Чӑваш Енри ултӑ районта инкеклӗ лару-тӑру режимӗ туса хунӑ. Хушӑва республика Элтеперӗ Олег Николаев алӑ пуснӑ.

Документра каланӑ тӑрӑх, чрезвычайлӑ лару-тӑру режимне утӑ уйӑхӗн 28-мӗшпе 29-мӗшӗсенчи ҫутҫанталӑкӑн хӑрушла пулӑмӗсене сирсе ярас тӗллевпе йышӑннӑ.

Асӑннӑ режима Канаш, Комсомольски, Вӑрмар, Ҫӗрпӳ, Шупашкар, Елчӗк тӑрӑхӗсенче туса хунӑ. Вырӑнтисене пулӑшма республикӑн Резерв фондӗнчен укҫа-тенкӗ уйӑрса парӗҫ.

cap.ru сӑнӳкерчӗкӗ

Йывӑрлӑха лекнӗ хӗрарӑмсене пулӑшассине Чӑваш Енре анлӑлатасшӑн.

Пурнӑҫри йывӑр лару-тӑрӑва лекнисене пулӑшакан сакӑр центртан тӑракан сеть йӗркелесшӗн. Ӑна пирӗн республикӑра 2025 ҫул тӗлне ӗҫлеттерсе ярасшӑн.

Паянхи куна ун пек нумай функциллӗ центрсем Шупашкарта тата Ҫӗмӗрлере пур. 2023 ҫул вӗҫне Шупашкарпа Канашра ӗҫлеттерсе ярасшӑн. 2025 ҫул тӗлне ун пеккисене тата тепӗр тӑваттӑ йӗркелесшӗн: Шупашкарта, Вӑрмарта, Улатӑрта, Ҫӗнӗ Шупашкарта.

Асӑннӑ центрсен сетьне Чӑваш Енӗн Ӗҫ тата социаллӑ хӳтлӗх министерстви, халӑха социаллӑ пулӑшу паракан комплекслӑ центрсен уҫмалла.

cap.ru сӑнӳкерчӗкӗ

Ҫурлан 4-мӗшӗнче ирхи 4 сехетре ҪҪХПИ инспекторӗсем фура водительне чарнӑ. Лешӗ кӑкӑрӗ тӗлӗнчен ыратнипе докуменчӗсене те часах шыраса тупайман. Аптӑрани пирки инспекторсене те каласа кӑтартнӑ, хӑй таҫта шӑннӑ тесе шутланӑ. Ҫавӑнпа малаллах каяссишӗн ҫине тӑнӑ. Аптекӑран ыратнине ирттерекен эмел туянса сывлӑхне ҫӑмӑллатма шутланӑ.

Анчах инспекторсем ӑна малалла кайма чарнӑ, васкавлӑ медпалӑшу чӗннӗ. Ҫапла вӗсем водителӗн пурнӑҫне ҫӑлнӑ. Унӑн инфаркт иккен - юн тымарӗ хупланса ларнӑ. Республикӑри кардиологи диспансерӗн тухтӑрӗсем унӑн сывлӑхне йӗркене кӗртнӗ, стенировани тунӑ. Арҫынна кӗҫех киле реабилитацие ярӗҫ. Вӑл Томск хулинчен Мускава кайма тухнӑ пулнӑ.

arbitrazpro.ru сайтри сӑн

Банкра ӗҫлекен ҫамрӑк специалист ултавҫӑсен аллине лекнӗ. Ҫапла вӑл 25 пин тенкӗ ҫухатнӑ.

19 ҫулти хӗр патне палламан ҫын шӑнкӑравланӑ. Вӑл финанс учрежденийӗн ӗҫченӗ имӗш. Хайхискер пӗлтернӗ тӑрӑх, ултавлӑ майпа пама хатӗрленнӗ кредита чарса лартмалла. Хӗр палламан ҫын каланине пурнӑҫласа пынӑ та 25 пин тенкине ҫухатнӑ.

Хӗр хӑйне улталани пирки полицие пырса каласа кӑтартнӑ. Халӗ кун тӗлӗшпе пуҫиле ӗҫ пуҫарас ыйтӑва пӑхса тухаҫҫӗ.

ШӖМ тунӑ сӑн

Паян ирхине А-151 федераци автоҫулӗн 5-мӗш ҫухрӑмӗнче авари пулнӑ. Шел, инкексӗр иртмен - пӗр ҫыннӑн пурнӑҫӗ татӑлнӑ.

ШӖМ малтанлӑха пӗлтернӗ тӑрӑх, «Лада Гранта» водителӗ хирӗҫ ҫул ҫине тухса кайнӑ та «Хендайпа» ҫапӑннӑ. Кун хыҫҫӑн иномарка ҫунма тытӑннӑ.

«Лада Грантӑри» пассажир, 40 ҫулти арҫын, вилнӗ. Водительсем вара, иккӗшӗ те, аманнӑ.

cap.ru сӑнӳкерчӗкӗ

Ӗнер Шӑмӑршӑ районӗнче комбайн ҫунса кайнӑ. Ку 15 сехет те 10 минутра пулнӑ.

"Строитель плюс" предприятин Дон-1500Б комбайнӗ урпа вырнӑ. Тӑрук унӑн мотор отсекӗ ҫунма тытӑннӑ. Комбайн вӑйлах ҫунса кайнӑ.

Чӑваш Енри Гостехнадзор пӗлтернӗ тӑрӑх, комбайн юсавлах пулнӑ. Пушар сӳнтермелли хатӗрпе те тивӗҫтернӗ ӑна. Техтӗрӗслев витӗр вара нумаях пулмасть, утӑ уйӑхӗн 12-мӗшӗнче, тухнӑ.

Гостехнадзор шутланӑ тӑрӑх, комбайнер напарникпе ӗҫленӗ тӗк тӑкак пӗчӗкрех пулӗччӗ - иккӗшӗ ҫулӑма хӑвӑртрах сӳнтерме ӗлкӗреччӗҫ.

Ӗнер Валерий Андреев (16.02.1956–07.08.2023) чӗлхеҫӗ куҫне ӗмӗрлӗхе хупнӑ.

Валерий Васильевич Канаш районӗнчи Ҫӗнӗ Шуртан ялӗнче ҫуралнӑ. Вӑл – чӑваш чӗлхи тӗпчевҫи, филологи ӑслӑлӑхӗсен кандидачӗ, доцент.

Валерий Андреев 1990 ҫулта вӑл И.Н. Ульянов ячӗллӗ ЧПУӗн чӑваш чӗлхи кафедрин доценчӗ пулса тӑрӑшма тытӑннӑ. Унта вӑл хӑй йывӑр чире кайичченех тӑрӑшнӑ.

Валерий Андреева аван пӗлнисем вӑл «лекцисемпе семинарсене яланах чунри ҫӗкленӳпе, чӗлхери тӗлӗнтермӗшле тӗслӗхсемпе «пуянлатса» ирттернине» палӑртаҫҫӗ.

gorodglazov.com сайтри сӑн

Ҫанталӑк шӑрӑх тӑрать. Ҫынсем шывра чӑмпӑлтатса уҫӑлаҫҫӗ. Анчах шыв ҫинче инкек пуласси те часах. Республикӑра 3 кунра пилӗк ҫын путса вилнӗ.

Ҫурлан 4-мӗшӗнче Шупашкарта тӗп пляжра Атӑлтан арҫын виллине кӑларнӑ. Тепӗр кунхине ГЭС патӗнче Ҫӗнӗ Шупашкарти 46-ри арҫын путса вилнӗ. Вӑл ӳсӗрле шыва кӗнӗ. Ҫав кунах Елчӗк районӗнче 47 ҫулти арҫыннӑн пурнӑҫӗ шыва кӗнӗ чухне татӑлнӑ.

Ҫурлан 6-мӗшӗнче Улатӑр районӗнче 47 ҫулти арҫын путнӑ. Ҫав кунах Комсомольски районӗнче 49-ти хӗрарӑм шывран тухайман.

cap.ru сӑнӳкерчӗкӗ

Ҫурла уйӑхӗн 26-мӗшӗнче Шупашкарта «Раҫҫейри чи лайӑх такси водителӗ» конкурсӑн финалӗ иртӗ. Ӑна Пӑр керменӗнче йӗркелӗҫ.

Конкурса 32 регионти таксист хутшӑнӗ. ЧР Транспорт министерстви пӗлтернӗ тӑрӑх, пӗрремӗш вырӑн йышӑннӑ таксиста машина парнелӗҫ тата 150 пин тенкӗпе хавхалантарӗҫ. Иккӗмӗш вырӑн йышӑнакана 100 пин тенкӗ парӗҫ. Виҫҫӗмӗш вырӑншӑн вара 50 пин тенкӗ лекӗ.

Водительсем 3 тур витӗр тухӗҫ: теори, ӑсталӑх тата пултарулӑх.

Тӳре-шара Шупашкартан Ҫӗнӗ Шупашкара троллейбус ярасси пирки тахҫанах калаҫать. Темиҫе ҫул каялла унта 100-мӗш троллейбус ҫӳретчӗ-ха. Анчах 2020 ҫулта ӑна кӑшӑлвируса пула тата унпа халӑх сахал усӑ курать тесе хупнӑ.

ТАСС пӗлтернӗ тӑрӑх, троллейбуссене ҫитес ҫул пуҫламӑшӗнче ярӗҫ. 62-мӗш маршрутпа ҫӳрӗҫ вӗсем, линире автономлӑ мелпе ҫӳрекен 21 троллейбус пулӗ. Троллейбуссемпе раштав уйӑхӗн 1-мӗшӗччен Ӗпхӳри трамвайпа троллейбус савучӗ тивӗҫтерӗ.