх шкулӗ; «Фантом» эстрада ташшин халӑх ансамблӗ; «Этуаль» халӑх хореографи студийӗ; «Ҫӑлкуҫ» халӑх театрӗ; «ART NOVA» халӑх пултарулӑх студийӗ; «Бэби-шлягер» вокал халӑх эстрада студийӗ;

«Парне» чӑваш юррин ансамблӗ; «Кульминаци» театр студийӗ; «Феерия» хальхи вӑхӑтри ташӑ студийӗ тухнӑ.

culture.cap.ru сӑнӳкерчӗкӗ

Ӗнер, ҫу уйӑхӗн 30-мӗшӗнче, Марина Карягина тележурналист, поэт, сценарист, драматург ҫинчен Мускав режиссёрӗ ӳкернӗ фильма кӑтартассине эпир унччен пӗлтернӗччӗ-ха. Аса илтерер: Мускаври режиссёр Александр Куприн пӗлтӗр Раҫҫейӗн Культура министерствин саккасӗпе Марина Карягина ҫинчен «Встречное течение. Амфистроф» документлӑ фильм ӳкернӗ. Ӑна ӗнер Чӑваш пашалӑх ҫамрӑксен театрӗнчи «Ҫеҫпӗл» кинозалта Шупашкарта иртекен XVI пӗтӗм тӗнчери кинофестивальте кӑтартнӑ.

«Поэзи ҫинчен кино ӳкерме пӗттте ансат пулмарӗ», – палӑртса хӑварнӑ Шупашкарти куракансемпе иртнӗ тӗлпулура режиссёр. «Фильма курсан Марина Карягинан сӑввисене вулас, вӗсене тарӑнрах ӑнланас килсе каять», — тенӗ Мария Готлиб журналист.

Ҫеҫпӗл ялӗнчи музейри сӑнӳкерчӗксем

Республика влаҫӗ ҫитес ҫул хӑш паллӑ ҫыннӑн ҫуралнӑ кунне паллӑ тӑвассине палӑртнӑ. 2024 ҫулта чӑваш поэчӗ Ҫеҫпӗл Мишши ҫуралнӑранпа 125 ҫул ҫитет.

Михаил Кузьмич Кузьмин Канаш районӗнчи Касаккасси (халӗ - Ҫеҫпӗл) ялӗнче 1899 ҫулхи чӳк уйӑхӗн 16-мӗшӗнче ҫуралнӑ. "Ҫеспӗл" псевдонима вӑл 1918 ҫулта илнӗ. 1922 ҫулхи ҫӗртме уйӑхӗн 15-мӗшӗнче вӑл хӑйӗн ҫине алӑ хунӑ. Унӑн вилтӑпри - Украинӑри Остёр хулинче.

Сӑмах май, республикӑра кӑҫал Иван Яковлев ҫуралнӑранпа 175 ҫул ҫитнине паллӑ тӑваҫҫӗ.