t.me/pro_cheby сӑнӳкерчӗкӗсем

Шупашкар хулинчи нумай хутлӑ ҫуртсенчен пӗринче балкон тӗпренсе тӑрать иккен.

Телеграмри каналсенчен пӗринче хыпарланӑ тӑрӑх, Эгер бульварӗнчи 20-мӗш ҫуртӑн балконӗсем халь-халь ишӗлсе анасла. Бетон катӑкӗсем час-часах ҫӗре ӳкеҫҫӗ. Вӗсем кӗмелли алӑк карлӑкӗ ҫине персе анаҫҫӗ.

Асӑннӑ ҫӑлкуҫра пӗлтернӗ тӑрӑх, апла пулин те управляющи компани нимӗн те тӑвасшӑн мар имӗш.

chgtrk.ru видеовӗнчен илнӗ сӑнӳкерчӗк

Чӑваш Енре тӗрлӗ ялта ял кунӗсем иртеҫҫӗ. Нумаях пулмасть Етӗрне тӑрӑхӗнчи Анат Явӑшра та иртнӗ.

Унта пухӑннисем чи малтан Анат Явӑш ялӗн ҫӑви ҫинче пуҫтарӑннӑ. Унта Чӑваш наци конгресне 16 ҫул ертсе пынӑ Геннадий Архипов вил тӑприйӗ ҫине чечек хунӑ.

Унтан уяв ялти ятарлӑ лапамра иртнӗ. Асӑннӑ тӑрӑхра ҫуралса ӳссе тӗрлӗ тӑрӑха сапаланнӑ ентешсем те пырса ҫитнӗ.

Чӑваш эстрада юрӑҫисем, Куславккапа Хӗрлӗ Чутай тӑрӑхӗсенчи пултарулӑх ушкӑнӗсем хаваслӑ юрӑ-ташӑпа, мыскарасемпе савӑнтарнӑ.

cap.ru сӑнӳкерчӗкӗ

2005-2015 ҫулсенче Улатӑр хулин администрацийӗн пуҫлӑхӗ пулнӑ Михаил Марискина Улатӑр хулин хисеплӗ ҫыннин ятне панӑ.

2018 ҫулта ӑна коррупцишӗн судпа айӑпланӑ. Следстви тата суд палӑртнӑ тӑрӑх, вӑл подряд организацине нимшӗн-мӗншӗн хыснаран 1,1 миллион тенкӗ куҫарса панӑ. Лешӗ хӑйӗн ӗҫне пурнӑҫламан та. Кунсӑр пуҫне вӑл ҫӗрпе ҫыхӑннӑ ултавшӑн та айӑпланнӑ. Суд Михаил Марискина юсанмалли колоние 2 ҫул та 8 уйӑхлӑха яма йышӑннӑ.

ШӖМ тунӑ сӑн

Утӑ уйӑхӗн 31-мӗшӗнче каҫхи 11 сехет ҫитеспе Шупашкарти Ленин Комсомолӗн урамӗнче хӗрарӑм арҫын хыҫҫӑн: "Арҫын, тавара тавӑрса пар!" - тесе чупнӑ. Ҫав вӑхӑтра полици капитанӗ Валерий Горшков ӗҫ хыҫҫӑн киле таврӑннӑ. Хӗрарӑм кӑшкӑрнине кура вӑл та арҫын хыҫҫӑн чупнӑ. Хайхискере тытса чарнӑ.

Арҫын лавккаран пӗр ещӗк сӑра вӑрласа тухнӑ иккен. Ҫав кун вӑл ҫак лавккаран темиҫе хут та тавар йӑкӑртма тӑнӑ иккен.

Палӑртмалла: 33 ҫулти арҫын унччен судпа пӗрре мар айӑпланнӑ. Хальлӗхе ӑна, ун тӗлӗшпе пуҫарнӑ пуҫиле ӗҫе тишкернӗ вӑхӑтра, тухса ҫӳреме чарнӑ.

Чӑваш Енре ӗҫ укҫи ӳссех пырать. Ҫапла пӗлтерет Росстат.

Пӗлтӗр ҫу уйӑхӗнче вӑтам шалу 40 пин тенкӗпе танлашнӑ. Кӑҫал ҫав уйӑхра вара вӑтам ӗҫ укҫи 49195 тенкӗ пулнӑ. Ку енӗпе Чӑваш Ен Атӑлҫи федераци округӗнчи 5 регионтан иртсе кайнӑ. Ҫакна та палӑртмалла: пирӗн республикӑри вӑтам шалу виҫи 9 уйӑх ӗнтӗ 40 пин тенкӗрен ытларах.

Танлаштарма: 2020 ҫулта вӑтам ӗҫ укҫи 31844 тенкӗпе танлашнӑ, 2021 ҫулта - 35798 тенкӗпе, пӗлтӗр вара - 41216 тенкӗпе.

t.me/pro_cheby сӑнӳкерчӗкӗсем

Йӑлӑмра правасӑр яш инкеке лекнӗ.

Мотоциклпа пыраканскер руле ҫултан айккинелле пӑрса янипе ҫаврӑнса ӳкнӗ.

Каччӑ суранланнӑ, ӑна больницӑна илсе кайнӑ. Аманнӑскер унта сипленӗ.

pravdapfo.ru ҫӑлкуҫри материалсемпе усӑ курса хатӗрленӗ коллаж

«Хыпар» Краснов депутата явап тыттарасшӑн. Ҫапларах пӗтӗмлетме пулать «Правда ПФО» тӗнче тетелӗнчи хаҫатра утӑ уйӑхӗн 31-мӗшӗнче «Краснов о тиражах и миражах» ятпа пичетленнӗ блогра.

Асӑннӑ ҫӑлкуҫ хыпарланӑ тӑрӑх, «Хыпар» хаҫат ӗҫченӗсен пӗр ушкӑнӗ республика парламенчӗн депутатне Пётр Краснова редакцие пӗрмай критикленӗшӗн (ӑнланманлӑх пирки Чӑваш халӑх сайтӗнче «Петр Краснов депутат «Хыпара» мӗншӗн тапӑннӑ?» ятпа пичетленнӗ хыпарта Софья Савнеш унччен пӗлтернӗччӗ-ха) явап тыттарма ыйтса Чӑваш Енӗн Патшалӑх Канашӗн этика енӗпе ӗҫлекен комиссине заявлени ҫырса панӑ-мӗн. Комисси вара ҫав хута пӑхса тухассине каярах вӑхӑта хӑварнӑ имӗш.

Асӑннӑ блогра Пётр Краснов депутат ӗнентернӗ тӑрӑх, унӑн тӗп чӑваш хаҫатне е пӗр-пӗр ҫынна тапӑнас тӗллев ҫук. Вӑл, республикӑн пӗрремӗш пичет министрӗ пулнӑскер, «Хыпар» шӑпишӗн питӗ пӑшӑрханать-мӗн.

youtube.com сайтри сӑн

Шупашкарта троллейбус водительне ултавҫӑсем шӑнман пӑр ҫине лартса янӑ. Вӑл вӗсене 1,75 миллион тенкӗ куҫарса панӑ. Ку укҫана арҫын кредит илнӗ. Хӑй каласа кӑтартнӑ тӑрӑх, ун патне "Мускаври йӗрке хуралҫи" шӑнкӑравланӑ.

Шупашкарти 38 ҫулти арҫын та самай пысӑк укҫасӑр юлнӑ. Хӑйӗнпе "Тӗп банк ӗҫченӗ" тесе паллаштарнӑ арҫын ӑна пухнӑ 755 пин тенкине урӑх счет ҫине куҫарма ӳкӗте кӗртнӗ. Кунсӑр пуҫне кредит илтернӗ. Ҫапла вӑл ултавҫа 2 миллион тенке яхӑн куҫарса панӑ.

Халӑх тетелӗнчи Светлана Васильева страницинчен илнӗ сӑнӳкерчӗк

Паян Канаш районӗнчи Чакаҫ ялӗнче ҫӗнӗ аллея уҫӑлнӑ.

Сывлӑшпа десант ҫарӗнче пулнисем маларах «Никто, кроме нас» (чӑв. Пирӗнсӗр пуҫне никам та) стела вырнаҫтарнӑ, моряксем — якорь евӗрлӗ «Защитникам морских рубежей» (чӑв. Тинӗс чиккисен хӳтӗлевҫисене) стела тата Андреев ялавне.

Митинга вырӑнти хастарсем, «Сияние» тата «Ҫӑлкуҫ» ташӑ тата пултарулӑх ушкӑнӗсем те хутшӑннӑ.

putpobedy.ru сӑнӳкерчӗкӗ

Патшалӑхӑн массӑллӑ информаци хатӗрӗсенче ӗҫлекенсем тава тивӗҫлӗ ятсене час-часах тивӗҫеҫҫӗ тесен те йӑнӑшмастпӑр пулӗ.

«Чӑваш Республикин культурӑн тава тивӗҫлӗ ӗҫченӗ» хисеплӗ ята халӗ Вӑрнар районӗнчи «Ҫӗнтерӳ ҫулӗ» хаҫат редакторне Светлана Чикмяковӑна панӑ.

Ҫак хӗрарӑм 1999 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. 2002-2005-мӗш ҫулсенче вӑл асӑннӑ хаҫатра пай пуҫлӑхӗнче, тӗп редакторӑн заместителӗнче-яваплӑ секретарьте ӗҫленӗ. Юлашки ҫулсенче редактор пулса тӑрӑшать.

Вӑл А. Емельянов ячӗллӗ преми лауреачӗ те пулса тӑнӑ. Ӑна республикӑн Патшалӑх Канашӗн тата РФ Ҫыхӑну тата массӑллӑ коммуникацисен министерствин Хисеп грамотисемпе те чысланӑ.