Прокуратура архивӗнчи сӑн

Прокуратура Хӗрлӗ Чутай муниципаллӑ округӗнчи шкулсене санитарипе эпидемиологи саккунӗсене мӗнле пӑхӑннине тӗрӗсленӗ. Икӗ шкулта санитари нормине пӑснине тупса палӑртнӑ.

Хӗрлӗ Чутай шкулӗнче шӑна нумай пулни палӑрнӑ. Мӑн Этмен шкулӗнче вара техперсонал валли уборнӑй пулман.

Ҫак икӗ шкул тӗлӗшпе прокуратура представлени ҫырнӑ. Пӗр шкул директорӗ тӗлӗшпе административлӑ ӗҫ пуҫарнӑ.

Муркаш муниципаллӑ округӗнчи Автанкасси ялӗнче арҫынна шыраҫҫӗ. Унран виҫҫӗмӗш кун хыпар ҫук.

71 ҫулти Юрий Васильев раштавӑн 27-мӗшӗнче килтен тухса кайнӑ та таврӑнман. Юрий Иванович 170 сантиметр ҫӳллӗш, туллирех кӗлеткеллӗ, ҫӳҫӗ тата усси шуралнӑ. Вӑл ӑсӗпе арпашма, ҫухалса кайма пултарать. Килтен кайнӑ чухне тӗттӗм кофта, шӑлавар, резин атӑ, хӑлхаллӑ калпак тӑхӑннӑ.

Ҫак номерсемпе шӑнкӑравлама ыйтаҫҫӗ: 8(800)700-54-52 е 112. «Лиза Алерт» инфоргӗ: Леонид (Енот) 89003319602.

Синоптиксем Ҫӗнӗ ҫула ҫанталӑк мӗнле пулассине пӗлтернӗ. Прогноз унчченхинчен улшӑннӑ.

Раштавӑн 30-31-мӗшӗсенче Шупашкарта 5-10 сантиметр хулӑнӑш юр ҫума пултарать. Сывлӑш температури 5-10 градус сивӗ пулӗ.

Ҫӗнӗ ҫул каҫхине пирӗн пата Хӗл мучи сивви ҫывхарӗ. Циклон кайӗ, раштавӑн 31-мӗшӗнче ҫӗрле 10-12 градус сивӗ тӑрӗ, ирхине вара – 12-17 градус сивӗ.

Кӑрлачӑн 1-мӗшӗнче юр ҫӑвӗ. Кӑрлачӑн 2-мӗшӗнченпе кӑнтӑрла 17-22 градус сивӗ тӑрӗ, ҫӗрлесерен – 30 градус сивӗ.

Малтанлӑха пӗлтернӗ тӑрӑх, каникулта сивӗ ҫанталӑк пулӗ. Иккӗмӗш декада пуҫламӑшӗнче кӑна юр ҫӑвӗ, ӑшӑтӗ.

ШӖМ тунӑ сӑн

Раштав уйӑхӗн пуҫламӑшӗнче Канаш муниципаллӑ округӗнчи Кивӗ Шелттем ялӗнче пурӑнакан 29 ҫулти арҫынна Канаш вокзалӗнче ҫаратнӑ. Вӑл, сусӑрскер, унта ашшӗ-амӑшӗпе пулнӑ. Кӗтмен ҫӗртен ун патне палламан ӳсӗр арҫын пынӑ та хӑйне тахҫанхи тусӗ пек тыткаланӑ, ыталаса илнӗ. Ҫав вӑхӑтра вӑл сусӑрӑн енчӗкне кӑларса илнӗ. Унта вара 4 пин тенке яхӑн пулнӑ.

Йӗрке хуралҫисем ҫакна ҫав округрах пурӑнакан, унччен судпа айӑпланнӑ 39 ҫулти арҫын тунине палӑртнӑ. Ӑна тытса чарнӑ, ун тӗлӗшпе пуҫарнӑ пуҫиле ӗҫе кӗҫех суд пӑхса тухӗ.

forum.na-svyazi.ru сӑнӳкерчӗкӗ

Ҫӗмӗрле хулинчи поликлиника ӗҫлемест, ӑна 2025 ҫулта ҫеҫ тӗплӗн юсӗҫ.

Чӑваш Ен Элтеперӗ Олег Ниолаев нумаях пулмасть ирттернӗ тӳрӗ лини вӑхӑтӗнче ун патне Ҫӗмӗрле хӗрарӑмӗ шӑнкӑравланӑ, вӑл Ҫӗмӗрлери хула больници мӗншӗн ӗҫлеменнипе кӑсӑкланнӑ.

Республикӑн Сывлӑх сыхлав министерствинче уҫӑмлатса панӑ тӑрӑх, 2-мӗш поликлиника вӑхӑтлӑха ӗҫлемест, мӗншӗн тесен ҫав ҫурта тӗплӗн юсамалла. Ӗҫе 2025 ҫулта ҫеҫ пурнӑҫлӗҫ.

Унта Республикӑн ӳтпе венерологи диспансерӗн тата Республикӑн нарколог диспансерӗн диспансер уйрӑмӗсем те унта пулӗҫ.

Ҫӗмӗрлере пурӑнакансен хальлӗхе хулари 1-мӗш поликлиникӑна ҫӳремелле.

tavanen.ru сайтри сӑн

Республикӑна 49 ҫӗнӗ шкул автобусӗ килсе ҫитнӗ. Вӗсене округсемпе хуласене ӑсатнӑ. Чи малтанах вӗсем шкулсенчи автопарка ҫӗнетме кирлӗ. Ҫӗнӗ транспортпа ҫӗнӗ маршрутсем уҫма та палӑртнӑ.

Автобуссем хӑтлӑ та хӑрушсӑр. Вӗсенчен ГЛОНАСС, хӑрушсӑрлӑх пиҫиххисем пур. Палӑртмалла: хальхи вӑхӑтра республикӑра 13,5 пин ачана 360 ытла автобус шкула илсе ҫӳрет. ЧР Элтеперӗ Олег Николаев палӑртнӑ тӑрӑх, шкулсенчи автопарка вӑхӑтрах ҫӗнетеҫҫӗ. Ҫӗнӗ транспорт килни ачасене кружоксемпе секцисене ҫӳреме май туса парать.

cap.ru сайтри сӑн

Раштав уйӑхӗн 30-мӗшӗнче Шупашкарта ретро-троллейбус ҫула тухӗ. Хальхинче ӑна Ҫӗнӗ ҫул уявне халалласа капӑрлатӗҫ.

Троллейбусра Хӗл мучипе Юр пике пулӗҫ. Рейс 9 сехет те 6 минутра ҫула тухӗ те ӗҫе 16 сехет те 57 минутра вӗҫлӗ. Кӑнтӑрлахи апатра тӑхтав пулӗ. Салона гирляндӑсемпе, ытти япалапа капӑрлатӗҫ. «Ӑслӑ транспорт» сарӑмра ӑна «001Р» паллӑпа уйӑрса илме пулать.

Раштавӑн 29-мӗшӗнче вара хулара «Хӗл мучи» операци» акци иртӗ. Ун чухне хула ҫыннисене Ҫӗнӗ ҫулпа саламлӗҫ, парнесем – канфетсем - парӗҫ.

ШӖМ тунӑ сӑн

Паян ирхине Шӑмӑршӑран инҫех мар авари пулнӑ. Руль умӗнче ларнӑ 24 ҫулти хӗрарӑм руле итлеттереймесӗр кювета чӑмнӑ. Хӑй вӑл – Чӗмпӗртен.

Салонра ҫур ҫулти ача пулнӑ. Вӑл ятарлӑ люлькӑра выртнӑ. Ӑна пульницӑна тӗрӗслеме илсе кайнӑ. Руль умӗнче ларнӑ хӗрарӑмӑн упӑшки чиперех – аманман.

t.me/oanikolaev каналтан илнӗ сӑнӳкерчӗксем

Шупашкарти В. Ярды ячӗллӗ Олимп резервӗн 7-мӗш спорт шкулӗн воспитанникӗ Евгений Евграфов сноубайк енӗпе иртнӗ тӗнчери пӗрремӗш ӑмӑртура ҫӗнтернӗ. «Элита» категорире вӑл арҫынсем хушшинче чи маттурри пулнӑ.

Спортӑн пӑр ҫинчи тата хӗллехи енӗсен пӗтӗм тӗнчери чемпионатне Килӗштерсе ӗҫлекен Шанхайри организацисен йышне кӗрекен ҫӗршывсенчен хутшӑннӑ. Вӗсен йышӗнче Китайри, Иранти, Раҫҫейри тата Кӑркӑстанри спортсменсем пулнӑ. Ӑмӑрту Харбин хулинче иртнӗ.

Командӑсенчен Раҫҫей ушкӑнӗ ҫӗнтернӗ.

«Раҫҫей» телеканал видеовӗнчен илнӗ сӑнӳкерчӗк

Чӑваш Енре электротрактор туса кӑларма тытӑнӗҫ. Ял хуҫалӑхӗнче усӑ курмалли техникӑна потребитель патне ҫитерессипе Шупашкарти вӑй агрегачӗсен завочӗ ҫине тӑрать.

Трактора икӗ тӗрлӗ туса кӑларӗҫ: дизель двигателӗпе тата электромоторпа.

Чӑваш тракторне Чӑваш Енри машина строительствин кластерӗ шухӑшласа кӑларнӑ электродвигателе вырнаҫтарӗҫ.

Асӑннӑ трактор мӗнле пуласси ҫинчен «Раҫҫей» телеканалпа сюжет та кӑтартнӑ.