Синоптиксем пӗлтернӗ тӑрӑх, ҫак кунсенче ҫанталӑк сивӗтет. Анчах кайран пирӗн пата «карчӑк ӑшши» килет.

Паян хӗвеллӗ-ха. Ыран та, шӑматкун, ӑшӑ пулӗ. Вырсарникун вара тӑрук сивӗтӗ, 10-15 градус кӑна ӑшӑ пулӗ. Ҫӗрле 1-6 градус кӑна ӑшӑ тӑрӗ, тӑм ӳкме пултарӗ. Тунтикун каҫхине ҫил лӑпланӗ, термометр «минус» кӑтартӗ. Ку – чи сивӗ кун. Кайран ӑшӑтма тытӑнӗ.

Авӑнӑн 25-мӗшӗнчен республикӑна ӑшӑ килме тытӑнать, кӑнтӑрласерен 20 градус ӑшӑ пулӗ. Малтанлӑха пӗлтернӗ тӑрӑх, «карчӑк ӑшши» ҫитес эрнери шӑматкунччен тӑрӗ. Авӑнӑн юлашки 2 кунӗнче кӑна кӗрхи ҫанталӑк пулӗ.

Роспотребнадзор ӗҫченӗсем Вӑрмар округӗнчи ҫӳп-ҫап полигонне тӗрӗслеме кайнӑ. Унта пушар тухнӑ.

Специалистсем ҫывӑхри ялти тата Вӑрмарти сывлӑша та тӗрӗсленӗ, унта тӗтӗм шӑршине тупса палӑртман.

Полигонра пушар авӑнӑн 16-мӗшӗнче тухнӑ, ҫулӑм 900 тӑваткал метра ярса илнӗ. Полигона «Водоканал» пӑхса тӑрать. Роспотребнадзор ӑна асӑрхаттару панӑ.

Следстви комитечӗн сайтӗнчи сӑн

Авӑн уйӑхӗн 16-мӗшӗнче Ҫӗмӗрлери чукун ҫул ҫинче 1997 ҫулта ҫуралнӑ хӗрарӑма тиев турттаракан пуйӑс ҫапса кайнӑ. Вӑл ӳсӗр пулни паллӑ.

Машинист ӑна таптаса каяс мар тесе пуйӑса чарма хӑтланнӑ. Анчах ӗлкӗреймен. Юрать-ха, хӗрарӑм чӗрех юлнӑ. Ӑна пульницӑна илсе ҫитернӗ.

Ку тӗслӗх тӗлӗшпе халӗ следстви умӗнхи тӗрӗслев ирттереҫҫӗ.

cap.ru сайтри сӑн

Шӑматкун республикӑра йӑлана кӗнӗ «Нацисен кросӗ» иртӗ. Ҫавӑн чухнех Сывлӑхпа спорт кунӗ пулӗ. Ҫавна май спорт учрежденийӗсене тӳлевсӗрех кӗме май пур. Анчах малтан спорт шкулӗсен, ФОКсен сайчӗсенче ҫырӑнмалла.

«Нацисен кросӗн» тӗп старчӗ 12 сехетре Шупашкарти Мускав ҫыранӗнче пулӗ. Унта хутшӑнакансем 1, 4, 6, 8 тата 12 ҫухрӑмсене парӑнтарӗҫ. Регистраци паян вӗҫленет. Патшалӑх пулӑшӑвӗсен порталӗнче те регистрациленме пулать.

Чупакансен тухтӑртан илнӗ справка пулмалла.

nalog.gov.ru сайтри сӑн

Вӑрнар округӗнче Ҫӗнӗ ҫул тӗлне тивӗҫлӗ канури 6 ҫын пенси укҫине илеймен. Мӗншӗн тесен ӑна почта уйрӑмӗн пуҫлӑхӗ /халӗ вӑл ӗҫлемест/ хӑйен кӗсйине чикнӗ.

Судра палӑртнӑ тӑрӑх, 2023 ҫулхи раштавран пуҫласа 2024 ҫулхи кӑрлаччен ҫак пуҫлӑх вӗсемшӗн хӑй алӑ пусса укҫине хӑй илнӗ. Пӗтӗмпе – 197 пине яхӑн тенкӗ.

50 ҫултискер ҫапла тунине прокуратура палӑртнӑ. Пуҫиле ӗҫ пуҫарсан ӑна ӗҫрен кӑларнӑ. Судра вал айӑпне йышӑннӑ, тӑкака саплаштарнӑ. Ӑна тӗрмене хупмасӑр 1 ҫуллӑха айӑпланӑ.

Чӑваш Енри пике Светлана Ярандайкина Пӗтӗм тӗнчери «Стюардессӑсен топӗ» конкурс финалне лекнӗ. Пӗтӗмпе 2586 заявка килнӗ, Светлана – вӗсен йышӗнче.

Вӑл 20 ҫултанпа бортпроводникре ӗҫлет. Хальччен вӑл 4 пине яхӑн вӗҫеве тухнӑ. Светлана – Хӗрлӗ Чутай округӗнчен. Вӑл тахҫанах Мускавра пурӑнать.

Хӑй палӑртнӑ тӑрӑх, Чӑваш Ене вӑл хаваспах вӗҫет, чӑвашла калаҫнине илтсен ачалӑха аса илет.

"На связи" форумри сӑн

Шупашкарта Президент бульварӗнче унччен банк пулнӑ вырӑнта ҫӗнӗ арт-объект лартнӑ. Вӑл кукша пуҫ евӗрскер, анчах унта - алӑ тупанӗсем. Тӗпӗ - гранитран. Ун ҫине ырӑлӑх пирки чӑвашла тата вырӑсла ҫырнӑ.

Арт-объект авторӗ - Мускаври скульптор, Пӗтӗм тӗнчери ырӑлӑх академийӗн президенчӗ Григорий Потопцкий. Унашкал арт-объектсене 35 ҫӗршывра вырнаҫтарнӑ.

Сӑнӳкерчӗкре - Савелий Иванов. «Контактри» сӑн

Раҫҫейри паллӑ телеертӳҫӗ Дмитрий Хаустов Ҫӗнӗ Шупашкарта шкул ачисем валли ӑсталӑх класӗ йӗркеленӗ. Ӑна ҫынсем «Спокойной ночи, малыши!» кӑларӑмри Степашка тӑрӑх пӗлеҫҫӗ.

Паллӑ телеертӳҫӗсен сӑн-сӑпатне епле тӑваҫҫӗ? Массӑллӑ информаци хатӗрӗсенче суяна епле пӗлмелле? Телекуравҫӑсем валли сюжета епле майпа ӗнентерӳллӗн кӑтартмалла? Нумай ыйтӑва сӳтсе явнӑ вӗсем.

Юлашкинчен ачасем Дмитрий Хаустовпа сӑн ӳкерӗннӗ.

«Конактри» сӑн

Шупашкарти 62-мӗш шкулта чӑваш чӗлхипе литературине вӗрентекен Людмила Николаева Хусанта иртекен «Тӑван чӗлхепе тӑван литературӑн чи лайӑх вӗрентекенӗ» Пӗтӗм Раҫҫейри конкурсӑн финалне хутшӑнать.

Людмила Петровна – ЧР тава тивӗҫлӗ учителӗ, аслӑ категориллӗ педагог. Вӑл унӑн урокӗсем ачасене савӑнӑҫ кӳччӗр тесе тӑрӑшать.

Мӗнех, ӑнӑҫу сунатпӑр! Ҫӗнтерӳҫӗ ячӗсем авӑн уйӑхӗн 21-мӗшӗнче паллӑ пулӗҫ.

«Контактри» сӑн

Тӑвай округӗнчи Татьяна Юркина сыр пӗҫерес енӗпе чӑн-чӑн ӑста. Качотта, сулугуни, халуми, ламбер… Тӗрлӗрен сыр хатӗрлет вӑл.

Татьяна Пӗтӗм Раҫҫейри «Ӗҫ ҫыннисем» конкурса хутшӑнма заявка панӑ. Вӑл «Ӗҫлӗ хӗрарӑм» номинацире тупӑшӗ.

Татьяна Юркина хӑйӗн ӗҫне аталантарма патшалӑхран пулӑшу илнӗ. 2023 ҫулта унӑн предприятийӗнче 800 килограма яхӑн сыр тунӑ. Кӑҫал вара ку кӑтартӑва тата пысӑклатасшӑн. Унӑн сырӗсене Вӑрмар, Тӑвай, Канаш Ҫӗрпӳ, Патӑрьел округӗсенче, Шупашкарта, Ҫӗнӗ Шупашкарта пурӑнакансем юратса ҫиеҫҫӗ.